Gutpela Helpim Bilong Tanim Tok
MAN i kamapim ol tok bilong Baibel, em God Jehova, em i laik bai ol i autim gutnius bilong Kingdom bilong em “long ol manmeri bilong olgeta lain man na bilong olgeta kantri na bilong olgeta tok ples na bilong olgeta kain skin.” (KTH 14:6) Em i laik bai olgeta man inap kisim Tok bilong em, em Baibel. Bilong mekim olsem, ol i bin tanim Baibel i go long planti tok ples moa, winim olgeta narapela buk. Planti tausen man bilong tanim Baibel ol i bin wok strong tru long tanim ol tingting bilong God i go long ol narapela tok ples.
Tasol ol man bilong tanim Baibel ol i no ting ol inap mekim dispela wok tasol long Baibel. Planti taim ol man i bin mekim wok long Baibel bilong helpim ol long tanim ol narapela tok. Planti man bilong tanim tok ol i bin skelim sampela tok bilong Baibel i stap long ol narapela tok ples na nau ol i bin painim sampela gutpela hap tok ol i ken mekim wok long en taim ol i tanim tok. Baibel em gutpela samting bilong helpim ol man long tanim tok, olsem na long nau ol i mekim wok long en bilong tanim tok long rot bilong kompiuta tu.
I hatwok tru long kompiuta i tanim tok. Na sampela saveman i ting kompiuta i no inap tanim tok. Bilong wanem ol i ting olsem? Long wanem, tok ples i no olsem ol wan wan tok ol i bungim wantaim, nogat. Olgeta wan wan tok ples i gat ol kain tok bilong ol yet, na ol lo na pasin bilong mekim tok, na ol tok piksa na tok bokis, na stail bilong ol yet. Sampela man i bin wok strong long wokim wanpela program bilong kompiuta em inap mekim ol dispela samting, tasol dispela wok i no kamap gutpela. Planti tok ol kompiuta i bin tanim, ol i no klia na ol man i no inap kisimgut.
Tasol long nau ol saveman bilong kompiuta i wok long traim ol nupela rot, olsem wanpela saveman bilong kompiuta, em Franz Josef Och, i tok. Olsem: Sapos yu laik tanim tok Hindi i go long tok Inglis, orait painim sampela tok i stap long tupela tok ples wantaim. Orait nau putim long kompiuta. Nau kompiuta bai skelim tupela tok wantaim. Taim kompiuta i painim wankain tok Hindi i stap 3-pela taim samting na long dispela sentens yet long hap bilong tok Inglis em i painim wanpela tok olsem “haus,” nau kompiuta i tingting olsem dispela tok Hindi i wankain olsem dispela tok “haus.” Na ating klostu long dispela tok i gat sampela hap tok olsem “bikpela,” “liklik,” “olpela” o “nupela.” Long dispela pasin kompiuta i wokim lista bilong ol tok i stap long wanpela tok ples na pasin bilong kolim long narapela tok ples. Orait taim ol i putim planti tok olsem i go long kompiuta, i no longtaim—olsem sampela de o wik—na kompiuta inap mekim wok long ol dispela nupela tok em i bin “lainim.” Tru, ating ol lo na stail bilong sampela tok i no kamap gutpela tumas, tasol man inap ritim na save long insait bilong en na ol bikpela tok bilong en.
Sapos ol i bin putim planti tok long kompiuta na ol tok i stret na i no gat popaia long en, ol tok em i tanim bai i gutpela. Na Baibel em i nambawan samting bilong helpim dispela wok. Ol i bin tanim Baibel i go long planti tok ples, na ol man i no gat hatwok long kisim, na em i gat planti tok bilong en. Olsem na Baibel em i namba wan samting dispela saveman i makim bilong mekim wok long en taim em i skulim kompiuta long wanpela nupela tok ples.