Ol Manmeri i Kalabus Long Smok
BILL em i wanpela strongpela man i gat gutpela pasin na gutpela save. Em i laikim tru famili bilong em. Tasol taim em i yangpela yet, em i bin kirap long smok. Bihain, taim em i lapun liklik em i nolaik tru long dispela pasin. Na taim em i smok i stap, em i tokim ol pikinini man bilong em long ol i no ken smok, em i tok dispela em i longlong pasin tru. Sampela taim em i brukim karamap bilong smok long strongpela han bilong em na tromoi i go long hapsait bilong rum, na em i tok promis olsem em i kisim pinis laspela smok bilong em. Tasol bihain liklik, em i kirap smok gen—pastaim long pasin hait, bihain long ples klia.
Bill i dai long sik kensa inap 15 yia i go pinis, bihain long em i bin karim bikpela pen inap sampela mun. Sapos em i no bin smok, ating em i stap laip yet long nau. Meri bilong em bai i gat yet poroman marit, na ol pikinini man bilong em bai i gat yet papa bilong ol.
I dai bilong Bill i bagarapim tru bel bilong famili bilong em, tasol dispela samting i no painim Bill tasol. Nogat. Lain Wol Helt Oganaisesen (WHO) i tok, ol sik em smok i as bilong en i save kilim i dai inap 4 milion manmeri long olgeta yia, o wanpela man long olgeta 8-pela 8-pela sekon. Long olgeta hap, smok em i nambawan as bilong ol sik em man inap abrusim. Sapos planti man i wok yet long smok, insait long 20 yia smok bai kamap nambawan as na ol man i dai o skin bilong ol i bagarap, winim namba bilong ol man yumi bungim wantaim em ol i dai long sik AIDS, sik TB, ka i bam long rot, ol mama i dai taim ol i karim pikinini, ol man i kilim i dai skin bilong ol yet, na man i kilim i dai narapela man.
Smok i save kilim i dai ol man. Tasol ol man i save smok ol i stap long olgeta hap. Lain WHO i tok, long olgeta hap inap olsem 1.1 bilion manmeri i save smok. Em olsem wanpela bilong olgeta 3-pela 3-pela man i bikpela pinis.
Ol saveman i tok, ol kampani bilong wokim smok ol i save tromoi planti handet milion dola bilong baim kot taim ol man i putim ol long kot, tasol dispela mani i liklik samting sapos yumi skelim wantaim planti bilion dola winmani ol i save kisim. Long Yunaitet Stets, long olgeta wan wan de ol i save wokim inap 1.5 bilion smok long ol faktori. Long olgeta hap, ol kampani bilong wokim smok na ol kampani bilong smok em gavman i save bosim, ol i save salim inap 5 trilion smok long olgeta yia!
Bilong wanem planti man i save mekim yet dispela pasin em inap kilim ol i dai? Sapos yu save smok, olsem wanem yu inap lusim smok? Stori i kamap bihain long dispela bai bekim ol dispela askim.