Pas Bilong Ol Man
Man i Kilim i Dai Em Yet Long Janueri, bikpela brata bilong mi i gat 48 krismas em i kilim i dai em yet. Long de bihain long bung bilong planim em, papa bilong mi, em i no wanpela Witnes Bilong Jehova, em i painim nius Kirap! (“Man i Kilim i Dai Em Yet—Husat i Strong Moa Long Mekim?,” Me 8, 2000) long liklik bokis bilong mipela bilong kisim ol pas samting. Em i no inap mekim wanpela tok na aiwara i pulap long ai bilong em taim em i soim dispela nius long mipela. Famili bilong mi ol i mekim krai bilong amamas na tenkyu long ol dispela gutpela stori.
B. J., long Amerika
Long yia i go pinis long hap em skul bilong mipela i stap long en, 6-pela pikinini ol i bin kilim i dai ol yet. Ol man i tingting planti long dispela, olsem na skul i kirapim wanpela program bilong was long ol pikinini i laik kilim i dai ol yet. Mipela i lusim dispela nius wantaim ol manmeri long ol hap em pastaim ol i no save amamas long harim tok bilong mipela. Sampela taim ol manmeri i kisim pinis nius long han bilong mipela taim mipela i no pinisim yet tok bilong mipela!
C. C., long Amerika
Taim mi stap yangpela, tupela taim mi traim long kilim i dai mi yet bihain long taim papa bilong mi i dai. Long sampela man dispela tok “man i kilim i dai em yet” i olsem wanpela tok i tambu tru long mekim. Tenkyu tru long yupela i bin putim dispela tok long skin bilong Kirap! Ol dispela stori i tokaut klia long dispela hevi, na i kamapim stret ol tok, na i kamapim gutpela tingting tru.
M. G., long Frans
Wok Kalabus Bilong Nau Long ol stori “Wok Kalabus Bilong Nau—Klostu Em Bai Pinis!” (Mas 8, 2000) i gat dispela tok: “I no gat wanpela man i ken stap olsem Kristen tru na insait long wok bilong mekim nogut long ol narapela man na daunim ol.” Kristen i mas mekim wanem ol samting bilong em i no ken insait long dispela pasin nogut tru? Long hap bilong Wes, i hatwok long painim wanpela samting em ol i no bin wokim long kain rot nogut olsem.
K. H., long Amerika
Long dispela stori mipela i toktok long ol samting ol kampani bilong wokim ol samting na ol narapela lain ol i save mekim bilong subim ol man long wok. Dispela i no makim olsem Kristen i mas lusim bikpela hap taim bilong save long olgeta wan wan samting em i baim. Tasol taim Kristen i save long samting i kamap long rot bilong wok kalabus, em wok bilong em yet long skelim olsem em bai baim o nogat. Long dispela samting na ol narapela samting tu, Kristen i laik stap stret long ai bilong God. (1 Pita 3:16)—Edita.
Mi wanpela yangpela meri i gat 16 krismas na stori bilong yupela i kirapim tru tingting bilong mi. Mi save long sampela yangpela meri i karim hevi bilong wok kalabus long nau. Ol i save wok strong tru insait long ol famili i lukautim ol. Tasol ol dispela famili i no save putim ol long skul—o ol i no mekim pasin sori long ol. Mi amamas tru taim mi kaunim long Baibel olsem Jehova bai helpim ol man em ol narapela i daunim ol.
A. O., long Bekina Faso
Bilip Long nau mi kaunim dispela stori “Baibel i Tok Wanem? Bilip Tru—Em i Wanem Samting?” (Mas 8, 2000) Dispela stori i kamapim klia tru olsem bilip tru em i no olsem bilip nating. Planti nius i save pulap long ol toksave bilong grisim ol man long baim ol samting na ol i no gat planti stori bilong givim save o bilong strongim man. Mipela i mas pilim tru ol stori yupela i kamapim.
E. S., long Itali
Video Bilong Noa Mi laik tok tenkyu long stori “Noa—Em i Wokabaut Wantaim God—Ol i Wokim Dispela Video Olsem Wanem?” (Mas 8, 2000) Pikinini man bilong mipela em i gat 2 na hap krismas, em i kirap long lukim dispela video taim em i no lain yet long wokabaut. Em i save lukim dispela video planti planti taim, na em i laik mi mas pilaim sampela hap bilong en gen bambai em i ken lukim. Man! Em i wanpela gutpela samting tru yumi gat ol tul bilong kirapim ol pikinini bilong yumi long laikim tru Jehova!
M. V. G., long Amerika