HELPIM BILONG DAUNIM PRESA
Yumi Inap Stap Gut na No Gat Presa
Savetingting i stap long Baibel inap helpim yumi long abrusim presa. Yumi yet i no inap rausim olgeta samting i putim presa long yumi. Tasol Krieta bilong yumi inap. Em i makim wanpela man long helpim yumi. Dispela man em Jisas Krais. Long graun olgeta, klostu nau em bai mekim ol samting i winim samting em i bin mekim taim em i stap olsem man long graun. Olsem:
JISAS BAI ORAITIM OL SIKMAN, OLSEM EM I BIN MEKIM.
“Olgeta man i stap nogut na i gat kain kain sik . . . , ol i bringim ol i kam long em na em i oraitim ol.”—MATYU 4:24.
JISAS BAI GIVIM HAUS NA KAIKAI LONG OLGETA MAN.
“Ol [ol man i stap aninit long wok bos bilong Krais] bai wokim ol haus na stap long ol, na ol bai planim ol gaden wain na kaikai prut bilong ol. Ol i no inap wokim haus na narapela man i kam sindaun long en, na ol i no inap planim samting na ol narapela i kisim na kaikai.”—AISAIA 65:21, 22.
WOK BOS BILONG JISAS BAI KAMAPIM BEL ISI LONG OLGETA HAP NA OL MAN BAI STAP SEIF.
“Taim em i stap yet, ol stretpela manmeri bai kamap gut olsem gras i gro gut, na taim mun i lait yet, bel isi bai i pulap long olgeta hap. Em bai bosim ol manmeri kirap long wanpela sait bilong solwara i go long narapela sait bilong solwara na kirap long Wara Yufretis na i go long pinis bilong graun. . . . Em bai daunim ol birua bilong em.”—BUK SONG 72:7-9.
JISAS BAI PINISIM PASIN NOGUT.
“Em bai sori long ol man i no gat nem na ol rabisman, na em bai kisim bek ol man i stap rabis. . . . Em bai kisim bek ol long han bilong ol man i mekim nogut long ol na long ol man i pait na bagarapim ol.”—BUK SONG 72:13, 14.
JISAS BAI PINISIM TU PEN NA HEVI NA DAI.
“Bai i no gat dai moa, na ol bai i no bel hevi moa na krai moa, na ol bai i no inap pilim pen gen.”—REVELESEN 21:4.