Aninit Long Kingdom Bilong God “Bel Isi Bai i Pulap”

Klostu nau dispela Kingdom Bilong God em yumi wetim—wanpela gavman God i kamapim bai bosim graun olgeta—bai bringim bel isi na pasin wanbel long graun. Buk Song 72:7 i promis olsem, “bel isi bai i pulap.” Tasol wanem taim dispela Kingdom bai bosim graun? Em bai mekim olsem wanem? Na hau yu inap kisim helpim long wok bos bilong Kingdom?

WANEM TAIM KINGDOM BILONG GOD BAI KAM?

Baibel i tok profet long ol bikpela samting i olsem sain i makim Kingdom Bilong God i kam klostu pinis. Olgeta dispela samting bai i stap olsem “sain,” dispela i makim tu woa, hangre, sik, ol guria, na pasin bilong brukim lo bai i go bikpela.—Matyu 24:3, 7, 12; Luk 21:11; Revelesen 6:2-8.

Narapela tok profet i tok: “Long taim bilong las de, taim nogut bai kamap na dispela bai givim hatwok long ol man. Ol man bai laikim ol yet tasol, ol bai laikim tumas mani, . . . ol bai sakim tok bilong papamama, ol bai i no tok tenkyu, ol bai i no stap gut long narapela, ol bai i no gat pasin bilong laikim ol wanfamili, ol bai i no laik kamap wanbel, ol bai bagarapim gutnem bilong ol arapela, ol bai i no gat pasin bilong bosim bel, ol bai kamap wail olgeta, ol bai i no laikim ol gutpela pasin, . . . ol bai pulap long pasin antap, ol bai i no laikim God, nogat, ol bai laikim kain kain amamas.” (2 Timoti 3:1-4) Long bipo sampela man tasol i save mekim ol dispela pasin. Tasol long nau planti man i save mekim.

Kirap long yia 1914 ol dispela tok profet i wok long kamap tru. Ol saveman i stori long hau ol samting long graun i senis bihain long dispela yia. Saveman Peter Munch bilong Denmak, i tok: “Pait i kirap long 1914 i kamapim bikpela senis. Taim 1914 i no yet ol samting i laik kamap gutpela, . . . tasol nau em taim nogut na i gat planti hevi na pasin nogut na birua, na olgeta man i pret.”

Bihain long ol dispela hevi gutpela sindaun bai kamap, kain olsem ples i stap isi bihain long bikpela win na ren. Dispela i soim olsem klostu nau Kingdom bai bosim olgeta hap bilong graun. Jisas i stori tu long ol gutpela samting i olsem hap bilong dispela mak: “Ol bai autim dispela gutnius bilong Kingdom long olgeta hap bilong graun na bai olgeta lain man i ken harim, na bihain long dispela, pinis bai kamap.”​—Matyu 24:14.

Dispela gutnius em i bikpela tok ol Witnes Bilong Jehova i save autim. Nambawan nius bilong ol i gat het tok Wastaua i Tokaut Long Kingdom Bilong Jehova. Nau i stap long winim 338 tokples, nius Wastaua i save stori long ol gutpela samting Kingdom Bilong God bai mekim long ol man na long dispela graun.

HAU BAI KINGDOM BILONG GOD I BOSIM GRAUN?

Bekim i stap long dispela 4-pela bikpela poin:

1. Kingdom bai i no inap mekim wok bilong em long rot bilong ol lida bilong politik bilong graun.

2. Ol bikman bilong lain politik bilong graun bai traim long holim yet namba bilong ol, na sakim Kingdom Bilong God.—Buk Song 2:2-9.

3. Kingdom Bilong God bai bagarapim ol kingdom politik i laik wok yet long bosim ol man. (Daniel 2:44; Revelesen 19:17-21) Baibel i kolim dispela laspela pait bai kamap long olgeta hap, Armagedon.—Revelesen 16:14, 16.

4. Olgeta manmeri i redi long daun long Kingdom Bilong God bai abrusim Armagedon na stap long nupela taim i gat bel isi. Ol bai insait long lain em Baibel i kolim olsem “bikpela lain manmeri,” ating ol i planti milion.—Revelesen 7:9, 10, 13, 14.

HAU YU INAP KISIM HELPIM LONG WOK BOS BILONG KINGDOM?

Namba 1 rot bilong i stap aninit long Kingdom Bilong God, em yu mas kisim save. Jisas i beten long God, na i tok: “Bilong kisim laip oltaim, ol i mas kisim save long yu, yu wanpela tasol yu God tru, na ol i mas kisim save long man yu bin salim i kam, em Jisas Krais.”—Jon 17:3.

Taim ol man i save long Jehova God olsem wanpela Man, dispela bai helpim ol long planti rot. Skelim tupela rot: Fes, ol i mas kisim strongpela bilip long em. Ol evidens i as bilong dispela bilip i strongim ol long bilip olsem Kingdom Bilong God em wanpela gavman tru na klostu em bai mekim wok bos. (Hibru 11:1) Namba 2, pasin bilong ol long laikim God na ol neiba i go bikpela. Pasin bilong laikim God i kirapim ol long redi long bihainim tok bilong em long bel olgeta. Pasin bilong laikim ol neiba i kirapim ol long bihainim tok bilong Jisas, planti taim ol i kolim olsem Gutpela Lo Tru. Em i tok: “Ol pasin yupela i laik bai ol man i mekim long yupela, yupela i mas mekim wankain pasin long ol.”—Luk 6:31.

Olsem wanpela papa i gat pasin laikim, Krieta bilong yumi i laik bai yumi stap amamas. Em i laik bai yumi ekspiriensim laip em Baibel i kolim olsem “laip tru.” (1 Timoti 6:19) Laip bilong nau i no “laip tru.” Planti milion man i hatwok tru na ol i mas taitim bun long i stap laip. Bilong helpim yu long save long “laip tru,” skelim sampela gutpela samting Kingdom Bilong God bai mekim long ol man i stap aninit long en.