Wai i No Gat Moa Pasin Bilong Rispek Long Laip?

RISEN NA YUMI RISPEKTIM LAIP

Ol pasin na wok yumi mekim we i no soim rispek long laip inap bagarapim helt na seifti bilong yumi yet na bilong ol narapela.

Pasin bilong smok i save kamapim sik kensa, na tu, i mekim na bodi i no gat strong long sakim dispela sik. Klostu 90 pesen bilong ol man i dai long lang kensa em ol yet i save smok o ol i save stap wantaim ol man i save smok.
Long olgeta yia pasin bilong sutim na kilim i dai wanpela lain olgeta i save givim bikpela bel hevi long planti man. Wanpela ripot long Standford University long Amerika i tok: “Wok painimaut i soim olsem maski ol man husat i abrusim skul sut-aut na ol i no kisim bagarap long bodi, memori bilong dispela samting nogut inap givim hevi long ol inap planti yia.”
Ol man i spak o kisim drak taim ol i draiv, ol i mekim na ol narapela draiva na ol man i wokabaut long rot i no pilim seif. Taim ol man i soim olsem ol i no tingim laip i bikpela samting, planti taim ol man i no gat asua i save kisim bagarap.

SAMTING YU KEN MEKIM

Lukautim gut helt bilong yu. Em gutpela long kirap kwik long lusim ol pasin i save bagarapim bodi olsem smok, dring planti tumas, o kisim drak. Ol dispela pasin inap bagarapim laip bilong yu na i soim olsem yu no rispektim laip bilong lain i stap klostu long yu na famili bilong yu.

“Yumi mas rausim olgeta pasin doti bilong skin.”—2 Korin 7:1.

Tingim gut seifti bilong yu na bilong ol narapela. Bilong stopim bagarap we inap kamap, stretim gut ol samting long haus i bagarap na haus i stap gut. Yu mas draiv gut, na lukautim gut ol samting long kar i stap gut. No ken larim ol narapela i subim yu long insait long ol samting we inap kamapim bagarap o dai.

“Taim yupela i wokim nupela haus, yupela i mas wokim tu liklik banis long arere bilong rup, na bai yupela na famili bilong yupela i no gat asua long blut taim wanpela man long rup i pundaun i go daun na i dai.”—Lo 22:8.a

Mekim pasin helpim long ol narapela. Pasin bilong rispektim laip i makim tu tingting yumi gat long ol man bilong kain kain skin, kantri, na bekgraun. Em tru, pasin bilong luk daun na heitim ol man bilong narapela lain na bekgraun em nambawan as bilong pasin bilong pait na bagarapim man na ol woa.

“Yupela i mas rausim olgeta pasin bilong bel nogut na kros na belhat na bikmaus na tok nogut, na olgeta kain pasin nogut. Tasol mekim pasin helpim long narapela narapela.”—Efesus 4:31, 32.

WOK MIPELA I MEKIM

Ol Witnes Bilong Jehova i save skulim ol narapela long lukautim gut laip na helt bilong ol. Wok mipela i mekim long skulim ol man long Baibel i helpim ol long lusim ol pasin we inap bagarapim laip bilong ol, olsem drak, dring spak na smok samting.

Mipela i save bihainim ol seifti lo long ol konstraksen projek bilong mipela. Ol volantia husat i helpim long wokim ol haus bilong mekim ol miting na ol narapela ples mipela i yusim long skulim ol man long Baibel, ol i save kisim seifti trening long lukautim ol yet na eksiden i no ken kamap. Olgeta taim mipela i sekim na stretim gut ol bilding bilong mipela na bai ol i stap gut na i stret long seifti lo bilong gavman.

Mipela i save helpim ol man i bungim hevi bilong disasta. Insait long 12-pela mun i go pinis, mipela i helpim ol manmeri husat i karim hevi long 200 disasta i bin kamap long olgeta hap bilong graun na i bagarapim laip bilong ol. Na mipela i tromoi winim 46 milion kina bilong baim ol samting bilong helpim ol man i kisim bagarap.

Taim sik Ebola i kirap bagarapim planti man long Wes Afrika (2014) na long Ripablik Bilong Kongo (2018), mipela i skulim gut ol man long hau ol inap pasim dispela sik bilong kilim man na i no ken i go bikpela. Mipela i salim ol mausman bilong mipela i go lukim ol wan wan grup na toktok wantaim ol long dispela topik “Pasin Bilong Bihainim Tok i Seivim Laip.” Mipela i putim ples bilong wasim han long fran bilong ol wan wan ples bilong lotu na mipela i strongim olgeta olsem em i bikpela samting long wasim han, na stori tu long ol narapela samting ol i ken mekim na bai sik i no ken i go bikpela.

Long Siera Leon, wanpela toksave i kamap long redio i tok tenkyu long ol Witnes Bilong Jehova long helpim ol Witnes na ol man i no Witnes long mekim ol samting na bai vairas bilong sik Ebola i no ken i go bikpela.

Ol Witnes Bilong Jehova i sanap long lain bilong wasim han paslain long go insait long Haus Kingdom. — Ples bilong wasim han long Haus Kingdom long taim bilong bikpela sik Ebola long 2014, long Liberia

a Long Midel Is bilong bipo, dispela gutpela lo i kamapim klia olsem ol i tingim gut seifti bilong famili na bilong ol narapela.