HEVI BILONG PRAIS I GO ANTAP

Hop Long Gutpela Samting Bai Kamap

Ating prais bilong ol samting long kantri i wok long go antap na pe yu kisim em i no inap? Yu tingting planti long hau bai yu lukautim yu yet na famili bilong yu long ol samting yupela i nidim? Ating yu pilim olsem i no gat wanpela gutpela samting bai kamap? Maski long kain taim olsem, pasin bilong bilip na wet long ol gutpela samting bai kamap, dispela inap helpim tru yumi.

WAI EM I BIKPELA SAMTING

Ol man husat i hop long ol gutpela samting bai kamap dispela em i no samting ol i tingting tasol long en. Samting ol i hop long en i kirapim ol long painim rot long mekim samting bilong stretim gut sindaun bilong ol. Eksampel, ol ripot i soim olsem ol man husat i hop long ol gutpela samting bai kamap bihain . . .

ol i save sanap strong na stap gut long taim bilong hevi
ol i redi long mekim senis long sindaun bilong ol sapos i gat nid long mekim olsem
ol i mekim ol gutpela disisen long ol samting ol bai mekim long laip bilong ol, na tu, ol pasin we ol i bihainim i lukautim helt bilong ol na ol i stap gut

SAMTING YU KEN MEKIM

Namba 1, skelim hau Baibel inap helpim yu long nau. Baibel i gat ol gutpela edvais bilong helpim yu long karim hevi bilong prais i go antap. Ol dispela edvais, na ol narapela samting em yu inap mekim, bai helpim yu long bosim gut ol samting long laip bilong yu na redim yu long karim ol narapela hevi bai kamap bihain.

“Gutpela tingting bai protektim yu; pasin bilong kliagut long ol samting bai stiaim yu.”—Provep 2:11, New Century Version.

Namba 2, skelim tok bilong Baibel long ol samting bai kamap bihain. Taim yu luksave long ol gutpela savetingting bilong Baibel, dispela bai kirapim yu na yu laik save moa long ol tok Baibel i mekim long ol samting bai kamap bihain. Eksampel, yu bai kisim save olsem God i laik bai yu kisim “gutpela sindaun” long bihain, em samting yu ken “bilip na wet long en,” na i no dispela tasol, Em i kamapim klia tu gutpela risen na yu inap wetim gutpela samting bai kamap. (Jeremaia 29:11) Dispela risen em Kingdom Bilong God.

KINGDOM BILONG GOD EM WANEM SAMTING, NA EM BAI MEKIM WANEM SAMTING?

Kingdom Bilong God em wanpela gavman we bai bosim graun olgeta. (Daniel 2:44; Matyu 6:10) Em bai stap long heven na bosim graun, em bai pinisim pen na hevi, pasin bilong stap rabis, na olgeta man bai stap bel isi na ol bai i gat olgeta samting ol i nidim bilong mekim ol i stap amamas, olsem ol dispela skripsa i kamapim.

“Ol samting yu mekim bai kamap gut na yu bai amamas.”—Buk Song 128:2.

“Ol [manmeri i stap ananit long Kingdom] bai no inap wok hat nating.”—Aisaia 65:23.

“Bai i gat planti wit samting long graun.”—Buk Song 72:16.

Planti milion manmeri i bilip long ol dispela tok promis, ol i save olsem God “i no inap giaman.” (Taitus 1:2) So yu ting yu yet i ken ritim Baibel bilong painimaut? Samting yumi bilip na wet long en inap strongim yumi long karim hevi bilong mani na ol prais i go antap, na yumi ken bilip tru olsem gutpela samting bai kamap.