Redi Long Givim

WAI EM I BIKPELA SAMTING

Pasin bilong givim—maski em liklik samting tasol—dispela inap mekim yu belgut na amamas long yu yet. Tru tumas, sampela dokta i tok olsem pasin bilong givim em i gutpela samting bilong helpim helt na tingting bilong yumi. Eksampel, em inap daunim pasin bilong tingting planti, presa, blut presa, na ol pen long bodi. Na ating, yu inap slip gut.

Taim yumi givim samting, ating em mani o narapela samting, long ol man husat i nidim helpim, em bai isi long yumi tu i redi long kisim helpim sapos yumi nidim helpim. Howard, husat i stap long Inglan, i tok: “Taim mi na meri bilong mi i painim ol rot bilong mekim moa yet pasin bilong givim na helpim ol narapela, mipela i no pilim nogut taim mipela i nidim helpim na ol i givim.” Em tru, ol man husat i gat pasin bilong givim, ol i no givim samting bikos ol i ekspektim ol narapela long bekim, nogat. Tasol ating ol i bungim ol gutpela pren husat i redi long helpim ol long taim ol i nidim helpim.

SAMTING YU KEN MEKIM

Serim samting yu gat. Sapos yu gat liklik samting tasol, ating yu inap long serim, maski em simpol kaikai tasol. Duncan na famili bilong em i stap long Yuganda, ol i no gat planti samting tasol ol i gat pasin bilong redi long givim samting long ol narapela. Duncan i tok: “Long ol Sande, mi na meri bilong mi i save invaitim wanpela i kam long haus na kaikai wantaim mipela. Mipela i amamas long spendim taim wantaim ol.”

Tasol em tru, taim yu laik givim samting long ol narapela yu mas bihainim stretpela tingting. Nogut yu givim hevi long famili bilong yu na ol i sot long samting ol i nidim.—Jop 17:5.

Traim dispela: Givim liklik kaikai o dring long wanpela. Sapos yu gat kaikai samting em yu no nidim moa, yu ting yu ken givim long ol pren na ol narapela husat i nidim?

Ol narapela rot bilong givim. Sampela gutpela presen tru em yu no inap baim long mani. Olsem, yumi ken givim taim bilong yumi na tingim ol narapela long rot bilong mekim samting bilong helpim ol. Ol gutpela tok yu mekim long narapela dispela tu em wanpela gutpela presen! So tokim ol narapela olsem yu amamas na laikim tru ol.

Traim dispela: Helpim ol narapela long ol samting ol i nid long mekim long haus, olsem stretim haus, o mekim ol narapela wok bilong ol. Raitim ol gutpela tok long wanpela kat o salim teks mesis long wanpela pren, maski em sotpela mesis tasol bilong tokim ol olsem yu tingim ol.

Taim yu painim ol rot bilong mekim dispela gutpela pasin bilong givim, rot i op long yu inap kisim bikpela amamas tru.