Stretim Ol Kros i Kamap Long Wok Bisnis

Long 1 Korin 6:​1-8 (NW), aposel Pol i toktok long ol wanbilip i kotim narapela narapela. Em i bel hevi long sampela Kristen long Korin “i no pret long kotim [narapela] long ai bilong ol man i no bilip.” (Ves 1) Pol i kamapim ol as na ol Kristen i no ken bringim ol arapela Kristen i go long kot. Mobeta ol i stretim kros bilong ol long pasin i stret wantaim ol lo bilong kongrigesen. Yumi ken skelim sampela as na Pol i givim dispela tok, na tu, yumi ken skelim sampela samting em dispela tok bilong Pol i no karamapim.

Sapos yumi gat sampela kros long sait bilong wok bisnis wantaim wanpela wanbilip, pastaim yumi laik stretim hevi long rot Jehova i makim, na i no long rot bilong yumi yet. (Sindaun 14:12) Olsem Jisas i soim, i gutpela moa long stretim kros hariap, nogut kros i go bikpela tru. (Matyu 5:​23-26) Tasol sori tru, sampela Kristen i kisim pasin bilong tok pait, na ol i karim kros bilong ol i go long kot. Pol i tok: “Yupela i lus tru, long wanem, yupela i wok long kotim ol brata bilong yupela.” Bilong wanem i olsem? Nambawan as bilong dispela em olsem, kain pasin olsem inap bagarapim gutnem bilong kongrigesen na gutnem bilong God em yumi save lotuim. Olsem na yumi laik bihainim tok bilong Pol, olsem: “Mobeta yupela i larim narapela i rongim yupela.”​—Ves 7.

Pol i tok tu olsem God i bin givim gutpela samting bilong helpim kongrigesen long stretim ol kain kain tok kros. Ol elda em ol man Kristen em save bilong ol long ol tok i tru bilong Baibel i givim savetingting long ol, na Pol i tok ol “inap skelim hevi i stap namel long ol brata” long “ol samting bilong i stap bilong yumi long nau.” (Ves 3-5) Jisas i soim olsem ol tok kros long ol bikpela rong​—olsem wanpela i bagarapim gutnem bilong narapela, giaman na paulim mani​—ol i mas stretim long rot bilong bihainim dispela tripela samting: namba wan, ol brata i insait long dispela hevi, ol i mas traim long stretim hevi namel long ol yet; namba tu, sapos dispela i no wok, kisim wanpela o tupela narapela husat i save long dispela hevi; na namba tri, sapos dispela i no wok, orait tokim ol elda bilong kongrigesen long dispela hevi.​—Matyu 18:​15-17.

Ating ol elda Kristen ol i no loya o bisnisman, na i no gat wok long ol i traim long stap ol kain man olsem. Ol i no save makim ol samting ol brata i mas mekim bilong stretim kros i kamap long wok bisnis bilong ol. Nogat. Ol i traim long helpim ol brata long bihainim tok bilong Baibel na painim rot bilong stretim kros long pasin em olgeta i amamas long en. Sapos i hatwok long stretim hevi, ating ol i ken askim wasman sekit o brens ofis bilong ol Witnes Bilong Jehova long helpim ol. Tasol i gat sampela samting em tok bilong Pol i no karamapim. Wanem sampela hevi olsem?

Ating sampela taim ol man i go long kot, long wanem, samting ol i laik mekim em samting kot i mas stretim na bai ol samting i ken wok gut. Olsem, ating kot tasol em rot bilong katim marit, o long makim husat bai kisim pikinini, o long makim meintenens mani bilong pikinini, o long kisim kompensesen long insurens, o long kisim hap mani taim bisnis i bagarap, o long strongim pepa i makim husat bai kisim mani kago bilong man i dai. Ating wanpela i kotim brata, na brata i pilim olsem em tu i mas bringim dispela man i go long kot bilong lukautim em yet.a

Taim ol Kristen i kot long ol kain samting olsem na ol i no kros na tok pait, ating ol i no sakim tok em holi spirit i bin kirapim Pol long raitim.b Tasol nambawan bikpela samting long ol Kristen em wok bilong mekim holi nem bilong Jehova na kamapim bel isi na pasin wanbel insait long kongrigesen. Pasin laikim em mak bilong ol disaipel bilong Krais, na “man i gat pasin laikim . . . em i no save tingim em yet.”​—1 Korin 13:​4, 5, NW; Jon 13:​34, 35.