Taim Man i Mekim Rong Long Yu, Yu Mekim Wanem?
Faipela elefan simen i lain long bet—yu no was gut na namba 3 i pundaun na bruk. Yu mas stretim na putim bek na bai lain elefan i no ken bruk. Tasol i hatwok na ating yu no inap stretim gut. Yu mas tokim wanpela man long helpim yu, em i gat save long mekim dispela wok.
TASOL wok bilong helpim ol brata sista bilong spirit bai lain bilong ol i no ken bruk, em i bikpela wok, winim wok bilong helpim ol elefan simen bai lain bilong ol i no ken bruk. Man bilong raitim Song i tok stret olsem: “Sapos ol manmeri bilong God i sindaun gut wantaim na i stap wanbel olsem ol brata tru, em i gutpela tumas, na ol i ken i stap belgut.” (Song 133:1) Taim hevi i kamap namel long yu na wanpela brata o sista Kristen, sampela taim i hatwok long stretim. Sampela ol i no bihainim stretpela pasin bilong mekim. Planti taim samting ol i mekim em i givim pen long narapela o i no stretim gut hevi, na mak nogut bilong en i stap.
Sampela Kristen i kirap kwik na tokim ol elda long hevi, tasol ol yet inap stretim. Ating ol i no save gut long rot bilong stretim na ol i go long ol elda. Wanpela brata i gat save pinis long givim gutpela tingting bilong Baibel long ol narapela, em i tok: “Planti brata i no save long rot bilong bihainim tok bilong Baibel na stretim hevi.” Na em i tok: “Planti taim ol i no bihainim pasin Jisas i makim.” Orait, Jisas i tok wanem long rot bilong stretim hevi i kamap namel long tupela Kristen? Bilong wanem i bikpela samting yumi mas save long dispela tok na lain long bihainim?
Ol Liklik Hevi
“Sapos yu bringim ofa bilong yu i kam long alta, na yu tingim brata bilong yu em i gat tok long yu, orait yu mas lusim ofa bilong yu i stap klostu long alta. Na yu go pastaim na stretim tok wantaim brata bilong yu. Stretim pinis, orait nau yu ken i go na givim ofa bilong yu long God.”—Matyu 5:23, 24.
Taim Jisas i mekim dispela tok, ol Juda i save bringim ol ofa i go long alta long haus lotu long Jerusalem. Sapos wanpela Juda i bin mekim rong long narapela Juda, em i ken mekim ofa ol i kukim olgeta long paia o mekim ofa bilong tekewe sin. Tasol Jisas i kolim bikpela samting: Taim man i laik mekim ofa na em i tingim brata bilong em i gat tok long em, em i mas stretim dispela hevi pastaim. Em i mas save, wok bilong stretim hevi na stap wanbel wantaim brata em i bikpela samting, winim dispela wok bilong lotu.
Taim ol Israel i aninit yet long Lo Bilong Moses, ol i mas mekim ol ofa, tasol God i no tingim ofa yet i bikpela samting. Taim King Sol i mekim rong, profet Samuel i tokim em: “Bikpela i laikim wanem pasin? Ating em i laikim olkain ofa tasol, a? O ating em i laikim yumi bihainim tok bilong en? Harim. Pasin bilong bihainim tok bilong en, em i namba wan pasin tru. Na pasin bilong ofaim ol gutpela abus long em, em i namba 2 tasol.”—1 Samuel 15:22.
Long maunten, Jisas i kolim gen pasin i namba wan; em i tokim ol disaipel ol i mas stretim hevi i kamap namel long ol pastaim, na bihain ol i ken mekim ofa. Long nau ol Kristen i mekim ol ofa bilong spirit—ol i “mas givim biknem long God,” na maus bilong ol i “mas litimapim nem bilong en.” (Hibru 13:15) Tasol lo bilong mekim ofa i wankain. Aposel Jon tu i kamapim klia dispela samting. Em i tok, sapos man i tok em i laikim tru God, tasol em i bel nogut long brata, em i lotu nating long God.—1 Jon 4:20, 21.
Jisas i tok, man i tingim brata i gat tok long em, em yet i mas kirap long stretim. Sapos em i mekim pasin daun olsem, gutpela samting bai kamap. Sapos em i go tokim brata, em tu i save mekim rong, dispela bai kirapim brata long wok gut wantaim em long stretim hevi. Lo Bilong Moses i tok, ol samting man i kisim long pasin bilong stil, em i mas bekim olgeta na hap moa tu. Sapos em i bin kisim 5-pela samting, em i mas bekim 6-pela. (Wok Pris 6:5) Man i mekim rong, sapos em i givim bel olgeta long stretim na em i redi long mekim hap wok moa tu, dispela bai helpim em gut long kamap wanbel gen wantaim brata em i bin rongim.
Tasol sampela taim yu wok long stretim hevi, tasol wok bilong yu i no kamap gutpela. Hap bilong Sindaun long Baibel i tok, i hatwok long stretim hevi wantaim man i pasim pinis bel. Sindaun 18:19 i tok: “Sapos yu mekim brata bilong yu i bel nogut long yu, orait em bai i pasim tingting bilong en na i no laikim yu, olsem ol manmeri i pasim dua bilong banis bilong taun na ol arapela man i no inap i go insait.” Tasol sapos yu laik tru long stretim hevi na yu mekim pasin daun, na yutupela wantaim i Kristen na i laik mekim pasin God i laikim, orait bai yutupela inap stretim hevi. Tasol sapos wanpela i tok Kristen i mekim bikpela rong, yumi gat wok long bihainim tok bilong Jisas long Matyu sapta 18.
Bilong Stretim Ol Bikpela Hevi
“Sapos brata bilong yu em i mekim rong long yu, orait yu go lukim em, na taim yutupela tasol i stap, yu mas traim stretim tok wantaim em. Sapos em i harim tok bilong yu, orait bai yu kisim bek brata bilong yu. Na sapos em i no harim tok bilong yu, orait yu mas kisim wanpela o tupela man moa i go wantaim yu. Olsem na bai i gat tupela o tripela man bilong strongim tok. Tasol sapos em i no laik harim tok bilong ol, orait yu mas tokim ol manmeri bilong sios. Na sapos em i no laik harim tok bilong ol tu, orait yu mas lukim em i olsem wanpela haiden na olsem man bilong kisim takis.”—Matyu 18:15-17.
Olsem wanem sapos bikpela hevi i kamap namel long wanpela Juda (o nau, wanpela Kristen) na narapela man i lotuim Jehova? Man i gat tok long brata em i mas kirap long mekim samting. Em i mas i go lukim brata na toktok wantaim em taim tupela tasol i stap. Sapos em i no kisim sampela bilong helpim em, na i no gat as tru bilong hevi, bai tupela inap stretim kwik. Sapos ol man insait long hevi, ol tasol i save long en, bai i no hatwok long stretim.
Tasol sapos dispela namba wan samting i no stretim hevi, Jisas i tok: “Kisim wanpela o tupela man moa i go wantaim yu.” Ating ol dispela man i save long dispela rong. Ating ol i bin harim wanpela i krungutim gutpela nem bilong narapela. O ol i bin lukim tupela i wokim kontrak nau tupela i kros long en, na ol i bin sainim nem bilong ol olsem witnes bilong kontrak. O ol i kamap witnes long taim ol i lukim rait o harim tok i kamapim as bilong hevi. Gutpela sapos liklik lain tasol i save long hevi, olsem “wanpela o tupela tasol.” Long dispela rot, sapos i no gat as tru bilong hevi, bai i no ken kamap bikpela.
Sapos brata i mekim rong long yu, yu mas i gat wanem laik? Yu laik semim em, na daunim em tru? Tok bilong Jisas i makim olsem ol Kristen i no ken kirap kwik na skelim pasin bilong brata na tok em i man nogut. Sapos em i pilim rong bilong em, na tok sori, na wok long stretim, orait bai yu “kisim bek brata bilong yu.”—Matyu 18:15.
Sapos yutupela i no inap stretim hevi, orait yu mas tokim kongrigesen. Pastaim dispela tok i makim ol hetman bilong Israel; bihain em i makim ol elda long kongrigesen Kristen. Brata i mekim rong, sapos em i no tanim bel, ating ol i mas rausim em long kongrigesen. Na ol i mas “lukim em i olsem wanpela haiden na olsem man bilong kisim takis.” Ol Juda i save klia long kain man olsem. Kristen yet i no ken rausim man. Ol elda, olsem ol mausman bilong kongrigesen, ol tasol i gat namba long mekim olsem.—Lukim 1 Korin 5:13.
Matyu 18:15-17 i tok long rausim man i no tanim bel, olsem na yumi save ol dispela ves i no stori long liklik rong. Jisas i tok long bikpela rong, tasol em i kain rong tupela yet inap stretim. Olsem: Ating wanpela i toknogutim narapela na bagarapim tru nem bilong em. O ating hevi i kamap long samting bilong mani, long wanem, bihain Jisas i stori long wokboi, em king i bin lusim bikpela dinau bilong em, tasol em i no sori long wanwok. (Matyu 18:23-35) Sapos brata i dinau na em i no inap bekim long taim tupela i makim pinis, ating dispela em i liklik hevi na tupela yet inap stretim. Tasol sapos em i no laik bekim, i olsem em i stil, na em bikpela rong.
I gat sampela rong i no inap tupela Kristen yet i stretim. Lo Bilong Moses i tok, sapos ol i save wanpela man i mekim bikpela sin ol i mas tokaut long dispela. (Wok Pris 5:1; Sindaun 29:24) Olsem tasol yumi mas tokaut long ol elda Kristen sapos yumi save long bikpela rong em inap mekim na bai kongrigesen i no stap klin moa.
Tasol planti taim, hevi i kamap namel long tupela Kristen em i no bikpela inap long ol i mas bihainim dispela pasin.
Inap Yu Lusim Tingting?
Jisas i stori pinis long pasin bilong stretim bikpela rong, na bihain em i lainim ol disaipel long narapela bikpela samting. Baibel i tok: “Pita i kam long Jisas na i askim em olsem, ‘Bikpela, hamas taim brata bilong mi i ken mekim rong long mi, na mi mas lusim rong bilong en? Ating inap long 7-pela taim?’ Na Jisas i tokim em olsem, ‘Mi no tok long yu mas lusim rong bilong en inap 7-pela taim tasol. Nogat. Mi tok, yu mas lusim inap 70 taims 7-pela taim.’ ” (Matyu 18:21, 22) Long narapela taim, Jisas i tokim ol disaipel, ol i mas lusim rong bilong brata inap “7-pela taim long wanpela de.” (Luk 17:3, 4) Olsem na yumi save, bilong stretim hevi, ol disaipel bilong Krais i mas lusim rong bilong brata.
Ol i mas wok strong bambai ol inap mekim olsem. Brata em yumi kolim tok bilong em long pastaim, em i tok: “Planti brata i no save long pasin bilong lusim rong.” Na em i tok: “Taim yu tokim ol, em bikpela samting ol i mas helpim kongrigesen long i stap wanbel, olsem na ol i mas lusim rong bilong brata, ol i kirap nogut.”
Aposel Pol i tok: “Sapos wanpela man namel long yupela em i gat tok long narapela brata i bin mekim rong long em, orait em i mas karim dispela hevi na lusim sin bilong dispela brata. Bikpela em i lusim pinis sin bilong yupela, na olsem tasol yupela tu i mas lusim sin bilong ol arapela.” (Kolosi 3:13) Olsem na sapos brata i mekim rong long yu, taim yu no toktok yet wantaim em, gutpela sapos yu askim yu yet, olsem: Em bikpela samting na mi mas toktok wantaim em o nogat? Mi inap lusim rong bilong em, olsem ol Kristen i mas mekim, o nogat? Sapos mi bin mekim rong long em, mi laik bai em i lusim rong bilong mi, a? Sapos mi no laik lusim rong bilong em, mi ken ting God bai lusim rong bilong mi taim mi beten askim em long mekim? (Matyu 6:12, 14, 15) Ol kain askim olsem bai helpim yu long lusim rong bilong brata.
Yumi Kristen na wanpela bikpela wok bilong yumi em bilong kamapim pasin wanbel insait long kongrigesen. Olsem na yumi mas bihainim tok bilong Jisas. Dispela bai helpim yumi long karim hevi na lusim rong bilong ol narapela. Dispela kain pasin bai helpim yumi long laikim tru ol brata, em wanpela mak bilong ol disaipel tru bilong Krais.—Jon 13:34, 35.
[Piksa long pes 23]
Sapos ol Kristen i bihainim tok bilong Jisas bai ol inap stretim hevi i kamap namel long ol