Lusim Tru Rong Ol Narapela i Mekim Long Yu

“Olsem tasol Papa bilong mi i stap long heven, em bai i mekim wankain pasin tasol long yupela sapos yupela i no lusim tru ol rong ol brata i mekim long yupela.”​—⁠MATYU 18:⁠35.

1, 2. (a) Wanpela meri em ol man i save em i wanpela sinmeri, em i mekim wanem na em i kamapim olsem em i amamas long Jisas? (b) Long tok Jisas i mekim long dispela, em i kamapim strong wanem samting?

EM I wanpela pamukmeri, na yumi no ting bai yumi painim kain meri olsem long haus bilong wanpela man bilong lotu. Ating sampela i kirap nogut taim ol i lukim em i stap long dispela haus, tasol yumi ken ting ol i kirap nogut moa yet long samting em i mekim. Em i go klostu long wanpela man em pasin bilong em i stret olgeta, na em i krai i stap na aiwara bilong em i pundaun long lek bilong dispela man na meri hia i mekim drai long gras bilong em yet. Long dispela pasin em i kamapim bel bilong em olsem em i amamas long ol wok dispela man i mekim.

² Dispela man, Jisas, em i no tingim dispela meri olsem samting nogut, maski ol man bilong dispela taun ol i save em i wanpela sinmeri. Tasol papa bilong haus, em wanpela Farisi nem bilong em Saimon, em i tingting planti olsem meri hia em i wanpela sinmeri. Em nau, Jisas i kirap na mekim tok piksa long tupela man i gat dinau long wanpela man. Wanpela i gat bikpela dinau tru​—⁠inap olsem pe wanpela wokman bai kisim long tupela yia. Narapela i gat liklik dinau tasol, inap olsem pe bilong 3-pela mun samting. Orait tupela wantaim i no inap bekim dinau, olsem na man bilong givim dinau long ol em i “lusim dinau bilong tupela.” Yumi save, man i gat bikpela dinau tru, i gat as na em i mas mekim pasin olsem em i laikim tru dispela man i bin lusim dinau bilong em. Orait, bilong kamapim as bilong dispela tok piksa, Jisas i stori long gutpela pasin dispela meri i bin mekim, na nau em i kamapim wanpela lo olsem: “Man i mekim liklik sin tasol na God i lusim sin bilong en, orait laik bilong en bai i liklik tasol.” Orait nau em i tokim dispela meri: “Mi lusim pinis ol sin bilong yu.”​—⁠Luk 7:​36-​48.

3. Yumi mas skelim wanem samting bilong yumi yet?

³ Orait askim skin bilong yu, ‘Sapos mi dispela meri, o mi bin mekim wankain pasin olsem em na wanpela man i mekim pasin marimari olsem long mi, bai mi pasim bel bilong mi na mi no lusim rong ol narapela i mekim long mi?’ Ating bai yu bekim olsem, ‘Nogat tru!’ Tasol olsem wanem? Yu bilip tru olsem yu gat pasin bilong lusim rong bilong narapela? Dispela em i pasin tru bilong yu? Yu bin mekim planti taim? Ol narapela bai tok yu man bilong lusim rong bilong ol narapela? Orait nau yumi ken stori long as na yumi olgeta wan wan i mas skelim gut tingting bilong yumi yet long dispela samting.

God i Save Lusim Sin Bilong Yumi

4. Yumi mas tokaut olsem yumi gat wanem samting i stap long skin bilong yumi?

⁴ Sin i stap long skin bilong yu na yu save pinis long dispela samting. Sapos wanpela man i askim yu olsem yu gat sin o nogat, bai yu tok yes, na ating bai yu tingim tok i stap long 1 Jon 1:8: “Sapos yumi tok, ‘Mi no gat sin,’ orait yumi giamanim bel bilong yumi yet, na tok tru i no i stap long bel bilong yumi.” (Rom 3:​23, NW; 5:⁠12) Long sampela man, sin i stap long skin bilong ol em i save kamap ples klia taim ol i mekim sampela bikpela rong tru. Tasol maski yu no gat asua long mekim ol bikpela rong olsem, long planti taim na long kain kain pasin yu bin abrusim mak bilong ol lo God i bin putim​—⁠olsem yu bin mekim sin. Dispela tok i stret tru, a?

5. Yumi mas tenkyu long God long wanem samting?

⁵ Olsem na ating samting i bin painim yu i wankain olsem aposel Pol i tok: “Bipo yupela i save mekim ol kain kain rong, na yupela i bihainim pasin bilong olpela bel, na dispela i kilim yupela i dai. Tasol God i mekim yupela i kisim laip wantaim Krais, na God i bin lusim olgeta rong bilong yumi.” (Kolosi 2:​13; Efesus 2:​1-3) Tingim gut dispela tok, “lusim olgeta rong bilong yumi.” Em planti rong tru, a? Olsem na i gat as na yumi olgeta wan wan i mas krai long Jehova olsem Devit i bin mekim: “God, bihainim promis bilong yu, na tekewe planti sin mi bin mekim.”​—⁠Song 25:⁠11.

6. Taim yumi tingim Jehova na pasin bilong lusim rong, yumi inap bilip tru long wanem samting?

⁶ Olsem wanem na God i save lusim rong bilong yu​—⁠o bilong yumi olgeta wan wan? Wanpela as bilong en i olsem, God Jehova i gat laik long lusim rong bilong man. Dispela em i pasin bilong em. (Kisim Bek 34:​6, 7; Song 86:⁠5) Tasol God i laik bai yumi go long em long rot bilong beten na askim em long lusim ol rong bilong yumi. (2 Stori 6:​21; Song 103:​3, 10, 14) Na em i bin stretim rot na bai i gat as long lo bilong em long lusim rong bilong yumi​—⁠dispela rot em ofa bilong Jisas bilong baim bek ol man.​—⁠Rom 3:​24; 1 Pita 1:​18, 19; 1 Jon 4:​9, 14.

7. Yu mas i gat laik long bihainim wanem pasin bilong Jehova?

⁷ Pasin bilong God long amamas long lusim rong bilong ol man, dispela i mas skulim yu long pasin yu mas mekim long ol narapela man. Pol i tingim dispela samting na em i tok: “Yupela i mas mekim gutpela pasin long ol arapela Kristen na givim bel bilong yupela long ol. Yupela i mas lusim sin bilong ol, olsem God i lusim sin bilong yupela long nem bilong Krais.” (Efesus 4:​32) Yumi save, dispela tok bilong Pol i makim olsem yumi mas larim dispela pasin bilong God i skulim yumi, long wanem, long narapela ves Pol i tok moa olsem: “God i save laikim yupela tru, na yupela i stap pikinini bilong em. Olsem na yupela i mas bihainim ol pasin em yet i save mekim.” (Efesus 5:⁠1) Yu pilim gut ol dispela tok bilong Pol? God Jehova i bin lusim ol rong bilong yu, olsem na yu mas bihainim pasin bilong em na ‘mekim gutpela pasin long ol arapela Kristen na givim bel long ol na lusim sin bilong ol.’ Tasol yu mas askim skin bilong yu: ‘Mi save mekim olsem? Sapos dispela i no pasin tru bilong mi, mi wok strong long kisim dispela pasin? Mi wok strong long bihainim pasin bilong God long lusim rong bilong ol man?’

Wok Strong Long Kisim Dispela Pasin

8. Yumi mas save olsem wanem long kongrigesen bilong yumi?

⁸ Em bai gutpela tru sapos yumi ken ting, long kongrigesen Kristen yumi no gat wok long bihainim pasin bilong God long lusim rong bilong ol man. Tasol sori tru, yumi gat wok long mekim olsem. Tru, ol brata sista Kristen bilong yumi ol i save wok strong long bihainim pasin bilong Jisas long laikim tru ol narapela. (Jon 13:35; 15:​12, 13; Galesia 6:⁠2) Ol i bin wok strong inap longtaim​—⁠na ol i wok strong yet​—⁠long lusim ol tingting, na toktok, na pasin i wankain olsem ol lain bilong dispela graun em ol i save mekim ol pasin nogut. Ol dispela Kristen ol i gat laik tru long kisim nupela tingting na pasin. (Kolosi 3:​9, 10) Tasol yumi mas save, lain Kristen long olgeta hap, na ol Kristen long olgeta wan wan kongrigesen, ol i gat sin i stap long skin bilong ol. Tru, pasin bilong ol long nau i winim tru pasin ol i bin holim bipo, tasol sin i stap yet long skin bilong ol.

9, 10. Bilong wanem yumi no ken kirap nogut sapos sampela hevi i kamap namel long ol brata?

⁹ Long Baibel God i tokaut stret olsem yumi bai lukim sampela pasin kranki namel long ol brata sista bilong yumi insait long kongrigesen. Yumi ken tingim tok bilong Pol long Kolosi 3:​13, em i tok: “Sapos wanpela man namel long yupela em i gat tok long narapela brata i bin mekim rong long em, orait em i mas karim dispela hevi na lusim sin bilong dispela brata. Bikpela em i lusim pinis sin bilong yupela, na olsem tasol yupela tu i mas lusim sin bilong ol arapela.”

¹⁰ Em nau, Baibel i tokim yumi long pasin bilong God long lusim ol rong bilong yumi, na yumi gat wok long bihainim pasin bilong em na lusim rong bilong ol narapela. Bilong wanem i hatwok long mekim? Long wanem, Pol i tok sampela bai ‘i gat tok long narapela brata i bin mekim rong long ol.’ Pol i save dispela pasin bai kamap. Yumi save, long taim bilong ol aposel tu, dispela pasin i stap namel long “ol manmeri bilong God” em ol i ‘wet long kisim gutpela samting bilong ol i stap long heven.’ (Kolosi 1:​2, 5) Olsem na yumi no ken ting em bai i narapela kain nau long dispela taim em klostu olgeta Kristen tru i no bin kisim tokaut long spirit holi olsem ‘God i makim ol pinis na ol i stap lain manmeri bilong en, na em i save laikim ol tru.’ (Kolosi 3:​12) Em nau, yumi no ken ting olsem i no stret liklik sapos insait long kongrigesen bilong yumi sampela i gat tok long narapela​—⁠olsem narapela i bin mekim rong long ol, o ol i ting narapela i bin mekim olsem, na ol i bel hevi long dispela.

11. Disaipel Jems i givim wanem toksave long yumi?

¹¹ Tok bilong brata bilong Jisas, em Jems, dispela tu i soim yumi olsem yumi mas ting sampela taim i gat sampela hevi bai kamap na yumi mas lusim rong bilong ol brata bilong yumi. “Ating wanpela man namel long yupela em i gat gutpela tingting na save? Sapos kain man olsem i stap, orait . . . em i mas bihainim gut pasin bilong gutpela tingting na save, na ol man bai i lukim gutpela pasin em i mekim. Tasol sapos yupela i save bel nogut tru long ol arapela man, . . . orait yupela i no ken amamas long gutpela tingting na save bilong yupela. Nogut yupela i giaman na pasin bilong yupela i daunim tok i tru.” (Jems 3:​13, 14) Yu ting ol Kristen tru ol inap “bel nogut tru long ol arapela”? Yumi mas ting olsem, long wanem, tok bilong Jems i makim klia olsem dispela kain pasin i bin kamap insait long kongrigesen long taim bilong ol aposel na em bai kamap long taim bilong yumi tu.

12. Wanem hevi i bin kamap insait long kongrigesen bilong Filipai long bipo?

¹² Kain pasin olsem i bin kamap namel long tupela Kristen em God i bin makim long spirit holi na ol i gat gutpela nem long wok strong wantaim Pol. Ating yu tingim yet stori bilong Yuodia na Sintike em yu bin kaunim long Baibel, em tupela i insait long kongrigesen bilong Filipai. Tru, Filipai 4:​2, 3 i no kamapim olgeta liklik liklik samting i bin kamap, tasol em i soim yumi olsem i gat wanpela hevi i stap namel long tupela. Wanem samting i bin kirapim dispela hevi? Ating wanpela i no tingting gut na em i mekim wanpela tok i sutim bel bilong narapela, o wanpela wanblut bilong narapela i bin givim baksait long em, o tupela i resis long kisim biknem samting na narapela i bel kaskas long narapela? Yumi no save long as bilong en, tasol dispela hevi i go bikpela tru, olsem na maski Pol i stap long Rom, em longwe tru long tupela, em i harim tok long dispela hevi. Yumi ken ting olsem dispela tupela sista bilong spirit i no save toktok liklik wantaim, olsem na narapela i wok long abrusim narapela long ol miting, o taim ol i toktok wantaim ol pren bilong ol, narapela i tok baksait long narapela.

13. Yumi ken ting Yuodia na Sintike i bin mekim wanem? Dispela i lainim yumi long wanem samting?

¹³ Ating dispela i wankain olsem wanpela hevi i bin kamap namel long sampela insait long kongrigesen bilong yu, o wanpela hevi yu yet yu bin insait long en, a? Sapos kain hevi olsem i stap nau insait long kongrigesen bilong yumi, orait yumi ken mekim wanem? Pol i bin tokim dispela tupela sista: “Yutupela meri wantaim i bilong lain bilong Bikpela, olsem na yutupela i mas kamap wanbel.” Ating tupela i wanbel long toktok gut wantaim bilong stretim dispela hevi na tokaut olsem ol i gat laik long lusim rong bilong narapela, na nau tupela i bihainim pasin bilong Jehova long lusim rong bilong man. Yumi ken ting olsem Yuodia na Sintike i bin stretim gut dispela hevi bilong tupela, na yumi tu inap mekim olsem. Yumi ol Kristen bilong nau i ken bihainim dispela pasin bilong lusim rong bilong narapela, na gutpela samting bai kamap long en.

Kamap Wanbel Gen​—⁠Lusim Rong

14. Sapos kros i kamap namel long yumi na narapela, bilong wanem planti taim yumi gat rot long lusim tingting long rong narapela i mekim long yumi na i gutpela yumi ken mekim olsem?

¹⁴ Taim wanpela hevi i kamap namel long yu na narapela Kristen, wanem samting inap helpim yu long lusim rong em i bin mekim long yu? Tru, yumi no inap makim stret wanpela samting, tasol Baibel i kamapim pasin em sampela i bin mekim, na Baibel i givim sampela gutpela tok tu long yumi, na ol dispela samting inap helpim yumi. Wanpela bikpela samting Baibel i kamapim​—⁠tasol i hatwok long bihainim​—⁠em bilong lusim tingting long dispela hevi. Taim wanpela hevi i kamap, olsem i bin kamap namel long Yuodia na Sintike, narapela i save ting narapela i gat rong, o em asua bilong em. Olsem na sapos kain samting olsem i painim yu, ating bai yu ting olsem em asua bilong dispela narapela Kristen yet, o rong bilong em i winim rong bilong yu. Tasol maski em i asua bilong husat, yu ting yu inap lusim rong bilong em na mekim dai dispela kros? Yu mas save, sapos tru em i asua bilong dispela narapela Kristen​—⁠na ating i no asua bilong em wanpela tasol​—⁠em nau, yu gat gutpela rot tru long go pas na lusim rong bilong em na mekim dai kros na em i ken pinis.

15, 16. (a) Maika i tok wanem long Jehova? (b) Wanem insait bilong dispela tok olsem God i save “lusim sin” bilong man?

¹⁵ Oltaim yumi mas tingim pasin bilong God, em i stap olsem gutpela piksa tru long lusim rong bilong man. (Efesus 4:⁠32–​5:⁠1) Profet Maika i stori long dispela pasin bilong God na em i tok: “Bikpela, i no gat wanpela god i olsem yu. Yu save lusim sin bilong ol liklik lain manmeri bilong yu i stap yet. Kros bilong yu i no save stap oltaim. Nogat. . . . Yu save amamas long mekim gutpela pasin long mipela.”​—⁠Maika 7:​18.

¹⁶ Taim Baibel i tok Jehova i save “lusim sin” bilong man, i no olsem Jehova i no inap tingim moa ol dispela rong, nogat. Tingim Samson na Devit, em tupela wantaim i bin mekim sampela bikpela rong. Bihain bihain tru long dispela taim, Jehova inap tingim yet ol dispela rong; na yumi tu i save long sampela rong bilong ol, long wanem, Jehova i bin kirapim ol man long raitim long Baibel. Tasol God bilong yumi, em God bilong lusim ol rong, em i marimari long dispela tupela man, na em i putim ol i stap olsem gutpela piksa yumi ken bihainim long pasin bilong holimpas bilip.​—⁠Hibru 11:32; 12:⁠1.

17. (a) Wanem pasin inap helpim yumi long lusim ol rong o pasin kranki ol narapela i mekim long yumi? (b) Sapos yumi wok strong long mekim olsem, olsem wanem yumi bihainim pasin bilong Jehova? (Lukim tok long sta daunbilo.)

¹⁷ Tru tumas, Jehova inap “lusim”a rong bilong ol, olsem Devit i bin askim em planti taim long mekim. (2 Samuel 12:13; 24:10) Orait olsem wanem long yumi? Yumi inap bihainim dispela pasin bilong God na yumi lusim ol liklik pasin kranki o rong ol narapela i mekim long yumi, em ol tu i gat sin i stap long skin bilong ol? Tingim wanpela tok piksa olsem: Yu sindaun long balus na em i spit i go long rot bilong en long ples balus. Yu lukluk i go ausait na long arere bilong ples balus yu lukim wanpela meri yu save long en na em i soim tang long yu olsem pikinini i save mekim taim em i kros long narapela. Yu save em i bel kros long wanpela samting, na yu ting em i tingting long yu na em i mekim dispela pasin. O ating em i tingting long narapela man. Orait balus i wok long go antap na i raunim ples balus antap tru long dispela meri, na taim yu lukluk i go ausait em i olsem wanpela liklik mak tasol i stap long ples balus. Insait long wanpela aua yu stap longwe tru, inap planti handet kilomita, na pasin dispela meri i bin mekim long yu, i olsem yu lusim pinis na i stap longwe tru long yu. Olsem tasol, sapos yumi wok strong long bihainim pasin bilong Jehova long lusim rong bilong man, dispela bai helpim yumi long bihainim gutpela tingting na lusim rong narapela i mekim long yumi. (Sindaun 19:11) Orait, inap tenpela yia bihain, o tu handet yia bihain long taim Wan Tausen Yia Bilong Krais i kirap pinis, dispela samting em i bin mekim bai i olsem liklik samting tru. Olsem na i gutpela yu ken lusim tingting long dispela rong em i bin mekim, a?

18. Sapos i olsem yumi no inap lusim tingting long rong narapela i mekim long yumi, yumi ken bihainim wanem tok?

¹⁸ Tasol ating wanpela taim yu bin beten long dispela samting, na yu wok strong long lusim rong man i bin mekim long yu, tasol yu no inap. Orait nau bai yu mekim wanem? Jisas i tok yu mas i go long dispela man na traim stretim dispela kros i stap namel long yutupela na bai yupela ken i stap wanbel gen. Jisas i tok: “Sapos yu bringim ofa bilong yu i kam long alta, na yu tingim brata bilong yu em i gat tok long yu, orait yu mas lusim ofa bilong yu i stap klostu long alta. Na yu go pastaim na stretim tok wantaim brata bilong yu. Stretim pinis, orait nau yu ken i go na givim ofa bilong yu long God.”​—⁠Matyu 5:​23, 24.

19. Taim yumi wok long painim rot bilong kamap wanbel gen wantaim brata bilong yumi, yumi mas i gat wanem tingting? Yumi mas abrusim wanem kain tingting?

¹⁹ Tingim dispela samting: Jisas i no tok yu mas go long brata bilong yu bilong kirapim em long ting olsem em yet i gat asua na yu nogat. Ating em i gat asua, tasol yumi ken ting yutupela wantaim i gat asua. Orait maski em i asua bilong husat, yu no ken tingting long kirapim em long tok sori na krai long yu long lusim rong bilong em. Sapos yu gat dispela kain tingting na yu go long em, bai yu no inap stretim dispela hevi. Na tu, yu no ken tingting long kamapim olgeta liklik liklik samting em i bin mekim o yu ting em i bin mekim. Taim yutupela i mekim pasin sori Kristen na toktok gut wantaim, na dispela i kamapim olsem narapela i bin kisim tingting kranki long tok o pasin bilong narapela na dispela tasol i as bilong hevi, orait yutupela wantaim i ken wok strong long stretim dispela samting. Tasol sapos yupela i no wanbel olgeta long as bilong dispela hevi, i no olsem yupela i mas kamap wanbel olgeta long en, a? Mobeta yutupela i wanbel long ting olsem yutupela wantaim i gat laik tru long mekim wok bilong God bilong yumi, em God bilong lusim rong bilong man. Taim yupela i tingim dispela samting, ating i no hatwok tumas long tok, “Sori tru, sin i stap long skin bilong yumi na dispela kros i kamap namel long yumi. Plis, yumi mas lusim dispela kros.”

20. Pasin bilong ol aposel inap lainim yumi long wanem samting?

²⁰ Yumi ken tingim ol aposel, sampela taim kros i kamap namel long ol tu, olsem long taim sampela i laik i stap nambawan. (Mak 10:​35-​39; Luk 9:​46; 22:​24-​26) Ol narapela i kros long dispela, na ating ol i bel nogut stret. Tasol ol inap lusim ol dispela kain kros na wok yet wantaim. Bihain wanpela bilong ol i raitim tok olsem: “Sapos man i laik bai laip bilong en i kamap gutpela, na em i laik lukim gutpela taim, orait em i no ken mekim tok nogut na em i no ken mekim ol tok giaman. Em i mas givim baksait long pasin nogut, na bihainim gutpela pasin tasol. Em i mas wok long kamap wanbel wantaim ol arapela manmeri, na em i mas strong long bihainim dispela pasin.”​—⁠1 Pita 3:​10, 11.

21. Jisas i bin givim wanem gutpela tok long yumi long pasin bilong lusim rong bilong man?

²¹ Pastaim yumi bin stori olsem: God i lusim planti rong yumi bin mekim bipo, olsem na yumi mas bihainim pasin bilong em na lusim rong bilong ol brata. (Song 103:12; Aisaia 43:25) Tasol i gat narapela samting tu yumi mas tingim. Taim Jisas i kolim bikpela beten bilong em, em i tok: “Sapos yupela i lusim rong bilong ol arapela manmeri, orait Papa bilong yupela long heven em bai i lusim rong bilong yupela tu.” Orait, inap wanpela yia samting bihain, em i kamapim tok i wankain long dispela na em i skulim ol disaipel long beten olsem: “Yu ken lusim ol sin bilong mipela, long wanem, mipela i save lusim ol rong ol arapela i bin mekim long mipela.” (Matyu 6:​12, 14; Luk 11:⁠4) Orait sampela de paslain long taim Jisas i dai, em i tok moa olsem: “Taim yupela i sanap na mekim prea, na yupela i tingim wanpela rong wanpela man i bin mekim long yupela, orait yupela i mas lusim rong bilong dispela man. Olsem na Papa bilong yupela i stap long heven em bai i lusim rong bilong yupela.”​—⁠Mak 11:⁠25.

22, 23. Pasin bilong yumi long lusim rong bilong narapela, dispela inap mekim wanem long i stap bilong yumi long bihain?

²² Em nau, bilong God i ken wok yet long lusim ol rong bilong yumi, yumi mas lusim rong bilong ol brata bilong yumi. Taim wanpela hevi i kamap namel long tupela Kristen, askim skin bilong yu olsem, ‘Em i bikpela samting tru long God i ken lusim ol rong bilong mi, tasol pasin bilong kamapim klia olsem wanpela brata o sista i bin mekim liklik rong o pasin kranki long mi, dispela i no bikpela samting, a?’ Yu save pinis long bekim bilong dispela askim.

²³ Tasol olsem wanem sapos dispela rong i no wanpela liklik rong tasol em narapela i mekim long yumi? Na wanem taim yumi mas bihainim tok bilong Matyu 18:​15-​18? Long stori i kamap bihain long dispela, bai yumi skelim ol dispela samting.

[Futnot]

Yu Inap Tingim?

◻ Olsem wanem Jehova i stap olsem piksa yumi ken bihainim long pasin bilong lusim rong bilong man?

◻ Yumi mas save olsem wanem long ol brata sista insait long kongrigesen?

◻ Planti taim yumi inap mekim wanem long ol liklik rong ol narapela i mekim long yumi?

◻ Bilong kamap wanbel gen wantaim brata bilong yumi, yumi ken mekim wanem sapos i gat wok long mekim olsem?

[Piksa long pes 15]

Taim kros i kamap namel long yu na narapela Kristen, i gutpela yu ken lusim tingting long en; isi isi dispela hevi bai kamap olsem liklik samting tru