Yu Redi Long Kisim Baptais?

Yu bin lainim planti samting long Jehova long rot bilong stadi long Baibel. Ating yu bihainim ol tok yu lainim na yu mekim sampela senis long laip bilong yu. Tasol ating i gat wanpela samting i pasim yu long dediket long Jehova na kisim baptais. Dispela lesen bai stori long sampela samting i pasim man long kisim baptais na hau yu ken winim ol.

1. Yu ting yu mas save long olgeta samting paslain long yu kisim baptais?

Bilong kisim baptais, yu mas i gat “stretpela save long tok i tru.” (1 Timoti 2:4) Dispela i no makim olsem yu mas i gat save long olgeta bekim bilong ol askim bilong Baibel paslain long yu kisim baptais, nogat. Ol Kristen em ol i baptais longpela taim pinis ol tu i wok yet long kisim save long Baibel. (Kolosi 1:​9, 10) Tasol yu mas kliagut long ol bikpela tok bilong Baibel. Sapos yu no klia olsem save bilong yu em inap long yu kisim baptais o nogat, toktok wantaim ol elda.

2. Yu mas mekim wanem sampela samting paslain long yu kisim baptais?

Paslain long yu kisim baptais, yu mas ‘tanim bel na senisim pasin bilong yu.’ (Ritim Aposel 3:19.) Dispela i makim olsem yu bel hevi tru long ol sin yu bin mekim, na yu askim Jehova long fogivim yu. Na tu, yu wok strong long sakim ol pasin nogut na yu tingting strong long mekim ol samting i amamasim God. Na yu kirap long go long olgeta miting na autim tok wantaim kongrigesen olsem wanpela pablisa i no baptais.

3. Wai na yu no ken larim pret i pasim yu long kisim baptais?

Sampela i pret olsem ol bai no inap mekim ol samting ol i tok promis long Jehova long en. Tru, sampela taim bai yu popaia, ol bilipman na meri em Baibel i stori long ol, ol tu i bin mekim popaia. Tasol Jehova i no ting ol manmeri i lotuim em i mas gutpela olgeta, nogat. (Ritim Buk Song 103:13, 14.) Em i amamas taim yu traim bes bilong yu! Em bai helpim yu. Jehova i tokim yumi olsem i no gat wanpela samting “inap tekewe yumi long pasin laikim bilong [em].”​—Ritim Rom 8:38, 39.

KISIM SAMPELA SAVE MOA

4. Save gut long Jehova

Yu ting yu mas save gut long Jehova paslain long yu kisim baptais? Yu mas save gut long em na bai yu laikim em na yu laik amamasim em. Pilaim VIDIO na lukim hau ol Baibel sumatin long olgeta hap bilong graun i mekim olsem. Na stori long dispela askim.

VIDIO: Ol Samting Yu Mas Mekim Bilong Kisim Baptais (3:56)

• Long vidio, wanem samting i helpim sampela long redi long kisim baptais?

Ritim Rom 12:2, na stori long ol dispela askim:

• Yu gat tupela tingting long ol tok Baibel i skulim ol man long en? O yu gat tupela tingting olsem ol Witnes Bilong Jehova i skulim ol man long tok i tru, o nogat?

• Sapos olsem, yu ken mekim wanem?

5. Winim ol hevi inap kamap na i pasim yu long kisim baptais

Taim mipela i bin mekim disisen long dediket long Jehova na kisim baptais, mipela tu i bin bungim ol hevi. Bilong lukim wanpela eksampel, pilaim VIDIO, na stori long ol dispela askim.

VIDIO: Pasin Bilong Laikim Jehova i Helpim Mi Long Winim Ol Hevi (5:22)

• Long vidio, Narangerel i mas winim wanem ol hevi bambai em i ken lotuim Jehova?

• Olsem wanem pasin bilong laikim Jehova i helpim em long winim ol dispela hevi?

Ritim Provep 29:25 na 2 Timoti 1:7, na stori long dispela askim:

• Wanem samting i givim yumi strong long winim ol hevi?

6. Trastim Jehova long helpim yu

Jehova bai helpim yu long winim mak. Pilaim VIDIO, na stori long ol dispela askim.

VIDIO: Jehova Bai Helpim Yu (2:50)

• Long vidio, wanem samting i pasim Baibel sumatin long kisim baptais?

• Em i kisim save long wanem samting na dispela i strongim em long trastim Jehova?

Ritim Aisaia 41:10, 13, na stori long dispela askim:

• Wai na yu ken bilip tru olsem yu ken inapim tok promis yu mekim taim yu kisim baptais?

7. Pilim moa yet pasin laikim bilong Jehova

Taim yu tingim tingim pasin laikim bilong Jehova long yu, bai yu tenkyu moa long em na bai yu gat laik long mekim wok bilong em inap oltaim. Ritim Buk Song 40:5, na stori long dispela askim:

• Wanem ol blesing bilong Jehova em yu amamas tru long en?

Profet Jeremaia i laikim Jehova na tok bilong em, na em i amamas tru long holim nem bilong Jehova. Em i tok: “Ol tok bilong yu i mekim mi i amamas na belgut, Jehova God, bosman bilong bikpela lain ami, nem bilong yu i stap long mi.” (Jeremaia 15:16) Bekim ol dispela askim:

• Bilong wanem em i wanpela gutpela samting tru long i stap wanpela Witnes Bilong Jehova?

• Yu laik kisim baptais na kamap wanpela Witnes Bilong Jehova?

• I gat sampela samting i pasim yu long mekim olsem?

• Yu ting yu mas mekim wanem na bai yu winim mak bilong kisim baptais?

OL BIKPELA POIN

Jehova inap helpim yu long winim ol samting inap pasim yu long kisim baptais.

Riviu

• Yu ting yu mas i gat bikpela save long Baibel na bai yu ken kisim baptais?

• Ating yu mas mekim wanem ol senis paslain long yu kisim baptais?

• Wai na yu no ken larim pasin bilong pret i pasim yu long kisim baptais?

MEKIM WOK PAINIMAUT

Skelim wanem samting i mas i stap nambawan risen na yu laik kisim baptais.

“Yu Redi Long Kisim Baptais?” (Wastaua, Mas 2020)

Kisim save long sampela hevi we inap pasim yu.

“Wanem Samting i Pasim Mi Long Kisim Baptais?” (Wastaua, Mas 2019)

Lukim hau wanpela man i bin winim sampela bikpela hevi na bai em i ken kisim baptais.

‘Wai na Yu Surikim Taim Long Kisim Baptais?’ (1:10)

Pastaim wanpela man nem bilong em Ataa i gat tupela tingting long kisim baptais. Lukim wanem samting i kirapim em long mekim dispela bikpela samting.

I Stret Mi Kisim Ol Dispela Blesing? (7:21)