Stori Nating 3: Olgeta Gutpela Man i Go Long Heven
Wanem as bilong dispela stori nating? Bihain long taim ol aposel bilong Jisas i dai pinis, kirap long yia 100 C.E. samting, ol Tisa Bilong Lotu i kisim biknem na strong. Buk New Catholic Encyclopedia (2003), Volium 6, pes 687, i stori long ol tok ol i skulim ol man long en: “Ol i skulim ol man olsem, taim man i dai pinis na spirit bilong em i lusim bodi na i mekim ol samting em i mas mekim bilong kamap klin, orait em bai go long heven na stap amamas.”
Baibel i tok wanem? “Ol manmeri i save daunim nem bilong ol yet, em ol i ken amamas. Bai God i givim olgeta graun long ol.”—Matyu 5:5.
Tru, Jisas i tok promis long ol disaipel olsem em bai go na “redim ples” bilong ol long heven, tasol em i tok olsem i no olgeta stretpela man bai go long dispela ples. (Jon 3:13; 14:2, 3) Em i bin beten long laik bilong God i mas kamap “long graun olsem ol i save bihainim long heven.” (Matyu 6:9, 10) I gat tupela kain samting i wetim ol stretpela man. Liklik lain bai mekim wok king long heven wantaim Krais, tasol bikpela lain bai stap oltaim oltaim long graun.—KTH 5:10.
Bihain, misin i senisim tingting long wok bilong en yet long graun. Wanem samting i kamap? Buk The New Encyclopædia Britannica i tok: “Isi isi misin i wok long kisim ples bilong Kingdom Bilong God em ol i bin wetim.” Misin i kirap long kisim bikpela strong long rot bilong i go insait long wok politik, em i sakim tok bilong Jisas olsem lain bilong em ol “i no man bilong dispela graun.” (Jon 15:19; 17:14-16; 18:36) King Konstantin bilong Rom i stiaim tingting bilong misin na misin i senisim sampela bilip bilong en, na wanpela bilip em i senisim, em God i wanem kain tru.
Skelim ol dispela ves bilong Baibel: Song 37:10, 11, 29; Jon 17:3; 2 Timoti 2:11, 12
TOK TRU:
Klostu olgeta gutpela man bai stap oltaim oltaim long graun—long heven, nogat
[Piksa Kredit Lain long pes 6]
Art Resource, NY