Karim Ol Hevi i Strongim Bilip Bilong Mipela Long Jehova

Stori bilong Ada Dello Stritto

Nau tasol mi pinis long raitim teks bilong de long notbuk bilong mi. Mi gat 36 krismas, tasol mi bin lusim tupela aua long raitim dispela liklik hap tok. Bilong wanem mi lusim bikpela hap taim olsem? Mama bilong mi bai stori long dispela.​—Joel

MI WANTAIM man bilong mi i bin kisim baptais na kamap Witnes Bilong Jehova long 1968. Mi karim tupela helti pikinini man, em David na Marc, na bihain mi karim namba 3 pikinini man, em Joel. Mi bin karim em long 1973, long wanpela haus sik long Binche long Beljam, em longwe long Brussels olsem 60 kilomita long hap saut. I no taim yet bilong karim em na em i kamap. Hevi bilong em i olsem 1.7 kilogram tasol. Taim mi lusim haus sik, Joel i mas i stap yet long haus sik na bai em i ken putim skin.

Sampela wik i lus, tasol pikinini man bilong mipela i no kamap orait liklik, olsem na mi wantaim man bilong mi, Luigi, i kisim em i go long wanpela dokta bilong ol pikinini. Dokta i glasim pinis Joel na em i tok: “Sori tru. I luk olsem Joel i gat ol hevi long skin em tupela brata bilong em i no gat.” Mitupela i no toktok. Long dispela taim mi save olsem liklik pikinini man bilong mipela i gat wanpela bikpela sik tru. Orait nau dokta i tokim man bilong mi: “Pikinini bilong yu i gat sik trisomi 21,” narapela nem bilong en, Down syndrome.a

Mitupela i bel hevi long tok bilong dokta, na mipela i go lukim narapela dokta. Em i glasim gut Joel klostu wanpela aua na em i no mekim wanpela tok. Tasol long mitupela Luigi em i olsem planti aua moa. Orait bihain dokta i lukluk long mipela na i tok: “Pikinini bilong yupela i mas kisim helpim long yupela long olgeta samting.” Na long gutpela pasin em i tok moa: “Tasol Joel bai stap amamas, long wanem, papamama bilong em i laikim em tru!” Bel bilong mi i bagarap stret na mi holim Joel na mipela i kisim em i go long haus. Long dispela taim em i gat 8-pela wik.

Ol Miting Kristen na Wok Autim Tok i Strongim Mipela

Bihain ol dokta i glasim Joel moa na ol i lukim olsem em i gat bikpela sik long lewa na sik (rickets) bilong bun. Lewa bilong em i bikpela tumas na i pas long waitlewa, na dispela i mekim na ol sik inap kalap kwik long em. Taim em i gat 4-pela mun em i kisim sik numonia, na em i mas i go bek long haus sik na i stap wanpis long wanpela rum. Mipela i lukim em i hatwok tru long pulim win na mipela i bel hevi tru. Mipela i laik holim em na mekim gut long em, tasol inap 10-pela wik mipela i no inap holim em liklik. Mitupela Luigi inap lukluk tasol long em, holimpas narapela narapela, na beten.

Long dispela taim bilong hevi, mitupela i wok long i go yet long ol miting bilong kongrigesen wantaim David na Marc, em ol i gat 6-pela na 3-pela krismas. Taim mipela i stap long Haus Kingdom, i olsem Jehova i holim mipela long han bilong em. Long ol aua mipela i stap long miting wantaim ol brata na sista Kristen, mipela i pilim olsem mipela inap putim hevi bilong mipela long han bilong Jehova, na dispela i mekim na mipela i stap bel isi liklik. (Sng. 55:22) Ol nes i lukautim Joel ol i tok, ol i lukim olsem pasin bilong mipela long go long ol miting Kristen i helpim mipela long holim stretpela tingting.

Long dispela taim mi askim Jehova long strongim mi long i go autim tok. Nogut mi stap tasol long haus na krai krai i stap​—mi laik toktok wantaim ol man na tokim ol long as na bilip bilong mi long ol tok promis bilong God long taim i no gat sik moa i strongim mi. Long olgeta taim mi mekim wok autim tok, mi pilim olsem Jehova i harim beten bilong mi.

“Dispela i Narapela Kain Tru!”

Mipela i amamas tru long taim mipela inap kisim Joel long haus sik na bringim em i kam bek long haus! Tasol long neks de, amamas bilong mipela i pinis. Kwiktaim sik bilong Joel i go bikpela na mipela i mas kisim em i go bek hariap long haus sik. Ol dokta i glasim em na i tokim mipela: “Joel i gat olsem 6-pela mun moa bilong i stap laip.” Fopela mun bihain, taim em i gat 8-pela mun, i luk olsem tok bilong ol dokta bai kamap tru, sik bilong Joel i go nogut moa. Wanpela dokta i sindaun wantaim mipela na em i tok: “Sori tru. Mipela i no inap mekim wanpela samting moa bilong helpim em.” Na em i tok moa: “Nau Jehova tasol inap helpim em.”

Mi go bek long rum bilong Joel long haus sik. Bel bilong mi i bagarap stret na strong bilong mi i pinis olgeta, tasol mi tingting strong olsem mi no ken lusim em. Sampela sista Kristen i senis senis bilong stap wantaim mi, taim Luigi i lukautim tupela narapela pikinini bilong mipela. Orait wanpela wik i go pinis, na wantu Joel i kisim hat-atek. Ol nes i sut i kam long rum, tasol ol i no inap mekim wanpela samting bilong helpim em. Sampela minit bihain wanpela i tok isi olsem, “Em i dai pinis . . . ” Mi no gat strong moa na mi krai na lusim rum. Mi laik beten long Jehova, tasol mi hatwok long mekim sampela tok bilong kamapim tru bel hevi bilong mi. Inap 15 minit samting bihain, na wanpela nes i singaut long mi olsem: “Joel i wok long kamap orait gen!” Em i kisim han bilong mi na i tok: “Kam, yu ken lukim em nau.” Taim mi go bek long Joel, lewa bilong em i pam gen! Kwiktaim tok bilong dispela samting i go nabaut long haus sik. Ol nes na dokta ol i kam lukim em na ol i tok: “Dispela i narapela kain tru!”

Gutpela Samting i Kamap Taim Em i Gat Fopela Krismas

Taim Joel i liklik pikinini yet, planti taim dokta i tokim mipela, “Oltaim yupela i mas laikim tru Joel.” Mitupela Luigi i pilim pinis gutpela pasin laikim bilong Jehova bihain long mi karim Joel, olsem na mipela tu i laik mekim gutpela pasin long Joel na laikim em tru. Mipela i gat planti rot bilong mekim olsem, long wanem, mipela i mas helpim em long olgeta samting em i mekim.

Long olgeta wan wan yia i kam inap long Joel i gat 7-pela krismas, i gat ol wankain hevi i save kamap. Namel long Oktoba na Mas, ol narapela narapela sik i wok long painim em, na oltaim mipela i mas kisim em i go i kam long haus sik. Long wankain taim mi traim long lusim bikpela hap taim long mekim gut long tupela pikinini, David na Marc. Na tupela tu i wok long helpim Joel long mekim ol samting​—na mipela i kirap nogut long samting i kamap. Sampela dokta i bin tokim mipela olsem Joel bai i no inap tru long wokabaut. Tasol taim Joel i gat 4-pela krismas, pikinini bilong mipela Marc i tok: “Joel, kam soim Mama olsem yu inap wokabaut!” Man! Joel i kirap wokabaut liklik, em namba wan taim bilong em long mekim! Mipela i amamas tru na mipela famili olgeta i beten na tenkyu long Jehova. Long ol narapela taim tu, taim Joel inap mekim wanpela liklik samting tasol, oltaim mipela i save tok amamas long em.

Mipela Skulim Joel Long God

Sapos inap, mipela i save kisim Joel i go long ol miting long Haus Kingdom. Bilong helpim em na bai em i no ken kisim olkain jem bilong sik, mipela save putim em long wanpela kain spesel pram em plastik i karamapim olgeta na em i sindaun insait long en. Tasol maski em i stap olsem, em i amamas long i stap wantaim kongrigesen.

Ol brata na sista Kristen i strongim tru mipela na mekim pasin laikim na givim gutpela helpim long mipela. Planti taim wanpela brata i save kamapim tok bilong Aisaia 59:1 long mipela, olsem: “Yupela i no ken ting, Bikpela i no gat strong bilong kisim bek yupela. Na yupela i no ken ting em i yaupas na i no inap harim ol prea bilong yupela. Nogat.” Dispela gutpela tok i helpim mipela long bilip strong long Jehova.

Taim Joel i wok long i go bikpela, mipela i wok strong long kirapim em long putim wok bilong Jehova i stap bikpela samting long laip bilong em. Long olgeta taim i gat rot, mipela i save toktok wantaim em long Jehova bambai em i ken kisim pasin bilong laikim tru na pas gut wantaim Papa bilong em long heven. Mipela i askim Jehova long blesim dispela wok bilong mipela long skulim em long Jehova bambai dispela wok i ken kamapim gutpela kaikai.

Taim Joel i gat 12 krismas samting, mipela i amamas tru long lukim olsem em i gat laik tru long stori long ol tok i tru bilong Baibel long ol man em i bungim. Taim em i gat 14 krismas em i kisim bikpela operesen, na mi amamas tru taim em i askim mi: “Mama, inap mi givim buk Stap Oltaim long dokta i bin katim mi?” Sampela yia bihain, dokta i mas katim em gen. Mipela i save olsem em inap i dai long dispela operesen. Paslain long operesen, Joel i givim wanpela pas long ol dokta, em mipela i raitim wantaim em. Pas i tokaut long tingting bilong em long mekim wok long blut. Dokta i askim Joel: “Yu wanbel long dispela tok?” Joel i tok strong, “Yes, Dokta, mi wanbel long en.” Mitupela i amamas tru long pikinini bilong mipela i bilip strong long Man i bin wokim em na em i strong long mekim ol samting Em i laikim. Ol lain bilong haus sik i helpim gut mipela, na mipela i tenkyu tru long dispela.

Joel i Kamap Strong Long Ol Samting Bilong Spirit

Taim Joel i gat 17 krismas, em i kisim baptais long wara bilong makim olsem em i dediket pinis long God. Mipela i no inap lusim tingting long dispela de! Bel bilong mipela i amamas tru taim mipela i lukim em i wok long kamap strong long ol samting bilong spirit. Kirap long dispela taim na i kam, pasin bilong em long laikim tumas Jehova na givim bel long tok i tru i no slek liklik. Taim em i bungim wanpela man em i save tokim em: “Tok i tru em i nambawan bikpela samting long laip bilong mi!”

Taim Joel i gat 18 krismas samting, em i lain long rit rait. Em i bin hatwok tru long mekim olsem. Taim em i raitim wanpela liklik hap tok, dispela i bikpela samting tru. Kirap long dispela taim na i kam, long olgeta de em i save ritim teks bilong de long buklet Skelim Sampela Tok Bilong Baibel Long Olgeta De. Bihain long en, em i save raitim ol tok bilong ves bilong dispela teks long wanpela notbuk bilong em, na long nau em i gat planti notbuk em i bin raitim ol tok olsem long en!

Long ol de bilong miting, Joel i save kirapim mipela long i go hariap long Haus Kingdom, long wanem, em i laik sekanim olgeta manmeri i kam. Long taim bilong miting em i save amamas long bekim sampela tok na insait long ol soim. Na em i mekim sampela wok bilong lukautim ol maikrofon na mekim ol narapela wok tu. Long olgeta wik, sapos em inap, em i save go wantaim mipela long autim tok. Long 2007, kongrigesen i tokaut olsem ol i bin makim em long kamap kongrigesen sevan. Mipela i amamas tru na krai. Em i wanpela gutpela blesing tru i kam long Jehova!

Jehova i Helpim Mipela

Long 1999, narapela bikpela hevi i painim mipela. Wanpela draiva i draiv kranki na i bamim ka bilong mipela, na Luigi i kisim bikpela bagarap. Ol dokta i mas katim na rausim wanpela lek bilong em, na em i kisim sampela bikpela operesen long bun bilong baksait. Long dispela taim tu, mipela i bilip strong long Jehova na mipela i pilim dispela strong em i save givim long ol wokman bilong em i gat hevi. (Fl. 4:13) Maski bodi bilong Luigi i nogut yet, mipela i traim long holim stretpela tingting. Em i no inap mekim moa wok mani, olsem na em i gat bikpela hap taim long lukautim Joel. Dispela i givim rot long mi long mekim sampela wok moa bilong spirit. Na Luigi inap mekim gut wok bilong em long lukautim famili long ol samting bilong spirit na kongrigesen bilong mipela tu, em i holim wok olsem kodineta bilong lain elda.

I stap bilong mipela i mekim na mipela i save lusim bikpela hap taim long i stap wantaim olsem famili. Insait long ol dispela yia, mipela i lain long holim stretpela tingting na no ken strong long traim mekim ol samting em mipela i no inap mekim. Sampela taim mipela i bel hevi na mipela i beten long Jehova na kamapim bel bilong mipela long em. Sori tru, taim tupela pikinini man bilong mipela, David na Marc, i kamap bikpela na i lusim mipela, isi isi ol i lusim wok bilong Jehova. Mipela i laik bai ol i kam bek long Jehova.​—Lu. 15:​17-24.

Insait long ol dispela yia, mipela i pilim olsem Jehova i bin helpim mipela, na long olgeta hevi i painim mipela, mipela i lain long wetim em i helpim mipela. Mipela i laikim tru tok bilong Aisaia 41:​13, i tok: “Mi God, Bikpela bilong yupela. Mi save sambai long yupela na mi tokim yupela olsem, yupela i no ken pret. Bai mi helpim yupela.” Mipela i save olsem Jehova i wok long holim strong han bilong mipela, na dispela i mekim gut bel bilong mipela. Tru tumas, mipela i ken tok tru olsem, pasin bilong karim ol hevi i bin strongim bilip bilong mipela long Papa bilong mipela long heven, Jehova.

[Futnot]

[Ol Piksa long pes 16, 17]

Joel wantaim mama bilong em, Ada

[Piksa long pes 18]

Ada, Joel, na Luigi

[Piksa long pes 19]

Joel i save amamas long sekanim ol brata na sista long Haus Kingdom