Husat Inap Helpim Ol Man i Singaut Long Kisim Helpim?
“God, yu mas lainim king gut long stretpela pasin bilong yu. . . . Em i save helpim ol rabisman i singaut long em.”—SNG. 72:1, 12.
1. Long samting i bin painim Devit, yumi lainim wanem samting long pasin marimari bilong God?
DISPELA tok King Devit bilong Israel bilong bipo i raitim em i mekim gut bel bilong yumi.a Planti yia paslain long em i raitim dispela tok, em i bin pilim bikpela bel hevi bihain long em i mekim pasin adaltri wantaim Batseba. Long dispela taim, Devit i krai long God olsem: “God, . . . yu gat bikpela marimari tru, olsem na mi laik bai yu rausim olgeta pasin nogut bilong mi. . . . Mi no inap lusim tingting long sin bilong mi. . . . Yu save pinis, taim mama i karim mi, mi kamap man bilong mekim pasin nogut. Taim mi stap yet long bel bilong mama, mi man bilong mekim sin.” (Sng. 51:1-5) Yes, Jehova i marimari long yumi, long wanem, em i save yumi gat sin.
2. Song 72 i tokim yumi long wanem samting?
2 Jehova i save gut long hevi bilong yumi. Tasol olsem Baibel i tok profet, man God i makim bilong kamap King, em bai “helpim ol rabisman i singaut long em. Na ol manmeri i sot long ol samting na i no gat helpim, orait em yet bai i helpim ol. Em i save sori long ol manmeri i no gat strong na i stap rabis. Na ol manmeri i no gat samting em i save kisim bek ol.” (Sng. 72:12, 13) Em bai helpim ol olsem wanem? Song 72 i bekim dispela askim. Em i stori long wok king bilong pikinini bilong Devit, Solomon, na i helpim yumi long save olsem wanem wok king bilong Pikinini Bilong God, Jisas Krais, bai helpim ol man i gat hevi.
Piksa Bilong Wok King Bilong Krais
3. Solomon i askim long wanem samting, na God i givim wanem samting long em?
3 Bihain long lapun Devit i tok Solomon i mas kamap king, em i givim sampela tok long Solomon na Solomon i bihainim. (1 Kin. 1:32-35; 2:1-3) Bihain, long wanpela driman, Jehova i tokim Solomon: “Yu ken askim mi long wanem samting yu laikim, na bai mi givim yu.” Solomon i askim long wanpela samting tasol: “Mi laik bai yu givim mi gutpela tingting na save, bai mi inap bosim gut ol dispela manmeri bilong yu, na bai mi inap save wanem pasin i gutpela na wanem pasin i nogut.” God i harim na em i givim Solomon dispela samting em i askim long en na planti narapela samting tu.—1 Kin. 3:5, 9-13.
4. Wanpela kwin i stori olsem wanem long wok king bilong Solomon?
4 Jehova i blesim Solomon, olsem na taim em i stap king, ol manmeri i stap bel isi na ol i gat gutpela sindaun—em samting no gat narapela gavman long graun i bin mekim. (1 Kin. 4:25) Wanpela husat i bin kam lukim wok king bilong Solomon, em kwin bilong Seba wantaim planti wokman bilong em. Em i tokim Solomon: “Mi stap long kantri bilong mi na mi harim tok long ol samting yu save mekim . . . na nau mi save dispela tok i tru olgeta. . . . Ol samting mi lukim nau i winim tru ol samting mi bin harim tok long en. Gutpela tingting na save bilong yu i moa yet na ol mani samting bilong yu i planti tumas.” (1 Kin. 10:1, 6, 7) Tasol savetingting Jisas i bin kamapim i bikpela moa yet, winim bilong Solomon, olsem na em i tok long em yet olsem: “I gat wanpela man i stap hia, em i winim tru Solomon.”—Mt. 12:42.
Gutpela Sindaun Aninit Long Man i Winim Solomon
5. Buk Song 72 i stori long wanem samting? Wok Jisas i mekim taim em i stap long graun i makim wanem samting?
5 Orait nau yumi ken skelim ol tok bilong Song 72 bilong kisim save long ol blesing bai kamap aninit long wok king bilong Jisas Krais, Man i Winim Solomon. (Ritim Song 72:1-4.) Dispela song i kamapim tingting bilong Jehova long wok king bilong Pikinini bilong em, Jisas Krais, em “King bilong kamapim gutpela sindaun na bel isi.” (Ais. 9:6, 7) Man i Winim Solomon bai wok aninit long God na helpim ‘ol rabisman na ol man i sot long ol samting.’ Wok king bilong em bai kamapim bel isi na stretpela pasin. Taim Jisas i stap long graun, em i mekim wok i makim ol samting em bai mekim long Taim Bilong Wan Tausen Yia em i stap king.—KTH. 20:4.
6. Wanem sampela wok Jisas i mekim i makim ol blesing bai kamap aninit long wok bos bilong Kingdom?
6 Tingim sampela wok Jisas Krais i mekim na i makim ol samting em bai mekim bilong helpim ol man na truim tok profet bilong Song 72. Em i sori tru long ol man i karim bikpela pen na hevi. (Mt. 9:35, 36; 15:29-31) Olsem: Wanpela man i gat sik lepra i kam long Jisas na i tok: “Sapos yu laik, yu inap long mekim mi i kamap klin long ai bilong God.” Jisas i tokim em: “Mi laik. Yu kamap klin.” Na man i kamap orait gen! (Mk. 1:40-42) Bihain, Jisas i bungim wanpela wido em pikinini man bilong em i dai pinis—em i gat dispela wanpela pikinini tasol. Jisas i “sori tru” na i tok: “Yu kirap,” na pikinini man bilong em i kirap. Em i stap laip gen!—Lu. 7:11-15.
7, 8. Wanem sampela wok i kamapim klia strong bilong Jisas long oraitim ol man?
7 Jehova i givim strong long Jisas long wokim ol mirakel. Dispela samting i kamap ples klia long “wanpela meri . . . i save karim blut . . . inap long 12-pela yia.” Maski “dispela meri i bin lukim planti dokta, na ol i bin givim planti pen long em, na em i bin lusim olgeta mani bilong en bilong baim ol,” sik bilong en i no orait liklik. Em i kam stap namel long bikpela lain manmeri na tatsim Jisas—em samting Lo i tok meri i ‘karim blut’ i no inap mekim. (Wkp. 15:19, 25) Jisas i pilim olsem sampela strong i lusim em, olsem na em i askim husat i bin tatsim em. Dispela meri, em i “pret na i guria . . . , em i kam brukim skru klostu long Jisas, na i tokaut klia long olgeta samting.” Taim Jisas i luksave olsem Jehova i bin oraitim dispela meri, Jisas i mekim gutpela pasin long em na i tok: “Pikinini, yu bilip long mi, olsem na yu kamap orait gen. Yu go, na bel bilong yu i ken i stap isi. Sik bilong yu i ken pinis.”—Mk. 5: 25-27, 30, 33, 34.
8 Strong God i givim Jisas long oraitim ol sikman i bin mekim bikpela samting tu long ol man i lukim. Ating planti man i kirap nogut tru taim ol i lukim Jisas i oraitim ol sikman paslain long em i mekim Bikpela Tok Long Maunten. (Lu. 6:17-19) Taim Jon Bilong Baptais i salim tupela man i go long Jisas bilong askim em olsem em i Mesaia o nogat, ol i lukim Em i ‘mekim orait planti manmeri i gat ol kain kain sik, na rausim planti spirit nogut, na mekim planti aipas i lukluk.’ Jisas i tokim tupela: “Yutupela go tokim Jon long ol samting nau yutupela i lukim na harim. Ol aipas ol i lukluk gen, na ol lek nogut ol i wokabaut. Skin bilong ol man i gat sik lepra, em i kamap klin, na ol yaupas i harim toktok. Ol man i dai pinis, ol i kirap gen, na ol rabisman i harim gutnius.” (Lu. 7:19-22) Ating dispela tok i bin strongim tru bel bilong Jon!
9. Ol mirakel bilong Jisas i makim wanem samting?
9 Tru, helpim Jisas i givim long ol sikman i stap sotpela taim tasol. Ol man em i oraitim sik bilong ol o kirapim bek ol, bihain ol i dai. Tasol ol mirakel Jisas i mekim taim em i stap long graun i makim olsem aninit long wok king bilong Mesaia, helpim Jisas bai givim long ol manmeri em bai stap oltaim oltaim.
Paradais Bai Kamap Long Graun Olgeta!
10, 11. (a) Ol blesing bilong Kingdom bai stap i go inap long wanem taim? Aninit long wok king bilong Jisas, i stap bilong ol man bai i wanem kain? (b) Husat bai stap wantaim Krais long Paradais, na olsem wanem em inap i stap oltaim oltaim?
10 Traim piksaim long tingting i stap bilong ol man long Paradais long graun. (Ritim Song 72:5-9.) Ol man i lotu long trupela God, ol bai stap long Paradais taim san na mun i lait yet—olsem oltaim oltaim! Pasin bilong Jisas Krais long mekim wok king bai i gutpela “olsem ren i save kam daun long ol gaden na kaikai i kamap gutpela.”
11 Taim yu piksaim long tingting truim bilong dispela song na tingim laip oltaim long Paradais long graun, ating bel bilong yu i kirap tru. Ating man nogut i hangamap wantaim Jisas i bin amamas tru taim Jisas i tokim em: “Bai yu stap wantaim mi long [“Paradais,” NW].” (Lu. 23:43) Long Taim Bilong Wan Tausen Yia Bilong Krais i Stap King, dispela man bai kisim laip gen. Sapos em i daun long wok king bilong Krais, em bai inap stap gut oltaim oltaim long graun na stap amamas.
12. Insait long Wan Tausen Yia Bilong Krais i Stap King, wanem rot bai op long ol man nogut i kirap bek?
12 Aninit long wok king bilong Man i Winim Solomon, Jisas Krais, ‘ol manmeri i bihainim stretpela pasin’ ol bai stap gut. (Sng. 72:7) Krais bai laikim na tingim gut ol manmeri, wankain olsem em i bin mekim taim em i stap long graun. Long nupela taim God i tok promis long kamapim, “ol man nogut” husat i kirap bek, ol tu bai i gat rot long bihainim ol lo bilong Jehova na stap laip oltaim. (Ap. 24:15) Tasol ol lain i no laik bihainim ol lo bilong God, bai God i no larim ol i stap laip yet na bagarapim gutpela sindaun bilong dispela nupela taim.
13. Mak bilong wok bos bilong Kingdom bai bikpela olsem wanem? Bilong wanem bai i no gat wanpela i bagarapim bel isi bilong ol man?
13 Man i Winim Solomon bai bosim olgeta hap bilong graun, olsem dispela tok i kamapim: “[Em bai] bosim olgeta manmeri long hap bilong solwara i stap klostu na i go inap long solwara i stap longwe. Na mak bilong graun bilong en i ken stat long wara Yufretis na i go inap long olgeta hap bilong graun. Ol manmeri i stap long ples drai i gat wesan bai ol i stap aninit long dispela king.” (Sng. 72:8, 9) Yes, Jisas Krais bai bosim olgeta hap bilong graun. (Sek. 9:9, 10) Ol man husat i pilim tru gutpela wok king bilong em na ol blesing dispela wok king bai kamapim, ol bai amamas long “stap aninit” long King Jisas Krais. Tasol ol man i mekim rong na i no tanim bel, ol bai dai, “maski ol i gat 100 krismas pinis.”—Ais. 65:20.
Em i Pilim Tru Hevi Bilong Yumi
14, 15. Olsem wanem yumi save olsem Jisas i pilim tru tingting bilong yumi man na em bai “helpim ol rabisman i singaut long em”?
14 Yumi ol man i gat sin, yumi stap nogut tru na yumi mas i gat helpim. Tasol i gat rot long yumi kisim helpim. (Ritim Song 72:12-14.) Jisas, Man i Winim Solomon, inap pilim tru hevi bilong yumi, long wanem, em i save olsem yumi no gutpela olgeta. Na tu, Jisas yet i bin karim pen long stretpela pasin em i mekim, na God i bin larim em i karim hevi bilong em yet. Jisas i pilim hevi nogut tru na dispela i mekim na “tuhat bilong en i kamap olsem blut na i pundaun long graun”! (Lu. 22:44) Bihain, long pos diwai, em i singaut: “God bilong mi, God bilong mi, bilong wanem yu lusim mi?” (Mt. 27:45, 46) Maski em i bin karim bikpela pen na hevi, na Satan i bin wok strong tru long pulim em na bai em i lusim Jehova, Jisas i stap gut long God Jehova.
15 Jisas i luksave long pen yumi karim na em bai ‘helpim ol rabisman i singaut long em na ol manmeri i sot long ol samting.’ Em i tingim tru ol manmeri, olsem Papa bilong em i save mekim, na em bai “harim prea bilong ol manmeri i sot long ol samting,” na ‘mekim orait ol manmeri em hevi i bagarapim tingting bilong ol na ol i pilim nogut,’ na “pasim ol sua bilong ol.” (Sng. 69:33; 147:3) Jisas inap “sori long yumi,” long wanem, “olgeta traim i save kamap long yumi, dispela olgeta i bin kamap pinis long em bilong traim em tu.” (Hi. 4:15) Em i gutpela samting tru long save olsem Jisas Krais i mekim wok king nau long heven na em i gat bikpela laik long pinisim pen na hevi bilong ol man!
16. Bilong wanem Solomon inap pilim tru hevi bilong ol manmeri bilong em?
16 Solomon i gat gutpela save na tingting, olsem na em inap “sori long ol manmeri i no gat strong.” Na tu, kain kain hevi i bin kamap insait long laip bilong em yet. Brata bilong em Amnon i reipim susa bilong em Tamar, na brata bilong Solomon, Apsalom, i kilim Amnon i dai long dispela rong em i mekim. (2 Sml. 13:1, 14, 28, 29) Apsalom i laik kisim wok king bilong Devit, tasol wok bilong em i pundaun, na Joap i kilim em i dai. (2 Sml. 15:10, 14; 18:9, 14) Bihain, brata bilong Solomon, Adoniya, i tingting strong long kamap king. Sapos em i bin kamap king, em bai kilim Solomon i dai. (1 Kin. 1:5) Solomon i save pilim tru pen na hevi bilong ol man, na dispela samting i kamap ples klia long beten em i mekim taim ol i dediketim tempel bilong Jehova. King i tingting long ol manmeri bilong em, na em i beten olsem: ‘Ol i pilim tru hevi bilong ol. Yu [Jehova] mas lusim sin bilong ol na helpim ol. Yu ken skelim pasin bilong olgeta wan wan man na bekim pe long ol inap long pasin ol i bin mekim.’—2 Sto. 6:29, 30.
17, 18. Sampela wokman bilong God i bin karim wanem kain pen? Wanem samting i bin helpim ol long mekim olsem?
17 Ating sampela i “pilim tru” yet bikpela pen i bin kamap long sampela pasin bipo ol i bin mekim. Mary,b wanpela Witnes Bilong Jehova i gat 30 krismas samting, em i tok: “I gat planti as long mi mas amamas, tasol taim mi tingim ol samting mi bin mekim bipo, dispela i mekim na mi sem na mi pilim nogut tru. Mi bel hevi, na mi krai planti taim, i olsem dispela samting i bin kamap asde tasol. Mi pilim yet olsem mi samting nating tasol na planti taim bel i kotim mi.”
18 Planti wokboi bilong God i pilim wankain, olsem na wanem samting inap strongim ol bambai ol inap karim hevi bilong ol? Mary i tok: “Ol gutpela pren na ol bratasista i helpim mi long stap amamas. Na tu, mi wok long tingim ol gutpela samting Jehova i bin tok promis long kamapim long bihain, na mi bilip strong olsem taim mi singaut long God i helpim mi, em bai givim bel isi long mi.” (Sng. 126:5) Yumi mas bilip long Pikinini Bilong God, em man God i bin makim bilong kamap King. Baibel i bin tok profet long em olsem: “Em i save sori long ol manmeri i no gat strong na i stap rabis. Na ol manmeri i no gat samting em i save kisim bek ol. Sapos ol man nogut i laik daunim ol na bagarapim ol, em i save kisim bek ol. Em i save laikim ol tumas na em i mekim olsem.” (Sng. 72:13, 14) Man! Dispela tok i strongim tru bel bilong yumi!
Planti Gutpela Samting i Wetim Yumi
19, 20. (a) Olsem Song 72 i tok, wok bos bilong Kingdom bai pinisim wanem kain hevi? (b) Yumi mas givim biknem long husat long wok king bilong Krais? Yu pilim olsem wanem long ol samting wok king bilong em bai kamapim?
19 Piksaim gen long tingting gutpela sindaun bilong ol stretpela man long nupela taim God bai kamapim aninit long wok king bilong Man i Winim Solomon. Baibel i tok promis: “Planti rais na wit samting i ken kamap long ol gaden bilong ol manmeri.” (Sng. 72:16) Kaikai bai kamap planti “olsem i save kamap long Lebanon,” em wanpela hap i bin kamapim planti kaikai tru long taim Solomon i bin i stap king. Tingim! Kaikai i no ken sot moa, ol man i no ken hangre moa! Olgeta bai i gat “planti gutpela gutpela” kaikai.—Ais. 25:6-8; 35:1, 2.
20 Yumi mas givim biknem long husat long ol dispela gutpela blesing? Yumi mas givim long God Jehova, em King Bilong Stap Oltaim na King Bilong Heven na Graun. Yumi bai amamas long bungim nek wantaim long mekim dispela laspela tok bilong dispela naispela song: “Bai ol manmeri i no ken lusim tingting long nem bilong king [Jisas Krais], na olgeta taim san i wok yet long kam antap long skai, ol man i ken wok long givim biknem long dispela king. . . . Na ol i ken askim God long givim blesing long ol na mekim gut long ol long wankain pasin olsem em i save mekim gut long king. Litimapim nem bilong God, Bikpela bilong ol Israel. Em wanpela tasol i save mekim ol dispela gutpela samting. Litimapim gutpela nem bilong em oltaim oltaim. Biknem bilong en i ken inapim olgeta graun. I tru tumas.”—Sng. 72:17-19.
[Ol Futnot]
a Tru, liklik het tok bilong Song 72 i tok, “Solomon i raitim dispela song,” tasol laspela ves bilong dispela song i soim olsem em Devit i bin raitim.
b Mipela i senisim nem.
Bai Yu Bekim Olsem Wanem?
• Tok profet bilong Song 72 i piksa bilong wanem samting?
• Man i Winim Solomon i husat? Mak bilong wok bos bilong em bai i bikpela olsem wanem?
• Yu yet i amamas long wanem ol blesing em Song 72 i tok profet long en?
[Piksa long pes 29]
Gutpela sindaun long taim Solomon i stap king i makim wanem samting?
[Piksa long pes 32]
Pasin bilong yumi long wok strong long kisim laip long Paradais aninit long wok king bilong Man i Winim Solomon, i no inap lus nating