Pas i Kam Long Grenada

Wanpela De Long Nambis

SAPOS ol i salim yu i go mekim wok misineri long narapela kantri, ating amamas bilong yu bai i narapela kain tru. Bai yu tingim ol manmeri, ol samting i stap long dispela kantri, na ol ekspiriens yu bai kisim taim yu mekim wok autim tok.

Taim mi na meri bilong mi i kisim wok misineri long Grenada​—wanpela ailan em solwara i raunim na i gat olsem 45 nambis​—mipela i wok long tingting long ol dispela nambis i luk olsem wanem. I no longtaim na mipela bai bung na amamas long wanpela bilong ol dispela nambis, tasol samting mipela i kisim amamas long en em ol manmeri, na i no san na solwara.

Nambis Grand Anse i no stap longwe tumas long haus bilong mipela long Grenada, na rot i go long dispela nambis i naispela tru. Rot i baut baut, na dispela i mekim na mipela inap lukim ol gutpela ples, olsem ol liklik maunten i grin tru, ol bikpela maunten, bikbus, wara kalap, na nambis. Ating dispela em i as na planti turis bilong olgeta hap i save kam lukim ples! Ol ples i luk naispela tru, olsem na draiva i mas was gut, nogut ol dispela samting i pulim ai bilong em, na em i no lukluk gut long rot. Ol rot i baut baut na sampela hap bilong rot i go liklik na mipela i tingting planti olsem wanem tupela ka i ken ron long en na ol i no bam.

Mipela i kamap long ples kibung long Convention Trade Center i stap long rot bilong nambis Grand Anse. Inap olsem 600 Witnes Bilong Jehova i bung long dispela hap bilong harim ol tok bilong Baibel. Dispela de em i spesel tru long Lesley na Daphne, em tupela marit i gat 70 krismas samting. Em de Lesley bai kisim baptais. Inap longpela taim pinis, Daphne i bin wetim dispela de, long wanem, em i bin kisim baptais bilong kamap wanpela Witnes Bilong Jehova long 1958.

Long ol Witnes, baptais i gat bikpela mining bilong en, na ol i save baptaisim man long rot bilong putim ol i go insait olgeta long wara. Em samting man i mekim taim em i kisim pinis stretpela save long tok i tru bilong Baibel na em i bihainim ol dispela tok long laip bilong em. Long dispela taim man i kamapim ples klia long ol narapela olsem em i dediket pinis long God Jehova.

Ol i askim mi long givim wanpela tok i kamapim ol tok bilong Baibel long baptais. Long pinis bilong tok, Lesley wantaim tupela marit bilong kisim baptais, ol i sanap. Em i werim wanpela waitpela siot ol i bin ainim gut, nektai, na em i gat bikpela smail long pes. Mi kamapim askim olsem: “Yu hevi long ol sin yu bin mekim na yu tanim bel na yu dediket pinis long Jehova long bihainim laik bilong em?” Yu inap luksave olsem ol i pilim tru na givim bel olgeta taim em na ol narapela i tok “Yes!”

Mi save long stori bilong Lesley, na mi pilim tru samting em i mekim. Inap planti yia tru, em i no laik stadi long Baibel, tasol em i senisim tingting bilong em taim em na meri bilong em i go long narapela ailan. Taim ol i stap long dispela ailan, ol i tingting olsem ol bai go long lotu bilong ol yet. Lesley i tokim Daphne: “Yu go long lotu bilong yu, na mi bai go long lotu bilong mi.”

Lesley i go lusim Daphne long Haus Kingdom na em i go long haus lotu bilong Angliken i stap long wankain blok. Taim Lesley i pinis long lotu, em i go bek long Haus Kingdom bilong kisim meri bilong em. Long Haus Kingdom, em i bungim ol manmeri i gat gutpela pasin pren na ol i tok amamas long em, maski ol i no bin bungim em bipo. Lesley i pilim tru dispela pasin. Long haus lotu bilong em, i no gat wanpela i bin toktok wantaim em. Lesley i tokim Daphne olsem: “Mi no inap go bek gen long dispela haus lotu bilong mi. I no gat wanpela i tingim mi, na pris tu i no tingim mi. Na i no gat wanpela i tok gude long mi taim mi go insait long haus lotu na taim mi kam ausait.” Taim Lesley i lusim haus lotu, em i no gat laik long go bek gen.

Bihain long dispela, Lesley i stadi long Baibel. Na nau em i redi long kisim baptais. Ol lain bilong kisim baptais, ol i go long nambis na mipela i bihainim ol. Solwara i stap klostu, olsem na i no gat wok long sanapim tang wara bilong baptais, olsem ol i save mekim long planti narapela kibung bilong ol Witnes Bilong Jehova. Mipela i brukim rot bilong i go long ples bilong kisim baptais.

Nambis Grand Anse i longpela inap 3-pela kilomita samting na wesan bilong en i wait tru na long yia olgeta wara i blupela na i hat liklik. Ol turis i kirap nogut taim ol i lukim mipela i kam long nambis. Ol man i werim siot na nektai, na ol meri i werim ol dres na ol sket. Lesley i senisim klos na i putim T-siot na sotpela trausis. Yu inap pilim tingting bilong Daphne taim em i lukim man bilong em i kisim baptais inap 50 yia bihain long baptais bilong em yet! San i lait bikpela na Daphne tu i gat bikpela smail. Ol turis tu i insait long amamas bilong dispela de. Ol tu i paitim han taim ol wan wan i kisim baptais.

Blupela skai, waitpela wesan, na solwara i wok long bruk isi isi​—olgeta dispela samting i litimapim tru nem bilong Man Bilong Wokim olgeta samting. Na taim 3-pela manmeri bilong kisim baptais i lusim wara, dispela i litimapim nem bilong Jehova moa yet. Taim mipela i lukim ol, dispela i mekim gut bel bilong mipela. Em i wanpela bikpela de tru. Dispela de i nambawan gutpela de tru long tingting bilong Lesley na Daphne.