Rot Namba 5
Inapim Laik Bilong Yu Long Kisim Save Long God
BAIBEL I TOK WANEM? “Ol manmeri i save, ol i stap rabis tru long ol samting bilong God, em ol i ken amamas.”—Matyu 5:3.
BILONG WANEM I HATWOK? I gat planti tausen lotu, na planti bilong ol i skulim ol man long ol narapela narapela rot bilong inapim laik bilong ol long kisim save long God. Olsem wanem yu inap save long wanem lotu i skulim ol man long tok i tru na long ol samting God i orait long en? Sampela man i gat nem long raitim buk ol i tok, pasin bilong bilip long God na lotuim em i no gat as bilong en na inap bagarapim man. Nius Maclean’s i kamapim tok bilong wanpela man i no bilip long God olsem: ‘Bilip Kristen olsem God i stap na yumi mas lotuim em, em ol samting saiens na yumi yet i no inap eksplenim, dispela i mekim na i olsem laip bilong yumi i no bikpela samting na i kirapim yumi long pait na mekim nogut long ol man.’
YU INAP MEKIM WANEM? Skelim ol samting i kamapim klia olsem i gat God i stap. (Rom 1:20; Hibru 3:4) No ken larim wanpela i daunim laik bilong yu long kisim bekim bilong ol bikpela askim, olsem: Yumi stap bilong mekim wanem? I gat laip bihain long taim yumi dai? Bilong wanem i gat planti pen na hevi i stap? God i laik mi mas mekim wanem? Taim yu kisim bekim bilong ol dispela askim, dispela em i bikpela samting bilong yu ken stap belgut inap oltaim.
Tasol no ken bilip nating long ol samting ol narapela i tokim yu. Baibel i kirapim yu long skelim gut ol tok na bai yu kisim save long pasin God i laikim tumas. (Rom 12:1, 2) Yu bai kisim gutpela samting long wok yu mekim. Sapos yu makim taim bilong stadi long Baibel na yu bihainim ol gutpela tok bilong en, yu inap abrusim ol hevi, daunim pasin bilong tingting planti, na mekim amamas bilong yu i go bikpela. Dispela em i no wanpela tok promis nating, nogat. Inap planti milion manmeri bilong kain kain sindaun ol i kisim ol gutpela samting long rot bilong kisim save long tok i tru bilong God na ol samting em i tingting pinis long mekim. Ritim ol laip stori i stap long pes 18 i go 21 bilong dispela nius.
Taim yu larim ol gutpela tok bilong Baibel i helpim yu, bai yu pas gut moa wantaim God. I gutpela sapos yu bihainim singaut bilong ol Witnes Bilong Jehova na yu stadi long Baibel wantaim ol. Sapos yu mekim olsem, ating bai yu wanbel wantaim tok bilong aposel Pol, em i tok: “Sapos yumi bihainim pasin bilong God yumi kisim planti gutpela samting, em sapos yumi amamas long ol samting God i save givim yumi.”—1 Timoti 6:6.
[Piksa long pes 8]
Skelim gut ol tok bilong kisim save long pasin God i laikim tumas