Yu Save Long Dispela?
Yu ting ol Kristen i bin ranawe lusim Judia paslain long Jerusalem i bagarap long yia 70 C.E.?
“Taim yupela i lukim ol ami i kam banisim Jerusalem, orait yupela i ken save olsem taim bilong em long bagarap i kam klostu. Long dispela taim ol manmeri long Judia i mas ranawe i go long ol maunten, na ol manmeri i stap long Jerusalem i mas lusim dispela hap.” (Luk 21:20, 21) Jisas i givim dispela tok long ol disaipel bilong em long Jerusalem bai bagarap. Olsem wanem? I gat sampela samting i kamapim klia olsem ol disaipel i bin bihainim tok lukaut bilong Jisas?
Sampela yia bihain long indai bilong Jisas, ami bilong Rom em Sestius Galus i bosim i kam pait long Palestain. Saveman bilong Juda em Josifas husat i bin stap long dispela taim i tok tu olsem dispela pait i bin kamap tru. Dispela ami bilong Rom i raunim Jerusalem na i luk olsem ol bai daunim Jerusalem. Tasol Galus i tok na ol i lusim Jerusalem. Saveman Eusebius i tok, dispela i opim rot na ol Kristen i stap long Judia i ranawe i go long Pela, em wanpela taun i stap long ples maunten bilong Dekapolis.
Sampela yia bihain, long 70 C.E. narapela ami bilong Rom em Jeneral Taitus i bosim, ol i kam bek na bagarapim biktaun bilong ol Juda. Dispela lain ami i bagarapim tru biktaun na i no gat man i stap long en, em samting ami bilong Galus i no bin mekim. Planti handret tausen manmeri i kalabus i stap long Jerusalem na ol i dai.
Husat ol dispela “yangpela profet”?
Long ol hap bilong Baibel we i stori long profet Samuel, Elaija, na Elisa, Baibel i stori tu long ol “yangpela profet.” Olsem, taim Elisa i tok long makim Jehu bilong kamap king bilong Israel, em i salim “wanpela yangpela profet” i go bilong mekim dispela wok.—2 King 9:1-4.
Ol saveman i ting olsem dispela tok i makim wanpela lain man em ol i stap na wok wantaim long wanpela hap na i no makim ol pikinini tru bilong ol profet. Buk Journal of Biblical Literature, i tok ol man insait long dispela grup ating em ol man husat i “givim ol yet long mekim wok bilong Yahweh [Jehova] aninit long lukaut bilong wanpela profet husat i stap olsem . . . waspapa bilong ol long sait bilong lotu.” (2 King 2:12) Olsem, long stori bilong Jehu i kamap king, Baibel i kolim wokman bilong Elisa olsem “yangpela profet.”—2 King 9:4.
I luk olsem ol dispela “yangpela profet” i no gat planti samting. Baibel i stori long wanpela lain olsem i bin stap long taim bilong Elisa na i tok ol i wokim haus bilong ol yet na ol i bin yusim tamiok bilong narapela man long mekim olsem. (2 King 6:1-5) Stori bilong wido meri bilong “wanpela profet” i kamapim klia olsem sampela bilong dispela lain man i bin marit. (2 King 4:1) Ol Israel i stap gut long God, ol i amamas long ol dispela yangpela profet na Baibel i stori olsem wanpela taim ol i givim ol gutpela kaikai olsem presen long ol.—2 King 4:38, 42.