Askim
Bilong wanem Elisa i askim Elaija long ‘givim strong long em long wankain pasin olsem papa i save givim planti samting long namba wan pikinini man’?
Klostu long taim Elaija i pinisim wok bilong em olsem profet long Israel, yangpela profet Elisa i askim em: “Yu bin kisim strong bilong God na yu mekim wok profet. Na mi laik yu givim dispela strong long mi.” (2 King 2:9) Em nau, long ol samting bilong spirit Elisa i laik kisim strong long Elaija inap olsem tupela hap, olsem papa i save givim tupela hap bilong olgeta samting long namba wan pikinini man. (Lo 21:17) Orait nau yumi ken stori long samting i bin kamap na bai yumi klia gut na kisim sampela save long en.
Profet Elaija i bin makim Elisa long kisim ples bilong em, olsem Jehova i tokim em long mekim. (1 King 19:19-21) Inap 6-pela yia Elisa i stap olsem wokman bilong Elaija na em i strong long mekim olsem i go inap long pinis bilong en. Long laspela de bilong Elaija olsem profet long Israel, long dispela de tu Elisa i stap gut long tisa bilong em Elaija. Elaija i strong long Elisa i no ken bihainim em moa, tasol 3-pela taim Elisa i tok: “Mi mas i go wantaim yu.” (2 King 2:2, 4, 6; 3:11) Tru tumas, Elisa i tingim dispela lapun profet olsem papa bilong em long spirit.—2 King 2:12.
Tasol i no Elisa tasol i olsem pikinini bilong Elaija. Elaija na Elisa i save bung wantaim wanpela lain ol i kolim olsem “pikinini bilong ol profet.” (2 King 2:3, NW ) Stori i stap long Namba 2 King i makim olsem ol dispela “pikinini” tu i pas gut wantaim papa bilong ol long spirit, em Elaija. (2 King 2:3, 5, 7, 15-17) Tasol Elaija i bin makim Elisa long kisim ples bilong em, olsem na Elisa i stap namba wan namel long ol pikinini bilong Elaija long spirit—em i olsem namba wan pikinini. Long Israel bilong bipo, namba wan pikinini man i kisim tupela hap bilong olgeta samting bilong papa, tasol ol narapela pikinini i kisim wanpela hap tasol. Olsem na Elisa i singaut long kisim tupela hap bilong ol samting bilong spirit Elaija i holim.
Bilong wanem Elisa i singaut long kisim dispela samting long dispela taim? Long wanem, klostu nau em bai kisim wanpela bikpela wok tru—em bai kisim ples bilong Elaija olsem profet long Israel. Elisa i save, bilong inapim tru dispela bikpela wok, em i mas i gat bikpela strong bilong spirit, winim strong bilong em yet, na Jehova tasol inap givim long em. Em i mas i gat strongpela bel olsem Elaija i no bin pret. (2 King 1:3, 4, 15, 16) Olsem na Elisa i singaut long tupela hap bilong strong bilong Elaija—strongpela bel na pasin bilong strong long lotuim Jehova wanpela tasol—em ol gutpela pasin spirit bilong God i save kamapim. (1 King 19:10, 14) Orait Elaija i mekim wanem?
Elaija i save, Elisa i bin singaut long samting i no bilong Elaija—God tasol inap givim long em. Olsem na long pasin daun Elaija i tok: “Samting yu askim mi long en, em i no isi long mi mekim. Tasol sapos yu lukim mi taim Bikpela i kisim mi i go, orait bai yu kisim dispela strong.” (2 King 2:10) Na tru tumas, Jehova i larim Elisa i lukim Elaija i go antap insait long wanpela raunwin. (2 King 2:11, 12) Samting Elisa i singaut long en, em i kisim. Jehova i givim strong long em bambai em i ken mekim dispela nupela wok na winim ol hevi bihain bai painim em.
Long nau dispela stori bilong Baibel inap strongim bel bilong ol Kristen em God i bin makim (sampela taim ol i kolim ol olsem lain Elisa i makim) na ol narapela wokman bilong God. Sampela taim yumi inap tingting planti taim yumi kisim wanpela nupela wok na yumi ting yumi no inap mekim, o yumi pilim olsem yumi no gat strongpela bel moa long mekim yet wok bilong autim tok bilong Kingdom long dispela taim em planti man i les long harim o ol i birua long yumi. Tasol sapos yumi krai long Jehova long helpim yumi, em bai givim holi spirit long yumi inap long yumi ken karim hevi bilong ol wok bilong yumi na bilong ol senis i wok long kamap. (Luk 11:13; 2 Korin 4:7; Filipai 4:13) Em nau, olsem Jehova i bin strongim Elisa long mekim ol bikpela wok bilong em, olsem tasol em bai helpim yumi olgeta, ol lapun na yangpela wantaim, long mekim gut wok bilong yumi long autim tok.—2 Timoti 4:5.