Yu Save Tingim Ol Lapun Wanbilip i Olsem Bikpela Samting?
TAIM ol Israel i stap insait long wanpela kontrak wantaim God, God i tokim ol: “Yupela i mas aninit long ol lapun na mekim gut long ol. Na yupela i mas aninit long mi, God bilong yupela.” (Wok Pris 19:32) Olsem na pasin bilong rispek long ol lapun em wanpela wok holi, na i olsem yumi daun long God. Maski ol Kristen long nau i no stap aninit moa long Lo Bilong Moses, dispela tok i kirapim yumi long save olsem Jehova i save tingim ol lapun i mekim wok bilong em, ol i olsem samting i dia na gutpela tumas. (Sindaun 16:31; Hibru 7:18) Yumi holim wankain tingting olsem bilong Jehova? Yumi tingim tru ol lapun brata na sista Kristen bilong yumi i olsem bikpela samting?
Elisa i Tingim Tru Lapun Pren Bilong Em
Baibel i kamapim wanpela stori bilong pasin bilong rispek long ol lapun i stap long Namba 2 King. Em i stori long olsem wanem yangpela profet Elisa i kisim ples bilong lapun profet Elaija long mekim wok profet. Skelim samting i bin kamap long laspela de bilong Elaija i stap olsem profet long taim bilong 10-pela lain Israel.
Long dispela de, Jehova i bin tokim dispela lapun profet long lusim Gilgal na i go long Betel, long Betel i go long Jeriko, na long Jeriko i go long wara Jordan. (2 King 2:1, 2, 4, 6) Tripela taim Elaija i tokim Elisa long no ken bihainim em, long taim ol i raun klostu 50 kilomita. Tasol olsem Rut i bin mekim sampela handet yia i go pinis we em i strong long em i no laik lusim Naomi, Elisa i no laik lusim dispela lapun profet. (Rut 1:16, 17) Elisa i tok 3-pela taim: “Long nem bilong Bikpela i stap oltaim, mi tok tru tumas, mi mas i go wantaim yu.” (2 King 2:2, 4, 6) Inap long dispela taim, Elisa i bin helpim Elaija 6-pela yia samting. Tasol em i laik wok yet wantaim Elaija i go i go. Baibel i tok moa: “Tupela i wok long toktok na wokabaut i go, . . . na wanpela raunwin i kisim Elaija i go.” (Ves 11) Elaija na Elisa i toktok wantaim i go inap long taim wok profet bilong Elaija i pinis long Israel. Dispela yangpela profet i laik tru long kisim planti tok bilong helpim na strongim em long lapun profet i gat gutpela save bilong mekim wok profet. Em i klia tru, Elisa i tingim tru lapun pren bilong em.
Olsem Ol Papa na Mama Bilong Yu
Em i no hatwok long save long as na Elisa i bin laikim dispela lapun profet olsem wanpela pren—olsem papa bilong em long spirit. (2 King 2:12) Paslain long wok profet bilong Elaija i pinis long Israel, em i tokim Elisa: “Yu laik bai mi mekim wanem samting bilong helpim yu pastaim?” (Ves 9) Olsem na i go inap long wok bilong em i pinis long Israel, Elaija i tingim i stap bilong Elisa—em bai kisim ples bilong Elaija—long ol samting bilong spirit, na long wok bilong God i ken i go yet.
Long nau, yumi amamas long lukim kain pasin olsem long ol lapun brata na sista Kristen bilong yumi i mekim pasin olsem papa na mama taim ol i amamas long givim save na gutpela tingting long ol yangpela. Olsem: Ol brata sista i mekim wok volantia long ol brens-ofis bilong ol Witnes Bilong Jehova inap planti yia i amamas long helpim ol nupela bilong famili Betel long kisim save long kain kain wok long mekim long Betel. Olsem tasol, ol wasman raun na meri bilong ol i bin raun lukim ol kongrigesen inap planti yia ol i amamas long helpim ol brata em ol i lain long mekim wok wasman raun. Na tu, long ol kongrigesen bilong ol Witnes Bilong Jehova long graun olgeta, i gat ol lapun brata na sista i bin mekim wok bilong Jehova inap planti yia na ol i amamas long givim gutpela save bilong ol long ol nupela insait long kongrigesen.—Sindaun 2:7; Filipai 3:17; Taitus 2:3-5.
Taim yumi lukim ol dispela gutpela lapun Kristen i givim bel long tingim tru ol narapela, dispela i mekim na yumi amamas long givim rispek long ol. Olsem na yumi laik bihainim pasin bilong Elisa long tingim gut ol lapun wanbilip bilong yumi. Aposel Pol i kirapim yumi long mekim pasin long ol lapun wanbilip olsem ol i “papa” na “mama” bilong yumi. (1 Timoti 5:1, 2) Taim yumi mekim olsem, yumi helpim kongrigesen Kristen long wok gut na kamap strong long olgeta hap bilong graun.
[Piksa long pes 30]
Elisa i laik wok yet wantaim Elaija i go i go
[Ol Piksa long pes 31]
Ol yangpela i kisim bikpela helpim long ol lapun Kristen