Tingim Jisas Krais

As na sampela i selebretim Krismas.

Sampela man i tok Krismas em taim bilong tingim Jisas. Ol i selebretim Krismas bilong tingim de mama i karim Jisas.

Bilong wanem dispela i givim hatwok?

Ol musik bilong Krismas na planti pasin bilong Krismas i no kirapim ol man long tingim tru Jisas Krais. Planti milion man husat i selebretim Krismas ol i no bilip long Jisas na sampela i no bilip olsem em i bin stap tru. Insait long ol wok bisnis, Krismas i kamap olsem wanpela holide bilong edvetaisim ol samting na i no taim bilong tingim Jisas.

Wanem ol stiatok bilong Baibel inap helpim man?

“Pikinini bilong man . . . i kam bilong . . . givim laip bilong em olsem pe bilong baim bek planti manmeri.” (Mak 10:45) Tok Jisas i mekim long kirap bilong dispela atikol, i klia tru olsem em i no mekim long betde bilong em, nogat, em i mekim long nait paslain long em i dai. Long dispela apinun, em i kamapim wanpela bung bilong tingim dai bilong em. Tasol bilong wanem Jisas i laik bai ol disaipel bilong em i tingim dai bilong em na i no tingim de mama i karim em? Long wanem, ofa bilong Jisas long baim bek man i givim rot long ol man long kisim laip oltaim. Baibel i tok: “Pe bilong sin em dai, tasol presen God i givim em laip oltaim long rot bilong Krais Jisas, Bikpela bilong yumi.” (Rom 6:23) Olsem na long olgeta yia, ol disaipel bilong Jisas i save tingim indai bilong em, ol i no tingim em olsem wanpela liklik bebi nating, nogat, ol i tingim em olsem “seivia bilong ol manmeri bilong graun.”—Jon 4:42.

“Krais yet i bin karim pen bilong helpim yupela. Em i stap olsem gutpela piksa bai yupela i ken bihainim gut lek mak bilong en.” (1 Pita 2:21) Bilong onarim na tingim Jisas, yu mas save gut long pasin bilong em olsem wanpela man i gutpela olgeta na i gat bikpela save. Na tu, tingim tingim long bel olsem wanem Jisas i mekim pasin sori, i no les kwik, na strongim bel long mekim stretpela pasin, na painim rot long bihainim pasin bilong Jisas long i stap bilong yu.

“Wok bilong bosim ol manmeri long graun i kamap wok bilong Bikpela bilong yumi wantaim Krais bilong en. Na Bikpela bai mekim wok king inap oltaim oltaim.” (Revelesen 11:15) Taim yu tingim Jisas Krais, tingim wok em i mekim long nau. Jisas i mekim wok King long heven. Baibel i tok profet long Jisas olsem: “Long stretpela pasin bilong skelim kot, em bai i harim wari bilong ol rabisman na em bai i helpim ol tarangu, ol arapela i daunim ol na mekim nogut long ol.” (Aisaia 11:4) Ol dispela gutpela pasin ol i no pasin bilong wanpela nupela bebi, nogat, ol i pasin bilong wanpela strongpela King.