Laip i Gat As Tru Bilong En​—Jisas i Soim Rot

OLSEM yumi stori pinis long atikol i kamap paslain, i stap bilong Jisas i gat as tru bilong en. Olsem na sapos yumi laik bai i stap bilong yumi i gat as tru bilong en, yumi mas bihainim eksampel bilong em na putim yau long ol skultok bilong em.

Jehova i tokim yumi long mekim olsem, olsem skripsa antap i kamapim. Bilong wokabaut olsem Jisas, dispela i makim olsem long olgeta samting long laip bilong yumi, yumi mas bihainim pasin bilong em na ol tok em i skulim ol man long en. Taim yumi mekim olsem dispela bai helpim yumi na God i orait long yumi, na laip bilong yumi bai i gat as tru bilong en.

Jisas i skulim ol man long ol tok na stiatok we inap helpim yumi long bihainim pasin bilong em. Long Bikpela Tok Long Maunten, Jisas i bin kamapim sampela bilong ol dispela stiatok. Bai yumi skelim sampela bilong ol dispela stiatok na olsem wanem bai yumi ken bihainim.

STIATOK: “Ol man i hangre long kisim save long God, ol i ken amamas.”—Matyu 5:3.

ROT EM DISPELA STIATOK I HELPIM YUMI NA I STAP BILONG YUMI I GAT AS TRU BILONG EN:

Tok bilong Jisas i kamapim olsem em pasin bilong yumi ol man long yumi laik save long God. Yumi laik save long bekim bilong ol askim olsem: Yumi stap bilong mekim wanem? Bilong wanem i gat planti pen na hevi i stap? Tru God i save tingim yumi? I gat laip bihain long taim yumi dai? Yumi mas save long bekim bilong ol dispela askim na dispela bai helpim yumi, na i stap bilong yumi bai i gat as bilong en. Jisas i save olsem i gat wanpela rot tasol bilong kisim bekim bilong ol dispela askim—em Baibel. Long Beten em i mekim long Papa bilong em, Jisas i tok: “Tok bilong yu em i tok i tru.” (Jon 17:17) Yu ting Tok Bilong God inap tru long helpim yumi long save gut long God na stap amamas?

STORI BILONG WANPELA MAN:

Esa, em i wanpela man bilong singsing long wanpela rok ben, na em inap kamap hapman bilong pilaim ol rok musik. Maski i olsem, Esa i no stap amamas tru. Em i tok: “Maski mi amamas long dispela rok ben, mi gat laik long i stap bilong mi i gat as tru bilong en.” Tasol bihain, em i bungim wanpela Witnes Bilong Jehova. Esa i tok: “Mi sutim planti askim long em. Tasol pasin bilong em long yusim Baibel long bekim tok i kirapim laik bilong mi long kisim save long Baibel, olsem na mi orait long em i stadi long Baibel wantaim mi.” Esa i pilim tru long bel ol tok em i lainim long Baibel stadi bilong em na dispela i kirapim em long dediketim laip bilong em long Jehova. Em i tok: “Pastaim kain kain hevi i save painim mi. Nau i stap bilong mi i gat as tru bilong en.”a

STIATOK: “Ol man bilong marimari, ol i ken amamas.”—Matyu 5:7.

ROT EM DISPELA STIATOK I HELPIM YUMI NA I STAP BILONG YUMI I GAT AS TRU BILONG EN:

Man i gat pasin marimari em i save sori, mekim pasin helpim na tingim gut ol narapela. Jisas i bin mekim pasin marimari long ol man em ol i mas kisim helpim. Em i sori tru long ol man, na dispela i kirapim em long oraitim ol sik bilong ol. (Matyu 14:14; 20:30-34) Taim yumi bihainim pasin bilong Jisas long marimari long ol narapela, dispela i mekim na i stap bilong yumi i gat as bilong en, long wanem, ol man i mekim pasin marimari long ol narapela ol i save amamas. (Aposel 20:35) Taim yumi mekim gutpela tok na gutpela pasin long narapela man, yumi mekim pasin marimari long ol man i nidim helpim. Olsem wanem? Taim yumi mekim pasin marimari long narapela, dispela i helpim tru yumi long i stap amamas?

STORI BILONG WANPELA MERI:

Maria na man bilong em Carlos, tupela i stap gutpela eksampel long pasin marimari. Mama bilong Maria i dai na Papa i stap wanpis, na inap sampela yia i go pinis em i bin sik na slip tasol long bet. Maria na Carlos i kisim em i go long haus bilong ol na lukautim em long olgeta samting. Planti nait ol i no save slip, na sampela taim, taim sik suga bilong em i go antap ol i mas hariap long kisim em i go long haus sik. Ol i tok olsem sampela taim ol i save taiet nogut tru. Tasol olsem Jisas i tok, ol i amamas na belgut long wanem, ol i mekim olgeta samting ol inap mekim bilong lukautim gut papa bilong Maria.

STIATOK: “Ol man bilong mekim i dai kros, ol i ken amamas.”—Matyu 5:9.

ROT EM DISPELA STIATOK I HELPIM YUMI NA I STAP BILONG YUMI I GAT AS TRU BILONG EN:

Bilong i stap olsem “man bilong mekim i dai kros,” yumi mas stap wanbel wantaim ol narapela. Olsem wanem pasin bilong i stap wanbel wantaim ol narapela i mekim na i stap bilong yumi i gat as tru bilong en? Wanpela samting em, yumi amamas long stap gut wantaim ol narapela. I gutpela yumi bihainim tok bilong Baibel, olsem: “Yupela i mas mekim olgeta samting yupela inap mekim bilong i stap wanbel wantaim olgeta man.” (Rom 12:18) Dispela tok “olgeta man,” i makim famili bilong yu na ol narapela husat i no wanbilip bilong yu. Olsem wanem? Pasin bilong i stap wanbel wantaim “olgeta man” inap mekim na i stap bilong yumi i gat as tru bilong en?

STORI BILONG WANPELA MERI:

Tingim Nair. Inap sampela yia i go pinis, planti samting i bin traim pasin bilong em long stap bel isi, moa yet insait long famili bilong em. Inap 15 yia i go pinis taim man bilong em i lusim em, em yet i bin mekim bikpela long ol pikinini. Wanpela pikinini man i save kisim drak na i paulim het bilong em na em i save tok long paitim mama na ol susa bilong em. Nair i save olsem ol tok bilong Baibel em i bin lainim i strongim em long stap bel isi, maski em i karim ol dispela hevi. Em i no laik kros o tok pait long ol samting. Em i wok strong long mekim gutpela pasin, na pilim hevi bilong ol narapela. (Efesus 4:31, 32) Em i bilip olsem taim em i wok long lain long pasin bilong i stap bel isi, dispela inap helpim em long pas gut wantaim famili bilong em na ol narapela.

TINGIM OL SAMTING BAI KAMAP BIHAIN

Sapos yumi bihainim ol gutpela skultok bilong Jisas, bai yumi stap belgut na amamas long laip bilong yumi. Tasol sapos yumi laik kisim laip i gat as tru bilong en, yumi mas save tu long ol samting bai kamap bihain. Yumi save olsem yumi bai go lapun, sik, na bihain yumi dai, olsem na hau bai yumi save olsem laip i gat as bilong en? Em ol samting we i save painim yumi.

Tasol i gat gutpela nius long gutpela samting bai kamap bihain! Jehova bai givim planti blesing long ol man husat i “wokabaut olsem Jisas i bin wokabaut.” Jehova i tok promis olsem klostu nau em bai kamapim nupela graun i gat stretpela pasin long en, we ol gutpela man bai kisim kain sindaun Jehova i bin tingting pinis long kamapim—stap oltaim oltaim na no gat sik. Baibel i tok: “Harim! Haus sel bilong God i stap wantaim ol manmeri, na God bai i stap wantaim ol, na ol bai i stap ol lain manmeri bilong em. Na God yet bai i stap wantaim ol. Na em bai mekim drai aiwara i stap long ai bilong ol, na bai i no gat dai moa, na ol bai i no bel hevi na krai moa, na ol bai i no inap pilim pen gen. Ol dispela samting bilong bipo ol i pinis olgeta.”—Revelesen 21:3, 4.

Maria, em pastaim yumi stori long en long namba 1 atikol, em i gat 84 krismas, em i amamas na wet long lukim ol dispela tok i kamap tru. Olsem wanem long yu? Yu laik kisim sampela save moa long “laip tru”—em dispela kain laip bai yumi kisim taim Kingdom Bilong God i bosim graun? (1 Timoti 6:19) Sapos olsem, yu ken askim ol Witnes Bilong Jehova long hap bilong yu o yu ken raitim pas i go long lain i wokim dispela nius.b