BEKIM OL ASKIM BILONG BAIBEL
God inap fogivim ol sin bilong yumi?
Yumi inap mekim ol samting bilong God i ken amamas long yumi
Baibel i tok olgeta manmeri ol i sinman. Yumi kisim pasin bilong mekim sin long namba 1 man, Adam. Olsem na sampela taim yumi save mekim pasin nogut na ating bihain yumi rigret long samting yumi mekim. Pikinini Bilong God em Jisas Krais i bin dai bilong baim bek sin bilong yumi. Ofa bilong Jisas i opim rot long God i ken fogivim ol sin bilong yumi. Dispela em wanpela presen i kam long God.—Ritim Rom 3:23, 24.
Sampela manmeri i bin mekim ol bikpela sin na ol i tingting planti olsem God bai fogivim ol o nogat. Baibel i tok: “Blut bilong Jisas, Pikinini bilong em, i rausim olgeta sin bilong yumi na mekim yumi i kamap klin.” (1 Jon 1:7) Jehova i redi long fogivim ol bikpela sin bilong yumi sapos yumi soim olsem yumi tanim bel tru.—Ritim Aisaia 1:18.
Yumi mas mekim wanem bilong God i ken fogivim sin bilong yumi?
Sapos yumi laik bai God Jehova i fogivim yumi, orait yumi mas kisim save long em na bai yumi ken kliagut long ol pasin bilong em, ol skultok bilong em, na ol samting em i laik yumi mekim. (Jon 17:3) Jehova i fogivim ol man i tanim bel tru long rong ol i bin mekim na ol i senisim pasin bilong ol.—Ritim Aposel 3:19.
Yumi inap mekim ol samting bilong God i ken amamas long yumi. Jehova i save long ol samting yumi no strong long en. Em i save marimari long ol man na mekim gutpela pasin long ol. Olsem wanem? Gutpela pasin helpim bilong em i kirapim yu long kisim sampela save moa long ol samting yu ken mekim bilong amamasim em?—Ritim Song 103:13, 14.