Bilong Wanem Baibel i No Kolim Nem Bilong Sampela Man Em Stori Bilong Ol i Stap Long Baibel?

Long Buk Rut long Baibel, wanpela man husat i no laik mekim wanpela wok bilong em olsem Lo Bilong Moses i makim, Baibel i no kolim nem bilong em. (Rut 4:1-12) Olsem wanem? Yumi ken ting olgeta man em Baibel i no kolim nem bilong ol, ol i man nogut o ol i samting nating tasol?

Nogat. Yumi ken tingim narapela man. Bilong redim laspela kaikai bilong em long Pasova, Jisas i tokim ol disaipel long “go insait long taun na go long dispela man” na redim ol samting long haus bilong em. (Matyu 26:18) Yu ting man hia em Jisas i kolim olsem “dispela man” em i man nogut o em i samting nating? Nogat tru; yumi ken ting “dispela man” em i wanpela disaipel bilong Jisas. Tasol nem bilong em i no bikpela samting long dispela stori, olsem na Baibel i no kolim.

Na tu, Baibel i kolim nem bilong planti man nogut, tasol em i no kolim nem bilong planti gutpela bilipman em stori bilong ol i stap long en. Olsem: Yumi olgeta i save long nem bilong namba 1 meri, em Iv. Tasol pasin bilong Iv long bikhet na tingim em yet tasol i as na Adam i mekim sin, na yumi olgeta i bin kisim bikpela hevi tru long dispela. (Rom 5:12) Tasol tingim meri bilong Noa, Baibel i no kolim nem bilong em, tasol yumi kisim gutpela samting tru long pasin bilong em long i no tingim em yet tasol na bihainim tok na sapotim man bilong em long bikpela wok em i bin mekim. I klia tru olsem, maski nem bilong em i no stap long Baibel, dispela i no makim olsem em i samting nating tasol o God i no orait long em.

I gat sampela man em Baibel i no kolim nem bilong ol, tasol ol i bin mekim bikpela wok insait long ol samting Jehova i tingting pinis long mekim. Tingim liklik meri Israel em i wokmeri nating long haus bilong Naman, em nambawan ofisa long ami bilong Siria. Em i strongim bel na tokaut long bos bilong en, em meri bilong Naman, long profet bilong Jehova i stap long Israel. Dispela i opim rot long wanpela bikpela mirakel i kamap. (2 King 5:1-14) Pikinini meri bilong hetman bilong Israel, em Jepta, em tu i stap gutpela piksa tru long pasin bilong bilip. Long laik bilong em yet em i no laik marit na kamapim pikinini bambai em i ken inapim wanpela tok promis papa bilong em i bin mekim. (Hetman 11:30-40) Na Baibel i no kolim nem bilong ol man i bin raitim winim 40 song, na tu, em i no kolim nem bilong sampela profet em ol i bin mekim ol bikpela wok.—1 King 20:37-43.

Na ol ensel i bin stap gut long God ol i stap gutpela piksa tru long dispela samting. I gat planti handret milion ensel i stap, tasol Baibel i kolim nem bilong tupela tasol—Gebriel na Maikel. (Daniel 7:10; Luk 1:19; Jut 9) Baibel i no kolim nem bilong ol arapela ensel. Olsem: Manoa, em papa bilong Samson, em i tokim wanpela ensel: “Kolim nem bilong yu. Na taim dispela samting i kamap olsem yu bin tok, orait mitupela i ken litimapim nem bilong yu.” Ensel i tok wanem? Em i tok: “Bilong wanem yutupela i laik save long nem bilong mi?” Em nau, ensel i mekim pasin daun na em i no laik kisim biknem ol i mas givim long God tasol.—Hetman 13:17, 18.

Baibel i no kamapim as na nem bilong sampela man i stap long Baibel na sampela man nogat. Tasol ol gutpela man na meri i bin mekim wok bilong God na i no kisim biknem na namba, pasin bilong ol inap skulim gut yumi.