BEKIM OL ASKIM BILONG BAIBEL
I gat as na graun i stap?
Em laik bilong God long graun i mas kamap gutpela ples em ol man i ken stap amamas long en
Graun bilong yumi i gutpela tru long ol samting i gat laip i ken stap long en. I gat wara long graun bilong helpim ol samting i stap laip. Graun i slip sait liklik, tanim tanim na raunim san, olgeta dispela samting i stap long mak stret na bai solwara i no kamap ais o hat tumas. Na tu, atmosfia na strong insait long graun i wok olsem magnet, ol i pasim ol marasin nogut olsem rediesen long bagarapim graun. Ol diwai na animal samting i wok gut wantaim bilong helpim narapela narapela long stap laip, dispela em narakain samting. Olsem na planti man i bilip olsem i gat as na graun i stap.—Ritim Aisaia 45:18.
Tasol ating bai yu tok: ‘I gat as na pen na hevi na wansait pasin tu i stap?’—Ritim Lo 32:4, 5.
Yu ting laik bilong God long graun bai kamap tru?
God i wokim graun bilong ol man i ken stap amamas long en, rispektim narapela narapela, na laikim Krieta bilong ol. Olsem na laip bilong man i winim laip bilong ol diwai na animal samting. Yumi man inap kisim save long Krieta bilong yumi, na yumi inap kamapim pasin laikim na stretpela pasin bilong em.—Ritim Saveman 12:13; Maika 6:8.
Krieta bilong yumi inap mekim olgeta samting em i tingting pinis long mekim. Olsem na yumi ken bilip tru olsem em bai pinisim olgeta pen na hevi na wansait pasin na em bai mekim graun i kamap gutpela ples na ol manmeri i ken stap amamas tru long en.—Ritim Song 37:11, 29; Aisaia 55:11.