Wanpela Presen Bilong i Stap Oltaim i Kam Long Krieta
OLSEM WANEM? Yu save kirap nogut olsem olgeta samting ol saientis i tok i mas i stap bilong ol samting i ken i stap laip long wanpela planet, em ol samting namba wan sapta bilong Baibel i stori long en? Em wanem ol samting?
Bilong ol samting i ken i stap laip, i mas i gat planti wara i stap, olsem Stat 1:2 i stori long en. Wara i no ken kol tumas na kamap ais, o hat tumas na kamap smok. Olsem na planet i no ken stap longwe o klostu tumas long san bilong en. Buk Stat i save stori planti long san na wok em i save mekim long graun.
Bilong ol man i ken i stap laip long wanpela planet, skai bilong planet i mas i gat ol win i stret long ol i ken pulim. Stat 1:6-8 i stori liklik long dispela samting. Stat 1:11, 12 i stori long kain kain diwai na gras samting i kamap, na dispela i save kamapim planti oksijen. Bilong planti narapela narapela kain animal i ken i stap, i mas i gat ol bikpela hap graun i stap na graun i mas kamapim gut ol diwai, gras, na kaikai, olsem Stat 1:9-12 i stori long en. Bilong i gat taim bilong kol i no kol tumas na san i no hat tumas, planet i no ken sanap stret taim em i raunim san, nogat, em i mas slip liklik, olsem graun bilong yumi i save slip saitwei liklik olsem 23.5 digri na dispela i no ken senis nabaut. Graviti bilong mun bilong yumi i save pulim graun na digri bilong em long slip liklik i no save senis. Liklik stori tasol bilong mun na sampela samting em i save mekim i stap long Stat 1:14, 16.
Moses i bin raitim dispela tok long bipo bipo, na em i no gat ol save bilong saiens bilong nau bilong helpim em. Olsem na olsem wanem em inap kamapim ol dispela tok? Yu ting save bilong Moses i winim ol narapela man long taim bilong em na em inap luksave long ol dispela samting? As na em inap raitim ol dispela tok em olsem, Krieta bilong heven na graun i bin kirapim em long raitim. Dispela em i wanpela bikpela samting taim yumi luksave olsem tok bilong Buk Stat i stret wantaim save bilong saiens.
Baibel i kamapim klia olsem i gat as na ol samting yumi lukim long graun na long ples antap i stap. Song 115:16 i tok: “Heven em i ples bilong God tasol, na em i givim graun long yumi manmeri.” Narapela song i tok: “Yu bin putim dispela graun i stap long ples bilong en, na graun i stap strong olgeta. Em i no inap surik liklik. Nogat tru.” (Song 104:5) Sapos ples antap na naispela graun bilong yumi i gat Man i bin tingim na wokim, orait yumi no hatwok long bilip olsem em inap lukautim ol dispela samting tu. Olsem na yumi ken bilip na wetim truim bilong gutpela tok promis, olsem: “Ol stretpela man bai i kisim graun God i givim ol, na bai ol i stap oltaim long en.” (Song 37:29) Yumi save, God “i no wokim graun bilong i stap nating. Nogat. Em i bin wokim bilong olgeta samting”—em ol man i tingim tru ol samting God i bin mekim—“i ken i stap” oltaim long en.—Aisaia 45:18.
Baibel i tok, Jisas i kam daun long graun bilong skulim yumi long God na laik bilong Em long givim laip oltaim long ol manmeri i bihainim tok bilong em. (Jon 3:16) Yumi ken bilip olsem klostu nau God bai “bagarapim ol man i bin bagarapim graun.” Tasol ol man bilong olgeta hap, em ol i stap bel isi na ol i orait long rot God i makim bilong kisim bek ol man, ol bai abrusim bagarap na i stap laip. (KTH 7:9, 14; 11:18) Laip bai i gutpela tru taim ol man i wok long kisim save na amamas long olgeta taim long ol gutpela samting God i bin wokim!—Saveman 3:11; Rom 8:21.
[Piksa Kredit Lain long pes 8]
NASA photo