Hau Krieta i Kamapim Ol Gutpela Tok Promis

Kirap long taim Krieta i wokim ol man, em i bin toktok wantaim ol man long rot bilong ol ensel na ol profet. Na tu, em i laik ol i raitim tok bilong em na ol tok promis bilong em. Ol dispela tok promis bilong God inap mekim sampela samting long i stap bilong yu long bihain. So yu inap painim we ol tok promis bilong God long nau?

Tok God i givim long yumi i stap long Ol Skripsa Holi. (2 Timoti 3:16) Olsem wanem God i yusim ol profet long raitim tok bilong em? (2 Pita 1:21) God i givim tingting bilong em long ol man, na ol i raitim ol dispela tingting. Dispela i wankain long nau. Sapos wanpela bisnisman i yusim sekreteri bilong em long raitim tok bilong em, yumi bai tingim olsem bisnisman yet i raitim ol dispela tok. Olsem tasol, maski God i yusim ol man long raitim tok bilong em, God yet i kamapim ol tok bilong Ol Rait Holi.

TOK BILONG GOD I GO LONG OLGETA HAP

Tok bilong God i bikpela samting olsem na em i laik bai olgeta man i ritim na kliagut long en. Long nau “gutnius bilong i stap oltaim oltaim” i go long “olgeta kantri, long olgeta traib, [na] long olgeta tokples.” (Revelesen 14:6) God i blesim dispela wok, olsem na Ol Rait Holi olgeta o hap bilong en i stap long winim 3,000 tokples, dispela i winim ol narapela buk long graun.