Baibel Em Wanem Samting?
Bekim Bilong Baibel
Baibel em 66 buk bilong ol rait holi we ol i bungim wantaim. Ol i raitim ol dispela buk insait long klostu 1,600 yia. Baibel i kamapim “tok bilong God.”—1 Tesalonaika 2:13.
Long dispela atikol
Sampela save bilong Baibel
Husat i raitim ol tok bilong Baibel? God em Man i kamapim ol tok i stap long Baibel, tasol em i yusim klostu 40 narapela narapela man long raitim ol tok bilong en. Sampela bilong ol dispela man em Moses, King Devit, Matyu, Mak, Luk, na Jon.a God i givim tingting long ol dispela man husat i raitim ol tok bilong en.—2 Timoti 3:16.
Tingim dispela tok piksa: Sapos bisnisman i tokim sekreteri bilong em long raitim wanpela pas, ating bisnisman bai givim ol poin we em i laikim na sekreteri yet bai raitim, tasol ol dispela tok i bilong bisnisman. Olsem tasol, maski God i yusim ol man long raitim tok bilong em, God yet i stap olsem Man i kamapim ol tok i stap long Baibel.
Wanem mining bilong dispela tok “Baibel”? Dispela tok “Baibel” i kam long tok Grik bilblia, mining bilong en “ol liklik buk.” Bihain dispela tok biblia i makim ol liklik buk we ol i bungim wantaim bilong kamapim Baibel.
Wanem taim ol i raitim Baibel? Ol i kirap raitim Baibel long yia 1513 B.C.E. na ol i pinis long raitim bihain long winim 1,600 yia, long 98 C.E. samting.
Baibel ol i raitim long namba wan taim i stap we? Baibel ol i raitim long namba wan taim i no stap moa, bikos ol i raitim ol tok bilong en long ol samting inap bagarap kwiktaim, olsem papairas na skin bilong ol animal. Tasol ol saveman i bin kopim gut ol tok bilong Baibel insait long planti handret yia, na bai ol tok i stap yet na ol man i ken ritim long bihain.
“Olpela Testamen” na “Nupela Testamen” i Makim Wanem Samting? Ol buk planti man i kolim olsem Olpela Testamen em ol buk bilong Baibel we ol i bin raitim long tokples Hibru, b ol i kolim tu olsem Ol Skripsa Hibru. Ol buk ol i kolim olsem Nupela Testamen em ol buk bilong Baibel ol i raitim long tokples Grik, ol i kolim tu olsem Ol Skripsa Grik. Taim ol i bungim tupela hap wantaim, ol i kolim olsem Ol Skripsa Holi.c
Wanem kain ol tok i stap long Baibel? Ol buk bilong Baibel i stori long histori, ol lo, ol tok profet, ol poem, ol provep, ol singsing, na ol pas. Lukim “Lista bilong ol buk bilong Baibel.”
Baibel i stori long wanem samting?
Kirap bilong Baibel i stori long hau God i Gat Olgeta Strong i bin wokim heven na graun. Long Baibel, em i kamapim nem bilong em, Jehova, na dispela i soim olsem em i laik bai ol manmeri i mas save long em.—Buk Song 83:18.
Baibel i stori olsem sampela i bin sutim tok giaman long God, na em i stori tu long hau em bai stretim gen gutnem bilong em.
Baibel i kamapim risen na God i wokim ol manmeri na graun. Na tu. em i stori long hau bai God i pinisim ol samting i save givim pen na hevi long ol manmeri.
Baibel i kamapim ol gutpela edvais long ol samting yumi mekim long wan wan de. Hia em sampela eksampel:
Strongim gutpela pasin pren. “Olgeta samting yupela i laik bai ol man i mekim long yupela, yupela i mas mekim long ol.”—Matyu 7:12.
Mining: Pasin yumi laik bai ol narapela i mekim long yumi, yumi mas mekim long ol.
Karim hevi bilong wari na tingting planti. “No ken tingting planti long ol samting bilong de antap, long wanem, de antap bai i gat ol wari bilong en.”—Matyu 6:34.
Mining: Yumi no ken wari na tingting planti long samting bai kamap bihain, nogat, yumi mas tingting tasol long ol samting bilong wan wan de.
Amamas insait long marit. “Yupela olgeta wan wan i mas laikim ol meri bilong yupela olsem yupela i save laikim yupela yet. Na maritmeri i mas i gat bikpela rispek long man bilong em.”—Efesus 5:33.
Mining: Pasin bilong laikim na rispektim narapela em bikpela samting long ol marit i ken stap amamas.
Tok bilong Baibel i bin senis?
Nogat. Ol saveman i skelim olpela manuskrip bilong Baibel bilong bipo na Baibel long nau na ol i luksave olsem ol tok bilong en long pastaim i stap wankain yet na i no bin senis. Dispela em stret—sapos God i laik ol manmeri i mas ritim tok bilong em na kliagut long mining bilong en, em i no inap larim wanpela man i senisim tok bilong em.d—Aisaia 40:8.
Wai na i gat narapela narapela trenslesen bilong Baibel?
Planti man long nau i no inap save long olpela tokples ol i raitim Baibel long en. Tasol Baibel i gat “gutnius” bilong ol manmeri long ‘olgeta kantri, olgeta traib, na olgeta tokples.’ (Revelesen 14:6) Dispela em risen na ol manmeri i nidim Baibel ol i trensletim long tokples ol i save long en na bai ol i ritim na kliagut long tok bilong God.
Baibel ol i trensletim i kamapim 3-pela wei ol i yusim:
Trensletim wan wan wed olsem i stap long tokples ol i bin yusim long bipo.
Trensletim mining bilong ol tok olsem i stap long ol tokples ol i bin yusim long bipo.
Trensletim long tingting na laik we man i senisim ol tok, em i mekim olsem na bai ol man i amamas long ritim. Tasol sampela taim dispela wei i haitim mining tru bilong tok em ol i raitim long namba wan taim.
Gutpela trenslesen bilong Baibel em Baibel we ol i trensletim stret ol tok bilong en, na tu, ol i yusim tokples we ol man i save long nau na bai ol manmeri i ken ritim na kliagut.e
Husat i mekim disisen long ol tok i mas stap long Baibel?
Olsem Man i kamapim ol tok bilong Baibel, em i makim ol samting bilong i stap long Baibel. Pastaim em i makim lain Israel bilong bipo long ol i ken lukautim “ol tok holi bilong em,” olsem na ol i sambai long Ol Skripsa Hibru.—Rom 3:2.
I gat sampela buk bilong Baibel i lus?
Nogat. Olgeta buk bilong Baibel i stap, i no gat wanpela i lus. Sampela man i ting olsem ol i haitim sampela buk bilong bipo we i hap bilong Baibel.f Tasol Baibel i gat olgeta buk we ol i bin raitim long bipo. (2 Timoti 1:13) God i kamapim olgeta tok bilong ol buk bilong Baibel. Yumi no inap mekim wankain tok long ol rait em ol i bin raitim long bipo we ol man i ting em i hap bilong ol buk bilong Baibel.g
Rot bilong painim ol ves bilong Baibel
Lista bilong ol buk bilong Baibel
a Bilong lukim lista bilong olgeta buk bilong Baibel, ol man i raitim, na taim ol i raitim, plis lukim “Ol Buk Bilong Baibel.”
b Liklik hap bilong Baibel i stap long Arameik, tokples we i klostu wankain long Hibru.
c Planti lain bilong ritim Baibel i laikim dispela tok “Ol Skripsa Hibru” na “Ol Skripsa Grik.” Ol dispela tok i helpim man long abrusim tingting olsem ol tok bilong “Olpela Testamen” i olpela na “Nupela Testamen” i kisim ples bilong en.
e Planti i amamas long ritim Nupela Taim Trenslesen Bilong Ol Skripsa Holi bikos ol i tanim stret ol tok em i isi long ritim. Lukim “Yu Ting Ol Tok Bilong Nupela Taim Trenslesen i Stret?”
f Ol i bungim ol dispela buk na kolim olsem Apokrifa. Buk Encyclopædia Britannica i tok, “long ol litresa bilong Baibel, [dispela tok i makim] ol rait i no hap bilong Baibel”—olsem ol buk i no stap long lista bilong ol buk bilong Baibel.
g Bilong kisim sampela save moa, lukim “Ol Gutnius Apokrifa—Yu Ting Em Ol Stori Long Jisas i Stap Hait?”