BAIBEL Bilong Wanem i Gat Planti?

Bilong wanem i gat planti narapela narapela vesen bilong Baibel long nau? Yu ting ol dispela nupela trenslesen bilong Baibel i helpim yu o pasim yu long kliagut long ol tok bilong en? Sapos yu kisim save long risen na ol i mekim ol dispela trenslesen bilong Baibel, dispela bai helpim yu long skelim gut ol tok bilong ol dispela Baibel.

Husat i bin kirap raitim ol tok bilong Baibel, na long wanem taim?

BAIBEL BILONG PASTAIM

Ol i divaidim Baibel i go long 2-pela seksen. Namba 1 seksen i gat 39 buk em “God i putim ol tok holi bilong en.” (Rom 3:2) Holi spirit bilong God i stiaim ol bilipman long raitim ol dispela buk bilong Baibel. Ol i mekim olsem inap longpela haptaim—em inap olsem 1,100 yia kirap long 1513 B.C.E. i go inap sampela taim bihain long 443 B.C.E. Ol i raitim planti bilong ol dispela buk long tokples Hibru, olsem na yumi kolim Ol Skripsa Hibru, o Olpela Testamen.

Namba 2 seksen i gat 27 buk we i kamapim tu “tok bilong God.” (1 Tesalonaika 2:13) Holi spirit bilong God i stiaim ol disaipel bilong Jisas Krais na ol i raitim ol dispela buk insait long sotpela haptaim—em inap olsem 60 yia kirap long 41 C.E. i go long 98 C.E. Ol i raitim planti bilong ol dispela buk long tokples Grik, olsem na yumi kolim Ol Skripsa Grik, o Nupela Testamen.

Ol i bungim dispela 66 buk na kamapim Baibel olgeta—em ol tok God i givim long ol manmeri. Tasol bilong wanem ol i wokim ol narapela trenslesen bilong Baibel? I gat 3-pela risen na ol i mekim olsem.

• Bilong helpim ol manmeri long ritim Baibel long tokples bilong ol yet.

• Bilong rausim ol popaia na putim bek ol tok bilong Baibel long pastaim.

• Bilong senisim ol olpela tok bilong bipo.

Ol i yusim dispela 3-pela risen na trensletim 2-pela Baibel long pastaim.

BAIBEL GRIK SEPTUAGINT

Inap 300 yia paslain long taim bilong Jisas, ol saveman bilong Juda i kirap trensletim Ol Skripsa Hibru i go long tokples Grik. Ol i kolim trenslesen bilong dispela Baibel olsem Grik Septuagint. Bilong wanem ol i wokim dispela Baibel? Ol i laik helpim lain Juda husat i mekim tokples Grik long kisim save long ol “Rait Holi.”—2 Timoti 3:15.

Baibel Septuagint i helpim tu planti milion manmeri husat i no bilong lain Juda, na ol lain husat i mekim tokples Grik na ol inap kisim save long tok bilong Baibel. Ol i mekim olsem wanem? Profesa W.  F.  Howard i tok: “Long taim bilong ol aposel, ol misineri bilong lotu Kristen i yusim Baibel Septuagint na ol i go long ol haus lotu bilong ‘kamapim klia olsem Jisas em Mesaia.’” (Aposel 17:3, 4; 20:20) Wanpela saveman bilong Baibel em F.  F.  Bruce i tok, pasin ol misineri i mekim i kirapim planti lain Juda na “ol i no gat intres moa long Baibel Septuagint.”

Isi isi ol disaipel bilong Jisas i kisim ol buk bilong Baibel long Ol Skripsa Grik na bungim wantaim Baibel Septuagint bilong Ol Skripsa Hibru, na dispela i kamapim Baibel olgeta em yumi gat long nau.

BAIBEL LATIN VULGATE

Jerome, em wanpela saveman bilong lotu husat i stap inap 300 yia bihain long ol i pinis raitim Baibel Septuagint. Em i kamapim Latin trenslesen bilong Baibel, em ol i kolim Latin Vulgate. I gat ol narapela Baibel long tok Latin i stap pinis, tasol bilong wanem ol i mas wokim nupela Baibel gen long tok Latin? Wanpela buk The International Standard Bible Encyclopedia i tok: Jerome i laik stretim “ol hap tok we i no stret, ol popaia, na skelim tu sapos i gat wok long rausim o putim bek sampela tok.”

Jerome i stretim planti bilong ol dispela popaia. Tasol bihain long sampela haptaim, ol bikman bilong lotu i mekim sampela bikpela asua! Ol i tokaut olsem ol manmeri i mas yusim tasol Latin Vulgate na i no ol narapela Baibel ol i trensletim. Olsem na dispela Baibel tasol i stap inap planti handret yia! Ol lain husat i go pas long tokaut long dispela Baibel i no helpim ol manmeri long kisim save long ol tok bilong en, nogat. Olsem na planti manmeri i no save long tok Latin.

PLANTI NUPELA TRENSLESEN BILONG BAIBEL

Long 500 C.E. samting, ol manmeri i wok yet long trensletim ol narapela Baibel—kain olsem Baibel Siria Peshitta em olgeta man i save long en. Tasol long yia 1350, ol trensleta i wok strong moa long trensletim Baibel i go long ol narapela tokples em planti manmeri inap save long en.

Long yia 1358 samting long Inglan, John Wycliffe i wok strong long trensletim ol dispela Baibel i go long tok Inglis na ol manmeri long ples bilong em inap kliagut long tok bilong Baibel. Bihain liklik, Johannes Gutenberg i kamapim ol rot bilong prinim Baibel na dispela i bin helpim planti saveman bilong Baibel long wokim na tilim ol nupela trenslesen bilong Baibel long planti hap bilong Yurop.

Taim Baibel long tok Inglis i kamap planti, ol manmeri i luksave olsem i gat nid long ol i mas trensletim ol narapela vesen bilong Baibel i go long tok Inglis. Long yia 300, wanpela pris long Inglan, em John Lewis i tok: “Ol tokples i wok long senis na sampela tok i no gat mining bilong en moa, olsem na em i bikpela samting long ol i mas skelim gen ol olpela trenslesen na putim ol tok em planti man long nau i save yusim.”

Long nau, ol saveman bilong Baibel inap skelim gut ol olpela trenslesen bilong Baibel winim bipo. Ol i save gut long ol tokples em ol i bin yusim long raitim ol Baibel long bipo, na tu, ol i painim ol manuskrip bilong bipo na dispela i helpim gut wok bilong trensletim Baibel. Dispela i helpim ol long bihainim stret ol tok ol i bin yusim long raitim Baibel long pastaim.

Olsem na ol tok bilong ol nupela vesen bilong Baibel inap tru long helpim yumi. Tasol i gutpela moa long skelim gut sampela bilong ol dispela trenslesen bilong Baibel.a Tasol sapos pasin laikim bilong God i kirapim ol man long skelim gen ol tok bilong ol nupela trenslesen bilong Baibel, orait wok bilong ol inap helpim yumi tru long nau.