Ol Kristen i Mas Selebretim Krismas?

Planti milion manmeri long olgeta hap bilong graun i bilip olsem krismas em taim bilong tingim de mama i karim Jisas Krais. Tasol yu ting ol Kristen long taim bilong ol aposel husat i pas gut wantaim Jisas i selebretim krismas? Baibel i tok wanem long pasin bilong selebretim betde? Taim yumi kisim bekim bilong ol dispela askim, yumi bai save sapos i stret long ol Kristen i selebretim krismas o nogat.

Namba 1, Baibel i no stori olsem sampela Kristen long bipo i bin selebretim betde bilong Jisas o betde bilong ol narapela bilipman. Baibel i stori tasol long betde bilong 2-pela man. Ol i no lotuim Jehova, em God husat i as bilong ol tok bilong Baibel. Na tu, ol pasin nogut i bin kamap long betde bilong ol. (Stat 40:20; Mak 6:21) Buk Encyclopædia Britannica i tok olsem ol Kristen long bipo i sakim “pasin bilong ol haiden long selebretim betde.”

Baibel i no kolim de stret Jisas i bon long en. Buk Cyclopedia bilong McClintock na Strong i tok: “N[upela] T[estamen] o ol narapela buk i no kolim stret de Krais i bon.” Sapos Jisas i laik bai ol disaipel i selebretim betde bilong em, ating em bai tokim ol long de mama i karim em.

Namba 2, Baibel i no stori olsem Jisas o wanpela bilong ol disaipel bilong em i bin selebretim krismas. Buk New Catholic Encyclopedia i tok, namba 1 taim stori i kamap long pasin bilong selebretim krismas em “taim Philocalus i yusim masin bilong em we i save rekodim taim bilong ol samting i kamap, na ol dispela samting i stap long wanpela buk em ol i bin painim long 336 [C.E.].” Dispela samting i kamap bihain long taim ol i bin raitim Baibel olgeta na sampela handret yia bihain long Jisas i stap long graun. McClintock na Strong i luksave olsem “God i no as bilong pasin bilong selebretim krismas, na tu, em i no stap long N[upela] T[estamen] bilong bipo.”a

Jisas, em Bikpela Tisa, na em i tokaut klia long samting em i laik bai ol disaipel bilong em i mas mekim, na dispela stori i stap long Baibel. Tasol Jisas i no tokim ol disaipel long selebretim krismas. Tingim, taim tisa i givim ol instraksen long ol sumatin long samting ol i mas mekim, em i laik bai ol i bihainim stret ol dispela instraksen, olsem tasol Jisas tu i no laik bai ol disaipel bilong em i “kalapim ol tok i stap long Rait Holi.”—1 Korin 4:6.

Tasol i gat wanpela bikpela bung em ol Kristen long pastaim i save gut long en—em bung bilong tingim dai bilong Jisas o Memorial. Jisas yet i tokim ol disaipel bilong em long mekim dispela bung na em i soim ol long pasin bilong mekim. Dispela tok Jisas i givim long ol disaipel, na de em i bin dai long en i stap long Baibel.—Luk 22:19; 1 Korin 11:25.

Olsem yumi stori pinis, ol man i ting krismas em taim bilong selebretim betde, tasol ol Kristen bilong bipo i no bihainim dispela bilip bilong ol haiden. Na tu, Baibel i no stori olsem Jisas o ol narapela man i bin selebretim krismas. Olsem na planti milion Kristen long olgeta hap bilong graun i kamapim klia olsem ol i no inap selebretim krismas.