Yu Ting Yu Mas Lain Long Tok Hibru na Tok Grik?

LONG pastaim, ol i bin raitim bikpela hap bilong Baibel long tupela tokples tasol, em tok Hibru na tok Grik.a Holi spirit bilong God i bin stiaim ol man husat i bin raitim Baibel long ol dispela tokples. (2 Samuel 23:2) Olsem na yumi ken tok, “spirit bilong God yet i bin kamapim” ol tok ol i raitim long Baibel.​—2 Timoti 3:​16, 17.

Tasol planti man bilong ritim Baibel long nau ol i no save long tok Hibru o tok Grik. Ol i mas ritim Baibel long tokples bilong ol yet. Ating yu tu i mas mekim olsem. Ol man bilong tanim Baibel long ol dispela tokples ol i no tok, spirit bilong God i bin stiaim ol na ol i mekim, nogat. Olsem na ating sampela taim yu tingting olsem: ‘Taim mi ritim wanpela Baibel ol i bin tanim, mi inap kisimgut ol tok bilong en, o mi mas lain long tok Hibru na tok Grik?’

Sampela Samting Yu Mas Tingim

Paslain long bekim dispela askim, i gat sampela samting yu mas tingim. Namba wan: Maski man i gat save long tok Hibru o tok Grik bilong pastaim, dispela yet i no inap helpim em long kisimgut ol tok bilong Baibel. Jisas i bin tokim ol Juda long taim bilong em: “Yupela i ting tok i stap long buk bilong God i save givim yupela laip i stap gut oltaim oltaim. Olsem na yupela i save wok long ritim na skelim olgeta tok i stap long buk bilong God. Tasol buk bilong God tu i save tokaut long mi, na yupela i no laik i kam long mi bilong kisim laip.” (Jon 5:​39, 40) Wanem samting i pasim ol? Yu ting ol i no gat save long tok Hibru? I no olsem, ol i save gut long dispela tokples. Tasol Jisas i tok moa olsem: “Mi save long yupela. Long bel bilong yupela, yupela i no gat laik long God.”​—Jon 5:42.

Na aposel Pol i tokim ol Kristen bilong Korin em ol i save mekim tok Grik: “Ol Juda i save strong tumas long lukim ol mirakel, na ol Grik i wok strong long kisim gutpela tingting na save. Tasol mipela i save autim tok bilong Krais i dai pinis long diwai . . . na dispela tok i olsem tok nogut long tingting bilong ol Juda. Na ol Grik i ting dispela em i kranki toktok tasol.” (1 Korin 1:​22, 23) Em nau, maski man i save long tok Hibru o tok Grik, dispela tasol i no inap mekim na em i bilipim ol tok i stap long Baibel, nogat.

Namba tu samting i olsem: Maski sampela man long nau ol i save long tok Hibru na tok Grik bilong nau, ol dispela tokples i no wankain long tok Hibru na tok Grik em ol i bin raitim Baibel long en. Planti man long nau em ol i save mekim tok Grik, ol i hatwok long kliagut long tok Grik bilong Baibel. As bilong dispela em olsem: Ol i bin skruim planti nupela tok long dispela tokples, na ol i senisim sampela tok bilong bipo, na planti wed i stap yet ol i gat narapela mining. Olsem: Dispela tok “gutpela” long Aposel 7:20 na Hibru 11:​23, long tok Grik bilong nau mining bilong en i olsem “pani.” Na tu, planti senis i kamap long pasin bilong kolim dispela tokples.

Na sapos yu lainim tok Hibru na tok Grik bilong nau, dispela i no makim olsem yu bai kliagut moa long ol tok bilong Baibel long tokples ol i bin raitim long pastaim tru. Yu bai i gat wok long skelim ol dikseneri na buk i kamapim ol lo bilong kolim dispela tokples bambai yu ken save long olsem wanem ol i bin kolim dispela tokples taim ol i raitim ol hap bilong Baibel long pastaim tru.

Namba tri samting i olsem: Em i hatwok tru long lainim wanpela nupela tokples. Ating pastaim i no hatwok tumas long lainim sampela liklik hap tok, tasol ating bai yu mas lain inap planti yia bilong kisimgut insait bilong dispela tokples na pasin na lo bilong kolim stret ol tok. Na ating bai yu lukim truim bilong wanpela savetok bilong bipo, olsem: Liklik save tasol inap nogutim man. Long wanem rot?

Wanem Mining Bilong Dispela Tok?

Olsem wanem? Wanpela man husat i lainim tokples bilong yu em i bin askim yu long mining bilong wanpela tok? Sapos olsem, orait yu save olsem sampela taim i hatwok long bekim gut dispela askim. Bilong wanem? Long wanem, wanpela wed i no gat wanpela mining tasol​—em i gat tupela o tripela mining. Ating yu bin askim em long kolim dispela wed insait long wanpela sentens. Sapos em i no bungim dispela wed wantaim sampela tok moa, ating bai yu hatwok long skelim gut mining stret bilong en. Ating em i askim yu long mining bilong wanpela wed olsem “ain.” Dispela wed i gat planti mining bilong en. Em inap makim ain tru tru ol i kisim insait long graun, o samting bilong ainim klos. Na em inap makim tu hap ain ol i pasim long lek bilong ol kalabusman, o wanpela marasin yumi kisim bilong helpim bodi. Olsem na dispela tok “ain” i gat kain kain mining bilong en. Orait wanem mining i stret long dispela wed?

Ating dikseneri inap kamapim olgeta kain mining bilong wanpela wed. Taim ol dikseneri i stori long mining bilong ol tok, sampela dikseneri i save stori pastaim long ol mining em planti man i kliagut long en, na bihain ol i kamapim ol narapela mining. Tasol sapos yu ritim ol tok i stap klostu long dispela wed, dispela bai helpim yu long save long mining tru bilong en. Yumi ken tok piksa olsem: Ating yu gat sampela save long ol marasin na yu laik save long as bilong sampela kain pen yu wok long pilim. Yu inap lukim dikseneri i stori long ol kain kain marasin na sik. Ating dikseneri bai kamapim olsem long 90 pesen bilong ol man, dispela pen ol i pilim inap makim wanpela sik stret, tasol long 10 pesen bilong ol man, dispela pen inap makim sik i narapela olgeta. Yu mas kisim planti save moa bambai yu inap save gut long as bilong pen yu pilim long bodi. Na olsem tasol, maski planti taim wanpela wed i gat wanpela mining tasol, dispela i no inap helpim yu sapos yu ritim tok bilong wanpela bikpela samting na ol i yusim dispela wed na em i gat narapela mining bilong en. Yu mas save gut long ol tok i stap klostu long dispela wed bambai yu inap kliagut long mining bilong en.

Na taim yu laik stadi long sampela wed i stap long Baibel, yu mas save tu long ol wed i stap klostu long dispela wed. Olsem: Ol tok Hibru bilong pastaim em ol i tanim olsem “spirit,” ol i gat kain kain mining, na bilong save long mining stret insait long wanpela sentens, yu mas lukim ol ves i stap klostu long en. Sampela taim yumi inap tanim stret olsem “win.” (Kisim Bek 10:13; Jon 3:8) Na sampela taim ol i makim strong bilong laip i stap long olgeta samting i gat laip, em ol man na animal wantaim. (Stat 7:22; Song 104:29; Jems 2:26) Na ol ensel long heven tu em yumi no inap lukim ol, Baibel i kolim ol olsem spirit. (1 King 22:​21, 22; Matyu 8:16) Strong bilong God long mekim wok, Baibel i kolim olsem holi spirit. (Stat 1:2; Matyu 12:28) Na sampela taim dispela tok i makim wanpela strongpela pasin o tingting i stap long wanpela man o long wanpela lain.​—Galesia 6:18.

Maski sapos wanpela dikseneri bilong tok Hibru o tok Grik i kamapim lista bilong ol dispela kain kain mining, ol tok i stap klostu long dispela wed bai helpim yu long save long stretpela mining bilong en.b Na olsem tasol long taim yu ritim Baibel long ol tokples bilong pastaim tru o yu ritim Baibel em ol i bin tanim long tokples bilong yu.

Yu Ting i Gat Rong Long Ritim Baibel Ol i Bin Tanim?

Sampela i bin wok strong tru long lainim tok Hibru o tok Grik bilong Baibel o tupela tokples wantaim. Ol i save bai ol i no inap kisimgut sampela tok, tasol ol i amamas long ol inap ritim Baibel long tokples ol i bin raitim long pastaim tru, na ol i pilim olsem hatwok bilong ol i no lus nating. Tasol sapos yu no inap mekim olsem, yu ting i stret yu bel hevi long dispela na lusim wok bilong kisim save long tok i tru bilong Baibel? Nogat tru! I gat sampela as na yu no ken mekim olsem.

Namba wan as em olsem: I stret long yu ken mekim wok long wanpela Baibel ol i bin tanim. Ol man bilong raitim Ol Skripsa Grik, em ol i kolim Nupela Testamen, taim ol i kolim wanpela hap tok bilong Ol Skripsa Hibru (olsem Olpela Testamen), planti taim ol i save kamapim ol tok i stap long Baibel ol i bin tanim long tok Grik.c (Song 40:6; Hibru 10:​5, 6) Ol i save mekim tok Hibru na ol inap kolim tok i stap long Baibel Hibru bilong pastaim tru, tasol i luk olsem ol i laik yusim Baibel em planti man inap kisim.​—Stat 12:3; Galesia 3:8.

Namba tu i olsem: Maski wanpela man i save gut long ol tokples ol i bin raitim Baibel long en long pastaim, em inap ritim ol tok bilong Jisas long Baibel ol i bin tanim. Dispela i olsem, long wanem, Jisas i bin mekim ol tok bilong em long wanpela kain tok Hibru, na ol man bilong raitim fopela Gutnius ol i bin raitim ol dispela tok bilong em long tokples Grik.d Sapos wanpela man inap ritim ol tok em ol wokman bilong Jehova bilong bipo i bin raitim long tokples bilong ol yet, em inap ting em i gat narapela kain gutpela save. Tasol em i mas tingim olsem yumi inap ritim tasol tok bilong Jisas long Baibel ol i bin tanim pinis. Jehova i mekim na ol tok nambawan Wokman bilong em i mekim i no ken lus, na ol dispela tok i stap long Baibel ol i bin tanim long tokples em planti manmeri moa i save long en long dispela taim bipo​—na dispela i makim olsem tokples yumi save ritim Baibel long en i no bikpela samting. Nambawan bikpela samting em olsem, yumi ritim ol tok bilong en long tokples em yumi inap kliagut long en na bihainim.

Namba tri i olsem: “Gutnius” i stap long Baibel em i bilong ol man bilong pasin daun i ken kisim na ritim, em ol i bilong “olgeta lain man na bilong olgeta kantri na bilong olgeta tok ples na bilong olgeta kain skin.” (KTH 14:6; Luk 10:21; 1 Korin 1:​27-29) Olsem na klostu olgeta manmeri bilong nau ol inap kisim wanpela Baibel long tokples bilong ol yet na kisim save long ol samting God i tingting pinis long mekim, na ol i no gat wok long lainim narapela tokples. Long sampela tokples, i gat planti Baibel em ol narapela narapela lain i bin tanim, na man i ken makim wanem Baibel em i laik ritim.e

Orait olsem wanem yu ken save tru olsem yu kisimgut tok i tru i stap long Baibel? Ol Witnes Bilong Jehova i lukim olsem, sapos ol i makim wanpela samting ol i laik stadi long en long Baibel, orait ol i mas skelim gut ol ves i stap klostu long en bambai ol inap kliagut long mining bilong en. Olsem: Ol i makim wanpela tok, olsem “Marit,” na ol i painim ol ves i stori long dispela samting. Long dispela rot, ol i larim wanpela hap bilong Baibel i kamapim klia mining bilong narapela hap bilong en. Ol Witnes Bilong Jehova i redi long mekim fri Baibel stadi wantaim ol man. Olsem na sapos yu laik, ol bai amamas long mekim Baibel stadi wantaim yu. Maski yu save mekim wanem tokples, God i laik “kisim bek olgeta [“kain,” NW] manmeri, bai ol i ken save long as bilong tok tru.”​—1 Timoti 2:4; KTH 7:9.

[Ol Futnot]

[Blok/Piksa long pes 22]

Baibel Septuagint

Ol Juda i save mekim tok Grik long taim bilong Jisas na ol aposel bilong em ol i bin mekim bikpela wok long Baibel Grik Septuagint. Dispela Baibel em Ol Skripsa Hibru ol i bin tanim long tok Grik. Baibel Septuagint i gat nem, long wanem, ol i ting em i namba wan Baibel ol i bin tanim i go long narapela tokples, na tu, ol i lusim planti yia moa long tanim ol tok bilong en. Wanpela lain bilong tanim tok ol i bin kirapim wok bilong tanim Baibel Septuagint inap 250 yia samting paslain long Krais, na ol narapela lain i pinisim dispela wok inap wan handet yia samting bihain.

Ol Kristen bilong pastaim ol i kirap kwik long mekim gutpela wok long Septuagint bilong kamapim long ples klia olsem Jisas em i Krais, em Mesaia God i bin promis long salim i kam. Ol i bin mekim gutpela wok tru long Baibel Septuagint, olsem na sampela i ting em i wanpela Baibel ol Kristen i bin tanim. Dispela i mekim na ol Juda i no laikim moa dispela Baibel, olsem na ol i tanim sampela nupela Baibel long tok Grik. Wanpela man husat i bin bihainim lotu Juda, nem bilong em Aquila, em i bin kamapim wanpela Baibel inap wan handet yia samting bihain long Krais. Wanpela saveman bilong Baibel i stori long Baibel em Aquila i bin tanim, na em i tok long wanpela samting em i kirap nogut long en. Nem bilong God, Jehova, ol i raitim long ol leta Hibru, i kamap planti taim long dispela Baibel Grik bilong Aquila.

[Kredit Lain]

Israel Antiquities Authority

[Ol Piksa long pes 23]

Em i bikpela samting long yumi mas ritim Baibel long tokples em yumi inap kliagut long en na bihainim