Wetim Dispela Taun i Save Stap Oltaim

1. Jisas i tok profet long wanem samting bai kamap long Jerusalem long taim bilong ol aposel?

SAMPELA de paslain long Jisas Krais i dai, em i mekim wanpela tok profet em namba wan truim bilong en i bin kamap long las de bilong haptaim bilong ol Juda. Em i tok lukaut olsem wanpela taim “ol ami [bai] kam banisim Jerusalem.” (Luk 21:20) Jisas i tokim ol disaipel bilong em olsem taim ol i lukim ol ami i kam—ol ami bilong Rom—ol i mas lusim taun kwiktaim.—Luk 21:​21, 22.

2. Aposel Pol i givim wanem tok lukaut long ol Kristen Hibru long Judia na Jerusalem?

² Sampela yia paslain long ami bilong Rom i kam banisim Jerusalem, aposel Pol i raitim wanpela strongpela pas em nau yumi save long en olsem Buk Hibru. Long dispela pas, Pol i givim tok long ol Kristen long Judia na Jerusalem bilong helpim ol long redi long ol samting bai kamap klostu taim. Wanem samting bai kamap klostu taim? Klostu nau Jerusalem bai bagarap. Sapos ol dispela Kristen i laik abrusim bagarap, orait ol i mas redi long lusim ol haus na ol wok bisnis bilong ol. Pol i tok long taun Jerusalem olsem: “Yumi no gat wanpela taun em i save stap oltaim, nogat.” Na em i tok moa: “Tasol yumi wetim tru dispela taun em bai kamap bihain.”—Hib. 13:14.

3. Wanem “dispela taun i gat faundesen tru tru,” na wai na yumi wetim dispela taun?

³ Ol Kristen em ol i lusim Jerusalem na Judia na ranawe, ating ol man i lap long ol na tok bilas long ol, tasol dispela disisen ol i mekim i seivim laip bilong ol. Long nau, ol man i save tok bilas long yumi bikos yumi no trastim ol man bilong dispela graun, na yumi no wok strong long painim gutpela sindaun long dispela graun. Wai na yumi save mekim dispela kain disisen? Bikos yumi save olsem dispela haptaim bilong nau em bilong i stap sotpela taim tasol. Yumi wetim “dispela taun i gat faundesen tru tru” em “dispela taun em bai kamap bihain,” em Kingdom Bilong God.a (Hib. 11:10; Mat. 6:33) Olgeta wan wan het tok bilong dispela atikol bai stori long: (1) hau ol tok Pol i raitim i bin helpim ol Kristen long taim bilong ol aposel long wetim “dispela taun em bai kamap bihain,” (2) hau Pol i redim ol long ol samting bai kamap bihain, na (3) hau ol tok bilong em i ken helpim yumi long nau.

TRASTIM JEHOVA BIKOS EM I NO INAP LUSIM YU

4. Wai na taun Jerusalem em i bikpela samting long ol Kristen?

⁴ Jerusalem em i bikpela samting long ol Kristen. Fes kongrigesen Kristen long taim bilong ol aposel i bin kirap long dispela taun long yia 33 C.E., na gavening bodi bilong en i stap long dispela taun. Na tu, planti Kristen i gat ol haus na ol i bungim planti mani kago samting bilong ol long dispela taun. Tasol Jisas i givim tok lukaut long ol disaipel bilong em olsem ol i mas ranawe lusim Jerusalem na Judia.—Mat. 24:16.

5. Pol i mekim wanem bilong redim ol Kristen long samting bai kamap?

⁵ Pol i helpim ol Kristen long kliagut long tingting Jehova i gat long taun Jerusalem bambai dispela i ken redim ol long samting bai kamap. Pol i helpim ol Kristen long kisim tingting bilong Jehova olsem tempel, wok pris, na ol sakrifais ol i save mekim long Jerusalem i no holi moa long ai bilong Jehova. (Hib. 8:13) Klostu olgeta manmeri long taun Jerusalem i bin sakim Mesaia. Tempel long Jerusalem i no stap moa olsem ples em ol man i ken mekim lotu i tru long Jehova, na klostu nau ol birua bai bagarapim dispela taun.—Luk 13:​34, 35.

6. Wai na ol tok bilong Pol long Hibru 13:​5, 6 i stret long ol Kristen?

⁶ Taim Pol i raitim pas i go long ol Hibru, Jerusalem em wanpela taun i gat planti manmeri na wok bisnis samting. Wanpela man Rom i save raitim ol buk samting na em i bin stap long dispela haptaim bipo, em i tok long Jerusalem olsem “em taun i gat biknem tru long hap Is.” Ol Juda i stap long ol narapela kantri i save raun i go long Jerusalem long olgeta yia bilong mekim ol bung bilong lotu, na ol i save spendim planti mani samting long hap na dispela i strongim ekonomi bilong taun. So i klia olsem ol Kristen i kisim helpim tu long strong bilong ekonomi. Ating em risen na Pol i bin tokim ol olsem: “Long sindaun bilong yupela, yupela i no ken bihainim pasin bilong laikim tumas mani. Yupela i mas ting olsem ol samting yupela i gat pinis em inap long yupela.” Bihain em i kolim tok bilong wanpela skripsa we Jehova i mekim tok bilong strongim ol manmeri bilong em olsem: “Mi no inap tru long lusim yu, na mi no inap givim baksait long yu.” (Ritim Hibru 13:​5, 6; Lo 31:6; Sng. 118:6) Ol Kristen i stap long Jerusalem na Judia i nidim dispela tok bilong strongim ol. Wai? Bikos liklik haptaim bihain tasol long ol i kisim dispela pas, ol i mas lusim ol haus, ol wok bisnis, na ol samting bilong ol. Na ol i mas statim nupela laip long narapela hap.

7. Wai na yumi mas strongim pasin bilong yumi long trastim Jehova long nau?

⁷ Skul yumi kisim: Wanem samting bai painim yumi klostu nau? Klostu nau “ traipela hevi tru” bai kamap na em bai pinisim dispela haptaim bilong nau. (Mat. 24:21) Yumi mas redi na was i stap wankain olsem ol aposel long taim bilong ol Kristen. (Luk 21:​34-36) Long taim bilong traipela hevi tru, ating yumi mas lusim sampela samting bilong skin em yumi gat na yumi mas trastim tru Jehova olsem em bai i no inap tru long lusim ol manmeri bilong em. Tasol long nau yet, paslain long traipela hevi tru i kirap, yumi gat rot bilong soim olsem yumi trastim tru Jehova. Askim yu yet, ‘Ol pasin bilong mi na ol mak mi laik winim i soim olsem mi trastim God em Man husat i promis long lukautim mi, na mi no trastim mani kago?’ (1 Tim. 6:17) Em tru olsem yumi ken kisim skul long ol samting i bin kamap long taim bilong ol aposel, tasol yumi ken save tu olsem traipela hevi tru em bai wanpela taim nogut tru. So hau bai yumi save long ol samting yumi ken mekim taim traipela hevi tru i kirap?

BIHAINIM TOK BILONG OL MAN I GO PAS LONG YUPELA

8. Jisas i tokim ol disaipel bilong em long mekim wanem?

⁸ Sampela yia bihain long ol Kristen i kisim pas em Pol i raitim long ol Hibru, ol i lukim ami bilong Rom i kam banisim taun Jerusalem. Dispela i stap olsem sain olsem ol Kristen i mas ranawe, long wanem, klostu nau taun Jerusalem bai bagarap. (Mat. 24:3; Luk 21:​20, 24) Tasol ol bai ranawe i go long wanem hap? Jisas i bin tok: “Ol manmeri long Judia i mas ranawe i go long ol maunten.” (Luk 21:21) I gat planti maunten long dispela hap. So ol bai ranawe i go long wanem maunten?

9. Wai na ol Kristen inap tingting planti long wanem maunten ol inap ranawe i go long en? (Lukim tu mep.)

⁹ Tingim sampela maunten em ol Kristen inap ranawe i go long en: ol maunten bilong Samaria, ol maunten bilong Galili, Maunten Hermon na ol maunten bilong Lebanon, na ol maunten long hapsait bilong Wara Jordan. (Lukim mep.) Ating ol i pilim olsem sampela taun long ol dispela ples maunten inap stap olsem gutpela ples hait bilong ol. Olsem, taun Gamla i stap antap long wanpela maunten we ol kil bilong en i raf na i hatwok tru long i go long en. Sampela Juda i tingim dispela taun olsem gutpela ples bilong ranawe i go long en. Tasol Gamla em hap we wanpela bikpela pait i bin kamap namel long ol Juda na ol Rom, na planti manmeri bilong taun i bin dai long dispela taim.b

10-11. (a) Jehova i stiaim lain bilong em long wanem rot? (Hibru 13:​7, 17) (b) Wanem gutpela samting i kamap taim ol Kristen i bihainim tok bilong ol man i go pas long ol? (Lukim tu piksa.)

¹⁰ I luk olsem Jehova i bin stiaim ol Kristen long rot bilong ol man em ol i bin go pas long mekim ol wok insait long kongrigesen. Bihain saveman Eusebius i tok: “Ol manmeri long kongrigesen long Jerusalem i kisim tok bilong stiaim ol em God i givim long sampela man em i makim; ol i tokim ol . . . long lusim taun paslain long woa i kirap na go sindaun long wanpela taun bilong Perea, nem bilong en Pela.” I luk olsem Pela em wanpela gutpela taun ol Kristen i ken go long en. Em i no stap longwe tumas long Jerusalem, olsem na em isi long ol i go kamap long en. Na tu, planti man long Pela em ol manmeri bilong ol arapela lain, so ol i no tingting long bikhet na pait long ami bilong Rom.—Lukim mep.

¹¹ Ol Kristen em ol i ranawe i go long ol maunten, ol i bihainim tok bilong Pol long ol “i mas bihainim tok bilong ol man i go pas” long ol insait long kongrigesen. (Ritim Hibru 13:​7, 17.) Dispela i mekim na lain bilong God i abrusim bagarap. Stori bilong ol samting i kamap bipo i soim olsem God i no bin lusim ol manmeri em ol i “wetim dispela taun i gat faundesen tru tru”—em Kingdom Bilong God.—Hib. 11:10.

12-13. Hau Jehova i stiaim lain bilong em long taim bilong hevi?

¹² Skul yumi kisim: Jehova i save yusim ol man i go pas long lain bilong em long givim ol daireksen na stiaim ol. Baibel i gat planti stori long hau Jehova i makim ol wasman long stiaim ol manmeri bilong em long taim bilong hevi. (Lo 31:23; Sng. 77:20) Na long nau tu, yumi lukim planti evidens i soim olsem Jehova i wok yet long yusim ol man i go pas long yumi bilong stiaim yumi.

¹³ Olsem, taim COVID-19 pendemik i kamap, “ol man i go pas” long yumi i givim ol daireksen bilong stiaim yumi. Ol elda i kisim ol tok long hau ol i ken lukautim ol bratasista long ol samting ol i nidim bilong strongim bilip. Bihain tasol long dispela pendemik i bin kamap, yumi mekim bikpela kibung tru long winim 500 tokples long rot bilong Intenet, TV, na redio. Yumi wok yet long kisim ol tok bilong strongim bilip. Dispela i mekim na yumi stap wanbel tru. Yumi ken bilip tru olsem maski yumi bungim wanem ol hevi long bihain, Jehova bai wok yet long yusim ol man i go pas long yumi long makim stretpela rot bilong helpim yumi. Yumi bai wok yet long trastim Jehova na bihainim ol lo bilong em, tasol wanem ol narapela pasin inap helpim yumi long redi long taim bilong traipela hevi tru na bihainim savetingting taim dispela hevi i kirap?

LAIKIM TRU OL BRATASISTA NA MEKIM GUT LONG OL

14. Olsem Hibru 13:​1-3 i kamapim, ol Kristen i mas bihainim wanem ol pasin long las de bilong haptaim bilong ol Juda?

¹⁴ Taim traipela hevi tru i kirap, yumi mas mekim pasin laikim long narapela narapela winim ol narapela taim bipo. Bilong mekim olsem, yumi mas bihainim pasin bilong ol Kristen i stap long Jerusalem na Judia. Oltaim ol i save mekim pasin laikim long narapela narapela. (Hib. 10:​32-34) Tasol long ol yia paslain long haptaim bilong ol Juda i pinis, ol Kristen i mas “laikim ol arapela olsem ol i brata bilong [ol]” na “mekim gut” long ol na ol i mas mekim moa yet ol dispela pasin.c (Ritim Hibru 13:​1-3.) Yumi tu i mas mekim olsem taim pinis bilong dispela haptaim bilong nau i kam klostu tru.

15. Wai na ol Kristen Hibru i mas laikim ol bratasista bilong ol na mekim gut long ol bihain long ol i ranawe?

¹⁵ Taim ami bilong Rom i kam banisim Jerusalem na kwiktaim ol i lusim na go bek, ol Kristen i kisim tasol ol liklik samting bilong ol na ol i ranawe. (Mat. 24:​17, 18) Ol i nidim helpim na sapot bilong narapela narapela taim ol i ranawe i go long ol maunten na taim ol i sindaun long nupela hap bilong ol. Ating i gat planti “samting ol i sot long en” na dispela i givim rot long ol Kristen long soim pasin laikim tru na mekim gut long ol narapela long rot bilong sapotim narapela narapela na serim samting wantaim ol.—Tai. 3:14.

16. Yumi ken mekim wanem bilong soim pasin laikim long ol wanbilip em ol i nidim helpim bilong yumi? (Lukim tu piksa.)

¹⁶ Skul yumi kisim: Pasin laikim i save kirapim yumi long helpim ol wanbilip taim ol i nidim helpim bilong yumi. Planti bratasista i redi long helpim ol wanbilip em ol i kamap refiuji bikos long ol woa na ol netrol disasta i bin kamap. Ol i givim helpim long ol long sait bilong bilip na long ol samting bilong skin ol i nidim tu. Wanpela sista long Yukren husat i bin ranawe lusim haus bilong em bikos long woa, em i tok: “Mipela i pilim olsem Jehova i stiaim mipela na helpim mipela long rot bilong ol bratasista. Ol i welkamim mipela na helpim gut mipela long Yukren, Hangari, na nau hia long Jemani.” Ol bratasista em ol i mekim gut long ol wanbilip na lukautim ol long ol samting ol i nidim, ol i stap olsem tul long han bilong Jehova.—Prov. 19:17; 2 Kor. 1:​3, 4.

17. Wai na em i bikpela samting long kisim pasin bilong laikim tru ol bratasista na mekim gut long ol long nau?

¹⁷ Yumi ken save olsem bai i gat bikpela wok moa long laikim na helpim ol bratasista bilong yumi long bihain winim long nau. (Hab. 3:​16-18) Jehova i trenim yumi long nau long kisim pasin bilong laikim tru ol bratasista na mekim gut long ol, em ol pasin yumi gat wok long mekim moa yet long bihain.

WANEM SAMTING BAI KAMAP BIHAIN?

18. Olsem wanem yumi ken bihainim pasin bilong ol Kristen Hibru long taim bilong ol aposel?

¹⁸ Stori bilong ol samting i kamap long bipo i soim olsem ol Kristen em ol i bin ranawe i go long ol maunten, ol i abrusim bagarap i bin painim Jerusalem. Ol i lusim taun Jerusalem na ranawe, tasol Jehova i no bin lusim ol. Olsem wanem long taim bilong yumi? Yumi no save long wanem ol samting tru bai kamap long bihain. Tasol Jisas i givim tok lukaut long yumi olsem yumi mas redi long bihainim tok. (Luk 12:40) Na tu, yumi gat ol tok em aposel Pol i raitim long pas bilong em i go long ol Hibru, em ol tok we i stret long yumi tu long nau wankain olsem i stret long ol Kristen long taim bilong ol aposel. Na Jehova yet i bin tokim yumi olsem em bai i no inap lusim yumi o givim baksait long yumi. (Hib. 13:​5, 6) So yumi ken givim bel tru long wetim dispela taun em bai stap oltaim—em Kingdom Bilong God—na amamas long ol blesing bilong i stap oltaim em bai kamapim.—Mat. 25:34.