1 Tihosi

3 Kutani Solomoni a endla ntwanano+ wa ku tekelana na Faro hosi ya le Egipta, a teka n’wana+ wa Faro, a n’wi tisa eMutini wa Davhida+ ku fikela loko a hete ku aka yindlu yakwe+ ni yindlu ya Yehovha+ ni rirhangu ra Yerusalema matlhelo hinkwawo.+ 2 Ntsena vanhu a va endla switlhavelo etindhawini leti tlakukeke,+ hikuva vito ra Yehovha a ri nga si akeriwa yindlu ku fikela emasikwini wolawo.+ 3 Solomoni a ya emahlweni a rhandza+ Yehovha hi ku famba emilawini ya Davhida tata wakwe.+ A hambeta a endla switlhavelo naswona a mbulukisa magandzelo etindhawini leti tlakukeke+ ntsena.

4 Hikwalaho hosi yi ya eGibiyoni+ yi ya endla xitlhavelo kona, hikuva a ku ri yona ndhawu leyikulu leyi tlakukeke.+ Solomoni a a nyikela switlhavelo swo hisiwa swa 1 000 ehenhla ka alitari yoleyo.+ 5 Yehovha a humelela+ eka Solomoni eGibiyoni enorhweni+ nivusiku; Xikwembu xi ku: “Kombela lexi ndzi faneleke ndzi ku nyika xona.”+ 6 Hiloko Solomoni a ku: “Wena u n’wi kombe musa lowukulu wa rirhandzu+ nandza wa wena Davhida tatana, hilaha a fambeke hakona emahlweni ka wena hi ntiyiso, ni hi ku famba na wena hi ku tshembeka+ ni hi mbilu yo lulama; u hambete u n’wi hlayisela musa lowukulu wa rirhandzu, lerova u n’wi nyika n’wana leswaku a tshama exiluvelweni xakwe ku fana ni le sikwini leri.+ 7 Sweswi, Yehovha Xikwembu xanga, wena u endle nandza wa wena a va hosi ematshan’weni ya Davhida tatana, kambe mina ndzo va mufana lontsongo.+ A ndzi swi tivi ku huma ni ku nghena.+ 8 Nandza wa wena u le xikarhi ka vanhu va wena lava u va hlawuleke,+ vanhu vo tala ngopfu, lava va nga ta ka va nga hlayiwi kumbe va pimiwa hikwalaho ka ku tala ka vona.+ 9 U fanele u nyika nandza wa wena mbilu leyi yingisaka leswaku a avanyisa+ vanhu va wena, a xiya exikarhi ka leswinene ni leswo biha;+ hikuva i mani la kotaka ku avanyisa+ vanhu lava va wena vo nonon’hwa?”+

10 Kutani nchumu lowu a wu tsakisa ematihlweni ya Yehovha, hikuva Solomoni u kombele nchumu lowu.+ 11 Xikwembu xi ya emahlweni xi ku eka yena: “Hikwalaho ka leswi u kombeleke nchumu lowu, u nga tikombelelanga masiku yo tala kumbe rifuwo+ kumbe ku kombela moya-xiviri wa valala va wena, kambe u tikombelele ku twisisa leswaku u twa timhaka ta vuavanyisi,+ 12 waswivo, kunene ndzi ta endla hi ku landza marito ya wena.+ Waswivo! Kunene ndzi ta ku nyika mbilu yo tlhariha ni leyi twisisaka,+ lerova a ku vanga na munhu la fanaka na wena emahlweni ka wena, naswona endzhaku ka wena a ku nge vi na munhu la fanaka na wena.+ 13 Nakambe ndzi ta ku nyika leswi u nga swi kombelangiki,+ rifuwo+ ni ku vangama, lerova a ku nge vi na hosi exikarhi ka tihosi leyi fanaka na wena, masiku ya wena hinkwawo.+ 14 Loko wo famba etindleleni ta mina hi ku hlayisa swileriso+ swa mina ni milawu ya mina, hilaha Davhida tata wa wena a fambeke hakona,+ ndzi ta lehisa masiku ya wena.”+

15 Loko Solomoni a xalamuka,+ waswivo, phela a ku ri norho. Kutani a fika eYerusalema a yima emahlweni ka areka+ ya ntwanano wa Yehovha, a nyikela switlhavelo swo hisiwa naswona a endla magandzelo ya xinakulobye,+ a endlela malandza+ yakwe hinkwawo nkhuvo.+

16 Hi nkarhi wolowo vavasati vambirhi lava va nga tinghwavava+ va fika eka hosi va yima emahlweni ka yona.+ 17 Wansati loyi un’wana a ku: “Ndzi khomele hosi yanga,+ mina ni wansati loyi hi tshama endlwini yin’we, kutani ndzi velekele ekusuhi na yena endlwini. 18 Hi siku ra vunharhu endzhaku ka loko ndzi velekile, wansati loyi na yena u velekile. A hi ri swin’we. A hi nga ri na mufambi endlwini, a ku nga ri na un’wana handle ka hina vambirhi endlwini. 19 Endzhaku n’wana wa wansati loyi a fa nivusiku, hikuva u etlele ehenhla ka yena. 20 Hiloko a pfuka exikarhi ka vusiku a teka n’wananga etlhelo ka mina loko hlonga ra wena ra xisati ri etlele, a n’wi veka exifuveni xakwe, kambe n’wana wakwe la feke a n’wi veka exifuveni xa mina. 21 Loko ndzi pfuka nimixo leswaku ndzi an’wisa+ n’wananga, waswivo, a a file. Hiloko ndzi n’wi nyangisisa swinene nimixo, kutani waswivo, a a nga ri yena n’wananga loyi ndzi n’wi tswaleke.” 22 Kambe wansati loyi un’wana a ku: “E-e, n’wananga hi loyi a hanyaka kasi n’wana wa wena hi loyi a feke!” Nkarhi lowu hinkwawo wansati loyi a a ku: “E-e, n’wana wa wena hi loyi a feke kasi n’wananga hi loyi a hanyaka.” Kutani va ya emahlweni va vulavula tano emahlweni ka hosi.+

23 Eku heteleleni, hosi yi ku: “Un’wana u ri, ‘Loyi a hanyaka i n’wananga, n’wana wa wena hi loyi a feke,’ kasi un’wana u ri, ‘E-e, n’wana wa wena hi loyi a feke kasi n’wananga hi loyi a hanyaka!’” 24 Hosi yi ya emahlweni yi ku:+ “Ndzi kumeleni banga.” Kutani va tisa banga emahlweni ka hosi. 25 Hiloko hosi yi ku: “Tsemani n’wana la hanyaka hi le xikarhi mi nyika loyi xiphemu xin’we, xiphemu lexin’wana mi xi nyika wansati loyi un’wana.” 26 Xikan’we-kan’we wansati loyi n’wana la hanyaka a a ri wa yena a byela hosi a ku (hikuva mintlhaveko+ yakwe ya le ndzeni a yi khumbekile hikwalaho ka n’wana wakwe,+ lerova a ku): “Ndzi khomele,+ hosi yanga! N’wi nyikeni n’wana la hanyaka. Mi nga n’wi dlayi.” Nkarhi lowu hinkwawo wansati loyi un’wana a a ku: “A nge vi wa mina kumbe a va wa wena. N’wi pulukanyeni!”+ 27 Kutani hosi yi hlamula yi ku: “N’wi nyikeni n’wana la hanyaka, mi nga tshuki mi n’wi dlaya. Loyi i mana wakwe.”

28 Hiloko tiko hinkwaro ra Israyele ri twa xiboho xa vuavanyisi+ lexi hosi a yi xi endlile; va chava hosi,+ hikuva va swi vonile leswaku vutlhari+ bya Xikwembu a byi ri endzeni ka yona leswaku yi humesa xiboho xa vuavanyisi.