Eksoda
2 Hi nkarhi wolowo, wanuna wo karhi wa yindlu ya Levhi a teka n’wana wa Levhi.+ 2 Kutani wansati loyi a tika, a veleka n’wana wa jaha. Loko a vona ndlela leyi a a saseke ha yona, a n’wi tumbeta+ tin’hweti+ tinharhu ta ku rhendzelaka ka n’weti. 3 Loko a vona leswaku a nga ha swi koti ku n’wi tumbeta,+ hiloko a teka bokisi ro endliwa hi papirasi a ri tota hi nhlaka ni ntita,+ kutani a veka n’wana loyi endzeni ka rona, a ri veka exikarhi ka tinhlanga+ eribuweni ra nambu wa Nayili. 4 Ku tlula kwalaho, makwavo wa xisati a yima ekulenyana leswaku a ta kumisisa leswi nga ta n’wi humelela.+
5 Endzhakunyana ka nkarhi n’wana wa Faro wa nhwanyana a ta ku ta hlamba eNambyeni wa Nayili, kutani vatirhi vakwe a va famba-famba etlhelo ka Nambu wa Nayili. Hiloko a vona bokisi exikarhi ka tinhlanga. Hi ku hatlisa a rhuma mahlonga yakwe leswaku ma ya ri teka.+ 6 Loko a ri pfula a vona n’wana, kutani waswivo, mufana loyi a a rila. Hiloko a n’wi twela vusiwana,+ hambileswi a nga vula a ku: “Loyi i un’wana wa vana va Vaheveru.” 7 Kutani makwavo wa xisati a byela n’wana wa Faro a ku: “Xana ndzi nga ya ndzi ya ku vitanela hi ku hlawuleka wansati wa muwundli eka vavasati va Vaheveru leswaku a ta ku wundlela n’wana ke?” 8 Hiloko n’wana wa Faro a ku eka yena: “Famba!” Xikan’we-kan’we nhwanyana a famba a ya vitana mana wa n’wana loyi.+ 9 Kutani n’wana wa Faro a ku eka yena: “Teka n’wana loyi u ndzi wundlela yena, mina ndzi ta ku nyika hakelo ya wena.”+ Hikwalaho wansati a teka n’wana a ya n’wi wundla. 10 N’wana a kula. Hiloko a n’wi tisa eka n’wana wa Faro kutani a va n’wana wa yena;+ a n’wi thya vito ra Muxe, a ku: “Hileswaku ndzi n’wi humese ematini.”+
11 Kutani emasikwini wolawo loko Muxe a ri karhi a tiyela, a huma a ya eka vamakwavo leswaku a ta vona mintirho ya vona yo nonon’hwa+ leyi a va yi endla; hiloko a vona Muegipta un’wana a ba Muheveru un’wana wa vamakwavo.+ 12 Kutani a rhalarhala, a nga voni munhu. Hiloko a dlaya Muegipta a n’wi fihla esaveni.+
13 Hambiswiritano, a huma esikwini leri tlhandlamaka kutani vavanuna vambirhi va Vaheveru a va lwa. Kutani a byela la endleke xihoxo a ku: “Ha yini u ba nakuloni?”+ 14 Hiloko yena a ku: “I mani la ku vekeke hosana ni muavanyisi wa hina?+ Xana u lava ku ndzi dlaya ku fana nileswi u dlayeke Muegipta?”+ Sweswi Muxe a chava, a ku: “Hakunene mhaka leyi ya tiviwa!”+
15 Hikwalaho Faro a twa mhaka leyi, kutani a ringeta ku dlaya Muxe;+ kambe Muxe a balekela+ Faro a ya tshama etikweni ra Midiyani;+ a fika a tshama exihlobyeni. 16 Muprista+ wa Midiyani a a ri ni vana va vanhwanyana va nkombo, naswona tanihi ntolovelo va fika va ta ka mati va ya tata switsengele leswaku va nwisa ntlhambi+ wa tata wa vona. 17 Tanihi ntolovelo varisi va fika va va hlongola. Hiloko Muxe a suka a yima a pfuna vavasati lava, a nwisa ntlhambi+ wa vona. 18 Kutani loko va fika ekaya eka Rhuwele+ tata wa vona, a huwelela a ku: “Swi endlekise ku yini leswaku mi hatlisa mi vuya ekaya namuntlha?” 19 Hiloko va ku: “Muegipta+ un’wana u hi kutsule evokweni ra varisi, kasi handle ka sweswo, u hi kele mati leswaku a nwisa ntlhambi.” 20 Kutani a byela vana vakwe a ku: “Kambe u kwihi? Hikwalaho ka yini mi siye munhu loyi? N’wi vitaneni a ta dya xinkwa.”+ 21 Endzhaku ka sweswo Muxe a rhandza ku tshama ni munhu loyi, kutani a nyika Muxe Zipora+ n’wana wakwe wa nhwanyana. 22 Endzhakunyana yena a tswala n’wana a n’wi thya vito ra Gerixomu,+ hikuva u te: “Ndzi muluveri etikweni rimbe.”+
23 Endzhaku ka masiku yo tala hosi ya Egipta yi hetelela yi file,+ kambe vana va Israyele va hambeta va va ni nhlomulo hikwalaho ka vuhlonga naswona va rila,+ xirilo xa vona xo kombela ku pfuniwa hikwalaho ka vuhlonga+ xi tlhandlukela eka Xikwembu xa ntiyiso. 24 Hi ku famba ka nkarhi Xikwembu xi twa+ ku konya+ ka vona kutani Xikwembu xi tsundzuka ntwanano wa xona na Abrahama, Isaka na Yakobe.+ 25 Hikokwalaho Xikwembu xi languta vana va Israyele kutani Xikwembu xi swi lemuka.