Vaavanyisi
10 Endzhaku ka Abimeleke, Tola n’wana wa Puwa, ntukulu wa Dodo, wa nyimba ya Isakara a sungula ku ponisa Vaisrayele.+ A a tshama eXamiri endhawini ya tintshava ya Efrayimi. 2 U avanyise Vaisrayele malembe ya 23. Endzhaku ka sweswo a fa a lahliwa eXamiri.
3 Endzhaku ka yena ku va na Yayiri wa Mugiliyadi naswona u avanyise Vaisrayele malembe ya 22. 4 A a ri ni vana va 30 lava a va famba hi timbhongolo ta 30 naswona a va ri ni miti ya 30, leyi ninamuntlha ya ha vitaniwaka Havhoti-yayiri;+ yi le tikweni ra Giliyadi. 5 Endzhaku ka sweswo Yayiri a fa a lahliwa eKamoni.
6 Vaisrayele va tlhela va endla swo biha emahlweni ka Yehovha,+ va sungula ku tirhela swikwembu leswi vuriwaka Bali,+ swifaniso swa Axitoreti, swikwembu swa le Aramu,* swikwembu swa le Sidoni, swikwembu swa Vamowabu,+ swikwembu swa Vaamoni+ ni swikwembu swa Vafilista.+ Va fularhela Yehovha va tshika ku n’wi tirhela. 7 Hiloko Yehovha a hlundzukela Vaisrayele swinene, kutani a va nyiketa eka Vafilista ni le ka Vaamoni.+ 8 Va xanisa Vaisrayele swinene lembe rero naswona ku ringana malembe ya 18, va xanisa Vaisrayele hinkwavo lava a va tshama etlhelweni ra Yordani laha a ku ri tiko ra Vaamori eGiliyadi. 9 Vaamoni na vona a va tsemakanya Yordani leswaku va ya lwa ni nyimba ya Yuda, ya Benjamini ni ya Efrayimi; Vaisrayele a va xaniseka swinene. 10 Hiloko Vaisrayele va kombela mpfuno eka Yehovha,+ va ku: “Hi ku dyoherile hi leswi hi tshikeke Xikwembu xa hina hi ya tirhela swikwembu leswi vuriwaka Bali.”+
11 Kambe Yehovha a byela Vaisrayele a ku: “Xana a ndzi mi ponisanga eEgipta+ ni le ka Vaamori,+ Vaamoni, Vafilista,+ 12 Vasidoni, Vaamaleke ni Vamidiyani loko va mi xanisa? Loko mi kombela mpfuno eka mina, ndzi mi ponisile eka vona. 13 Kambe mi ndzi fularherile mi ya tirhela swikwembu swin’wana.+ Hi yona mhaka ndzi nga ta ka ndzi nga ha mi ponisi.+ 14 Fambani mi ya kombela mpfuno eka swikwembu leswi mi swi hlawuleke.+ A swi mi ponise emaxangwini.”+ 15 Kambe Vaisrayele va byela Yehovha va ku: “Hi dyohile. Hi endle leswi u vonaka swi ri swinene ematihlweni ya wena. Hi kombela leswaku u hi ponisa namuntlha.” 16 Kutani va susa swikwembu swa matiko exikarhi ka vona, va tirhela Yehovha,+ lerova a va twela vusiwana hikwalaho ka ndlela leyi a va xaniseka ha yona.+
17 Hi ku famba ka nkarhi Vaamoni+ va tilulamisela ku lwa nyimpi, kutani va dzima nxaxa eGiliyadi. Vaisrayele na vona va tilulamisela ku lwa nyimpi, kutani va dzima nxaxa eMizpa. 18 Vanhu va le Giliyadi ni tindhuna ta kona va byelana va ku: “I mani loyi a nga ta hi rhangela loko hi ya lwa ni Vaamoni?+ A a ve ndhuna ya vaaki hinkwavo va le Giliyadi.”