Vaavanyisi

1 Endzhaku ka loko Yoxuwa+ a file, Vaisrayele va vutisa Yehovha+ va ku: “I mani loyi a nga ta rhanga a ya lwa ni Vakanana?” 2 Hiloko Yehovha a ku: “Ku ta rhanga vana va Yuda.+ Ndzi ta nyiketa tiko leri evokweni ra vona.” 3 Kutani vana va Yuda va byela vana va Simiyoni, lava a va ri vamakwavo va ku: “A hi fambeni swin’we endhawini leyi hi averiweke yona+ hi ya lwa ni Vakanana. Na hina hi ta famba na n’wina endhawini leyi mi averiweke yona.” Hiloko vana va Simiyoni va famba na vona.

4 Loko vana va Yuda va ya eku lweni, Yehovha a nyiketa Vakanana ni Vaperezi eka vona,+ hiloko va hlula vavanuna va 10 000 eBezeki. 5 Va kuma Adoni-bezeki eBezeki, hiloko va lwa na yena kutani va hlula Vakanana+ ni Vaperezi.+ 6 Loko Adoni-bezeki a baleka, va n’wi hlongorisa va n’wi khoma kutani va n’wi tsema makhudzu ya mavoko ni makhudzu ya milenge. 7 Hiloko Adoni-bezeki a ku: “Ku ni tihosi ta 70 leti a ti tsemiwe makhudzu ya mavoko ni makhudzu ya milenge leti a ti rhwalela swakudya ehansi ka tafula ra mina. Xikwembu xi ndzi endle leswi ndzi swi endleke eka tona.” Endzhaku ka sweswo vana va Yuda va n’wi yisa eYerusalema+ kutani a fela kona.

8 Vavanuna va Yuda va tlhela va lwa ni muti wa Yerusalema+ kutani va wu hlula; va dlaya vanhu hi banga ni ku hisa muti hi ndzilo. 9 Endzhaku ka sweswo vavanuna va Yuda va ya va ya lwa ni Vakanana lava a va tshama endhawini ya tintshava ni le Negebu na Xefela.+ 10 Hiloko vavanuna va Yuda va famba va ya hlasela Vakanana lava a va tshama eHebroni (vito ra khale ra le Hebroni a ku ri Kiriyati-araba), kutani va dlaya Sexayi, Ahimani na Talimayi.+

11 Loko va suka kwalaho va ye va ya hlasela vaaki va le Debiri.+ (Vito ra khale ra Debiri a ku ri Kiriyati-sefere.)+ 12 Hiloko Kalebe+ a ku: “Wanuna loyi a nga ta hlasela muti wa Kiriyati-sefere a wu hlula, ndzi ta n’wi nyika Akisa n’wana wa mina a va nsati wakwe.”+ 13 Kutani Otiniyele+ n’wana wa Kenazi,+ ndzisana ya Kalebe a hlula muti wolowo. Hiloko Kalebe a n’wi nyika Akisa n’wana wakwe a va nsati wakwe. 14 Loko Akisa a ri karhi a muka, u byele Otiniyele leswaku a kombela nsimu eka Kalebe tata wakwe. Hiloko Akisa a chika embhongolweni yakwe.* Kalebe a n’wi vutisa a ku: “U lava yini?” 15 Akisa a ku: “Ndzi kombela u ndzi nyika nyiko, hikuva u ndzi nyike ndhawu ya le dzongeni;* ndzi nyike na Guloti-mayima.”* Hiloko Kalebe a n’wi nyika Guloti ya le Henhla ni Guloti ya le Hansi.

16 Vatukulu va Mukena,+ loyi Muxe a a teke n’wana wakwe,+ va suke emutini wa mirhi ya micindzu+ va ri ni vana va Yuda va ya emananga ya Yuda, lawa a ma ri edzongeni wa Aradi.+ Va fika va tshama ni vanhu va kwalaho.+ 17 Kambe vana va Yuda va famba ni vana va Simiyoni makwavo, va hlasela Vakanana lava a va tshama emutini wa Sefata, va wu lovisa.+ Hiloko va wu thya vito ra Horma.*+ 18 Endzhaku ka sweswo vana va Yuda va teka muti wa Gaza+ ni tindhawu ta wona, muti wa Axikeloni+ ni tindhawu ta wona ni muti wa Ekroni+ ni tindhawu ta wona. 19 Yehovha a a seketela vana va Yuda. Va teke ndhawu leyi nga ni tintshava va tshama eka yona, kambe va tsandzeke ku hlongola vaaki lava a va tshama endhawini leyi nga rivala, hikuva a va ri ni makalichi ya nyimpi lama nga ni mikwana yo leha ya nsimbhi emavhilweni.+ 20 Muti wa Hebroni va wu nyike Kalebe hilaha Muxe a tshembiseke hakona,+ hiloko a hlongola vana vanharhu va Anaka+ kwalaho.

21 Vana va Benjamini a va va hlongolanga Vayebusi lava a va tshama eYerusalema, kambe Vayebusi va ye emahlweni va tshama ni vana va Benjamini eYerusalema ku ta fikela namuntlha.+

22 Hi nkarhi wolowo, vatukulu va Yosefa+ va ye va ya lwa ni vaaki va le Bethele naswona Yehovha a a va seketela.+ 23 Vatukulu va Yosefa va rhumele vavanuna leswaku va ya kambela muti wa Bethele (muti lowu khale a wu vitaniwa Luzi),+ 24 naswona vavanuna volavo va vone wanuna un’wana a huma emutini. Hiloko va ku eka yena: “Hi kombela u hi komba ndlela yo nghena emutini, a hi nge ku dlayi.” 25 Hiloko a va komba ndlela yo nghena emutini, kutani va dlaya vanhu va muti wolowo hi banga, kambe wanuna yoloye va n’wi tshika a famba ni ndyangu wakwe.+ 26 Wanuna yoloye u ye etikweni ra Vaheti a fika a aka muti lowu a nga wu thya vito ra Luzi, ninamuntlha wa ha vitaniwa tano.

27 Vana va Manase a va wu tekanga muti wa Beta-xeyani ni swimitana leswi nga ekusuhi na wona, muti wa Tanaka+ ni swimitana leswi nga ekusuhi na wona, muti wa Dori ni swimitana leswi nga ekusuhi na wona, muti wa Ibileyamu ni swimitana leswi nga ekusuhi na wona ni muti wa Megido ni swimitana leswi nga ekusuhi na wona.+ Vakanana va ye emahlweni va tshama etikweni leri. 28 Loko Vaisrayele va va ni matimba, a va va hlongolanga+ Vakanana kambe va va endle mahlonga+ ya vona.

29 Vana va Efrayimi na vona a va va hlongolanga Vakanana lava a va tshama eGezere. Vakanana va ye emahlweni va tshama na vona eGezere.+

30 Vana va Zebuloni a va va hlongolanga vaaki va le Kitironi ni va le Nahaloli.+ Vakanana va ye emahlweni va tshama ni vana va Zebuloni naswona vana va Zebuloni va endle Vakanana mahlonga ya vona.+

31 Vana va Axere a va va hlongolanga vaaki va le Ako, Sidoni,+ Ahilabu, Akizibi,+ Heliba, Afiki+ na Rehobo.+ 32 Vana va Axere va ye emahlweni va tshama ni Vakanana lava a va tshama etikweni rero, hikuva a va va hlongolanga.

33 Vana va Neftali a va va hlongolanga vaaki va le Beta-xemexe ni va le Beta-anata,+ kambe va ye emahlweni va tshama ni Vakanana lava a va tshama etikweni rero.+ Vana va Neftali va endle vaaki va le Beta-xemexe ni va le Beta-anata mahlonga ya vona.

34 Vaamori va sindzise vana va Dani ku tshama endhawini ya tintshava, a va va pfumelelanga ku rhelela endhawini leyi nga rivala.+ 35 Kutani Vaamori va ye emahlweni va tshama eNtshaveni ya Heresi, eAyaloni+ ni le Xalabimi.+ Kambe loko vatukulu va Yosefa va ya va va ni matimba swinene va endle Vaamori mahlonga. 36 Ndhawu ya Vaamori a yi sukela entshaveni ya Akrabimi,+ yi tlhela yi sukela eSela ku ya eswintshabyanini.