LEVHITIKA

1 Hiloko Yehovha a vitana Muxe a vulavula na yena a ri etendeni ra nhlengeletano+ a ku: 2 “Byela Vaisrayele u ku, ‘Loko un’wana wa n’wina o tshuka a nyikela eka Yehovha gandzelo leri humaka eka swifuwo, mi fanele mi nyikela gandzelo ra n’wina leri humaka eka ntlhambi wa tihomu kumbe ntlhambi wa tinyimpfu.+

3 “‘Loko gandzelo rakwe ku ri gandzelo ro hisiwa leri humaka eka ntlhambi wa tihomu, u fanele a nyikela nkuzi leyi hanyeke kahle.+ U fanele a ri nyikela eka Yehovha hi ku tirhandzela+ enyangweni ya tende ra nhlengeletano. 4 U ta tlhandleka voko rakwe ehenhla ka nhloko ya gandzelo ro hisiwa naswona Xikwembu xi ta amukela gandzelo rero leswaku a rivaleriwa swidyoho swakwe.

5 “‘Kutani ku fanele ku tlhaviwa xinkuzana emahlweni ka Yehovha naswona vana va Aroni lava nga vaprista,+ va ta nyikela ngati kutani va yi n’wan’wasela ematlhelo hinkwawo ya altari+ leyi nga enyangweni ya tende ra nhlengeletano. 6 Gandzelo ro hisiwa ri fanele ri yevuriwa kutani ri tsemeleriwa.+ 7 Vana va Aroni lava nga vaprista va ta tshivela ndzilo ealtarini+ kutani va tlhandleka tihunyi endzilweni. 8 Va ta veka nyama leyi tsemeleriweke ya gandzelo+ swin’we ni nhloko ni mafurha ya tinso ehenhla ka tihunyi leti nga endzilweni lowu nga ealtarini. 9 Marhumbu ni manqina ya rona swi ta hlantswiwa hi mati kutani muprista u ta swi hisa hinkwaswo ealtarini swi va gandzelo ro hisiwa, gandzelo leri endliwaka hi ndzilo ri va nun’hwelo lowu tsakisaka eka Yehovha.+

10 “‘Loko gandzelo rakwe ro hisiwa ri huma entlhambini+ wa tinyimpfu kumbe timbuti, u fanele a nyikela hi khuna kumbe xiphongo lexi hanyeke kahle.+ 11 Ri ta tlhaviwa emahlweni ka Yehovha hi le tlhelo ra le n’walungwini ra altari, kutani vana va Aroni lava nga vaprista va ta n’wan’wasela ngati ya rona ematlhelo hinkwawo ya altari.+ 12 Ri ta tsemeleriwa kutani muprista u ta veka nyama ya rona, nhloko ya rona ni mafurha ya rona ya tinso ehenhla ka tihunyi leti nga endzilweni lowu nga ealtarini. 13 U ta hlantswa marhumbu ni manqina hi mati kutani muprista u ta ri nyikela hinkwaro a ri hisa ealtarini. I gandzelo ro hisiwa, gandzelo leri endliwaka hi ndzilo ri va nun’hwelo lowu tsakisaka eka Yehovha.

14 “‘Kambe loko gandzelo rakwe leri hiseriwaka Yehovha ku ri swinyenyana, u ta nyikela gandzelo rakwe hi magugurhwana* kumbe hi swituvana.+ 15 Muprista u ta ri nyikela ealtarini kutani a tsema nhloko ya rona, a ri hisa ealtarini, kambe ngati ya rona yi fanele yi chuluriwa etlhelo ka altari. 16 U fanele a susa chelele ra rona ni tinsiva ta rona a swi lahlela etlhelo ka altari, etlhelo ra le vuxeni laha ku nga ni nkuma.*+ 17 U ta ri handzula hi le timpapeni ta rona, kambe a nga fanelanga a ri tsema hi le xikarhi. Kutani muprista u ta ri hisa ealtarini ehenhla ka tihunyi leti nga endzilweni. I gandzelo ro hisiwa, gandzelo leri endliwaka hi ndzilo ri va nun’hwelo lowu tsakisaka eka Yehovha.

2 “‘Kutani loko munhu a nyikela gandzelo ra mavele+ eka Yehovha, gandzelo rakwe ri fanele ri va mapa lama silekeke kahle naswona u fanele a chela mafurha ehenhla ka wona, kutani a n’wan’wasela murhi wa risuna ehenhla ka wona.+ 2 U ta ri tisa eka vana va Aroni lava nga vaprista, kutani muprista u ta nusa mapa ya rona lama silekeke kahle lama hlanganisiweke ni mafurha swin’we ni murhi wa rona wa risuna a tata xandla, u ta swi hisa swi va gandzelo ra xitsundzuxo+ ealtarini, gandzelo leri endliwaka hi ndzilo ri va nun’hwelo lowu tsakisaka eka Yehovha. 3 Hinkwaswo leswi saleke eka gandzelo ra mavele i swa Aroni ni vana+ vakwe, i nchumu wo kwetsima ngopfu+ lowu humaka emagandzelweni ya Yehovha lama endliweke hi ndzilo.

4 “‘Loko u nyikela gandzelo ra mavele leri bakiweke hi ovhene, ku fanele ku va mapa lama silekeke kahle, swinkwa leswi nga riki na comela leswi endliweke ku fana ni swingwavila swi hlanganisiwe ni mafurha kumbe swinkwa swo oma leswi nga riki na comela leswi totiweke mafurha.+

5 “‘Loko gandzelo ra wena ku ri gandzelo ra mavele lama katingiweke hi nsimbhi,+ ku fanele ku va mapa lama silekeke kahle lama nga riki na comela lama hlanganisiweke ni mafurha. 6 Ri fanele ri phemeleriwa naswona u ta chela mafurha ehenhla ka rona.+ I gandzelo ra mavele.

7 “‘Loko gandzelo ra wena ku ri gandzelo ra mavele lama swekiweke hi pani, ri fanele ri endliwa hi mapa lama silekeke kahle lama hlanganisiweke ni mafurha. 8 U fanele u tisa gandzelo ra mavele leri endliweke hi swilo leswi eka Yehovha naswona ri ta nyiketiwa muprista, yena u ta ri tisa ekusuhi ni altari. 9 Muprista u ta pambula swin’wana eka gandzelo ra mavele swi va gandzelo ra xitsundzuxo+ kutani a ri hisa ealtarini ri va gandzelo leri endliweke hi ndzilo, ra nun’hwelo lowu tsakisaka eka Yehovha.+ 10 Leswi saleke eka gandzelo ra mavele i swa Aroni ni vana vakwe, i nchumu wo kwetsima ngopfu wa magandzelo ya Yehovha lama endliweke hi ndzilo.+

11 “‘Mi nga tshuki mi nyikela gandzelo ra mavele leri cheriweke comela+ eka Yehovha, hikuva a mi fanelanga mi hisa mbila leyi vileke kumbe vulombe* swi va gandzelo leri endleriweke Yehovha hi ndzilo.

12 “‘Mi nga swi nyikela eka Yehovha swi va gandzelo ra mihandzu leyi wupfeke ku sungula,+ kambe a swi fanelanga swi tisiwa ealtarini leswaku swi va nun’hwelo lowu tsakisaka.

13 “‘Gandzelo rin’wana ni rin’wana ra mavele leri u nga ta ri nyikela ri fanele ri va ri cheriwe munyu; naswona u nga tshuki u rivala ku ri chela munyu hikuva wu ta ku tsundzuxa ntwanano wa Xikwembu. Gandzelo rin’wana ni rin’wana leri u nga ta ri nyikela, u ta ri chela munyu.+

14 “‘Loko u nyikela eka Yehovha hi gandzelo ra mavele ra mihandzu leyi wupfeke ku sungula, u fanele u nyikela hi mavele lama nga tiyelangiki lama katingiweke hi ndzilo, tindzoho ta mavele lama nga kandziwangiki ngopfu, swi va gandzelo ra mavele ra mihandzu ya wena leyi wupfeke ku sungula.+ 15 U ta chela mafurha ehenhla ka swona kutani u n’wan’wasela murhi wa risuna ehenhla ka swona. I gandzelo ra mavele. 16 Muprista u ta hisa mavele man’wana lama nga kandziwangiki ngopfu swin’we ni mafurha ku katsa ni murhi wa swona hinkwawo wa risuna swi va gandzelo ra xitsundzuxo,+ gandzelo leri endleriweke Yehovha hi ndzilo.

3 “‘Loko gandzelo rakwe ku ri gandzelo ro kombela ku rhula+ naswona loko a ri nyikela ri huma entlhambini wa tihomu, hambi i nkuzi kumbe i ntswele, u fanele a nyikela xifuwo lexi hanyeke kahle emahlweni ka Yehovha. 2 U ta tlhandleka voko rakwe ehenhla ka nhloko ya gandzelo rakwe naswona ri ta tlhaviwa enyangweni ya tende ra nhlengeletano; kutani vana va Aroni lava nga vaprista va ta n’wan’wasela ngati ematlhelo hinkwawo ya altari. 3 U ta nyikela gandzelo rin’wana ro kombela ku rhula ri va gandzelo leri endleriweke Yehovha hi ndzilo:+ mafurha+ lama funengetaka marhumbu, mafurha hinkwawo lama khomaneke na marhumbu 4 ni tinso timbirhi swin’we ni mafurha lama nga eka tona ekusuhi ni masenge. Nakambe u ta susa mafurha lama nga exivindzini ku katsa ni tinso.+ 5 Vana va Aroni va ta swi hisa ealtarini ehenhla ka gandzelo ro hisiwa leri nga ehenhla ka tihunyi leti nga endzilweni;+ i gandzelo leri endliweke hi ndzilo ra nun’hwelo lowu tsakisaka eka Yehovha.+

6 “‘Loko a nyikela hi nyimpfu kumbe mbuti eka Yehovha leswaku ku va gandzelo ro kombela ku rhula, u ta nyikela hi xifuwo xa xinuna kumbe xa xisati lexi hanyeke kahle.+ 7 Loko a nyikela khuna leritsongo leswaku ri va gandzelo rakwe, u ta ri nyikela emahlweni ka Yehovha. 8 U ta tlhandleka voko rakwe ehenhla ka nhloko ya gandzelo rakwe kutani ri ta tlhaviwa emahlweni ka tende ra nhlengeletano. Vana va Aroni va ta n’wan’wasela ngati ya rona ematlhelo hinkwawo ya altari. 9 U ta nyikela mafurha ya gandzelo ro kombela ku rhula ma va gandzelo leri endleriweke Yehovha+ hi ndzilo. U ta susa ncila hinkwawo lowu noneke ekusuhi ni longo, mafurha lama funengetaka marhumbu, mafurha hinkwawo lama khomaneke na marhumbu 10 ni tinso timbirhi swin’we ni mafurha lama nga eka tona ekusuhi ni masenge. Nakambe u ta susa mafurha lama nga exivindzini ku katsa ni tinso.+ 11 Kutani muprista u ta swi hisa ehenhla ka altari swi va swakudya,* gandzelo leri endleriweke Yehovha hi ndzilo.+

12 “‘Loko gandzelo rakwe ku ri mbuti, u ta ri nyikela emahlweni ka Yehovha. 13 U ta tlhandleka voko rakwe ehenhla ka nhloko ya rona kutani ri ta tlhaviwa emahlweni ka tende ra nhlengeletano naswona vana va Aroni va fanele va n’wan’wasela ngati ya rona ematlhelo hinkwawo ya altari. 14 Mafurha lama funengetaka marhumbu, mafurha hinkwawo lama khomaneke na marhumbu+ hi wona lawa a nga ta ma nyikela ma va gandzelo rakwe leri endleriweke Yehovha hi ndzilo 15 ni tinso timbirhi swin’we ni mafurha lama nga eka tona ekusuhi ni masenge. Nakambe u ta susa mafurha lama nga exivindzini ku katsa ni tinso. 16 Muprista u ta swi hisa ealtarini swi va swakudya,* gandzelo leri endliweke hi ndzilo ri va nun’hwelo lowu tsakisaka. Mafurha hinkwawo i ya Yehovha.+

17 “‘I nawu wa hilaha ku nga heriki eka vatukulu va n’wina, etindhawini hinkwato leti mi tshamaka eka tona: Mi nga tshuki mi dya mafurha kumbe ngati.’”+

4 Yehovha a ya emahlweni a byela Muxe a ku: 2 “Byela Vaisrayele u ku, ‘Loko munhu a dyoha kambe ku nga ri hi vomu,+ a endla swilo leswi Yehovha a leriseke leswaku a swi fanelanga swi endliwa:

3 “‘Loko muprista+ loyi a hlawuriweke a dyoha+ kutani a vangela vanhu nandzu, u fanele a nyikela xinkuzana lexi hanyeke kahle eka Yehovha, xi va gandzelo ra xidyoho hikwalaho ka xidyoho lexi a xi endleke.+ 4 U ta tisa nkuzi enyangweni ya tende ra nhlengeletano+ emahlweni ka Yehovha kutani a tlhandleka voko rakwe ehenhla ka nhloko ya nkuzi naswona u ta tlhava nkuzi emahlweni ka Yehovha.+ 5 Kutani muprista loyi a hlawuriweke+ u ta teka ngati yin’wana ya nkuzi a yi tisa etendeni ra nhlengeletano; 6 muprista u ta peta ritiho engatini+ kutani a n’wan’wasela ngati yin’wana ka nkombo+ emahlweni ka Yehovha, emahlweni ka khetheni leri pfalaka ndhawu yo kwetsima. 7 Muprista u ta tlhela a tota ngati yin’wana etimhondzweni ta altari ya murhi wo nun’hwela+ leyi nga emahlweni ka Yehovha etendeni ra nhlengeletano; kutani ngati leyin’wana hinkwayo ya nkuzi u ta yi chela etshakwini ra altari ya gandzelo ro hisiwa,+ leyi nga enyangweni ya tende ra nhlengeletano.

8 “‘Kutani u ta susa mafurha hinkwawo ya nkuzi ya gandzelo ra xidyoho, ku katsa ni mafurha lama funengetaka marhumbu ni mafurha lama khomaneke na marhumbu 9 ni tinso timbirhi swin’we ni mafurha lama nga eka tona ekusuhi ni masenge. Nakambe u ta susa mafurha lama nga exivindzini ku katsa ni tinso.+ 10 U ta susa swilo leswi hilaha ku endliwaka hakona eka nkuzi ya gandzelo ro kombela ku rhula.+ Kutani muprista u ta swi hisa ealtarini ya gandzelo ro hisiwa.

11 “‘Kambe dzovo ra nkuzi ni nyama ya yona hinkwayo swin’we ni nhloko ya yona, manqina ya yona, marhumbu ya yona ni vulongo+ bya yona, 12 nkuzi hinkwayo, u ta yi humesela ehandle ka nxaxa a yi yisa endhawini leyi baseke laha nkuma* wu lahliwaka kona, kutani u ta yi hisa ehenhla ka tihunyi endzilweni.+ Yi fanele yi hisiwa laha nkuma wu lahliwaka kona.

13 “‘Kutani loko Vaisrayele vo dyoha kambe ku nga ri hi vomu,+ kambe va nga swi xiyi leswaku va endle swilo leswi Yehovha a leriseke leswaku va nga swi endli,+ 14 kutani xidyoho xa kona xi tiviwa, va fanele va nyikela xinkuzana xa gandzelo ra xidyoho va xi tisa emahlweni ka tende ra nhlengeletano. 15 Vakulukumba va kona va ta tlhandleka mavoko enhlokweni ya nkuzi emahlweni ka Yehovha, kutani nkuzi yi ta tlhaviwa emahlweni ka Yehovha.

16 “‘Kutani muprista loyi a hlawuriweke u ta tisa ngati yin’wana ya nkuzi etendeni ra nhlengeletano. 17 Muprista u ta peta ritiho engatini kutani a n’wan’wasela yin’wana ya yona ka nkombo emahlweni ka Yehovha, emahlweni ka khetheni.+ 18 Kutani u ta tota ngati yin’wana etimhondzweni ta altari+ leyi nga emahlweni ka Yehovha, leyi nga etendeni ra nhlengeletano; ngati leyin’wana hinkwayo u ta yi chela etshakwini ra altari ya gandzelo ro hisiwa, leyi nga enyangweni ya tende ra nhlengeletano.+ 19 U ta susa mafurha hinkwawo lama nga eka nkuzi kutani a ma hisa ehenhla ka altari.+ 20 Nkuzi leyi u ta yi endlisa leswi a endliseke xiswona eka nkuzi leyin’wana ya gandzelo ra xidyoho. U ta endlisa sweswo, muprista u ta va kombelela ku rivaleriwa+ kutani va ta rivaleriwa. 21 U ta humesa nkuzi yi ya ehandle ka nxaxa kutani a yi hisa hilaha a hiseke nkuzi+ yo sungula hakona. I gandzelo ra xidyoho ra vanhu.+

22 “‘Loko ndhuna+ yi dyoha kambe ku nga ri hi vomu hi ku endla xin’wana xa swilo leswi Yehovha Xikwembu xa yona a leriseke leswaku swi nga endliwi, kutani yi va ni nandzu, 23 kumbe yi xiya leswaku yi endle xidyoho, yi fanele yi tisa xiphongo lexitsongo lexi hanyeke kahle xi va gandzelo ra yona. 24 Yi ta tlhandleka voko ra yona ehenhla ka nhloko ya ximbutana kutani yi xi tlhava endhawini leyi gandzelo ro hisiwa ri dlayeriwaka kona emahlweni ka Yehovha.+ I gandzelo ra xidyoho. 25 Muprista u ta teka ngati yin’wana ya gandzelo ra xidyoho hi ritiho a yi tota etimhondzweni+ ta altari ya gandzelo ro hisiwa, kutani u ta chela ngati leyin’wana hinkwayo etshakwini ra altari ya gandzelo ro hisiwa.+ 26 U ta hisa mafurha ya xona hinkwawo ehenhla ka altari ku fana ni mafurha ya gandzelo ro kombela ku rhula;+ kutani muprista u ta kombela leswaku xidyoho xa yona xi rivaleriwa, hikwalaho ndhuna yoleyo yi ta rivaleriwa xona.

27 “‘Loko munhu un’wana etikweni a dyoha kambe ku nga ri hi vomu kutani a va ni nandzu hi ku endla xin’wana xa swilo leswi Yehovha a leriseke leswaku a swi fanelanga swi endliwa,+ 28 kumbe a xiya leswaku u endle xidyoho, u fanele a tisa ximbutana xa ntswele lexi hanyeke kahle xi va gandzelo ra xidyoho lexi a xi endleke. 29 U ta tlhandleka voko rakwe ehenhla ka nhloko ya ximbutana xa gandzelo ra xidyoho kutani a xi tlhava laha xifuwo xa gandzelo ro hisiwa+ xi tlhaveriwaka kona. 30 Muprista u ta teka ngati yin’wana ya xona hi ritiho a yi tota etimhondzweni ta altari ya gandzelo ro hisiwa, kutani u ta chela ngati leyin’wana hinkwayo ya xona etshakwini ra altari.+ 31 U ta susa mafurha+ ya xona hinkwawo hilaha mafurha ya xifuwo xa gandzelo ro kombela ku rhula+ ma susiwaka hakona, muprista u ta xi hisa ehenhla ka altari xi va nun’hwelo lowu tsakisaka eka Yehovha; kutani muprista u ta n’wi kombelela ku rivaleriwa, kutani u ta rivaleriwa.

32 “‘Kambe loko a tisa xinyimpfana xi va gandzelo ra yena ra xidyoho, u fanele a tisa xinyimpfana xa ntswele lexi hanyeke kahle. 33 U ta tlhandleka voko rakwe ehenhla ka nhloko ya gandzelo ra xidyoho kutani a ri tlhava ri va gandzelo ra xidyoho laha gandzelo ro hisiwa ri tlhaveriwaka kona.+ 34 Muprista u ta teka ngati yin’wana ya gandzelo ra xidyoho hi ritiho a yi tota etimhondzweni ta altari ya gandzelo ro hisiwa,+ kutani u ta chela ngati leyin’wana hinkwayo ya rona etshakwini ra altari. 35 U ta susa mafurha ya rona hinkwawo hilaha mafurha ya khuna leritsongo ra gandzelo ro kombela ku rhula ma susiwaka hakona, kutani muprista u ta swi hisa ealtarini ehenhla ka magandzelo ya Yehovha lama endliwaka hi ndzilo;+ muprista u ta n’wi kombelela ku rivaleriwa hikwalaho ka xidyoho lexi a xi endleke, hikwalaho u ta rivaleriwa xona.+

5 “‘Loko munhu o tshuka a swi vona kumbe a twa leswaku un’wana u endle xidyoho kutani a twa ku tivisiwa leswaku ku fanele ku nyikeriwa vumbhoni,*+ kambe a nga vuli nchumu, u ta va ni nandzu naswona u ta tihlamulela hikwalaho ka xihoxo xa yena.

2 “‘Kumbe loko munhu o khumba nchumu lowu nga tengangiki, ku nga ha va ntsumbu wa xiharhi lexi nga tengangiki, xifuwo lexi nga tengangiki kumbe swivumbiwa leswi nga tengangiki leswi fambaka swi tele,+ a nga tenganga naswona u ni nandzu hambiloko a nga swi xiyi. 3 Kumbe loko munhu o khumba munhu kumbe nchumu lowu nga tengangiki,+ lowu nga n’wi endlaka a nga tengi kambe a nga swi xiyi, kutani a swi tiva, u ta va ni nandzu.

4 “‘Kumbe loko munhu o hatlisela ku hlambanya ku endla swo karhi, ku nga ha va leswinene kumbe leswo biha ku nga khathariseki leswaku i yini, kambe a nga swi xiyi, kutani endzhaku a swi xiya leswaku u hatlisele ku hlambanya, u ta va ni nandzu.*+

5 “‘Loko a va ni nandzu wa xin’wana xa swilo leswi, u fanele a phofula+ ndlela leyi a dyoheke ha yona. 6 U ta tlhela a tisa gandzelo ra yena ra nandzu eka Yehovha hikwalaho ka xidyoho lexi a xi endleke,+ ku nga xinyimpfana xa ntswele kumbe ximbutana xa ntswele, xi va gandzelo ra xidyoho. Kutani muprista u ta n’wi kombelela ku rivaleriwa xidyoho xa yena.

7 “‘Kambe loko a nga swi koti ku humesa nyimpfu, u fanele a tisa magugurhwana mambirhi kumbe swituvana+ swimbirhi eka Yehovha swi va gandzelo ra yena ra nandzu hikwalaho ka xidyoho lexi a xi endleke, xin’we xi va xa gandzelo ra xidyoho kutani lexin’wana xi va xa gandzelo ro hisiwa.+ 8 U ta swi tisa eka muprista, kutani yena u ta rhanga hi ku nyikela gandzelo ra xidyoho ivi a tsema nhloko ya rona laha nhamu ya rona yi sungulaka kona, kambe a nga yi tsemi yi suka. 9 U ta n’wan’wasela ngati yin’wana ya gandzelo ra xidyoho etlhelo ka altari, kambe ngati leyi saleke yi ta cheriwa etshakwini ra altari.+ I gandzelo ra xidyoho. 10 Lerin’wana u ta ri endla ku fana ni gandzelo ro hisiwa hi ku ya hi maendlelo ya kona ya nkarhi ni nkarhi;+ kutani muprista u ta n’wi kombelela ku rivaleriwa xidyoho xa yena, hikwalaho u ta rivaleriwa xona.+

11 “‘Kutani loko a nga swi koti ku humesa magugurhwana mambirhi kumbe swituvana swimbirhi, u fanele a tisa mapa lama silekeke kahle lama ringanaka omere*+ yin’we ma va gandzelo ra yena ra xidyoho. A nga fanelanga a ri chela mafurha kumbe a veka murhi wa risuna eka rona, hikuva i gandzelo ra xidyoho. 12 U ta ma tisa eka muprista, kutani muprista u ta nusa lama tataka xandla ma va gandzelo ra xitsundzuxo ivi a ma hisa ealtarini ehenhla ka magandzelo ya Yehovha lama endliweke hi ndzilo. I gandzelo ra xidyoho. 13 Muprista u ta n’wi kombelela ku rivaleriwa xidyoho xa yena, hambi xi ri xihi xa swidyoho leswi, kutani u ta rivaleriwa xona.+ Leswi saleke eka gandzelo swi ta va swa muprista,+ ku fana ni gandzelo ra mavele.’”+

14 Yehovha a ya emahlweni a vulavula na Muxe a ku: 15 “Loko munhu o tshuka a nga tshembeki kutani a tlula nawu mayelana ni swilo swo kwetsima swa Yehovha+ kambe ku nga ri hi vomu, u ta tisa khuna leri hanyeke kahle eka Yehovha ri va gandzelo ra nandzu;+ ntikelo* wa rona wu ta ringana ni mpimo wa ndhawu yo kwetsima.*+ 16 Kutani u ta riha xidyoho lexi a dyoheleke ndhawu yo kwetsima ha xona naswona u ta engetela 20 wa tiphesente eka mali yoleyo.+ U ta swi nyika muprista leswaku muprista a ta n’wi kombelela ku rivaleriwa+ hi khuna ra gandzelo ra nandzu, kutani u ta rivaleriwa.+

17 “Loko munhu a dyoha hi ku endla xin’wana xa swilo leswi Yehovha a leriseke leswaku a swi fanelanga swi endliwa, hambiloko a nga swi xiyi, wa ha ri ni nandzu naswona u ta tihlamulela hikwalaho ka xihoxo xakwe.+ 18 U fanele a tisa khuna leri hanyeke kahle eka muprista hi ku ya hi nxavo lowu muprista a wu ringanyeteke, ri va gandzelo ra nandzu.+ Kutani muprista u ta n’wi kombelela ku rivaleriwa xihoxo lexi a xi endleke a nga swi tivi naswona a nga xi endlangiki hi vomu, kutani u ta rivaleriwa xona. 19 I gandzelo ra nandzu. U ni nandzu wo dyohela Yehovha.”

6 Yehovha a ya emahlweni a vulavula na Muxe a ku: 2 “Loko munhu o dyoha kutani a nga tshembeki eka Yehovha+ hi ku xisa munhukulobye mayelana ni nchumu lowu a khomisiweke wona+ kumbe nchumu lowu a lombiweke wona kumbe a yivela munhukulobye kumbe a n’wi tekela swo karhi hi vukanganyisi, 3 kumbe a kuma nchumu lowu lahlekeke kutani a hemba mayelana na wona naswona loko a hlambanya hi vunwa eka xidyoho xihi ni xihi lexi a nga xi endlaka,+ u fanele a endla leswi: 4 Loko a dyohile naswona a ri ni nandzu, u fanele a tlherisela leswi a swi yiveke, leswi a swi tekeke hi nkani, leswi a swi tekeke hi vukanganyisi, leswi a khomisiweke swona, kumbe nchumu lowu lahlekeke lowu a wu kumeke, 5 kumbe nchumu wun’wana ni wun’wana lowu a hlambanyeke hi vunwa eka wona, kutani u fanele a wu riha hi hakelo leyi heleleke+ naswona u ta engetela 20 wa tiphesente eka mali yoleyo. U ta wu nyika n’wini wa wona hi siku leri a nga ta voniwa nandzu ha rona. 6 Kutani u ta tisa khuna leri hanyeke kahle eka muprista ri va gandzelo ra yena ra nandzu eka Yehovha hi ku ya hi nxavo lowu muprista a wu ringanyeteke, wa gandzelo ra nandzu.+ 7 Muprista u ta n’wi kombelela ku rivaleriwa emahlweni ka Yehovha, kutani u ta rivaleriwa nchumu wihi ni wihi lowu a nga ha vaka a wu endlile lowu endleke leswaku a va ni nandzu.”+

8 Yehovha a ya emahlweni a vulavula na Muxe a ku: 9 “Lerisa Aroni ni vana vakwe u ku, ‘Lowu i nawu wa gandzelo ro hisiwa:+ Gandzelo ro hisiwa ri ta tshama exitikweni ealtarini vusiku hinkwabyo ku fikela nimixo, kutani ndzilo wu ta tshama wu ri karhi wu pfurha ealtarini. 10 Muprista u ta ambala xiambalo xakwe xa vuprista lexi endliweke hi lapi+ a tlhela a ambala xiburukwana+ lexi endliweke hi lapi. Kutani u ta susa nkuma*+ wa gandzelo ro hisiwa lowu ndzilo wu ri hiseke ealtarini, a wu veka etlhelo ka altari. 11 U ta hluvula swiambalo+ swakwe a ambala swin’wana kutani a teka nkuma a wu yisa endhawini leyi baseke ehandle ka nxaxa.+ 12 Ndzilo wu ta tshama wu ri karhi wu pfurha ealtarini. A wu fanelanga wu timeka. Muprista u fanele a tshivela tihunyi+ ehenhla ka wona mixo wun’wana ni wun’wana naswona a veka gandzelo ro hisiwa ehenhla ka wona, kutani u ta hisa mafurha ya magandzelo yo kombela ku rhula ehenhla ka wona.+ 13 Ndzilo wu ta tshama wu ri karhi wu pfurha ealtarini. A wu fanelanga wu timeka.     

14 “‘Kutani lowu i nawu wa gandzelo ra mavele:+ N’wina vana va Aroni mi ta ri nyikela eka Yehovha emahlweni ka altari. 15 Un’wana wa vona u ta nusa mapa lama silekeke kahle ya gandzelo ra mavele hi voko ni mafurha man’wana ya rona ni murhi hinkwawo wa risuna lowu nga eka gandzelo ra mavele, u ta swi hisa ealtarini swi va nun’hwelo lowu tsakisaka wa gandzelo ra xitsundzuxo eka Yehovha.+ 16 Aroni ni vana vakwe va ta dya leswi saleke swa rona.+ Swi ta endliwa swi va swinkwa leswi nga riki na comela swi dyeriwa endhawini yo kwetsima. Va ta swi dyela exivaveni* xa tende ra nhlengeletano.+ 17 A swi fanelanga swi bakiwa ni nchumu wihi ni wihi lowu cheriweke comela.+ Ndzi va nyike swona swi va xiavelo xa vona eka magandzelo ya mina lama endliweke hi ndzilo.+ I nchumu wo kwetsima ngopfu+ ku fana ni gandzelo ra xidyoho ni gandzelo ra nandzu. 18 Vaxinuna hinkwavo exikarhi ka vana va Aroni va ta swi dya.+ I xiavelo xa vona xa hilaha ku nga heriki eka vatukulu va n’wina hinkwavo, lexi humaka eka magandzelo lama endleriweke Yehovha hi ndzilo.+ Hinkwaswo leswi nga ta ma* khumba swi ta va swo kwetsima.’”

19 Yehovha a tlhela a vulavula na Muxe a ku: 20 “Leri i gandzelo leri Aroni ni vana vakwe va nga ta ri nyikela eka Yehovha hi siku leri a nga ta hlawuriwa ha rona:+ mapa lama silekeke kahle lama ringanaka omere*+ yin’we ma va gandzelo ra mavele,+ hafu ya wona nimixo ni hafu ya wona nimadyambu. 21 Ri ta endliwa hi mafurha lama katingiweke hi nsimbhi.+ U ta ri tisa ri pfanganisiwe kahle ni mafurha kutani u nyikela swiphemu swa rona leswi bakiweke swa gandzelo ra mavele swi va nun’hwelo lowu tsakisaka eka Yehovha. 22 Muprista la hlawuriweke loyi a nga ta n’wi tlhandlama exikarhi ka vana+ vakwe, na yena u ta ri endla. I nawu wa hilaha ku nga heriki: Ri ta hiseriwa Yehovha ri ri gandzelo leri heleleke. 23 Gandzelo rin’wana ni rin’wana ra mavele ra muprista ri fanele ri va gandzelo leri heleleke. A ri fanelanga ri dyiwa.”

24 Yehovha a tlhela a vulavula na Muxe a ku: 25 “Byela Aroni ni vana vakwe u ku, ‘Lowu i nawu wa gandzelo ra xidyoho:+ Gandzelo ra xidyoho ri ta tlhaviwa+ emahlweni ka Yehovha endhawini leyi gandzelo ro hisiwa ri tlhaveriwaka eka yona. I nchumu wo kwetsima ngopfu. 26 Muprista loyi a ri humesaka ri va gandzelo ra xidyoho u ta ri dya.+ U ta ri dyela endhawini yo kwetsima exivaveni xa tende ra nhlengeletano.+

27 “‘Hinkwaswo leswi khumbaka nyama ya rona swi ta va swo kwetsima, naswona loko munhu wihi ni wihi o tota ngati yin’wana ya rona eka xiambalo xakwe, xi fanele xi hlantswiwa endhawini yo kwetsima. 28 Xibya xa vumba lexi a yi swekiwe hi xona xi ta fayiwa. Kambe loko yi swekiwe hi xibya xa koporo xi ta khuhliwa kutani xi hlantswiwa hi mati.

29 “‘Vaxinuna hinkwavo lava nga vaprista va ta yi dya.+ I nchumu wo kwetsima ngopfu.+ 30 Hambiswiritano, a ku na gandzelo ra xidyoho leri nga ta dyiwa loko ngati yin’wana ya rona yi tisiwe etendeni ra nhlengeletano leswaku yi ta kombela ku rivaleriwa endhawini yo kwetsima.+ Ri ta hisiwa hi ndzilo.

7 “‘Lowu i nawu wa gandzelo ra nandzu:+ I nchumu wo kwetsima ngopfu. 2 Va ta tlhava xifuwo xa gandzelo ra nandzu laha swifuwo swa magandzelo yo hisiwa swi tlhaveriwaka kona, ngati+ ya xona yi fanele yi n’wan’waseriwa ematlhelo hinkwawo ya altari.+ 3 U ta nyikela hi mafurha+ ya xona hinkwawo, ku katsa ni ncila wa xona lowu noneke, mafurha lama funengetaka marhumbu 4 ni tinso timbirhi ni mafurha lama nga ekusuhi ni masenge. Nakambe u ta susa mafurha lama nga exivindzini ku katsa ni tinso.+ 5 Muprista u ta swi hisa ealtarini swi va gandzelo leri endleriweke Yehovha hi ndzilo.+ I xifuwo xa gandzelo ra nandzu. 6 Vaxinuna hinkwavo lava nga vaprista va ta xi dya+ naswona xi fanele xi dyeriwa endhawini yo kwetsima. I nchumu wo kwetsima ngopfu.+ 7 Nawu wa gandzelo ra xidyoho ni wa gandzelo ra nandzu wa fana; nyama ya kona yi ta va ya muprista loyi a endlaka gandzelo ro kombela ku rivaleriwa.+

8 “‘Loko muprista a nyikela gandzelo ro hisiwa ra munhu un’wana, dzovo+ ra xifuwo lexi muprista a endleke gandzelo ro hisiwa ha xona ri ta va ra yena.

9 “‘Gandzelo rin’wana ni rin’wana ra mavele leri bakiweke hi ovheni kumbe leri endliweke hi pani kumbe leri katingiweke hi nsimbhi+ i ra muprista loyi a ri nyikelaka. Ri ta va ra yena.+ 10 Kambe gandzelo rin’wana ni rin’wana ra mavele leri pfanganisiweke ni mafurha+ kumbe leri omeke+ ri ta va ra vana va Aroni hinkwavo; va ta avelana mimpimo leyi ringanaka.

11 “‘Lowu i nawu wa gandzelo ro kombela ku rhula+ leri munhu a nga ta ri nyikela eka Yehovha: 12 Loko a ri nyikela leswaku a kombisa ku khensa,+ u ta ri nyikela ni swinkwa leswi nga riki na comela leswi endliweke ku fana ni swingwavila swi pfanganisiwa ni mafurha swi va gandzelo ra ku khensa, swinkwa swo oma leswi nga riki na comela leswi totiweke mafurha ni swinkwa leswi endliweke ku fana ni swingwavila hi mapa lama silekeke kahle lama pfanganisiweke kahle ni mafurha. 13 U ta nyikela gandzelo rakwe swin’we ni swinkwa leswi nga ni comela leswi endliweke ku fana ni swingwavila ku katsa ni magandzelo yakwe yo kombela ku rhula lama nga gandzelo ro khensa. 14 U ta teka muxaka ha wun’we wa xinkwa wa gandzelo rin’wana ni rin’wana wu va gandzelo ro kwetsima ra Yehovha; ri ta va ra muprista loyi a n’wan’waselaka ngati ya magandzelo yo kombela ku rhula.+ 15 Nyama ya gandzelo ro khensa ya magandzelo yakwe yo kombela ku rhula yi ta dyiwa hi siku leri a nga ta yi nyikela ha rona. A nga fanelanga a hlayisa yin’wana ku fikela nimixo.+

16 “‘Loko gandzelo leri a ri nyikelaka ku ri gandzelo ra xihlambanyo+ kumbe ra ku tirhandzela,+ ri ta dyiwa hi siku leri a ri nyikelaka ha rona naswona leswi saleke swi nga tlhela swi dyiwa hi siku leri landzelaka. 17 Kambe hi siku ra vunharhu, nyama leyi saleke ya gandzelo yi ta hisiwa hi ndzilo.+ 18 Hambiswiritano, loko nyama ya gandzelo rakwe ro kombela ku rhula yo dyiwa hi siku ra vunharhu, loyi a ri nyikelaka a nge amukeleki eka Xikwembu. A nge amukeriwi; i nchumu lowu nyenyetsaka naswona munhu loyi a dyaka yin’wana ya nyama ya rona u ta tihlamulela hikwalaho ka xihoxo xakwe.+ 19 Nyama leyi nga ta khumba nchumu wun’wana ni wun’wana lowu nga tengangiki a yi fanelanga yi dyiwa. Yi ta hisiwa hi ndzilo. Vanhu hinkwavo lava tengeke va nga dya nyama leyi tengeke.

20 “‘Kambe munhu la nga tengangiki loyi a dyaka nyama ya gandzelo ro kombela ku rhula leri nga ra Yehovha, u fanele a dlayiwa.+ 21 Loko munhu o khumba nchumu lowu nga tengangiki, ku nga ha va munhu loyi a nga tengangiki+ kumbe xiharhi lexi nga tengangiki+ kumbe nchumu wun’wana ni wun’wana lowu nga tengangiki lowu nyenyetsaka,+ kutani a dya nyama yin’wana ya gandzelo ro kombela ku rhula leri nga ra Yehovha, munhu yoloye u fanele a dlayiwa eka varikwavo.’”

22 Yehovha a ya emahlweni a vulavula na Muxe a ku: 23 “Byela Vaisrayele u ku, ‘Mi nga tshuki mi dya mafurha+ ya nkuzi kumbe ya khuna leritsongo kumbe ya mbuti. 24 Mafurha ya xiharhi lexi kumiweke xi file ni mafurha ya xiharhi lexi dlayiweke hi xiharhi xin’wana ma nga ha tirhiseriwa xilo xin’wana ni xin’wana, kambe a mi fanelanga mi ma dya.+ 25 Hikuva loyi a dyaka mafurha ya xiharhi lexi a xi nyikelaka xi va gandzelo leri endleriweke Yehovha hi ndzilo, u fanele a dlayiwa.

26 “‘Mi nga tshuki mi dya ngati+ etindhawini leti mi tshamaka eka tona, hambi i ya swinyenyana kumbe i ya swiharhi. 27 Munhu loyi a dyaka ngati u fanele a dlayiwa.’”+

28 Yehovha a tlhela a vulavula na Muxe a ku: 29 “Byela Vaisrayele u ku, ‘Loyi a nyikelaka gandzelo rakwe ro kombela ku rhula eka Yehovha, u ta tisa xiphemu xa gandzelo rakwe ro kombela ku rhula eka Yehovha.+ 30 U ta tisa mafurha+ ni xifuva a swi khome hi mavoko, swi va gandzelo leri endleriweke Yehovha hi ndzilo naswona u ta ndziwita xifuva xi va gandzelo leri ndziwitiwaka+ emahlweni ka Yehovha. 31 Muprista u ta hisa mafurha ealtarini,+ kambe xifuva xi ta va xa Aroni ni vana vakwe.+

32 “‘Mi ta nyika muprista nenge wa xinene wu va gandzelo ro kwetsima leri humaka eka magandzelo ya n’wina yo kombela ku rhula.+ 33 N’wana wa Aroni loyi a nyikelaka ngati ya magandzelo yo kombela ku rhula ni mafurha, nenge wa xinene wu ta va wa yena.+ 34 Hikuva ndzi teka xifuva xa gandzelo leri ndziwitiwaka ni nenge wa xiphemu xo kwetsima leswi humaka eka magandzelo yo kombela ku rhula ya Vaisrayele, ndzi swi nyika muprista Aroni ni vana vakwe, i nawu wa hilaha ku nga heriki eka Vaisrayele.+

35 “‘Lexi a ku ri xiphemu xa magandzelo lama endleriweke Yehovha hi ndzilo leswaku xi vekeriwa vaprista, ku nga Aroni ni vana vakwe hi siku leri va hlawuriweke ha rona leswaku va va vaprista va Yehovha.+ 36 Hi siku leri Yehovha a va hlawuleke+ ha rona u lerise Vaisrayele leswaku va va nyika xiphemu lexi. I nawu wa hilaha ku nga heriki eka vatukulu va vona.’”

37 Lowu i nawu wa gandzelo ro hisiwa,+ gandzelo ra mavele,+ gandzelo ra xidyoho,+ gandzelo ra nandzu,+ gandzelo ra ku vekiwa ka vaprista+ ni gandzelo ro kombela ku rhula,+ 38 hilaha Yehovha a leriseke Muxe hakona eNtshaveni ya Sinayi,+ hi siku leri a leriseke Vaisrayele ku nyikela magandzelo ya vona eka Yehovha emananga ya Sinayi.+

8 Yehovha a ya emahlweni a vulavula na Muxe a ku: 2 “Teka Aroni ni vana vakwe,+ swiambalo swa vona,+ mafurha yo kwetsima,*+ nkuzi ya gandzelo ra xidyoho, makhuna mambirhi ni basikiti ya swinkwa leswi nga riki na comela,+ 3 kutani u hlengeleta vanhu hinkwavo enyangweni ya tende ra nhlengeletano.”

4 Hiloko Muxe a endla hilaha Yehovha a n’wi leriseke hakona, kutani vanhu va hlengeletana enyangweni ya tende ra nhlengeletano. 5 Kutani Muxe a byela vanhu a ku: “Hi leswi swilo leswi Yehovha a leriseke leswaku hi swi endla.” 6 Hiloko Muxe a tshineta Aroni ni vana vakwe ekusuhi kutani a va hlambisa hi mati.+ 7 Endzhaku ka sweswo, a n’wi ambexa xiambalo xo leha+ kutani a n’wi boha bandhi,+ a n’wi ambexa xiambalo xo pfumala mavoko,+ a n’wi ambexa efodi*+ ivi a yi boha yi tiya hi bandhi+ leri nga eka yona. 8 Endzhaku ka sweswo, a n’wi bohelela xinkwamana xa le xifuveni+ kutani a veka Urimi na Thumimi+ exinkwamaneni xa le xifuveni. 9 Hiloko a n’wi ambexa duku+ kutani emahlweni ka rona a veka xiphepherhele xo hatima xa nsuku, mfungho wo kwetsima wa ku tinyiketela,*+ hilaha Yehovha a leriseke Muxe hakona.

10 Kutani Muxe a teka mafurha yo kwetsima a tota tabernakela ni swilo hinkwaswo leswi a swi ri eka yona,+ a swi hlawulekisa. 11 Endzhaku ka sweswo, a n’wan’wasela man’wana ya wona ka nkombo ealtarini kutani a tota altari ni swilo hinkwaswo leswi nga eka yona ni xo hlambela ni xilo lexi xo hlambela xi tshameke ehenhla ka xona leswaku a swi hlawulekisa. 12 Eku heteleleni a chela mafurha man’wana yo kwetsima enhlokweni ya Aroni kutani a n’wi hlawula leswaku a va wo kwetsima.+

13 Hiloko Muxe a tshineta vana va Aroni ekusuhi a va ambexa swiambalo swo leha, a va boha mabandhi kutani a va boha maduku,+ hilaha Yehovha a leriseke Muxe hakona.

14 Kutani a tisa nkuzi ya gandzelo ra xidyoho, hiloko Aroni ni vana vakwe va tlhandleka mavoko enhlokweni ya nkuzi ya gandzelo ra xidyoho.+ 15 Muxe a yi tlhava kutani a teka ngati+ a yi tota hi ritiho etimhondzweni ta altari matlhelo hinkwawo ivi a tengisa altari exidyohweni, kambe ngati leyin’wana hinkwayo a yi chela etshakwini ra altari leswaku a yi hlawulekisa ni ku yi basisa. 16 Endzhaku ka sweswo, Muxe a teka mafurha hinkwawo lawa a ma ri ehenhla ka marhumbu ni lawa a ma ri eka xivindzi ni tinso timbirhi ni mafurha ya tona kutani a swi hisa ealtarini.+ 17 Kutani nkuzi hinkwayo, dzovo ra yona, nyama ya yona ni vulongo bya yona swi hisiwa hi ndzilo ehandle ka nxaxa+ hilaha Yehovha a leriseke Muxe hakona.

18 Hiloko a tisa khuna ra gandzelo ro hisiwa ekusuhi kutani Aroni ni vana vakwe va tlhandleka mavoko enhlokweni ya khuna.+ 19 Kutani Muxe a ri tlhava ivi a n’wan’wasela ngati ya rona ematlhelo hinkwawo ya altari. 20 A tsemelela khuna kutani a veka nhloko ya rona, nyama ya rona ni mafurha ya tinso ealtarini. 21 Hiloko Muxe a hlantswa marhumbu ni manqina hi mati kutani a hisa khuna hinkwaro ealtarini. A ku ri gandzelo ro hisiwa ra nun’hwelo lowu tsakisaka. A ku ri gandzelo leri endleriweke Yehovha hi ndzilo hilaha Yehovha a leriseke Muxe hakona.

22 Hiloko a tisa khuna ra vumbirhi, khuna leri nyikeriwaka loko ku vekiwa vaprista+ kutani Aroni ni vana vakwe va tlhandleka mavoko enhlokweni ya rona.+ 23 Muxe a ri tlhava kutani a teka ngati yin’wana ya rona a yi tota emakumu ka ndleve ya xinene ya Aroni ni le khudzwini ra voko rakwe ra xinene ni le khudzwini ra nenge wakwe wa xinene. 24 Endzhaku ka sweswo, Muxe a tshineta vana va Aroni kutani a tota ngati yin’wana emakumu ka tindleve ta vona ta xinene ni le makhudzwini ya mavoko ya vona ya xinene ni le makhudzwini ya milenge ya vona ya xinene; kutani Muxe a n’wan’wasela ngati leyin’wana hinkwayo ematlhelo hinkwawo ya altari.+

25 Hiloko a teka mafurha, ncila wo nona, mafurha hinkwawo lawa a ma ri ehenhla ka marhumbu ni ya xivindzi, tinso timbirhi ni mafurha ya tona ni nenge wa xinene.+ 26 A humesa xinkwa xin’we lexi nga riki na comela lexi endliweke ku fana ni xingwavila,+ xinkwa xin’we lexi endliweke ku fana ni xingwavila lexi totiweke mafurha+ ni xinkwa xin’we xo oma, ebasikitini ya swinkwa leswi nga riki na comela leyi a yi ri emahlweni ka Yehovha. Hiloko a swi veka ehenhla ka mafurha ni nenge wa xinene. 27 Endzhaku ka sweswo, a swi veka eswandleni swa Aroni ni le swandleni swa vana vakwe kutani a sungula ku swi ndziwita swi va gandzelo leri ndziwitiwaka emahlweni ka Yehovha. 28 Hiloko Muxe a swi teka emavokweni ya vona kutani a swi hisa ealtarini ehenhla ka gandzelo ro hisiwa. A ku ri gandzelo ra ku vekiwa ka vaprista ra nun’hwelo lowu tsakisaka. A ku ri gandzelo leri endleriweke Yehovha hi ndzilo.

29 Kutani Muxe a teka xifuva a xi ndziwita xi va gandzelo leri ndziwitiwaka emahlweni ka Yehovha.+ Xifuva xa khuna ra ku vekiwa ka vaprista xi ve xa Muxe hilaha Yehovha a leriseke Muxe+ hakona.

30 Hiloko Muxe a teka mafurha man’wana yo kwetsima+ ni ngati yin’wana leyi a yi ri ealtarini kutani a n’wan’wasela Aroni ni swiambalo swakwe ni vana vakwe ni swiambalo swa vana vakwe lava a va ri na yena. Hikwalaho a hlawulekisa Aroni ni swiambalo swakwe ni vana vakwe+ ni swiambalo swa vona.+

31 Kutani Muxe a byela Aroni ni vana vakwe a ku: “Swekani+ nyama enyangweni ya tende ra nhlengeletano naswona mi ta yi dyela kwalaho ni swinkwa leswi nga ebasikitini ya loko ku vekiwa vaprista, hilaha ndzi lerisiweke hakona, ‘Aroni ni vana vakwe va ta swi dya.’+ 32 Nyama leyi nga ta sala ni xinkwa mi ta swi hisa hi ndzilo.+ 33 A mi fanelanga mi huma enyangweni ya tende ra nhlengeletano ku ringana masiku ya nkombo, kukondza ku hela masiku ya ku vekiwa ka n’wina hikuva swi ta teka masiku ya nkombo leswaku mi vekiwa ku va vaprista.+ 34 Yehovha u lerise leswaku hi endla leswi hi swi endleke namuntlha leswaku mi kombeleriwa ku rivaleriwa.+ 35 Mi ta tshama enyangweni ya tende ra nhlengeletano vusiku ni nhlikanhi ku ringana masiku ya nkombo+ naswona mi tivonela leswaku mi nga tluli swileriso swa Yehovha+ leswaku mi nga fi; hikuva ndzi lerisiwe tano.”

36 Kutani Aroni ni vana vakwe va endla hinkwaswo leswi Yehovha a swi leriseke Muxe.

9 Hi siku ra vunhungu,+ Muxe a vitana Aroni ni vana vakwe ni vakulukumba va Israyele. 2 Hiloko a byela Aroni a ku: “Teka rhole leri hanyeke kahle ri va gandzelo ra xidyoho+ ni khuna leri hanyeke kahle ri va gandzelo ro hisiwa, u swi nyikela emahlweni ka Yehovha. 3 Kambe u ta byela Vaisrayele u ku, ‘Tekani xiphongo xi va gandzelo ra xidyoho, rhole ni khuna leritsongo, hinkwaswo swi ri ni lembe naswona swi hanye kahle, swi va gandzelo ro hisiwa 4 ni nkuzi ni khuna swi va magandzelo yo kombela ku rhula,+ mi swi nyikela emahlweni ka Yehovha ni gandzelo ra mavele+ leri pfanganisiweke ni mafurha, hikuva Yehovha u ta humelela eka n’wina namuntlha.’”+

5 Hiloko va teka leswi Muxe a leriseke leswaku va swi yisa emahlweni ka tende ra nhlengeletano. Kutani Vaisrayele hinkwavo va tshinela, va yima emahlweni ka Yehovha. 6 Kutani Muxe a ku: “Hi leswi swilo leswi Yehovha a leriseke leswaku swi endliwa, leswaku ku vangama ka Yehovha ku va eka n’wina.”+ 7 Hiloko Muxe a byela Aroni a ku: “Yana ealtarini u nyikela gandzelo ra wena ra xidyoho+ ni gandzelo ra wena ro hisiwa, u kombela ku rivaleriwa,+ wena ni ndyangu wa wena; kutani u nyikela gandzelo ra vanhu+ naswona u va kombelela ku rivaleriwa,+ hilaha Yehovha a leriseke hakona.”

8 Hi ku hatlisa Aroni a ya ealtarini kutani a tlhava rhole ra gandzelo ra xidyoho leri a ri ri ra yena.+ 9 Hiloko vana va Aroni va n’wi nyiketa ngati+ kutani a peta ritiho eka yona ivi a yi tota etimhondzweni ta altari, ngati leyin’wana a yi chela etshakwini ra altari.+ 10 Kutani a hisa mafurha ni tinso ni xivindzi ealtarini, leswi humaka eka gandzelo ra xidyoho, hilaha Yehovha a leriseke Muxe hakona.+ 11 Hiloko a hisa nyama ni dzovo hi ndzilo ehandle ka nxaxa.+

12 Kutani a tlhava gandzelo ro hisiwa hiloko vana va Aroni va n’wi nyiketa ngati a yi n’wan’wasela ematlhelo hinkwawo ya altari.+ 13 Kutani va n’wi nyiketa nyama ya gandzelo ro hisiwa ni nhloko a swi hisa ealtarini. 14 A tlhela a hlantswa marhumbu ni manqina a swi hisa ealtarini swi va gandzelo ro hisiwa.

15 Hiloko a nyikela gandzelo ra vanhu, a teka mbuti ya gandzelo ra xidyoho ra vanhu a yi tlhava a endla gandzelo ra xidyoho hi yona ku fana ni lero sungula. 16 Kutani a nyikela gandzelo ro hisiwa hi ku ya hi swileriso swo endla magandzelo yo hisiwa.+

17 Endzhaku ka sweswo, a nyikela gandzelo ra mavele,+ a nusa yo tata xandla kutani a ma hisa ealtarini ku tlhandlekela eka gandzelo ro hisiwa ra nimixo.+

18 Endzhaku ka sweswo a tlhava nkuzi ni khuna ra gandzelo ro kombelela vanhu ku rhula. Hiloko vana va Aroni va n’wi nyiketa ngati kutani a yi n’wan’wasela matlhelo hinkwawo ya altari.+ 19 Loko ku ri mafurha ya nkuzi,+ ncila wo nona wa khuna, mafurha lama funengeteke swa le ndzeni, tinso ni mafurha lama funengeteke xivindzi,+ 20 va swi veke ehenhla ka swifuva, endzhaku ka sweswo a hisa mafurha ealtarini.+ 21 Kambe Aroni a ndziwita swifuva ni nenge wa xinene swi va gandzelo ro ndziwitiwa emahlweni ka Yehovha, hilaha Muxe a leriseke hakona.+

22 Hiloko Aroni a tlakusela mavoko evanhwini a va katekisa+ kutani a rhelela a suka ealtarini endzhaku ko endla gandzelo ra xidyoho, gandzelo ro hisiwa ni magandzelo yo kombela ku rhula. 23 Eku heteleleni, Muxe na Aroni va nghena etendeni ra nhlengeletano va tlhela va huma kutani va katekisa vanhu.+

Hiloko ku vangama ka Yehovha ku humelela eka vanhu hinkwavo,+ 24 Yehovha+ a rhumela ndzilo kutani wu sungula ku hisa gandzelo ro hisiwa ni mafurha lawa a ma ri ealtarini. Loko vanhu hinkwavo va swi vona, va sungula ku huwelela, va wa swikandza swa vona swi languta ehansi.+

10 Endzhaku ka sweswo, Nadabu na Abihu+ vana va Aroni, va teka swo khoma ndzilo va chela ndzilo eka swona va chela ni murhi wo nun’hwela+ eka swona. Kutani va sungula ku endla gandzelo* leri nga amukelekiki+ emahlweni ka Yehovha, leri a nga va lerisangiki leswaku va ri endla. 2 Hiloko Yehovha a rhumela ndzilo kutani wu va hisa+ va fela emahlweni ka Yehovha.+ 3 Kutani Muxe a byela Aroni a ku: “Yehovha u te, ‘Lava nga ekusuhi na mina+ va fanele va tsundzuka leswaku ndza kwetsima naswona ndzi ta vangamisiwa emahlweni ka vanhu hinkwavo.’” Aroni a miyela.

4 Hiloko Muxe a vitana Mixayele na Elizafani vana va Uziyele,+ makwavo wa tata wa Aroni a ku eka vona: “Tanani mi ta tlakula vamakwenu mi va susa emahlweni ka ndhawu yo kwetsima mi va yisa ehandle ka nxaxa.” 5 Kutani va ta ivi va tlakula vavanuna volavo lava a va ha ambale swiambalo swa vona swo leha va va yisa ehandle ka nxaxa, hilaha Muxe a va byeleke hakona.

6 Hiloko Muxe a byela Aroni ni vana vakwe lavan’wana, ku nga Eliyazara na Ithamara a ku: “Mi nga tshiki misisi ya tinhloko ta n’wina mi nga vi na mhaka na yona kumbe mi handzula swiambalo swa n’wina,+ leswaku mi nga fi nileswaku Xikwembu xi nga hlundzukeli ntshungu hinkwawo. Vamakwenu va yindlu hinkwayo ya Israyele va ta rilela lava Yehovha a va dlayeke hi ndzilo. 7 A mi fanelanga mi huma enyangweni ya tende ra nhlengeletano hikuva mi ta fa leswi mafurha yo kwetsima* ya Yehovha ma nga le henhla ka n’wina.”+ Kutani va endla hilaha Muxe a va byeleke hakona.

8 Kutani Yehovha a byela Aroni a ku: 9 “Wena ni vana va wena mi nga nwi vhinyo kumbe swakunwa leswi pyopyaka loko mi ta etendeni ra nhlengeletano,+ leswaku mi nga fi. I nawu wa hilaha ku nga heriki eka vatukulu va n’wina. 10 Leswi swi ta endla leswaku ku va ni ku hambana exikarhi ka nchumu wo kwetsima ni lowu nyameke ni le xikarhi ka nchumu lowu nga basangiki ni lowu baseke+ 11 ni ku dyondzisa Vaisrayele swileriso hinkwaswo leswi Yehovha a va byeleke swona hi ku tirhisa Muxe.”+

12 Hiloko Muxe a vulavula na Aroni swin’we ni vana vakwe lava saleke, ku nga Eliyazara na Ithamara a ku: “Tekani gandzelo ra mavele leri siyiweke eka magandzelo ya Yehovha lama endliweke hi ndzilo, mi ri dya tanihi xinkwa lexi nga riki na comela ekusuhi ni altari+ hikuva i nchumu wo kwetsima ngopfu.+ 13 Mi fanele mi ri dyela endhawini yo kwetsima+ hikuva i xiavelo xa wena ni vana va wena lexi humaka eka magandzelo ya Yehovha lama endliweke hi ndzilo, hikuva ndzi lerisiwe tano. 14 Nakambe mi ta dya xifuva xa gandzelo leri ndziwitiwaka ni nenge wa gandzelo ro kwetsima+ endhawini leyi baseke, n’wina ni vana va n’wina va majaha ni va vanhwanyana+ hikuva swilo leswi mi nyikiwe swona leswaku swi va xiavelo xa n’wina ni xa vana va n’wina, xi huma eka magandzelo yo kombela ku rhula ya Vaisrayele. 15 Va ta tisa nenge wa gandzelo ro kwetsima ni xifuva xa gandzelo leri ndziwitiwaka swin’we ni magandzelo ya mafurha lama endliweke hi ndzilo, leswaku ku ta ndziwitiwa gandzelo leri ndziwitiwaka emahlweni ka Yehovha; kutani ri ta va xiavelo xa wena ni vana va wena+ hilaha ku nga heriki hilaha Yehovha a leriseke hakona.”

16 Muxe a lavisisa mbuti ya gandzelo ra xidyoho+ kutani a kuma leswaku a yi hisiwile. Hiloko a hlundzukela vana va Aroni lava a va sele, ku nga Eliyazara na Ithamara a ku: 17 “Hikwalaho ka yini mi nga dyelanga gandzelo ra xidyoho endhawini yo kwetsima,+ hikuva i nchumu wo kwetsima ngopfu naswona mi nyikiwe rona leswaku mi ta susa xidyoho eka vanhu leswaku mi ta va kombelela ku rivaleriwa emahlweni ka Yehovha? 18 Maswivo! Ngati ya rona a yi tisiwanga endzeni ka ndhawu yo kwetsima.+ A mi fanele mi ri dyele endhawini yo kwetsima, hilaha ndzi lerisiweke hakona.” 19 Aroni a byela Muxe a ku: “Waswivo! Namuntlha va nyikele gandzelo ra vona ra xidyoho ni gandzelo ra vona ro hisiwa emahlweni ka Yehovha,+ kambe ndzi humeleriwe hi swilo swo biha. Loko a ndzi dye gandzelo ra xidyoho namuntlha, xana sweswo a swi ta n’wi tsakisa Yehovha?” 20 Loko Muxe a twa sweswo, a swi twisisa leswaku hikwalaho ka yini a endle tano.

11 Kutani Yehovha a byela Muxe na Aroni a ku: 2 “Byelani Vaisrayele mi ku, ‘Leswi i swivumbiwa leswi hanyaka leswi nga emisaveni leswi mi nga swi dyaka:+ 3 Xiharhi xin’wana ni xin’wana lexi nga ni sondzo* leri avaneke hi le xikarhi xi tlhela xi gayela, xi nga dyiwa.

4 “‘Kambe a mi fanelanga mi dya swiharhi leswi, leswi gayelaka kumbe leswi sondzo* ra swona ri avaneke hi le xikarhi: kamela, ya gayela kambe sondzo* ra yona a ri avananga hi le xikarhi. A yi tenganga eka n’wina.+ 5 Ni mbila+ hikuva ya gayela kambe sondzo* ra yona a ri avananga hi le xikarhi. A yi tenganga eka n’wina. 6 Ni mpfundla hikuva wa gayela kambe a wu na sondzo* leri avaneke hi le xikarhi. A wu tenganga eka n’wina. 7 Ni nguluve+ hikuva yi ni sondzo* leri avaneke hi le xikarhi kambe a yi gayeli. A yi tenganga eka n’wina. 8 A mi fanelanga mi dya nyama ya swona kumbe mi khumba mitsumbu ya swona. A swi tenganga eka n’wina.+

9 “‘Leswi mi nga swi dyaka eka hinkwaswo leswi nga ematini hi leswi: Xin’wana ni xin’wana lexi nga ematini lexi nga ni swipapila* ni mahakatimba, hambi xi le lwandle kumbe enambyeni, mi nga xi dya.+ 10 Kambe swilo hinkwaswo leswi nga elwandle ni leswi nga enambyeni leswi nga riki na swipapila ni mahakatimba, eka swivumbiwa hinkwaswo swa le matini leswi fambaka swi tele ni swivumbiwa swin’wana leswi hanyaka swa le matini, i nchumu lowu nyenyetsaka eka n’wina. 11 Leswi swi nyenyetsaka eka n’wina, a mi fanelanga mi dya nyama+ ya swona naswona mi fanele mi nyenya mitsumbu ya swona. 12 Hinkwaswo leswi nga ematini leswi nga riki na swipapila ni mahakatimba, i nchumu lowu nyenyetsaka eka n’wina.

13 “‘Leswi i swivumbiwa leswi hahaka leswi mi nga ta swi nyenya; a swi fanelanga swi dyiwa, hikuva swa nyenyetsa: gama,+ n’hwati, koti ra ntima,+ 14 mangatlu yo tshwuka ni mangatlu man’wana ni man’wana ya ntima, 15 mawukuwuku hinkwawo, 16 yinca,* xikhovha, sekwa ra nhova, xikhwezana* xin’wana ni xin’wana, 17 xikhovha lexitsongo, ngulukwani, xikhovha xa tindleve to leha, 18 sekwa lerikulu, gumba, koti, 19 ntavila, rikolwa rin’wana ni rin’wana, marimamahlanga ni mangadyana. 20 Xivumbiwa xin’wana ni xin’wana lexi nga ni timpapa eka leswi fambaka swi tele* lexi kotaka ku famba, i nchumu lowu nyenyetsaka eka n’wina.

21 “‘Eka swivumbiwa hinkwaswo leswi nga ni timpapa swi tlhela swi kota ku famba hi milenge ya mune eka leswi fambaka swi tele, mi nga dya ntsena leswi nga ni milenge yimbirhi yo leha leswaku swi ta tlula hi yona ehenhla ka misava. 22 Leswi mi nga swi dyaka hi leswi: tinjiya tin’wana ni tin’wana leti nga tshamiki endhawini yin’we, tinjiya tin’wana leti dyiwaka,+ tinchonyonyo ni timherha. 23 Swivumbiwa hinkwaswo leswi nga ni timpapa swi tlhela swi kota ku famba hi milenge ya mune eka leswi fambaka swi tele, i nchumu lowu nyenyetsaka eka n’wina. 24 Un’wana ni un’wana loyi a khumbaka mitsumbu ya swona u ta va a nga tenganga ku fikela nimadyambu.+ Leswi swi ta endla leswaku mi va lava nga tengangiki. 25 Un’wana ni un’wana la rhwalaka mitsumbu ya swona u fanele a hlantswa swiambalo swakwe;+ u ta va a nga tenganga ku fikela nimadyambu.

26 “‘Xiharhi xin’wana ni xin’wana lexi nga ni sondzo* leri avaneke hi le xikarhi xi tlhela xi nga gayeli, a xi tenganga eka n’wina. Un’wana ni un’wana loyi a swi khumbaka u ta va a nga tenganga.+ 27 Xivumbiwa xin’wana ni xin’wana lexi nga riki na swinyondzwana eka swivumbiwa leswi hanyaka leswi fambaka hi milenge ya mune, a swi tenganga eka n’wina. Un’wana ni un’wana loyi a khumbaka mitsumbu ya swona u ta va a nga tenganga ku fikela nimadyambu. 28 Loyi a rhwalaka mitsumbu ya swona u fanele a hlantswa swiambalo swakwe+ naswona u ta va a nga tenganga ku fikela nimadyambu.+ A swi tenganga eka n’wina.

29 “‘Leswi i swivumbiwa leswi fambaka swi tele leswi nga emisaveni leswi nga tengangiki eka n’wina: mfukuzana, kondlo,+ nkolombyana wun’wana ni wun’wana, 30 xipyindzi,* nkolombyana lowukulu, xipululu, nkolombyana wa le saveni ni rimpfani. 31 Swivumbiwa leswi, leswi fambaka swi tele a swi tenganga eka n’wina.+ Un’wana ni un’wana loyi a khumbaka mitsumbu ya swona u ta va a nga tenganga ku fikela nimadyambu.+

32 “‘Nchumu wun’wana ni wun’wana lowu swi welaka eka wona loko swi file wu ta va wu nga tenganga, ku nga ha va xibya lexi vatliweke, xiambalo, dzovo kumbe xiambalo* xo khwaxa. Xibya xin’wana ni xin’wana lexi tirhisiwaka xi fanele xi hoxiwa ematini naswona xi ta va xi nga tenganga ku fikela nimadyambu; endzhaku ka sweswo xi ta va xi tengile. 33 Loko swo wela exibyeni xa vumba, mi ta xi faya naswona nchumu wun’wana ni wun’wana lowu a wu ri eka xona wu ta va wu nga tenganga.+ 34 Swakudya swin’wana ni swin’wana leswi cheriwaka hi mati lama humaka exibyeni xexo, swi ta va swi nga tenganga naswona swakunwa swin’wana ni swin’wana leswi nga exibyeni xexo swi ta va swi nga tenganga. 35 Nchumu wun’wana ni wun’wana lowu mitsumbu ya swona yi welaka eka wona wu ta va wu nga tenganga. Hambi i ovhene kumbe xitofu lexitsongo, swi fanele swi fayiwa. A swi tenganga naswona swi ta tshama swi nga tenganga eka n’wina. 36 Xihlovo ni khele leri ku hlayisiwaka mati eka rona swi ta tshama swi tengile, kambe un’wana ni un’wana la khumbaka mitsumbu ya swivumbiwa leswi nga tengangiki u ta va a nga tenganga. 37 Loko mitsumbu ya swona yo wela ehenhla ka mbewu leyi nga ta byariwa, yi tengile. 38 Kambe loko mbewu yo cheriwa hi mati kutani ntsumbu wun’wana wa swona wu wela ehenhla ka yona, mbewu yoleyo a yi tenganga eka n’wina.

39 “‘Kutani loko xiharhi lexi mi pfumeleriwaka ku xi dya xi fa, un’wana ni un’wana loyi a khumbaka ntsumbu wa xona u ta va a nga tenganga ku fikela nimadyambu.+ 40 Un’wana ni un’wana loyi a dyaka ntsumbu wa xona u fanele a hlantswa swiambalo swakwe naswona u ta va a nga tenganga ku fikela nimadyambu.+ Un’wana ni un’wana la rhwalaka ntsumbu wa xona u fanele a hlantswa swiambalo swakwe naswona u ta va a nga tenganga ku fikela nimadyambu. 41 Xivumbiwa xin’wana ni xin’wana eka leswi fambaka swi tele emisaveni i nchumu lowu nyenyetsaka.+ A xi fanelanga xi dyiwa. 42 A mi fanelanga mi dya xivumbiwa xin’wana ni xin’wana lexi fambaka hi khwiri, xivumbiwa xin’wana ni xin’wana lexi fambaka hi milenge hinkwayo ya mune, kumbe swivumbiwa swin’wana ni swin’wana leswi fambaka swi tele emisaveni leswi nga ni milenge yo tala, hikuva swa nyenyetsa.+ 43 Mi nga tshuki mi tiendla lava nyenyetsaka hi ku dya xivumbiwa xin’wana ni xin’wana xa leswi fambaka swi tele naswona mi nga tinyamisi kutani mi va lava nga tengangiki hikwalaho ka swona.+ 44 Hikuva hi mina Yehovha Xikwembu xa n’wina+ naswona mi fanele mi tshama mi basile mi tlhela mi kwetsima+ hikuva mina ndza kwetsima.+ Kutani a mi fanelanga mi tiendla lava nga tengangiki hi ku dya xivumbiwa xin’wana ni xin’wana xa leswi fambaka swi tele emisaveni. 45 Hikuva hi mina Yehovha loyi a mi rhangeleke mi huma etikweni ra Egipta leswaku ndzi tikombisa ndzi ri Xikwembu eka n’wina+ naswona mi fanele mi kwetsima,+ hikuva mina ndza kwetsima.+

46 “‘Lowu i nawu mayelana ni swiharhi, swivumbiwa leswi hahaka, xivumbiwa xin’wana ni xin’wana lexi hanyaka lexi fambafambaka ematini swin’we ni xivumbiwa xin’wana ni xin’wana eka leswi fambaka swi tele emisaveni, 47 leswaku ku va ni ku hambana exikarhi ka leswi nga tengangiki ni leswi tengeke ni le xikarhi ka swivumbiwa leswi hanyaka leswi nga dyiwaka ni leswi nga ta ka swi nga dyiwi.’”+

12 Yehovha a ya emahlweni a byela Muxe a ku: 2 “Byela Vaisrayele u ku, ‘Loko wansati a tika kutani a veleka n’wana waxinuna, u ta va a nga tenganga ku ringana masiku ya nkombo, tanihi leswi a nga tengangiki loko a ri enkarhini.+ 3 Hi siku ra vunhungu n’wana u ta yimbisiwa.+ 4 Wansati u ta ya emahlweni a tibasisa ku ringana masiku ya 33 hikwalaho ka ngati leyi humeke. A nga fanelanga a khumba nchumu wun’wana ni wun’wana wo kwetsima naswona a nga fanelanga a ta endhawini yo kwetsima kukondza masiku ya ku basisiwa ka yena ma hela.

5 “‘Loko o veleka n’wana wa nhwanyana, u ta va a nga tenganga ku ringana masiku ya 14, ku fana ni loko a ri enkarhini. U ta ya emahlweni a tibasisa ku ringana masiku ya 66 hikwalaho ka ngati leyi humeke. 6 Loko masiku ya ku basisiwa ka yena hikwalaho ka n’wana wakwe wa jaha kumbe wa nhwanyana ma herile, u ta tisa khuna leritsongo eka muprista, leri nga ni lembe ri va gandzelo ro hisiwa+ ni xituvana kumbe gugurhwana ri va gandzelo ra xidyoho, u ta swi tisa enyangweni ya tende ra nhlengeletano. 7 Muprista u ta ri nyikela emahlweni ka Yehovha naswona a n’wi kombelela ku rivaleriwa kutani u ta va a basile eka ngati yakwe leyi humeke. Lowu i nawu mayelana ni wansati loyi a velekaka n’wana waxinuna kumbe waxisati. 8 Kambe loko a nga swi koti ku humesa nyimpfu, u fanele a teka magugurhwana mambirhi kumbe swituvana swimbirhi,+ xin’we xi va gandzelo ro hisiwa lexin’wana xi va gandzelo ra xidyoho naswona muprista u ta n’wi kombelela ku rivaleriwa kutani u ta va a tengile.’”

13 Yehovha a ya emahlweni a vulavula na Muxe na Aroni a ku: 2 “Loko munhu o pfimba emirini, a va ni swirhumbana kumbe a va ni mafelangati leswi nga ha vaka vuvabyi bya nhlokonho*+ emirini wakwe, u fanele a tisiwa eka muprista Aroni kumbe eka un’wana wa vana vakwe lava nga vaprista.+ 3 Muprista u ta kambela vuvabyi lebyi nga enhlongeni yakwe. Loko misisi leyi nga endhawini leyi nga ni vuvabyi yi hundzuke yo basa naswona vuvabyi byi languteka byi nghene enyameni yakwe, i vuvabyi bya nhlokonho. Muprista u ta byi kambela kutani u ta n’wi vula loyi a nga tengangiki. 4 Kambe loko mafelangati lama nga enhlongeni yakwe ma ri yo basa naswona ma languteka ma nga nghenanga enhlongeni ni misisi yi nga hundzukanga yo basa, muprista u ta n’wi tshamisa a ri yexe munhu la vabyaka ku ringana masiku ya nkombo.+ 5 Muprista u ta n’wi kambela hi siku ra vunkombo, kutani loko vuvabyi byi tikomba byi yimile byi nga hangalakanga ni miri, muprista u ta n’wi tshamisa a ri yexe masiku man’wana ya nkombo.

6 “Muprista u fanele a tlhela a n’wi kambela hi siku ra vunkombo naswona loko vuvabyi byi nga hangalakanga ni miri, muprista u ta n’wi vula la tengeke;+ a ku ri swirhumbana ntsena. Munhu loyi u ta hlantswa swiambalo swakwe kutani a va loyi a tengeke. 7 Kambe loko vuvabyi byi hangalake ni miri endzhaku ka loko a humelele eka muprista leswaku a ta vona loko a tengile, kutani u ta humelela eka muprista ra vumbirhi. 8 Muprista u ta n’wi kambela kutani loko vuvabyi byi hangalake ni miri, muprista u ta n’wi vula loyi a nga tengangiki. I nhlokonho.+

9 “Loko munhu o va ni vuvabyi bya nhlokonho, u fanele a yisiwa eka muprista, 10 kutani muprista u ta n’wi kambela.+ Loko ku ri ni swirhumbana swo basa emirini naswona swi hundzule misisi yi va yo basa naswona swirhumbana swi boxekile,+ 11 i nhlokonho leyi nga ta tshama nkarhi wo leha enhlongeni yakwe naswona muprista u ta n’wi vula loyi a nga tengangiki. A nga fanelanga a n’wi tshamisa a ri yexe leswaku a ta kamberiwa+ hikuva a nga tenganga. 12 Loko nhlokonho yo hangalaka ni nhlonge hinkwayo ya munhu yoloye kutani yi n’wi funengeta ku suka enhlokweni ku ya emilengeni laha muprista a nga kotaka ku vona kona 13 naswona loko muprista a n’wi kamberile kutani a kuma leswaku nhlokonho yi funengete nhlonge yakwe hinkwayo, u ta vula leswaku munhu yoloye u tengile. Nhlonge yakwe hinkwayo yi hundzuke yo basa, u tengile. 14 Kambe loko yo tshuka yi huma swirhumbana leswi boxekeke, u ta va a nga tenganga. 15 Loko muprista a vona swirhumbana leswi boxekeke, u ta n’wi vula loyi a nga tengangiki.+ Swirhumbana leswi boxekeke a swi tenganga. I nhlokonho.+ 16 Kambe loko swirhumbana leswi boxekeke swo tlhela swi va swo basa, u ta ya eka muprista. 17 Muprista u ta n’wi kambela+ naswona loko swirhumbana swi hundzuke swo basa, muprista u ta vula leswaku munhu yoloye u tengile. U ta va a tengile.

18 “Loko munhu o huma rhumba enhlongeni yakwe kutani ri hola, 19 kambe laha a ku ri ni rhumba ku huma swirhumbana swo basa kumbe mafelangati, u fanele a ya eka muprista. 20 Muprista u ta ma kambela,+ kutani loko ma vonaka ma nghene enhlongeni naswona misisi ya kona yi hundzuke yo basa, muprista u ta n’wi vula la nga tengangiki. I vuvabyi bya nhlokonho lebyi humeke eka rhumba. 21 Kambe loko muprista a ma kambela kutani a kuma leswaku a ku na misisi yo basa eka wona naswona a ma nghenanga enhlongeni, ma vonaka ma nyamalarile, muprista u ta n’wi tshamisa a ri yexe ku ringana masiku ya nkombo.+ 22 Loko ma hangalake ni nhlonge, muprista u ta n’wi vula la nga tengangiki. I vuvabyi. 23 Kambe loko mafelangati ma nga hangalakanga ni miri, i vuvabyi lebyi humaka eka rhumba naswona muprista u ta n’wi vula la tengeke.+

24 “Kumbe loko munhu o tshwa hi ndzilo kutani xivati xa laha a tshweke kona xi huma mafelangati kumbe xi va xo basa, 25 muprista u ta xi kambela. Loko misisi leyi nga eka mafelangati yi hundzuke yo basa naswona xi vonaka xi nghene enhlongeni, i nhlokonho leyi humaka exivatini kutani muprista u ta n’wi vula la nga tengangiki. I vuvabyi bya nhlokonho. 26 Kambe loko muprista a xi kambela kutani a kuma leswaku a ku na misisi yo basa eka mafelangati naswona a xi nghenanga enhlongeni, mafelangati ma nyamalarile, muprista u ta n’wi tshamisa a ri yexe masiku ya nkombo.+ 27 Muprista u ta n’wi kambela hi siku ra vunkombo naswona loko mafelangati ma hangalake ni nhlonge, muprista u ta n’wi vula la nga tengangiki. I vuvabyi bya nhlokonho. 28 Kambe loko mafelangati ma nga hangalakanga ni miri ma tlhela ma nyamalala, ku ri xivati lexi nga lo pfimba, muprista u ta n’wi vula la tengeke hikuva i xivati lexi pfimbisiweke hi ku tshwa.

29 “Loko wanuna kumbe wansati o huma xirhumbana enhlokweni kumbe exilepfini, 30 kutani muprista u ta kambela xirhumbana xexo.+ Loko xi vonaka xi nghene enhlongeni naswona misisi yi ri ya xitshopana yi tlhela yi va yitsongo, muprista u ta vula leswaku munhu yoloye a nga tenganga; i swirhumbana swa ku tsuvuka ka misisi kumbe malepfu. I nhlokonho ya nhloko kumbe ya xilepfu. 31 Kambe loko muprista a vona leswaku swirhumbana a swi nghenanga enhlongeni naswona a ku na misisi ya ntima eka swona, muprista u fanele a tshamisa munhu yoloye a humeke swirhumbana a ri yexe ku ringana masiku ya nkombo.+ 32 Muprista u ta kambela swirhumbana hi siku ra vunkombo, loko swirhumbana swi nga hangalakanga naswona laha swi nga kona ku nga humanga misisi ya xitshopana naswona ndhawu leyi swi nga eka yona yi nga nghenanga enhlongeni, 33 munhu yoloye u fanele a byevula nhloko yakwe ni malepfu, kambe a nga fanelanga a byevula ndhawu leyi nga ni swirhumbana. Kutani muprista u ta tshamisa munhu yoloye a ri yexe ku ringana masiku ya nkombo.

34 “Muprista u ta tlhela a kambela ndhawu leyi nga ni swirhumbana hi siku ra vunkombo kutani loko swirhumbana swa ku tsuvuka ka misisi kumbe malepfu swi nga hangalakanga ni nhlonge naswona swi nga nghenanga enhlongeni, muprista u fanele a n’wi vula la tengeke naswona munhu yoloye u fanele a hlantswa swiambalo swakwe kutani a va la tengeke. 35 Kambe loko swirhumbana swo hangalaka ni nhlonge endzhaku ka loko a basisiwile, 36 muprista u ta n’wi kambela kutani loko swirhumbana swi hangalake ni nhlonge, muprista a nga fanelanga a kambisisa misisi ya xitshopana; munhu yoloye a nga tenganga. 37 Kambe loko ku kumiwa leswaku swirhumbana a swi hangalakanga ni nhlonge naswona ku mile misisi ya ntima eka swona, swirhumbana swi horile. U tengile, muprista u ta n’wi vula la tengeke.+

38 “Loko wanuna kumbe wansati o huma mafelangati enhlongeni naswona ma ri yo basa, 39 muprista u ta ma kambela.+ Loko swirhumbana swa nhlonge swi kala muhlovo, i swirhumbana leswi humeke enhlongeni. Munhu yoloye u tengile.

40 “Loko wanuna o suka misisi ya nhloko yakwe kutani a sala a ri ni mpandlha, u tengile. 41 Loko o suka misisi ya le mahlweni ka nhloko yakwe kutani a huma mpandlha, u tengile. 42 Kambe loko ko huma mafelangati empandlheni kumbe emombyeni wakwe, i nhlokonho leyi humeke empandlheni yakwe kumbe emombyeni wakwe. 43 Muprista u ta n’wi kambela naswona loko ku hume mafelangati empandlheni ehenhla ka nhloko yakwe kumbe emombyeni wakwe naswona swi fana ni nhlokonho enhlongeni yakwe, 44 u ta n’wi vula la nga tengangiki hikuva u ni nhlokonho. 45 Swiambalo swa munhu la nga ni vuvabyi bya nhlokonho swi fanele swi handzuriwa, nhloko yakwe yi fanele yi nga kamiwi naswona u fanele a funengeta malepfu yakwe ya le henhla ka nomu kutani a huwelela a ku, ‘A ndzi tenganga, a ndzi tenganga!’ 46 Loko a ha ri ni vuvabyi lebyi u ta va a nga tenganga. Leswi a nga tengangiki, u fanele a tshama a ri yexe. U ta tshama ehandle ka nxaxa.+

47 “Loko vuvabyi bya nhlokonho byo thyakisa xiambalo ku nga ha va xa voya kumbe xa lapi, 48 kumbe harani ya xiambalo lexi lukiweke xa ntsembyana kumbe xa voya kumbe dzovo kumbe nchumu wun’wana ni wun’wana lowu endliweke hi dzovo, 49 kutani xivati xa rihlaza ra xitshopana kumbe xo tshwuka xa vuvabyi xi thyakisa xiambalo, dzovo, harani kumbe xilo xin’wana ni xin’wana xa dzovo, xi ni nhlokonho kutani xi fanele xi kombiwa muprista. 50 Muprista u ta kambela vuvabyi lebyi, kutani u fanele a tshika nchumu lowu nga ni vuvabyi ku ringana masiku ya nkombo.+ 51 Loko a kambela vuvabyi lebyi hi siku ra vunkombo kutani a kuma leswaku byi hangalake ni xiambalo, harani kumbe ni dzovo (ku nga khathariseki leswaku dzovo leri ri tirhiseriwa yini), vuvabyi byebyo i nhlokonho leyi dlayaka naswona nchumu wolowo a wu tenganga.+ 52 U fanele a hisa xiambalo kumbe harani leyi nga eka voya kumbe lapi kumbe xilo xin’wana ni xin’wana xa dzovo lexi vuvabyi byi kumekeke eka xona, hikuva i nhlokonho leyi dlayaka. Xi fanele xi hisiwa hi ndzilo.

53 “Kambe loko muprista a xi kambela kutani vuvabyi byi nga hangalakanga ni xiambalo kumbe harani kumbe ni xilo xin’wana ni xin’wana xa dzovo, 54 muprista u ta lerisa leswaku va hlantswa xilo lexi nga ni vuvabyi, kutani u ta xi tshika masiku man’wana ya nkombo. 55 Kutani muprista u ta kambela nchumu lowu nga ni vuvabyi endzhaku ka loko wu hlantswiwile wu basa. Loko xivati xi nga hundzukanga hambiloko vuvabyi byi nga hangalakanga, nchumu wolowo a wu tenganga. U fanele u wu hisa hi ndzilo hikuva wu dyiwile, ku nga ha va endzeni ka wona kumbe ehandle ka wona.

56 “Kambe loko muprista a wu kamberile kutani a kuma leswaku xiphemu xa wona lexi a xi ri ni vuvabyi xi basile endzhaku ka loko xi hlantswiwile, u ta xi handzula eka xiambalo kumbe edzobyeni kumbe eka harani. 57 Hambiswiritano, loko bya ha humelela eka xiphemu xin’wana xa xiambalo kumbe eka harani kumbe eka xilo xin’wana ni xin’wana xa dzovo, byi le ku hangalakeni kutani u fanele u xi hisa hi ndzilo xilo xin’wana ni xin’wana lexi tluleriweke hi vuvabyi.+ 58 Kambe loko vuvabyi byi nyamalala eka xiambalo kumbe eka harani kumbe eka xilo xin’wana ni xin’wana xa dzovo lexi u xi hlantsweke, swi fanele swi hlantswiwa ra vumbirhi, kutani swi ta va swi tengile.

59 “Lowu i nawu wa vuvabyi bya nhlokonho eka xiambalo xa voya kumbe eka lapi kumbe eka harani kumbe eka xilo xin’wana ni xin’wana xa dzovo, leswaku swi ta vuriwa leswi tengeke kumbe leswi nga tengangiki.”

14 Yehovha a ya emahlweni a vulavula na Muxe a ku: 2 “Lowu wu ta va nawu wa munhu loyi a nga ni nhlokonho hi siku ro tiyisekisa ku tenga kakwe, loko a fanele a tisiwa eka muprista.+ 3 Muprista u ta ya ehandle ka nxaxa a fika a n’wi kambela. Loko munhu loyi a nga ni nhlokonho a horile eka vuvabyi bya nhlokonho, 4 muprista u ta n’wi lerisa leswaku a tisa swinyenyana swimbirhi leswi hanyaka leswi tengeke, mukedari, lapi ro tshwuka ni hisopa leswaku a ta tengisiwa.+ 5 Muprista u ta lerisa leswaku xinyenyana xin’we xi dlayeriwa exibyeni xa vumba ematini lama khulukaka. 6 Kambe u fanele a teka xinyenyana lexi hanyaka swin’we ni mukedari, lapi ro tshwuka ni hisopa, a swi peta swin’we engatini ya xinyenyana lexi nga dlayeriwa ematini lama khulukaka. 7 Kutani u ta yi n’wan’wasela ka nkombo eka loyi a tibasisaka nhlokonho naswona u ta n’wi vula loyi a tengeke, kutani u ta tshika xinyenyana lexi hanyaka xi ya enhoveni.+

8 “Loyi a tibasisaka u fanele a hlantswa swiambalo swakwe, a byevula misisi yakwe hinkwayo naswona a hlamba ematini kutani u ta va a tengile. Endzhaku ka sweswo a nga nghena enxaxeni, kambe u ta tshama ehandle ka tende rakwe ku ringana masiku ya nkombo. 9 Hi siku ra vunkombo u fanele a byevula misisi hinkwayo leyi nga enhlokweni yakwe, exilepfini xakwe ni tinxiyi takwe. Endzhaku ka loko a byevule misisi yakwe hinkwayo, u ta hlantswa swiambalo swakwe ivi a hlamba hi mati kutani u ta va a tengile.

10 “Hi siku ra vunhungu u ta teka makhuna mambirhi lamatsongo lama hanyeke kahle, xinyimpfana xa ntswele lexi hanyeke kahle+ lexi nga ni lembe, mapa lama silekeke kahle lama ringanaka tiomere* tinharhu lama pfanganisiweke ni mafurha ma va gandzelo ra mavele+ ni logo* yin’we ya mafurha;+ 11 kutani muprista loyi a vulaka leswaku munhu loyi a tibasisaka u tengile, u ta n’wi yisa swin’we ni magandzelo lawa emahlweni ka Yehovha enyangweni ya tende ra nhlengeletano. 12 Muprista u ta teka khuna rin’we leritsongo a ri humesa ri va gandzelo ra nandzu+ swin’we ni mpimo wa logo wa mafurha, kutani u ta swi ndziwita swi va gandzelo leri ndziwitiwaka emahlweni ka Yehovha.+ 13 Kutani u ta tlhava khuna leritsongo laha swifuwo swa gandzelo ra xidyoho ni gandzelo ro hisiwa swi toloveleke ku tlhaveriwa kona,+ endhawini yo kwetsima, hikuva xifuwo xa gandzelo ra nandzu ku fana ni xa gandzelo ra xidyoho i swa muprista.+ I nchumu wo kwetsima ngopfu.+

14 “Kutani muprista u ta teka ngati yin’wana ya xifuwo xa gandzelo ra nandzu a yi tota emakumu ka ndleve ya xinene ya loyi a tibasisaka ni le khudzwini ra voko rakwe ra xinene ni le khudzwini ra nenge wakwe wa xinene. 15 Kutani muprista u ta teka mpimo wun’wana wa logo wa mafurha+ a ma chela exandleni xakwe xa ximatsi. 16 Muprista u ta peta ritiho rakwe ra xinene emafurheni lama nga exandleni xakwe xa ximatsi kutani a n’wan’wasela mafurha man’wana ka nkombo hi ritiho rakwe emahlweni ka Yehovha. 17 Kutani muprista u ta teka mafurha man’wana lama saleke exandleni xakwe a ma tota emakumu ka ndleve ya xinene ya loyi a tibasisaka ni le khudzwini ra voko rakwe ra xinene ni le khudzwini ra nenge wakwe wa xinene, ehenhla ka ngati ya gandzelo ra nandzu. 18 Muprista u ta teka mafurha lama saleke exandleni xakwe a ma chela enhlokweni ya loyi a tibasisaka, kutani muprista u ta n’wi kombelela ku rivaleriwa emahlweni ka Yehovha.+

19 “Muprista u ta nyikela xifuwo xa gandzelo ra xidyoho+ a kombelela loyi a tibasisaka ku rivaleriwa hikwalaho ka leswi a nga tengangiki, kutani endzhaku ka sweswo u ta tlhava xifuwo xa gandzelo ro hisiwa. 20 Muprista u ta humesa gandzelo ro hisiwa ni gandzelo ra mavele+ ealtarini, muprista u ta n’wi kombelela ku rivaleriwa+ kutani u ta va a tengile.+

21 “Kambe, loko a ri xisiwana a nga ri na swona, u ta teka khuna rin’we leritsongo ri va gandzelo ra nandzu ra gandzelo leri ndziwitiwaka leswaku a ta tikombelela ku rivaleriwa, swin’we ni mapa lama silekeke kahle lama ringanaka omere* yin’we lama pfanganisiweke ni mafurha ma va gandzelo ra mavele, mpimo wa logo wa mafurha 22 ni magugurhwana mambirhi kumbe swituvana swimbirhi, hi ku ya hileswi a nga na swona. Xin’wana xi ta va gandzelo ra xidyoho lexin’wana xi va gandzelo ro hisiwa.+ 23 Hi siku ra vunhungu+ u ta swi tisa leswaku ku ta tiyisekisiwa ku tenga kakwe eka muprista enyangweni ya tende ra nhlengeletano emahlweni ka Yehovha.+

24 “Muprista u ta teka khuna leritsongo ra gandzelo ra nandzu+ ni mpimo wa logo wa mafurha, kutani muprista u ta swi ndziwita swi va gandzelo leri ndziwitiwaka emahlweni ka Yehovha.+ 25 Endzhaku ka sweswo, muprista u ta tlhava khuna leritsongo ra gandzelo ra nandzu kutani a teka ngati yin’wana ya xifuwo xa gandzelo ra nandzu a yi tota emakumu ka ndleve ya xinene ya loyi a tibasisaka ni le khudzwini ra voko rakwe ra xinene ni le khudzwini ra nenge wakwe wa xinene.+ 26 Muprista u ta chela mafurha man’wana exandleni xakwe xa ximatsi,+ 27 kutani u ta n’wan’wasela mafurha man’wana lama nga exandleni xakwe xa ximatsi ka nkombo hi ritiho ra xinene emahlweni ka Yehovha. 28 Kutani muprista u ta tota mafurha man’wana lama nga exandleni xakwe emakumu ka ndleve ya xinene ya loyi a tibasisaka ni le khudzwini ra voko rakwe ra xinene ni le khudzwini ra nenge wakwe wa xinene, etindhawini leti a toteke ngati ya gandzelo ra nandzu eka tona. 29 Endzhaku ka sweswo, muprista u ta chela mafurha lama saleke exandleni xakwe enhlokweni ya loyi a tibasisaka, leswaku a n’wi kombelela ku rivaleriwa emahlweni ka Yehovha.

30 “U ta nyikela gugurhwana rin’we kumbe xituvana xin’we hi ku ya hi leswi a nga na swona,+ 31 lexi a nga kotaka ku xi kuma, xi va gandzelo ra xidyoho naswona lexin’wana xi va gandzelo ro hisiwa+ swin’we ni gandzelo ra mavele; kutani muprista u ta kombelela loyi a tibasisaka ku rivaleriwa emahlweni ka Yehovha.+

32 “Lowu i nawu eka loyi a a ri ni vuvabyi bya nhlokonho, kambe a nga riki na nchumu loko a tiyisekisa ku tenga kakwe.”

33 Kutani Yehovha a byela Muxe na Aroni a ku: 34 “Loko mi fika etikweni ra Kanana+ leri ndzi mi nyikaka rona ri va ndzhaka ya n’wina,+ kutani ndzi thyakisa yindlu etikweni ra n’wina hi vuvabyi bya nhlokonho,+ 35 n’wini wa yindlu u fanele a ya byela muprista a ku, ‘Ku ni xivati ekhumbini ra yindlu ya mina lexi vonakaka ku fana na nhlokonho.’ 36 Muprista u ta lerisa leswaku ku humesiwa swilo hinkwaswo leswi nga endlwini loko a nga si ta a ta kambela xivati lexi humeleleke, leswaku a nga vuli leswaku swilo hinkwaswo leswi nga endlwini a swi tenganga; kutani endzhaku ka sweswo muprista u ta ta a ta kambela yindlu. 37 U ta kambela ndhawu leyi nga ni xivati, loko makhumbi ya yindlu ma ri ni mimbhovo ya rihlaza ra xitshopana kumbe yo tshwuka naswona yi languteka yi nghene ekhumbini ra yindlu, 38 muprista u ta huma endlwini a ya enyangweni ya yona, kutani u ta pfala yindlu yoleyo masiku ya nkombo.+

39 “Kutani muprista u ta tlhelela hi siku ra vunkombo a fika a kambela yindlu. Loko xivati xi hangalake ni makhumbi ya yindlu, 40 muprista u ta lerisa leswaku maribye lama nga ni xivati ma xokoriwa ma cukumetiwa ehandle ka muti endhawini leyi nga basangiki. 41 Kutani u ta lerisa leswaku yindlu yi khwayiwa hinkwayo endzeni, misava leyi nga ta khwayiwa yi fanele yi cukumetiwa ehandle ka muti endhawini leyi nga basangiki. 42 Kutani laha va humeseke kona maribye va ta veka maribye man’wana naswona u fanele a tirhisa misava yin’wana leswaku ku phamiwa yindlu.

43 “Hambiswiritano, loko ko tlhela ku huma xivati endlwini yoleyo endzhaku ka loko ku xokoriwe maribye naswona yindlu yi khwayiwile yi tlhela yi phamiwa, 44 muprista u ta nghena endzeni ka yona a yi kambela. Loko xivati xi hangalake ni yindlu, i nhlokonho leyi dlayaka.+ Yindlu a yi tenganga. 45 Kutani u ta lerisa leswaku yindlu yi hirimuxiwa, maribye ya yona, timhandzi ta yona ni misava hinkwayo ya yindlu, swi ta yisiwa ehandle ka muti endhawini leyi nga basangiki.+ 46 Kambe loyi a nga ta nghena endlwini yoleyo loko ya ha pfariwile+ u ta va a nga tenganga ku fikela nimadyambu;+ 47 naswona loyi a etlelaka endlwini yoleyo u fanele a hlantswa swiambalo swakwe ni loyi a dyelaka endlwini yoleyo u fanele a hlantswa swiambalo swakwe.

48 “Kambe loko muprista a fika a kuma leswaku xivati a xi hangalakanga endlwini endzhaku ka loko yi tlhele yi phamiwa, muprista u ta vula leswaku yindlu yoleyo yi tengile, hikuva xivati a xa ha ri kona. 49 Muprista u ta teka swinyenyana swimbirhi, mukedari, lapi ro tshwuka ni hisopa+ leswaku a tengisa yindlu. 50 U ta dlaya xinyenyana xin’we exibyeni xa vumba ematini lama khulukaka. 51 Kutani u ta teka mukedari, hisopa, lapi ro tshwuka ni xinyenyana lexi hanyaka a swi peta engatini ya xinyenyana lexi dlayiweke ni le matini lama khulukaka, naswona u fanele a yi n’wan’wasela etlhelo leri langutaneke ni yindlu ka nkombo.+ 52 U ta tengisa yindlu hi ngati ya xinyenyana, mati lama khulukaka, xinyenyana lexi hanyaka, mukedari, hisopa ni lapi ro tshwuka. 53 Kutani u ta tshika xinyenyana lexi hanyaka xi ya ehandle ka muti enhoveni ivi a kombela leswaku yindlu yi rivaleriwa, kutani yi ta va yi tengile.

54 “Lowu i nawu mayelana ni vuvabyi bya nhlokonho, swirhumbana swa ku tsuvuka ka misisi kumbe malepfu,+ 55 nhlokonho ya xiambalo+ kumbe ya yindlu+ 56 ni ku pfimba, swirhumbana ni mafelangati,+ 57 leswaku swi ta tiviwa loko nchumu wo karhi wu nga tenganga niloko nchumu wo karhi wu tengile.+ Lowu i nawu mayelana ni nhlokonho.”+

15 Yehovha a ya emahlweni a vulavula na Muxe na Aroni a ku: 2 “Byelani Vaisrayele mi ku, ‘Loko wanuna o tshuka a huma thyaka eka xirho xakwe xa rimbewu, ri ta n’wi endla loyi a nga tengangiki.+ 3 A nga tenganga, hambiloko xirho xakwe xa rimbewu xi ya emahlweni xi huma thyaka kumbe xi pfaleka, a nga tenganga.

4 “‘Sangu rin’wana ni rin’wana leri munhu loyi a humaka thyaka a etlelaka eka rona ri ta va ri nga tenganga naswona nchumu wun’wana ni wun’wana lowu a nga ta tshama eka wona wu ta va wu nga tenganga. 5 Munhu loyi a khumbaka sangu rakwe u fanele a hlantswa swiambalo swakwe naswona u fanele a hlamba hi mati, kutani u ta va a nga tenganga ku fikela nimadyambu.+ 6 Un’wana ni un’wana loyi a tshamaka eka xilo lexi munhu loyi a humaka thyaka a a tshame eka xona, u fanele a hlantswa swiambalo swakwe, a hlamba hi mati naswona u ta va a nga tenganga ku fikela nimadyambu. 7 Un’wana ni un’wana loyi a khumbaka munhu loyi a humaka thyaka u fanele a hlantswa swiambalo swakwe, a hlamba hi mati kutani u ta va a nga tenganga ku fikela nimadyambu. 8 Loko munhu loyi a humaka thyaka o tshwutela munhu loyi a tengeke, loyi a tshwuteriweke u fanele a hlantswa swiambalo swakwe, a hlamba hi mati kutani u ta va a nga tenganga ku fikela nimadyambu. 9 Xitshamo xin’wana ni xin’wana lexi munhu loyi a humaka thyaka a tshamaka eka xona loko a gade xifuwo, xi ta va xi nga tenganga. 10 Un’wana ni un’wana loyi a khumbaka xilo xin’wana ni xin’wana lexi a tshame eka xona u ta va a nga tenganga ku fikela nimadyambu naswona un’wana ni un’wana loyi a nga ta rhwala swilo sweswo u ta hlantswa swiambalo swakwe, a hlamba hi mati kutani u ta va a nga tenganga ku fikela nimadyambu. 11 Loko munhu loyi a humaka thyaka+ a nga hlambanga mavoko yakwe hi mati kutani a khumba munhu un’wana, munhu loyi a khumbiweke u fanele a hlantswa swiambalo swakwe, a hlamba hi mati kutani u ta va a nga tenganga ku fikela nimadyambu. 12 Xibya xa vumba lexi munhu loyi a humaka thyaka a xi khumbaka xi fanele xi fayiwa naswona xibya xin’wana ni xin’wana lexi vatliweke xi fanele xi hlantswiwa hi mati.+

13 “‘Loko thyaka ri yima, u ta hlayela masiku ya nkombo naswona u fanele a hlantswa swiambalo swakwe, a hlamba hi mati lama khulukaka, kutani u ta va a tengile.+ 14 Hi siku ra vunhungu u fanele a teka magugurhwana mambirhi kumbe swituvana swimbirhi,+ a ta emahlweni ka Yehovha enyangweni ya tende ra nhlengeletano, kutani a swi nyika muprista. 15 Muprista u ta swi nyikela, xin’wana xi va gandzelo ra xidyoho kasi lexin’wana xi va gandzelo ro hisiwa, naswona muprista u ta n’wi kombelela ku rivaleriwa emahlweni ka Yehovha mayelana ni thyaka leri humeke eka yena.

16 “‘Kutani loko wanuna o tshuka a humesa mbewu ya vununa, u fanele a hlamba miri wakwe hinkwawo hi mati naswona u ta va a nga tenganga ku fikela nimadyambu.+ 17 Xiambalo xin’wana ni xin’wana kumbe dzovo rin’wana ni rin’wana leswi cheriweke hi mbewu ya vununa u fanele u swi hlantswa hi mati naswona swi ta va swi nga tenganga ku fikela nimadyambu.

18 “‘Loko wanuna a etlela ni wansati ivi ku huma mbewu ya vununa, va fanele va hlamba hi mati naswona va ta va va nga tenganga ku fikela nimadyambu.+

19 “‘Loko wansati a huma ngati hikwalaho ka leswi a nga le nkarhini, u ta va a nga tenganga ku ringana masiku ya nkombo.+ Un’wana ni un’wana loyi a n’wi khumbaka u ta va a nga tenganga ku fikela nimadyambu.+ 20 Nchumu wun’wana ni wun’wana lowu a nga ta etlela eka wona loko a ri enkarhini wu ta va wu nga tenganga naswona hinkwaswo leswi a nga ta tshama eka swona swi ta va swi nga tenganga.+ 21 Un’wana ni un’wana loyi a khumbaka sangu rakwe u fanele a hlantswa swiambalo swakwe, a hlamba hi mati kutani u ta va a nga tenganga ku fikela nimadyambu. 22 Un’wana ni un’wana loyi a khumbaka xilo xin’wana ni xin’wana lexi a a tshame eka xona u fanele a hlantswa swiambalo swakwe, a hlamba hi mati kutani u ta va a nga tenganga ku fikela nimadyambu. 23 Loko ku ri leswaku wansati yoloye a a tshame esangwini kumbe eka xilo xin’wana, loyi a nga ta xi khumba u ta va a nga tenganga ku fikela nimadyambu.+ 24 Loko wanuna o etlela ni wansati loyi a nga enkarhini+ u ta va a nga tenganga ku ringana masiku ya nkombo naswona sangu rin’wana ni rin’wana leri wanuna loyi a nga ta etlela eka rona ri ta va ri nga tenganga.

25 “‘Loko wansati o huma ngati ku ringana masiku yo tala+ kambe ku nga ri wona nkarhi lowu a yaka enkarhini ha wona+ kumbe loko ngati yo huma nkarhi wo leha ku tlula masiku lawa a yaka enkarhini ha wona, u ta va a nga tenganga masiku wolawo hinkwawo, ku fana ni loko a ri enkarhini. 26 Sangu rin’wana ni rin’wana leri a nga ta etlela eka rona hi masiku lawa a humaka ngati ha wona ri ta va ri nga tenganga ku fana ni sangu leri a etlelaka eka rona loko a ri enkarhini,+ naswona xilo xin’wana ni xin’wana lexi a nga ta tshama eka xona xi ta va xi nga tenganga ku fana niloko a ri enkarhini. 27 Un’wana ni un’wana loyi a nga ta swi khumba u ta va a nga tenganga naswona u fanele a hlantswa swiambalo swakwe, a hlamba hi mati kutani u ta va a nga tenganga ku fikela nimadyambu.+

28 “‘Hambiswiritano, loko ngati leyi a yi huma eka yena yi yimile, u fanele a hlayela masiku ya nkombo kutani endzhaku ka sweswo u ta va a tengile.+ 29 Hi siku ra vunhungu u fanele a teka magugurhwana mambirhi kumbe swituvana swimbirhi,+ u ta swi tisa eka muprista enyangweni ya tende ra nhlengeletano.+ 30 Muprista u ta teka xin’we a endla gandzelo ra xidyoho kutani hi lexin’wana a endla gandzelo ro hisiwa, naswona muprista u ta n’wi kombelela ku rivaleriwa emahlweni ka Yehovha hikwalaho ka ngati leyi nga tengangiki leyi humeke eka yena.+

31 “‘Mi fanele mi pfuna Vaisrayele leswaku va va lava tengeke, leswaku va nga fi hikwalaho ko thyakisa tabernakela ya mina leyi nga exikarhi ka vona.+

32 “‘Lowu i nawu mayelana ni wanuna la humaka thyaka, wanuna la nga tengangiki hikwalaho ka leswi a humeke mbewu ya vununa,+ 33 wansati la nga tengangiki hikwalaho ka leswi a nga le nkarhini,+ wanuna un’wana ni un’wana la humaka thyaka kumbe wansati la humaka ngati+ ni wanuna la etlelaka ni wansati la nga tengangiki.’”

16 Yehovha a vulavula na Muxe endzhaku ka rifu ra vana vambirhi va Aroni lava nga fa hikwalaho ka ku tshinela eka Yehovha+ hi ndlela leyi nga amukelekiki. 2 Yehovha a ku eka Muxe: “Byela Aroni makwenu leswaku a nga fanelanga a nghena nkarhi wun’wana ni wun’wana endhawini yo kwetsima,+ endzhaku ka khetheni leri pfalaka,+ emahlweni ka xifunengeto xa Areka leswaku a nga fi,+ hikuva ndzi ta humelela ehenhla ka xifunengeto+ ndzi ri epapeni.+

3 “Aroni u fanele a ta ni leswi landzelaka loko a ta endhawini yo kwetsima: xinkuzana xa gandzelo ra xidyoho+ ni khuna ra gandzelo ro hisiwa.+ 4 U fanele a ambala xiambalo xa lapi xo leha xo kwetsima+ naswona xiburukwana lexi endliweke hi lapi+ xi fanele xi funengeta miri wakwe, u fanele a tiboha hi bandhi leri endliweke hi lapi+ naswona a boha duku ra lapi.+ I swiambalo swo kwetsima.+ U ta hlamba hi mati+ kutani a swi ambala.

5 “U fanele a teka swiphongo swimbirhi leswitsongo eka Vaisrayele+ swi va gandzelo ra xidyoho ni khuna ri va gandzelo ro hisiwa.

6 “Kutani Aroni u fanele a tisa nkuzi ya gandzelo ra xidyoho leri nga ra yena, ivi a tikombelela ku rivaleriwa, yena+ ni ndyangu wakwe.

7 “Kutani u ta teka swiphongo swimbirhi a swi yimisa emahlweni ka Yehovha enyangweni ya tende ra nhlengeletano. 8 Aroni u ta hoxa vuhlolotwana* eka swiphongo haswimbirhi, vuhlolotwana byin’wana byi va bya Yehovha kasi lebyin’wana byi va bya Azazele.* 9 Aroni u ta nyikela xiphongo lexi vuhlolotwana*+ byi xi hlawuleke leswaku xi va xa Yehovha, u ta endla gandzelo ra xidyoho hi xona. 10 Kambe xiphongo lexi vuhlolotwana* byi xi hlawuleke leswaku xi va xa Azazele xi fanele xi tisiwa xa ha hanya xi yimisiwa emahlweni ka Yehovha, leswaku ku ta komberiwa ku rivaleriwa swidyoho ehenhla ka xona, leswaku xi ta tshikiwa xi famba xi ya emananga xi va xa Azazele.+

11 “Aroni u ta tisa nkuzi ya gandzelo ra xidyoho leri nga ra yena ivi a tikombelela ku rivaleriwa, yena ni ndyangu wakwe; endzhaku ka sweswo u ta tlhava nkuzi ya gandzelo ra xidyoho leri nga ra yena.+

12 “Endzhaku ka sweswo u ta teka xo khoma ndzilo+ lexi teleke hi makala lama pfurhaka lama humaka ealtarini+ leyi nga emahlweni ka Yehovha ni mpimo wa mavoko mambirhi ya mapa ya murhi wo nun’hwela+ kutani u ta swi yisa endzeni ka khetheni.+ 13 U ta tlhela a chela murhi wo nun’hwela ehenhla ka ndzilo emahlweni ka Yehovha,+ kutani papa ra murhi lowu ri ta funengeta xifunengeto xa Areka+ ya Vumbhoni+ leswaku a nga fi.

14 “U ta teka ngati+ yin’wana ya nkuzi a yi n’wan’wasela hi ritiho emahlweni ka xifunengeto etlhelo ra le vuxeni, naswona u ta n’wan’wasela ngati yin’wana hi ritiho ka nkombo emahlweni ka xifunengeto.+

15 “Endzhaku ka sweswo u ta tlhava xiphongo xa gandzelo ra xidyoho leri nga ra vanhu,+ kutani a yisa ngati ya xona endzeni ka khetheni,+ a endla hilaha a endleke hakona hi ngati+ ya nkuzi; u ta yi n’wan’wasela etlhelo ka xifunengeto ni le mahlweni ka xifunengeto.

16 “U fanele a kombela leswaku ndhawu yo kwetsima yi rivaleriwa mayelana ni swilo leswi nga tengangiki leswi endliweke hi Vaisrayele ni swidyoho swa vona,+ sweswo hi leswi a faneleke a swi endla eka tende ra nhlengeletano, leri nga exikarhi ka vona hikwalaho ka leswi va endlaka swilo leswi nga tengangiki.

17 “A ku fanelanga ku va ni munhu un’wana etendeni ra nhlengeletano loko a nghena a ya kombela ku rivaleriwa endhawini yo kwetsima kukondza a huma. U ta kombelela yena ni ndyangu wakwe+ ku rivaleriwa swin’we ni Vaisrayele hinkwavo.+

18 “Kutani u ta huma a ya ealtarini+ leyi nga emahlweni ka Yehovha, a yi kombelela ku rivaleriwa naswona u ta teka ngati yin’wana ya nkuzi ni ngati yin’wana ya xiphongo a yi tota ematlhelo hinkwawo ya timhondzo ta altari. 19 U ta tlhela a n’wan’wasela ngati yin’wana eka yona hi ritiho ka nkombo, kutani a yi tengisa ivi a yi hlawulekisa eka swiendlo leswi nga tengangiki swa Vaisrayele.

20 “Loko a hete ku kombela leswaku ndhawu yo kwetsima, tende ra nhlengeletano ni altari+ swi rivaleriwa,+ u ta tlhela a tisa xiphongo lexi hanyaka.+ 21 Aroni u ta tlhandleka mavoko yakwe enhlokweni ya xiphongo lexi hanyaka kutani a vula swihoxo ni swidyoho hinkwaswo swa Vaisrayele naswona swi ta fana niloko a veka swidyoho leswi hinkwaswo enhlokweni ya xona,+ kutani u ta xi nyika munhu loyi a hlawuriweke naswona munhu yoloye u ta xi yisa emananga. 22 Xiphongo xolexo xi ta rhwala swihoxo swa vona hinkwaswo+ xi ya na swona ekwandzasini,+ u ta xi yisa emananga.+

23 “Kutani Aroni u ta nghena etendeni ra nhlengeletano a hluvula swiambalo swa lapi leswi a a swi ambarile loko a nghena endhawini yo kwetsima, u ta swi veka kwalaho ehansi. 24 U fanele a hlamba hi mati+ endhawini yo kwetsima ivi a ambala swiambalo swakwe;+ kutani u ta huma a ta nyikela gandzelo rakwe ro hisiwa+ ni gandzelo ro hisiwa ra vanhu+ naswona a kombelela yena ni vanhu ku rivaleriwa.+ 25 U ta hisa mafurha ya gandzelo ra xidyoho ealtarini.

26 “Wanuna loyi a nga fambisa xiphongo xa Azazele+ u fanele a hlantswa swiambalo swakwe a hlamba hi mati kutani endzhaku ka sweswo a nga nghena enxaxeni.

27 “Kutani nkuzi ya gandzelo ra xidyoho ni xiphongo xa gandzelo ra xidyoho leswi ngati ya swona yi tisiweke endhawini yo kwetsima leswaku ku ta komberiwa ku rivaleriwa, swi ta yisiwa ehandle ka nxaxa, kutani madzovo ya swona, nyama ya swona ni vulongo bya swona swi ta hisiwa endzilweni.+ 28 Loyi a swi hiseke u fanele a hlantswa swiambalo swakwe kutani a hlamba hi mati, endzhaku ka sweswo a nga nghena enxaxeni.

29 “Swi ta va nawu wa hilaha ku nga heriki eka n’wina: Hi n’hweti ya vunkombo, hi siku ra vukhume ra n’hweti mi fanele mi tisola* hikwalaho ka swidyoho swa n’wina naswona a mi fanelanga mi tirha,+ ku nga ha va n’wina kumbe munhu loyi a humaka etikweni rin’wana loyi a tshamaka exikarhi ka n’wina. 30 Hi siku leri mi ta kombeleriwa ku rivaleriwa+ leswaku mi vuriwa lava tengeke. Mi ta va mi tengile eswidyohweni swa n’wina hinkwaswo emahlweni ka Yehovha.+ 31 I savata, ku nga siku ro hlawuleka ra leswaku mi wisa naswona mi fanele mi tisola hikwalaho ka swidyoho swa n’wina.+ I nawu wa hilaha ku nga heriki.

32 “Muprista loyi a nga ta hlawuriwa+ a tlhela a vekiwa ku va muprista+ leswaku a siva tata wakwe+ u ta kombela ku rivaleriwa kutani a ambala swiambalo leswi endliweke hi lapi,+ ku nga swiambalo swo kwetsima.+ 33 U ta kombela leswaku Kamara Ro Kwetsima Ngopfu,+ tende ra nhlengeletano+ ni altari+ swi rivaleriwa; naswona u ta kombelela vaprista ni tiko hinkwaro ra Israyele ku rivaleriwa.+ 34 Lowu wu ta va nawu wa hilaha ku nga heriki eka n’wina,+ leswaku Vaisrayele va kombeleriwa ku rivaleriwa swidyoho swa vona hinkwaswo kan’we hi lembe.”+

Hiloko Aroni a endla hilaha Yehovha a leriseke Muxe hakona.

17 Yehovha a ya emahlweni a vulavula na Muxe a ku: 2 “Byela Aroni ni vana vakwe ni Vaisrayele hinkwavo u ku, ‘Leswi hi leswi Yehovha a swi leriseke:

3 “‘“Loko munhu un’wana ni un’wana wa yindlu ya Israyele loyi a tlhavaka nkuzi kumbe khuna leritsongo kumbe mbuti enxaxeni kumbe ehandle ka nxaxa, 4 kambe a nga xi tisi xifuwo xexo enyangweni ya tende ra nhlengeletano leswaku a ta xi nyikela xi va gandzelo eka Yehovha emahlweni ka tabernakela ya Yehovha, munhu yoloye u ta va ni nandzu wa ngati. U halate ngati naswona u fanele a dlayiwa. 5 Sweswo swi endleriwa leswaku Vaisrayele va nga ha tlhavi swifuwo enhoveni, kambe va ta swi tisa eka Yehovha enyangweni ya tende ra nhlengeletano eka muprista. Va ta endlela Yehovha magandzelo yo kombela ku rhula hi swona.+ 6 Kutani muprista u ta n’wan’wasela ngati ealtarini ya Yehovha enyangweni ya tende ra nhlengeletano, a hisa mafurha ma va nun’hwelo lowu tsakisaka eka Yehovha.+ 7 Hikwalaho va nga ha tshuki va endlela madimona lama fanaka ni timbuti magandzelo,+ lawa va tikhomaka hi ndlela yo biha hi ku ma gandzela.+ Lowu wu ta va nawu wa n’wina wa hilaha ku nga heriki eka vatukulu va n’wina.”’

8 “U fanele u va byela u ku, ‘Munhu un’wana ni un’wana wa yindlu ya Israyele kumbe munhu loyi a humaka etikweni rin’wana loyi a tshamaka exikarhi ka n’wina loyi a humesaka gandzelo ro hisiwa kumbe gandzelo rin’wana 9 kutani a nga ri tisi enyangweni ya tende ra nhlengeletano a ta ri nyikela eka Yehovha, u fanele a dlayiwa.+

10 “‘Loko munhu un’wana ni un’wana wa yindlu ya Israyele kumbe loyi a humaka etikweni rin’wana loyi a tshamaka exikarhi ka n’wina o dya ngati ya muxaka wun’wana ni wun’wana,+ munhu yoloye loyi a dyaka ngati ndzi ta n’wi fularhela naswona ndzi ta n’wi dlaya exikarhi ka varikwavo. 11 Hikuva vutomi bya nyama byi le ngatini,+ kutani mina ndzi mi vekele yona ealtarini+ leswaku mi tikombelela ku rivaleriwa hikuva i ngati leyi kombelelaka ku rivaleriwa+ hi vutomi lebyi nga eka yona. 12 Hi yona mhaka leyi ndzi nga byela Vaisrayele ndzi ku: “A mi fanelanga mi dya ngati naswona a ku na munhu loyi a humaka etikweni rin’wana loyi a tshamaka exikarhi ka n’wina+ loyi a faneleke a dya ngati.”+

13 “‘Loko Muisrayele kumbe munhu loyi a humaka etikweni rin’wana loyi a tshamaka exikarhi ka n’wina o hlota ivi a khoma xiharhi kumbe xinyenyana lexi nga dyiwaka, u fanele a halata ngati ya xona+ kutani a yi seletela hi misava. 14 Hikuva vutomi bya nyama ya muxaka wun’wana ni wun’wana byi le ngatini ya yona. Hikwalaho ndzi byele Vaisrayele ndzi ku: “A mi fanelanga mi dya ngati ya muxaka wun’wana ni wun’wana wa nyama, hikuva vutomi bya nyama ya muxaka wun’wana ni wun’wana byi le ngatini ya yona. Un’wana ni un’wana loyi a yi dyaka u ta dlayiwa.”+ 15 Loko munhu un’wana ni un’wana, ku nga ha va Muisrayele kumbe munhu loyi a humaka etikweni rin’wana, o dya xifuwo lexi kumiweke xi file kumbe lexi handzuleriweke hi xiharhi,+ u fanele a hlantswa swiambalo swakwe kutani a hlamba hi mati naswona u ta va a nga tenganga ku fikela nimadyambu;+ endzhaku ka sweswo u ta va a tengile. 16 Kambe loko a nga swi hlantswi swiambalo swakwe naswona a nga hlambi, u ta tihlamulela hikwalaho ka xihoxo xakwe.’”+

18 Yehovha a ya emahlweni a vulavula na Muxe a ku: 2 “Byela Vaisrayele u ku, ‘Hi mina Yehovha Xikwembu xa n’wina.+ 3 A mi fanelanga mi hanya ku fana ni vanhu va le tikweni ra Egipta leri a mi tshama eka rona naswona a mi fanelanga mi endla leswi va swi endlaka etikweni ra Kanana leri ndzi mi yisaka eka rona.+ A mi fanelanga mi landzelela milawu ya vona. 4 Mi fanele mi yingisa swiboho swa mina swa vuavanyisi naswona mi fanele mi hlayisa milawu ya mina, mi hanya hi yona.+ Hi mina Yehovha Xikwembu xa n’wina. 5 Mi fanele mi hlayisa milawu ya mina ni swiboho swa mina swa vuavanyisi; loyi a endlaka tano u ta hanya hikwalaho ka swona.+ Hi mina Yehovha.

6 “‘A ku na munhu exikarhi ka n’wina loyi a faneleke a endla timhaka ta masangu ni xaka rakwe ra le kusuhi.+ Hi mina Yehovha. 7 U nga tshuki u endla timhaka ta masangu ni tata wa wena naswona u nga tshuki u endla timhaka ta masangu ni mana wa wena. I mana wa wena, u nga tshuki u endla timhaka ta masangu na yena.

8 “‘U nga tshuki u endla timhaka ta masangu ni nsati wa tata wa wena.+ Swi khomisa tata wa wena tingana.

9 “‘U nga tshuki u endla timhaka ta masangu ni makwenu wa wena wa xisati, ku nga ha va makwenu wa wena wa xisati hi tatana kumbe manana, u nga ha va u velekiwe swin’we na yena kumbe a ri wa ndyangu wun’wana.+

10 “‘U nga tshuki u endla timhaka ta masangu ni n’wana wa nhwanyana wa n’wana wa wena wa jaha kumbe n’wana wa nhwanyana wa n’wana wa wena wa xisati, hikuva swi ta ku khomisa tingana.

11 “‘U nga tshuki u endla timhaka ta masangu ni n’wana wa nhwanyana wa nsati wa tata wa wena, ku nga n’wana wa tata wa wena, hikuva i makwenu wa wena wa xisati.

12 “‘U nga tshuki u endla timhaka ta masangu ni makwavo wa xisati wa tata wa wena. I xaka ra le kusuhi ra tata wa wena.+

13 “‘U nga tshuki u endla timhaka ta masangu ni makwavo wa xisati wa mana wa wena, hikuva i xaka ra le kusuhi ra mana wa wena.

14 “‘U nga tshuki u khomisa makwavo wa xinuna wa tata wa wena tingana hi ku endla timhaka ta masangu ni nsati wakwe. I xaka ra wena.+

15 “‘U nga tshuki u endla timhaka ta masangu ni n’wingi wa wena.+ I nsati wa n’wana wa wena, u nga tshuki u etlela na yena.

16 “‘U nga tshuki u endla timhaka ta masangu ni nsati wa makwenu,+ hikuva swi ta khomisa makwenu tingana.

17 “‘U nga tshuki u endla timhaka ta masangu ni wansati ni n’wana wakwe wa nhwanyana.+ U nga tshuki u teka n’wana wa nhwanyana wa n’wana wakwe waxinuna ni n’wana wa nhwanyana wa n’wana wakwe waxisati leswaku u etlela na vona. I maxaka ya yena ya le kusuhi; i manyala.

18 “‘U nga tshuki u teka makwavo waxisati wa nsati wa wena leswaku a va nsati wa wena wa vumbirhi,+ kutani u endla timhaka ta masangu na yena nsati wa wena a ha hanya.

19 “‘U nga tshuki u endla timhaka ta masangu ni wansati loyi a nga le nkarhini.+

20 “‘U nga tshuki u endla timhaka ta masangu ni nsati wa wanuna un’wana, kutani u va loyi a nga tengangiki.+

21 “‘U nga tshuki u pfumela leswaku vana va wena va nyikeriwa eka Moleke.+ U nga tshuki u thyakisa vito ra Xikwembu xa wena hi ndlela yoleyo.+ Hi mina Yehovha.

22 “‘U nga tshuki u etlela ni waxinuna ku fana niloko u etlela ni wansati.+ I nchumu lowu nyenyetsaka.

23 “‘Wanuna a nga fanelanga a endla timhaka ta masangu ni xiharhi leswaku a va loyi a nga tengangiki hikwalaho ka sweswo; ni wansati a nga fanelanga a yima emahlweni ka xiharhi leswaku a ta endla timhaka ta masangu na xona.+ Sweswo swi lwisana ni nawu wa Xikwembu.

24 “‘U nga tshuki u tiendla loyi a nga tengangiki hi ku endla xin’wana xa swilo leswi, hikuva matiko lawa ndzi ma hlongolaka emahlweni ka n’wina ma tiendle lama nga tengangiki hi ku endla swilo leswi hinkwaswo.+ 25 Hikwalaho tiko a ri tenganga, kutani ndzi ta ri xupula hikwalaho ka xihoxo xa rona naswona tiko ri ta hlanta vaaki va rona.+ 26 Kambe n’wina mi fanele mi hlayisa milawu ni swiboho swa mina swa vuavanyisi,+ naswona a mi fanelanga mi endla xin’wana xa swilo leswi, leswi nyenyetsaka, ku nga ha va n’wina kumbe munhu loyi a humaka etikweni rin’wana loyi a tshamaka exikarhi ka n’wina.+ 27 Hikuva swilo leswi hinkwaswo leswi nyenyetsaka a swi endliwa hi vanhu lava a va tshama etikweni leri, n’wina mi nga si tshama eka rona,+ kutani sweswi tiko a ri tenganga. 28 Kutani tiko a ri nge boheki ku mi hlanta hikwalaho ko ri nyamisa hilaha ri nga ta hlanta matiko lawa a ma tshama eka rona n’wina mi nga si tshama eka rona. 29 Loko munhu un’wana o endla xin’wana xa swilo leswi, leswi nyenyetsaka, hinkwavo lava endlaka swilo leswi va fanele va dlayiwa. 30 Mi fanele mi hlayisa milawu leyi ndzi mi nyikeke yona hi ku va mi nga endli swilo leswi nyenyetsaka leswi a swi endliwa hi matiko lawa a ma tshama kona n’wina mi nga si tshama kona,+ leswaku mi nga tiendli lava nga tengangiki hikwalaho ka swona. Hi mina Yehovha Xikwembu xa n’wina.’”

19 Yehovha a ya emahlweni a vulavula na Muxe a ku: 2 “Byela Vaisrayele hinkwavo u ku, ‘Mi fanele mi kwetsima hikuva mina Yehovha Xikwembu xa n’wina ndza kwetsima.+

3 “‘Un’wana ni un’wana wa n’wina u fanele a xixima* mana wakwe ni tata wakwe,+ naswona mi fanele mi hlayisa tisavata ta mina.+ Hi mina Yehovha Xikwembu xa n’wina. 4 Mi nga tshuki mi gandzela swikwembu leswi nga pfuniki nchumu+ kumbe mi tiendlela swikwembu leswi endliweke hi nsimbhi.+ Hi mina Yehovha Xikwembu xa n’wina.

5 “‘Loko mi endlela Yehovha gandzelo ro kombela ku rhula,+ mi fanele mi ri endla hi xikongomelo xa leswaku mi amukeleka eka yena.+ 6 Ri fanele ri dyiwa hi siku leri mi ri endleke ha rona ni hi siku leri landzelaka, kambe leswi saleke ku fikela siku ra vunharhu swi fanele swi hisiwa hi ndzilo.+ 7 Kambe loko nyama ya gandzelo yo dyiwa hi siku ra vunharhu, i nchumu lowu nyenyetsaka lowu nga taka wu nga amukeleki. 8 Loyi a yi dyaka u ta tihlamulela hikwalaho ka xihoxo xakwe, hikuva u nyamise nchumu wo kwetsima wa Yehovha naswona munhu yoloye u fanele a dlayiwa.

9 “‘Loko mi tshovela ensin’wini ya n’wina, mi nga tshuki mi tshovela hinkwaswo leswi nga ematlhelo ka nsimu ya n’wina naswona mi nga tshuki mi rholela leswi saleke loko mi tshovela.+ 10 Nakambe mi nga tshuki mi hlengeleta leswi saleke ensin’wini ya n’wina ya madiriva kumbe mi rholela madiriva lama weke ensin’wini ya n’wina. Mi fanele mi swi siyela xisiwana*+ ni munhu loyi a humaka etikweni rin’wana. Hi mina Yehovha Xikwembu xa n’wina.

11 “‘Mi nga tshuki mi yiva,+ mi nga xisani+ naswona mi nga kanganyisani. 12 Mi nga tshuki mi hlambanya hi vito ra mina+ leswaku mi vulavula mavunwa kutani mi thyakisa vito ra Xikwembu xa n’wina. Hi mina Yehovha. 13 U nga tshuki u dyelela munhukuloni+ naswona a wu fanelanga u kanganyisa van’wana.+ A wu fanelanga u tshama vusiku hinkwabyo ku fikela nimixo ni muholo wa munhu loyi a thoriweke.+

14 “‘U nga tshuki u rhukana munhu la feke tindleve kumbe u veka nchumu wo karhi emahlweni ka munhu la feke matihlo leswaku a khudlunyeka+ naswona u fanele u chava Xikwembu xa wena.+ Hi mina Yehovha.

15 “‘Mi nga tshuki mi avanyisa hi ndlela leyi nga lulamangiki. Mi nga tshuki mi va ni xihlawuhlawu eka xisiwana kumbe mi tsakela munhu la fuweke.+ Mi fanele mi avanyisa munhukuloni hi ndlela leyinene.

16 “‘U nga tshuki u famba u onha van’wana vito.+ U nga tshuki u lava ku dlaya munhukuloni.*+ Hi mina Yehovha.

17 “‘U nga tshuki u venga makwenu embilwini ya wena.+ U fanele u tshinya munhukuloni+ leswaku u nga kumeki u ri ni xidyoho ku fana na yena.

18 “‘U nga tshuki u rihisela+ kumbe u va ni xikhomela eka vanhu varikwenu naswona u fanele u rhandza munhukuloni hi ndlela leyi u tirhandzaka ha yona.+ Hi mina Yehovha.

19 “‘Mi fanele mi yingisa milawu ya mina leyi landzelaka: Mi nga tshuki mi khandziyanisa swifuwo swa n’wina swa mixaka yimbirhi. Mi nga tshuki mi byala timbewu ta mixaka yimbirhi ensin’wini ya n’wina,+ naswona mi nga tshuki mi ambala xiambalo lexi endliweke hi mixaka yimbirhi ya tiharhani leti pfanganisiweke.+

20 “‘Kutani loko wanuna o endla timhaka ta masangu ni wansati, naswona wansati yoloye a ri nandza loyi a tshembisiweke wanuna un’wana kambe a nga kutsuriwanga kumbe a nga tshunxiwanga, va fanele va xupuriwa. Hambiswiritano, a va fanelanga va dlayiwa hikuva a a nga tshunxiwanga. 21 Wanuna yoloye u fanele a tisa gandzelo rakwe ra nandzu eka Yehovha etendeni ra nhlengeletano, ku nga khuna ra gandzelo ra nandzu.+ 22 Muprista u ta n’wi kombelela ku rivaleriwa hi khuna ra gandzelo ra nandzu emahlweni ka Yehovha hikwalaho ka xidyoho lexi a xi endleke, kutani u ta rivaleriwa xidyoho lexi a nga xi endla.

23 “‘Loko mi fika etikweni leri ndzi mi nyikaka rona kutani mi byala mirhi ya mihandzu, a mi fanelanga mi dya mihandzu ya yona malembe manharhu yo sungula. Mi fanele mi teka mihandzu ya murhi wolowo yi ri leyi nga tengangiki ni leyi nga fanelangiki yi dyiwa. 24 Kambe hi lembe ra vumune, mihandzu ya wona hinkwayo yi ta va yo kwetsima naswona wu ta va nkarhi wo tsaka emahlweni ka Yehovha.+ 25 Kutani hi lembe ra vuntlhanu mi nga ha dya mihandzu ya wona leswaku mi engetela ntshovelo wa n’wina hi yona. Hi mina Yehovha Xikwembu xa n’wina.

26 “‘Mi nga tshuki mi dya nchumu lowu nga ni ngati.+

“‘Mi nga tshuki mi vhumbha kumbe mi endla masalamusi.+

27 “‘Mi nga tshuki mi byevula* misisi ya n’wina ya le matlhelo ka nhloko kumbe mi tsemeta malepfu ya n’wina ya le makumu.+

28 “‘Mi nga tshuki mi tixekelela hikwalaho ka munhu loyi a nga fa*+ naswona mi nga tshuki mi tifungha nhlonge. Hi mina Yehovha.

29 “‘U nga tshuki u khomisa n’wana wa wena wa nhwanyana tingana hi ku n’wi endla nghwavava,+ leswaku tiko ra wena ri nga thyakisiwi hi tinghwavava naswona ri tala hi mahanyelo yo biha.+

30 “‘Mi fanele mi hlayisa tisavata ta mina+ naswona mi fanele mi xixima ndhawu ya mina yo kwetsima. Hi mina Yehovha.

31 “‘U nga tshuki u ya eka vangoma+ naswona u nga tshuki u vutisa vavhumbhi+ leswaku u nga vi loyi a nga tengangiki hikwalaho ka vona. Hi mina Yehovha Xikwembu xa wena.

32 “‘U fanele u xixima munhu loyi a nga ni misisi yo basa,*+ u fanele u komba munhu loyi a kuleke xichavo+ naswona u fanele u chava Xikwembu xa wena.+ Hi mina Yehovha.

33 “‘Loko muluveri a tshama etikweni ra n’wina, a mi fanelanga mi n’wi xanisa.+ 34 Muluveri loyi a tshamaka na n’wina mi fanele mi n’wi teka a ri muaki wa tiko ra n’wina;+ naswona mi fanele mi n’wi rhandza hi ndlela leyi mi tirhandzaka ha yona, hikuva a mi ri valuveri etikweni ra Egipta.+ Hi mina Yehovha Xikwembu xa n’wina.

35 “‘Mi nga tshuki mi kanganyisa loko mi pima ku leha, ku tika kumbe swihalaki.+ 36 Mi fanele mi tirhisa swikalo leswi pimaka kahle, mipimo leyi nga yona ya ku tika, mpimo lowu nga wona wa efa* ni mpimo lowu nga wona wa hini.*+ Hi mina Yehovha Xikwembu xa n’wina loyi a mi humeseke etikweni ra Egipta. 37 Kutani mi fanele mi hlayisa milawu ya mina hinkwayo ni swiboho swa mina hinkwaswo swa vuavanyisi, naswona mi fanele mi swi yingisa.+ Hi mina Yehovha.’”

20 Yehovha a ya emahlweni a vulavula na Muxe a ku: 2 “U ta byela Vaisrayele u ku, ‘Munhu un’wana ni un’wana loyi a nga Muisrayele ni munhu un’wana ni un’wana loyi a humaka etikweni rin’wana loyi a tshamaka eIsrayele, loyi a nyiketaka un’wana wa vana vakwe eka Moleke u fanele a dlayiwa.+ Vanhu va tiko va fanele va n’wi khandla hi maribye a fa. 3 Ndzi ta fularhela munhu yoloye naswona ndzi ta n’wi dlaya hikuva u nyikete vana vakwe van’wana eka Moleke naswona u thyakise ndhawu ya mina yo kwetsima+ a tlhela a nyamisa vito ra mina ro kwetsima. 4 Loko vanhu va tiko vo endla onge a va swi voni leswi endliwaka hi munhu yoloye loko a nyiketa vana vakwe eka Moleke kutani va nga n’wi dlayi,+ 5 mina ndzi ta fularhela munhu yoloye ni ndyangu wakwe.+ Ndzi ta dlaya munhu yoloye ni hinkwavo lava hlanganyeleke na yena eku tikhomeni hi ndlela yo biha hi ku gandzela Moleke.

6 “‘Munhu la nga tshembekiki* loyi a yaka eka vangoma+ ni le ka vavhumbhi,+ ndzi ta n’wi fularhela naswona ndzi ta n’wi dlaya.+

7 “‘Mi fanele mi tihlawulekisa naswona mi kwetsima+ hikuva hi mina Yehovha Xikwembu xa n’wina. 8 Mi fanele mi yingisa milawu ya mina mi tlhela mi hanya hi yona.+ Hi mina Yehovha loyi a mi hlawulekisaka.+

9 “‘Loko ko va ni munhu la rhukanaka tata wakwe kumbe mana wakwe, u fanele a dlayiwa.+ Leswi a rhukaneke tata wakwe kumbe mana wakwe, ngati yakwe yi le henhla ka yena.

10 “‘Mayelana ni munhu loyi a oswaka ni nsati wa wanuna un’wana: Loyi a oswaka ni nsati wa munhukulobye u fanele a dlayiwa, yena ni loyi a osweke na yena.+ 11 Wanuna loyi a etlelaka ni nsati wa tata wakwe u khomise tata wakwe tingana.+ Havambirhi ka vona va fanele va dlayiwa. Ngati ya vona yi le henhla ka vona. 12 Loko wanuna a etlela ni n’wingi wakwe, havambirhi ka vona va fanele va dlayiwa. Va lwisane ni nawu wa Xikwembu. Ngati ya vona yi le henhla ka vona.+

13 “‘Loko wanuna a etlela ni waxinuna ku fana niloko a etlela ni wansati, havambirhi ka vona va endle nchumu lowu nyenyetsaka.+ Va fanele va dlayiwa. Ngati ya vona yi le henhla ka vona.

14 “‘Loko wanuna a teka wansati ni mana wa wansati yoloye, i manyala.+ Va fanele va hisa yena swin’we na vona endzilweni+ leswaku manyala ma nga yi emahlweni exikarhi ka n’wina.

15 “‘Loko wanuna o endla timhaka ta masangu ni xiharhi u fanele a dlayiwa naswona mi fanele mi dlaya ni xiharhi xexo.+ 16 Loko wansati a tshinela eka xiharhi leswaku a endla timhaka ta masangu na xona,+ u fanele u dlaya wansati ni xiharhi xa kona. Va fanele va dlayiwa. Ngati ya vona yi le henhla ka vona.

17 “‘Loko wanuna a endla timhaka ta masangu ni makwavo wa xisati, n’wana wa nhwanyana wa tata wakwe kumbe n’wana wa nhwanyana wa mana wakwe, i tingana.+ Va fanele va dlayiwa emahlweni ka vanhu varikwavo. Wanuna loyi u khomise makwavo wa xisati tingana. U fanele a tihlamulela hikwalaho ka xihoxo xakwe.

18 “‘Loko wanuna a endla timhaka ta masangu ni wansati loyi a nga le nkarhini, havambirhi ka vona a va yi xiximanga ngati yakwe leyi humaka.+ Havambirhi ka vona va fanele va dlayiwa.

19 “‘U nga tshuki u endla timhaka ta masangu ni makwavo wa xisati wa mana wa wena kumbe makwavo wa xisati wa tata wa wena, hikuva sweswo ku ta va ku khomisa xaka ra le kusuhi tingana.+ Va fanele va tihlamulela hikwalaho ka xihoxo xa vona. 20 Wanuna loyi a etlelaka ni nsati wa makwavo wa tata wakwe u khomise makwavo wa tata wakwe tingana.+ Va fanele va tihlamulela hikwalaho ka xidyoho xa vona. Va fanele va fa va nga ri na vana. 21 Loko munhu a teka nsati wa makwavo, i nchumu lowu nyenyetsaka.+ U khomise makwavo tingana. A va fanelanga va va ni vana.

22 “‘Mi fanele mi yingisa milawu ya mina hinkwayo ni swiboho swa mina hinkwaswo swa vuavanyisi+ mi tlhela mi swi endla,+ leswaku tiko leri ndzi mi yisaka eka rona leswaku mi ya tshama eka rona ri nga mi hlanti.+ 23 Mi nga tshuki mi landzela milawu ya matiko lawa ndzi ma hlongolaka emahlweni ka n’wina;+ hikuva ma endle swilo leswi hinkwaswo kutani ndza ma nyenya.+ 24 Hi yona mhaka leyi ndzi mi byeleke ndzi ku: “Mi ta teka tiko ra vona naswona ndzi ta mi nyika rona leswaku ri va ra n’wina, tiko leri khulukaka ntswamba ni vulombe.+ Hi mina Yehovha Xikwembu xa n’wina loyi a mi hlawuleke evanhwini.”+ 25 Mi fanele ku hambanisa exikarhi ka xiharhi lexi tengeke ni lexi nga tengangiki ni le xikarhi ka xinyenyana lexi nga tengangiki ni lexi tengeke;+ mi nga tshuki mi tinyamisa hi xiharhi kumbe xinyenyana kumbe xikokovi xin’wana ni xin’wana, leswi ndzi mi hlawuleleke swona leswaku mi swi teka swi ri leswi nga tengangiki.+ 26 Mi fanele mi kwetsima eka mina hikuva mina Yehovha ndza kwetsima+ naswona ndzi mi hlawurile evanhwini leswaku mi va va mina.+

27 “‘Wanuna kumbe wansati loyi a tiendlaka mungoma kumbe muvhumbhi* u fanele a dlayiwa.+ Vanhu va fanele va va khandla hi maribye va fa. Ngati ya vona yi le henhla ka vona.’”

21 Yehovha a ya emahlweni a byela Muxe a ku: “Vulavula ni vaprista, ku nga vana va Aroni, u ku, ‘A nga kona loyi a faneleke a tinyamisa hi ntsumbu eka varikwavo.+ 2 Kambe a nga tinyamisa hikwalaho ka xaka rakwe lerikulu, mana wakwe, tata wakwe, n’wana wakwe wa jaha, n’wana wakwe wa nhwanyana, makwavo wakwe wa xinuna 3 naswona a nga tinyamisa hikwalaho ka makwavo wakwe wa xisati loko a ha ri nhwana loyi a ha tshamaka na yena naswona a nga si tekiwaka. 4 A nge tinyamisi naswona a nge tithyakisi hikwalaho ka wansati loyi a tekiweke hi un’wana wa vanhu varikwavo. 5 Va nga tshuki va tsemeta mpandlha+ kumbe va byevula makumu ya malepfu ya vona kumbe va tixekelela.+ 6 Va fanele va kwetsima eka Xikwembu xa vona+ naswona a va fanelanga va thyakisa vito ra Xikwembu xa vona,+ hikuva va nyikela magandzelo lama endleriwaka Yehovha hi ndzilo, ku nga xinkwa* xa Xikwembu xa vona, kutani va fanele va kwetsima.+ 7 A va fanelanga va teka nghwavava,+ wansati loyi a nyamisiweke kumbe wansati loyi a tshikiweke hi nuna,+ hikuva muprista wa kwetsima eka Xikwembu xakwe. 8 U fanele u n’wi hlawulekisa+ hikuva hi yena loyi a nyikelaka xinkwa xa Xikwembu xa wena. U fanele a kwetsima eka wena hikuva mina Yehovha loyi a mi hlawulekisaka ndza kwetsima.+

9 “‘Loko n’wana wa nhwanyana wa muprista o tinyamisa hi ku endla vunghwavava, u nyamisa tata wakwe. U fanele a hisiwa hi ndzilo.+

10 “‘Muprista lonkulu wa vamakwavo, loyi a cheriweke mafurha yo kwetsima* enhlokweni yakwe+ naswona a hlawuriweke ku ambala swiambalo swa vuprista,+ a nga fanelanga a tshika misisi ya nhloko yakwe a nga vi na mhaka na yona kumbe a handzula swiambalo swakwe.+ 11 A nga fanelanga a tshinelela ntsumbu;*+ a nge tinyamisi hambi ku ri hikwalaho ka tata wakwe kumbe mana wakwe. 12 A nga fanelanga a huma endhawini yo kwetsima naswona a nga fanelanga a nyamisa ndhawu yo kwetsima ya Xikwembu xakwe,+ hikuva mfungho wa ku tinyiketela, ku nga mafurha yo kwetsima ya Xikwembu xakwe,+ wu le henhla ka yena. Hi mina Yehovha.

13 “‘Loko a teka nsati u fanele a teka wansati la nga si etlelaka ni wanuna.+ 14 A nge teki noni, wansati la tshikiweke, loyi a nyamisiweke kumbe nghwavava; kambe u fanele a teka nhwana eka varikwavo la nga si etlelaka ni wanuna leswaku a va nsati wakwe. 15 A nga fanelanga a nyamisa vana* vakwe eka varikwavo,+ hikuva hi mina Yehovha loyi a n’wi hlawulekisaka.’”

16 Yehovha a ya emahlweni a vulavula na Muxe a ku: 17 “Byela Aroni u ku, ‘A ku na munhu ni un’we wa vana* va wena eka vatukulu va vona hinkwavo loyi a nga ni vulema, loyi a nga tshinelaka leswaku a ta nyikela xinkwa xa Xikwembu xakwe. 18 Loko ku ri ni munhu loyi a nga ni vulema, a nga tshuki a tshinela endhawini yo kwetsima: munhu loyi a feke matihlo kumbe loyi a khwitaka kumbe loyi xikandza xakwe xi vavisekeke* kumbe loyi a nga ni mavoko kumbe milenge leyi nga ringaniki, 19 munhu loyi a tshovekeke nenge kumbe voko, 20 loyi a nga ni lundza kumbe manghimana* kumbe munhu loyi a nga ni vuvabyi bya matihlo kumbe swirhumbana kumbe matshansi* kumbe marhanga yakwe ya vununa ma fayekeke.+ 21 A ku na munhu wa vana* va muprista Aroni loyi a nga ni vulema loyi a nga tshinelaka leswaku a ta nyikela magandzelo ya Yehovha lama endliweke hi ndzilo. Leswi a nga ni vulema, a nge tshineli leswaku a ta nyikela xinkwa xa Xikwembu xakwe. 22 A nga dya xinkwa xa Xikwembu xakwe lexi humaka eka swilo swo kwetsima ngopfu+ ni le ka leswi humaka eka swilo swo kwetsima.+ 23 Kambe a nge tshineli ekusuhi ni khetheni+ naswona a nge tshineli ealtarini+ hikuva u ni vulema; naswona a nga fanelanga a nyamisa ndhawu ya mina yo kwetsima,+ hikuva hi mina Yehovha loyi a va hlawulekisaka.’”+

24 Kutani Muxe a vulavula na Aroni ni vana vakwe ni Vaisrayele hinkwavo.

22 Yehovha a ya emahlweni a vulavula na Muxe a ku: 2 “Byela Aroni ni vana vakwe leswaku va fanele va va ni vuxiyaxiya eka ndlela leyi va swi khomaka ha yona* swilo swo kwetsima swa Vaisrayele naswona va nga thyakisi vito ra mina ro kwetsima+ mayelana ni swilo leswi va ndzi hlawulekiselaka swona.+ Hi mina Yehovha. 3 Va byele u ku, ‘Loko un’wana wa vatukulu va vana va n’wina o tshinela ekusuhi ni swilo swo kwetsima leswi Vaisrayele va swi hlawulekiselaka Yehovha, a nga tenganga, munhu yoloye u ta dlayiwa emahlweni ka mina.+ Hi mina Yehovha. 4 A ku na wanuna ni un’we eka vana va Aroni loyi a nga ni nhlokonho+ kumbe a humaka thyaka eka xirho xakwe xa rimbewu+ a nga dyaka swilo swo kwetsima a nga si tenga,+ hambi ku ri wanuna loyi a khumbaka munhu loyi a nga tengangiki hikwalaho ka leswi a khumbeke ntsumbu+ kumbe wanuna loyi ku humaka mbewu ya vununa eka yena,+ 5 hambi wanuna loyi a khumbaka xivumbiwa lexi nga tengangiki eka leswi fambaka swi tele+ kumbe loyi a khumbaka munhu loyi a nyameke, loyi a nga n’wi endlaka a va loyi a nga tengangiki.+ 6 Munhu loyi a khumbaka nchumu wun’wana ni wun’wana eka swilo leswi, u ta va a nyamile ku fikela nimadyambu naswona a nge swi dyi swilo swo kwetsima, kambe u fanele a hlamba hi mati.+ 7 Loko dyambu ri perile u ta va a tengile, kutani endzhaku ka sweswo a nga ha dya swin’wana swa swilo swo kwetsima hikuva i swakudya swakwe.+ 8 Nakambe a nga fanelanga a dya xifuwo xin’wana ni xin’wana lexi kumiweke xi file kumbe nchumu wun’wana ni wun’wana lowu handzuleriweke hi swiharhi kutani wu n’wi endla a va loyi a nga tengangiki.+ Hi mina Yehovha.

9 “‘Va fanele va yingisa xileriso xa mina leswaku va nga vi ni xidyoho hikwalaho ka ku nga xi yingisi kutani va boheka ku fa hileswi va nga xi yingisangiki hikuva a va nyamisa swilo swo kwetsima. Hi mina Yehovha loyi a va hlawulekisaka.

10 “‘A ku na munhu la nga riki muprista* loyi a nga dyaka nchumu wun’wana ni wun’wana wo kwetsima.+ A ku na muluveri loyi a endzeleke muprista kumbe mutirhi la thoriweke loyi a nga dyaka swilo swo kwetsima. 11 Kambe loko muprista o xava munhu hi mali, munhu yoloye a nga swi dya. Mahlonga lama velekiweke endyangwini wakwe na wona ma nga dya swakudya swakwe.+ 12 Loko n’wana wa nhwanyana wa muprista o tekiwa hi munhu loyi a nga riki muprista, n’wana yoloye a nge wu dyi munyikelo wa swilo swo kwetsima. 13 Kambe loko n’wana wa nhwanyana wa muprista o va noni kumbe a tshikiwa a nga ri na vana kutani a tlhelela endlwini ya tata wakwe ku fana ni loko a ha ri muntshwa, a nga dya swin’wana swa swakudya swa tata wakwe;+ kambe a ku na munhu la nga riki muprista* loyi a nga swi dyaka.

14 “‘Loko munhu o dya nchumu wo kwetsima hi xihoxo, u fanele a tisa gandzelo rin’wana eka muprista kutani eka rona a engetela 20 wa tiphesente.+ 15 Hikwalaho a va fanelanga va nyamisa swilo swo kwetsima swa Vaisrayele leswi va swi nyikelaka eka Yehovha+ 16 kutani swi va vangela ku xupuriwa hikwalaho ka nandzu wa vona hi leswi va dyeke swilo swa vona swo kwetsima; hikuva hi mina Yehovha loyi a va hlawulekisaka.’”

17 Yehovha a ya emahlweni a vulavula na Muxe a ku: 18 “Byela Aroni ni vana vakwe ni Vaisrayele hinkwavo u ku eka vona, ‘Loko Muisrayele kumbe muluveri loyi a tshamaka eIsrayele a tisa gandzelo ro hisiwa+ leri a tiboheke hi ku hlambanya eka Yehovha kumbe a endla gandzelo ra ku tirhandzela,+ 19 u fanele a tisa nkuzi leyi hanyeke kahle,+ makhuna lamatsongo kumbe timbuti leswaku a ta amukeleka. 20 A mi fanelanga mi nyikela nchumu wun’wana ni wun’wana lowu nga ni vulema+ hikuva wu ta endla leswaku mi nga amukeleki.

21 “‘Loko munhu a nyikela gandzelo ro kombela ku rhula+ leri a tiboheke hi ku hlambanya eka Yehovha kumbe ku ri gandzelo ra ku tirhandzela, ku fanele ku va nkuzi kumbe nyimpfu kumbe mbuti leyi hanyeke kahle leswaku a ta amukeleka. Xifuwo xolexo a xi fanelanga xi va ni vulema. 22 Xifuwo xa gandzelo a xi fanelanga xi va xi fe matihlo, xi tshovekile, xi tsemiwile, xi ri ni nhlungu, swirhumbana kumbe matshansi;* a mi fanelanga mi nyikela swilo leswi eka Yehovha kumbe mi endlela Yehovha gandzelo ro tano ealtarini. 23 Mi nga nyikela nkuzi kumbe nyimpfu leyi milenge ya yona yi nga ringaniki, yi va gandzelo ra ku tirhandzela, kambe a yi nge amukeleki loko yo va gandzelo ra xihlambanyo. 24 A mi fanelanga mi nyikela eka Yehovha hi xifuwo lexi marhanga ya xona ya vununa ma vavisekeke kumbe ma fayiweke kumbe ma susiweke kumbe ma tsemiweke naswona a mi fanelanga mi nyikela hi swifuwo swo tano etikweni ra n’wina. 25 Kutani a mi fanelanga mi nyikela hi swin’wana swa swifuwo leswi, leswi humaka eka muluveri swi va xinkwa xa Xikwembu xa n’wina hikuva swi ni vulema. A swi nge amukeleki.’”

26 Yehovha a ya emahlweni a vulavula na Muxe a ku: 27 “Loko ko velekiwa nkuzi kumbe khuna leritsongo kumbe mbuti, swi ta ya emahlweni swi tshama ni mana wa swona ku ringana masiku ya nkombo,+ kambe ku sukela hi siku ra vunhungu ku ya emahlweni swi ta amukeriwa swi va gandzelo, ku nga gandzelo leri endleriweke Yehovha hi ndzilo. 28 A mi fanelanga mi tlhava nkuzi kumbe nyimpfu ni vana va yona hi siku rin’we.+

29 “Loko mi nyikela gandzelo ro khensa eka Yehovha,+ mi fanele mi ri nyikela hi ndlela leyi nga ta endla leswaku mi amukeleka. 30 Ri fanele ri dyiwa hi siku rero. A mi fanelanga mi ri siya ku fikela nimixo.+ Hi mina Yehovha.

31 “Mi fanele mi hlayisa swileriso swa mina mi tlhela mi swi endla.+ Hi mina Yehovha. 32 A mi fanelanga mi thyakisa vito ra mina ro kwetsima+ naswona ndzi fanele ndzi hlawulekisiwa exikarhi ka Vaisrayele.+ Hi mina Yehovha loyi a mi hlawulekisaka,+ 33 loyi a mi humeseke etikweni ra Egipta leswaku ndzi tikombisa ndzi ri Xikwembu eka n’wina.+ Hi mina Yehovha.”

23 Yehovha a ya emahlweni a vulavula na Muxe a ku: 2 “Byela Vaisrayele u ku, ‘Mikhuvo+ ya Yehovha leyi mi faneleke mi yi huwelela+ i tinhlengeletano to kwetsima. Mikhuvo ya mina hi leyi:

3 “‘Mi nga ha tirha masiku ya tsevu kambe hi siku ra vunkombo i savata, i siku ro wisa,+ ku nga nhlengeletano yo kwetsima. A mi nge endli ntirho wo karhi. Ku ta va savata ya Yehovha hinkwako laha mi tshamaka kona.+

4 “‘Leyi i mikhuvo ya Yehovha, tinhlengeletano to kwetsima leti mi faneleke mi ti huwelela hi mikarhi ya tona leyi vekiweke: 5 Hi n’hweti yo sungula hi siku ra vu-14 ra n’hweti,+ loko dyambu ra ha ku pela i Paseka+ ya Yehovha.

6 “‘Hi siku ra vu-15 ra n’hweti leyi i Nkhuvo Wa Swinkwa Leswi Nga Riki Na Comela lowu endleriwaka Yehovha.+ Mi fanele mi dya swinkwa leswi nga riki na comela masiku ya nkombo.+ 7 Hi siku ro sungula, mi ta va ni nhlengeletano yo kwetsima.+ A mi fanelanga mi endla ntirho wo tika. 8 Kambe mi ta nyikela gandzelo leri endleriweke Yehovha hi ndzilo ku ringana masiku ya nkombo. Hi siku ra vunkombo ku ta va ni nhlengeletano yo kwetsima. A mi fanelanga mi endla ntirho wo tika.’”

9 Yehovha a ya emahlweni a vulavula na Muxe a ku: 10 “Byela Vaisrayele u ku, ‘Loko mi hetelela mi fike etikweni leri ndzi mi nyikaka rona kutani mi tshovela ntshovelo wa rona, mi fanele mi yisa nyandza ya swilo leswi mi swi tshoveleke ku sungula+ eka muprista.+ 11 Yena u ta ndziwita nyandza emahlweni ka Yehovha leswaku mi amukeleka. Muprista u fanele a yi ndziwita hi siku leri landzelaka Savata. 12 Hi siku leri nyandza yi nga ta ndziwitiwa ha rona, mi fanele mi nyikela khuna leritsongo leri hanyeke kahle leri nga ni lembe, ri va gandzelo ro hisiwa eka Yehovha. 13 Gandzelo ra rona ra mavele ku ta va mapa lama silekeke kahle lama ringanaka ni tiomere* timbirhi ma pfanganisiwe ni mafurha, ma va gandzelo leri endleriweke Yehovha hi ndzilo, nun’hwelo lowu tsakisaka. Gandzelo ra rona ra swakunwa ku ta va kotara ya hini* ya vhinyo. 14 A mi fanelanga mi dya xinkwa, mbhacha kumbe mavele lama ha ku tshoveriwaka ku fikela siku leri, kukondza mi tisa gandzelo ra Xikwembu xa n’wina. I nawu wa hilaha ku nga heriki eka vatukulu va n’wina hinkwavo hinkwako laha mi tshamaka kona.

15 “‘Mi ta hlayela tisavata ta nkombo ku sukela hi siku ra le ndzhaku ka Savata, ku sukela hi siku leri mi tiseke nyandza ya gandzelo leri ndziwitiwaka.+ Ku fanele ku va mavhiki lama heleleke. 16 Mi ta hlayela masiku ya 50+ ku ya fikela eka siku ra le ndzhaku ka Savata ya vunkombo, kutani mi fanele mi nyikela gandzelo ra mavele lama ha ku tshoveriwaka eka Yehovha.+ 17 Mi ta tisa swinkwa swimbirhi swi huma laha mi tshamaka kona swi va gandzelo leri ndziwitiwaka. Swi fanele swi va swi endliwe hi mapa lama silekeke kahle lama ringanaka tiomere* timbirhi. Swi fanele swi cheriwa comela loko swi bakiwa,+ swi va leswi tshoveriweke ku sungula leswi nyikeriwaka eka Yehovha.+ 18 Kutani mi fanele mi nyikela swinkwa swin’we ni swinyimpfana swa xinuna swa nkombo leswi hanyeke kahle, ha xin’we xi ri ni lembe rin’we ni xinkuzana ni makhuna mambirhi.+ Swi ta va gandzelo ro hisiwa leri endleriwaka Yehovha swin’we ni gandzelo ra swona ra mavele ni magandzelo ya swona ya swakunwa, swi va gandzelo leri endliwaka hi ndzilo, ra nun’hwelo lowu tsakisaka eka Yehovha. 19 Kutani mi fanele mi nyikela ximbutana xin’we xi va gandzelo ra xidyoho+ ni swinyimpfana swimbirhi swa xinuna, ha xin’we xi ri ni lembe rin’we swi va gandzelo ro kombela ku rhula.+ 20 Muprista u ta ndziwita swinyimpfana swimbirhi swa xinuna ni swinkwa leswi endliweke hi swilo leswi tshoveriweke ku sungula, swi va gandzelo leri ndziwitiwaka emahlweni ka Yehovha. Swi ta va nchumu wo kwetsima eka Yehovha lowu nga wa muprista.+ 21 Hi siku rero mi ta huwelela+ leswaku ku ni nhlengeletano yo kwetsima. A mi nge endli ntirho wo tika. I nawu wa hilaha ku nga heriki eka vatukulu va n’wina hinkwavo etindhawini hinkwato leti mi tshamaka eka tona.

22 “‘Loko mi tshovela ensin’wini ya n’wina, mi nga tshuki mi tshovela hinkwaswo leswi nga ematlhelo ka nsimu ya n’wina naswona mi nga tshuki mi rholela leswi saleke loko mi tshovela.+ Mi fanele mi swi siyela xisiwana*+ ni muluveri.+ Hi mina Yehovha Xikwembu xa n’wina.’”

23 Yehovha a ya emahlweni a vulavula na Muxe a ku: 24 “Byela Vaisrayele u ku, ‘Hi n’hweti ya vunkombo hi siku ro sungula ra n’hweti, mi fanele mi wisa eka mitirho ya n’wina hinkwayo, siku leri ri ta tivisiwa hi ku chayiwa ka timhalamhala+ leswaku mi ta tsundzuka leswaku i nhlengeletano yo kwetsima. 25 A mi nge endli ntirho wo tika naswona mi ta nyikela gandzelo leri endleriwaka Yehovha hi ndzilo.’”

26 Yehovha a ya emahlweni a vulavula na Muxe a ku: 27 “Hambiswiritano, hi siku ra vukhume ra n’hweti leyi ya vunkombo i Siku Ro Kombela Ku Rivaleriwa.+ Mi fanele mi va ni nhlengeletano yo kwetsima kutani mi fanele mi tisola*+ hikwalaho ka swidyoho swa n’wina kutani mi nyikela gandzelo leri endleriweke Yehovha hi ndzilo. 28 A mi fanelanga mi tirha hi siku leri hikuva i siku ra ku kombela ku rivaleriwa leswaku mi rivaleriwa+ hi Yehovha Xikwembu xa n’wina. 29 Munhu un’wana ni un’wana la nga taka a nga tisoli* hikwalaho ka swidyoho swakwe hi siku leri, u ta dlayiwa.+ 30 Naswona ndzi ta lovisa munhu un’wana ni un’wana eka varikwavo loyi a endlaka ntirho hi siku leri. 31 A mi fanelanga mi tirha. I nawu wa hilaha ku nga heriki eka vatukulu va n’wina hinkwavo hinkwako laha mi tshamaka kona. 32 I savata, i siku ro wisa kutani mi fanele mi tisola+ hikwalaho ka swidyoho swa n’wina hi siku ra vukaye ra n’hweti nimadyambu. Mi fanele mi hlayisa savata ya n’wina ku sukela nimadyambu ku ya fika nimadyambu.”

33 Yehovha a ya emahlweni a vulavula na Muxe a ku: 34 “Byela Vaisrayele u ku, ‘Hi siku ra vu-15 ra n’hweti leyi ya vunkombo i Nkhuvo wa Mitsonga* eka Yehovha ku ringana masiku ya nkombo.+ 35 Ku ta va ni nhlengeletano yo kwetsima hi siku ro sungula, kutani a mi fanelanga mi endla ntirho wo tika. 36 Mi fanele mi nyikela gandzelo leri endleriwaka Yehovha hi ndzilo ku ringana masiku ya nkombo. Hi siku ra vunhungu mi ta va ni nhlengeletano yo kwetsima+ naswona mi fanele mi nyikela gandzelo leri endleriwaka Yehovha hi ndzilo. I nhlengeletano yo xiximeka. A mi fanelanga mi endla ntirho wo tika.

37 “‘Leyi i mikhuvo+ ya Yehovha leyi mi faneleke mi yi huwelela tanihi tinhlengeletano to kwetsima+ leswaku mi nyikela gandzelo leri endleriwaka Yehovha hi ndzilo: gandzelo ro hisiwa,+ gandzelo ra mavele+ ni gandzelo ra swakunwa+ hi ku ya hi leswi lavekaka siku ni siku. 38 Magandzelo lawa ma ta engetela eka lawa ma nyikeriwaka hi tisavata ta Yehovha,+ tinyiko ta n’wina,+ magandzelo ya n’wina ya xihlambanyo+ ni magandzelo ya n’wina ya ku tirhandzela+ lawa mi faneleke mi ma nyikela eka Yehovha. 39 Hambiswiritano, hi siku ra vu-15 ra n’hweti ya vunkombo loko mi hlengelete leswi tshoveriweke, mi fanele mi tlangela nkhuvo wa Yehovha ku ringana masiku ya nkombo.+ Mi ta wisa hi siku ro sungula mi tlhela mi wisa hi siku ra vunhungu.+ 40 Hi siku ro sungula mi ta teka mihandzu ya mirhi yo saseka, matluka ya mirhi ya micindzu,+ marhavi lama nga ni matluka yo tala ni ya mirhi ya phopla leyi nga enkoveni, kutani mi ta tsaka+ emahlweni ka Yehovha Xikwembu xa n’wina ku ringana masiku ya nkombo.+ 41 Mi ta wu tlangela masiku ya nkombo elembeni wu ri nkhuvo wa Yehovha.+ Mi fanele mi wu tlangela hi n’hweti ya vunkombo wu ri nawu wa hilaha ku nga heriki eka vatukulu va n’wina hinkwavo. 42 Mi fanele mi tshama emitsongeni ku ringana masiku ya nkombo.+ Vaisrayele hinkwavo va fanele va tshama emitsongeni, 43 leswaku vatukulu va n’wina va ta swi tiva+ leswaku ndzi tshamise Vaisrayele emitsongeni loko ndzi va humesa etikweni ra Egipta.+ Hi mina Yehovha Xikwembu xa n’wina.’”

44 Kutani Muxe a vulavula ni Vaisrayele hi mikhuvo ya Yehovha.

24 Yehovha a ya emahlweni a vulavula na Muxe a ku: 2 “Lerisa Vaisrayele leswaku va ku tisela mafurha lama tengeke ya mutlhwari ya timboni leswaku ti ta tshama ti lumekiwile nkarhi hinkwawo.+ 3 Aroni u fanele a hlela leswaku timboni ti tshama ti lumekiwile ku sukela nimadyambu ku fikela nimixo emahlweni ka Yehovha ehandle ka khetheni* ra areka ya Vumbhoni etendeni ra nhlengeletano. I nawu wa hilaha ku nga heriki eka vatukulu va n’wina hinkwavo. 4 Mikarhi hinkwayo u fanele a langutela timboni leti nga eka xo tlhoma timboni+ xa nsuku wo tenga lexi nga emahlweni ka Yehovha.

5 “U ta teka mapa lama silekeke kahle kutani u baka swinkwa swa 12 leswi endliweke ku fana ni swingwavila. Xinkwa ha xin’we u ta xi baka hi tiomere* timbirhi. 6 U ta swi veka hi mitlawa yimbirhi, swi va tsevu eka ntlawa ha wun’we,+ ehenhla ka tafula leri endliweke hi nsuku wo tenga leri nga emahlweni ka Yehovha.+ 7 U fanele u chela murhi wa risuna lowu tengeke eka ntlawa ha wun’we, wu ta va xinkwa xa gandzelo ra xitsundzuxo,+ leri endleriwaka Yehovha hi ndzilo. 8 Siku rin’wana ni rin’wana ra Savata, u fanele a veka xinkwa xexo nkarhi hinkwawo emahlweni ka Yehovha.+ I ntwanano wa hilaha ku nga heriki ni Vaisrayele. 9 Xi ta va xa Aroni ni vana vakwe+ naswona va ta xi dyela endhawini yo kwetsima+ hikuva i nchumu wo kwetsima ngopfu eka yena lowu humaka eka magandzelo lama endleriwaka Yehovha hi ndzilo tanihi xileriso xa hilaha ku nga heriki.”

10 Exikarhi ka Vaisrayele a ku ri ni n’wana wa jaha loyi mana wakwe a a ri Muisrayele kasi tata wakwe a a ri Muegipta,+ hiloko n’wana loyi a lwa ni wanuna un’wana wa Muisrayele enxaxeni. 11 N’wana loyi, loyi mana wakwe a a ri Muisrayele u sungule ku sandza Vito ra Xikwembu* ni ku ri rhukana.+ Hiloko va n’wi tisa eka Muxe.+ Vito ra mana wakwe a ku ri Xelomiti, n’wana wa Dibri wa nyimba ya Dani. 12 Va n’wi pfalerile kukondza xiboho xa Yehovha xi hlamuseriwa kahle eka vona.+

13 Hiloko Yehovha a vulavula na Muxe a ku: 14 “Humesa munhu loyi a rhukaneke a ya ehandle ka nxaxa naswona hinkwavo lava n’wi tweke va fanele va tlhandleka mavoko ehenhla ka nhloko yakwe, kutani Vaisrayele hinkwavo va fanele va n’wi khandla hi maribye.+ 15 Kutani u fanele u byela Vaisrayele u ku, ‘Loko munhu o rhukana Xikwembu xakwe, u ta tihlamulela hikwalaho ka xidyoho xakwe. 16 Hikwalaho loyi a sandzaka vito ra Yehovha u fanele a dlayiwa.+ Vaisrayele hinkwavo va ta n’wi khandla hi maribye. Munhu loyi a humaka etikweni rin’wana u fanele a dlayiwa ku fana ni Muisrayele, loko a sandze Vito ra Xikwembu.

17 “‘Loko munhu a dlaya munhu un’wana u fanele a dlayiwa.+ 18 Munhu loyi a baka xifuwo a xi dlaya u fanele a xi riha, vutomi hi vutomi.* 19 Loko munhu a vavisa munhu un’wana, leswi a swi endleke eka munhu yoloye swi fanele swi endliwa eka yena.+ 20 Ku tshoveka hi ku tshoveka, tihlo hi tihlo, tino hi tino, ndlela leyi a vaviseke munhu lowun’wana ha yona u fanele a vavisiwa ha yona na yena.+ 21 Munhu loyi a baka xiharhi a xi dlaya u fanele a xi riha,+ kambe loyi a baka munhu a n’wi dlaya u fanele a dlayiwa.+

22 “‘Ku ta tirha xiboho xin’we xa vuavanyisi eka n’wina kumbe eka munhu loyi a humaka etikweni rin’wana,+ hikuva hi mina Yehovha Xikwembu xa n’wina.’”

23 Endzhaku ka sweswo, Muxe a vulavula ni Vaisrayele kutani va n’wi humesela ehandle ka nxaxa munhu loyi a rhukaneke, hiloko va n’wi khandla hi maribye.+ Hikwalaho Vaisrayele va endla hilaha Yehovha a leriseke Muxe hakona.

25 Yehovha a ya emahlweni a vulavula na Muxe eNtshaveni ya Sinayi a ku: 2 “Byela Vaisrayele u ku, ‘Loko mi hetelela mi fika etikweni leri ndzi mi nyikaka rona,+ tiko ri ta hlayisa savata ya Yehovha.+ 3 U fanele u byala mbewu ensin’wini ya wena malembe ya tsevu, u tlhela u tshena nsimu ya wena ya madiriva naswona u ta hlengeleta ntshovelo wa tiko.+ 4 Kambe hi lembe ra vunkombo, ku fanele ku va savata ya ku wisa ka tiko, i savata ya Yehovha. A wu fanelanga u byala mbewu ensin’wini ya wena kumbe u tshena nsimu ya wena ya madiriva. 5 A wu fanelanga u tshovela leswi nga timilela endzhaku ka ntshovelo naswona madiriva ya murhi wa wena wa madiriva lowu nga tsheniwangiki u nga tshuki u ma hlengeleta. Ku fanele ku va lembe ra ku wisa ka tiko. 6 Hambiswiritano, u nga ha dya swakudya leswi nga mila etikweni hi nkarhi wa savata ya rona; wena, mahlonga ya wena ya xinuna ni ya xisati, mutirhi wa wena loyi a thoriweke swin’we ni valuveri lava tshamaka na wena va nga swi dya 7 ni swifuwo ni swiharhi leswi nga etikweni ra wena. Hinkwaswo leswi tiko ri swi humesaka swi nga dyiwa.

8 “‘U ta hlaya malembe ya tisavata ta nkombo, malembe ya nkombo ma andzisiwe ka nkombo, kutani masiku ya malembe ya tisavata ta nkombo ma ta va malembe ya 49. 9 Kutani mi ta ba nanga leyi pfumaka swi twala ngopfu hi n’hweti ya vunkombo hi siku ra vukhume ra n’hweti; hi Siku Ro Kombela Ku Rivaleriwa,+ mi fanele mi ba nanga yi twala etikweni ra n’wina hinkwaro. 10 Mi fanele mi endla lembe ra vu-50 ri va ro hlawuleka, mi huwelela ntshunxeko eka vaaki hinkwavo etikweni hinkwaro.+ Ri ta va Lembe Ra Ntshunxeko* eka n’wina, kutani un’wana ni un’wana wa n’wina u ta tlhelela etikweni leri nga ndzhaka yakwe naswona un’wana ni un’wana wa n’wina u fanele a tlhelela endyangwini wakwe.+ 11 Lembe rero ra vu-50 ri ta va Lembe Ra Ntshunxeko eka n’wina. A mi nge byali mbewu kumbe mi tshovela leswi timileleke etikweni swi huma eka mbewu leyi weke emasin’wini kumbe mi hlengeleta madiriva lama khiweke emirhini leyi nga tsheniwangiki.+ 12 Hikuva i Lembe Ra Ntshunxeko. Ri fanele ri kwetsima eka n’wina. Mi nga ha dya leswi tiko ri swi humesaka.+

13 “‘Hi Lembe Ra Ntshunxeko, un’wana ni un’wana wa n’wina u fanele a tlhelela etikweni leri nga ndzhaka yakwe.+ 14 Loko wo xavisela munhukuloni xo karhi kumbe u xava xo karhi eka yena, mi nga kanganyisani.+ 15 Loko u xava masimu eka munhukuloni, u fanele u hlayela malembe lama nga ta hundza endzhaku ka Lembe Ra Ntshunxeko, munhu yoloye u fanele a ku xavisela hi ku ya hi nhlayo ya malembe lama nga sala ya ku tshovela.+ 16 Loko ka ha sale malembe yo tala, a nga tlakusa ntsengo wa nxavo wa wona naswona loko ku sale malembe matsongo, u fanele a hunguta ntsengo wa nxavo wa wona, hikuva u ku xavisela nhlayo ya leswi u nga ta swi tshovela. 17 Ku nga vi na munhu la kanganyisaka munhukulobye exikarhi ka n’wina+ naswona mi fanele mi chava Xikwembu xa n’wina,+ hikuva hi mina Yehovha Xikwembu xa n’wina.+ 18 Loko mi hlayisa milawu ya mina ni swiboho swa mina swa vuavanyisi, mi ta tshama etikweni ra n’wina mi sirhelelekile.+ 19 Tiko ri ta humesa mihandzu ya rona,+ kutani mi ta dya mi xurha naswona mi ta tshama eka rona mi sirhelelekile.+

20 “‘Kambe loko mi ku: “Hi ta dya yini hi lembe ra vunkombo loko hi nga byali mbewu kumbe ku hlengeleta ntshovelo wa hina?”+ 21 Hi lembe ra vutsevu ndzi ta mi rhumela nkateko wa mina naswona tiko ri ta humesa ntshovelo lowu ringaneke malembe manharhu.+ 22 Kutani mi ta byala mbewu hi lembe ra vunhungu naswona mi dya ntshovelo wa khale kukondza ku va lembe ra vukaye. Mi ta dya ntshovelo wa khale kukondza ntshovelo wa rona wu va kona.

23 “‘Tiko a ri fanelanga ri xaviseriwa makumu+ hikuva i ra mina.+ N’wina mi valuveri ni vahlapfa eka mina.+ 24 Etikweni hinkwaro leri nga ndzhaka ya n’wina mi fanele mi nyika mpfumelelo wa leswaku ri tlhela ri xaviwa.

25 “‘Loko makwenu o va xisiwana kutani a boheka ku xavisa ndhawu yin’wana leyi nga ndzhaka yakwe, mukutsuri loyi a nga xaka ra yena u fanele a ta a ta xava swilo leswi makwavo a swi xavisaka.+ 26 Loko munhu a nga ri na mukutsuri kambe a va ni rifuwo kutani a kuma mali yo tlhela a swi xava, 27 u fanele a hlayela nxavo wa ntshovelo wa yona wa malembe lawa a yi xavisile kutani a hakela mali ya malembe lama saleke eka munhu loyi a n’wi xaviserile. Kutani a nga tlhelela endhawini leyi nga ndzhaka ya yena.+

28 “‘Kambe loko a nga kumi leswi ringaneke leswaku a n’wi tlherisela swona, leswi a swi xaviseke swi ta tshama ni muxavi ku fikela hi Lembe Ra Ntshunxeko;+ kutani swi fanele swi huma hi Lembe Ra Ntshunxeko, yena u fanele a tlhelela endzhakeni yakwe.+

29 “‘Kutani loko munhu o xavisa yindlu emutini lowu biyeriweke hi khumbi, u ta va ni mfanelo yo tlhela a yi xava ku fikela loko lembe leri a yi xaviseke ha rona ri hela; u ta heta lembe hinkwaro a ha ri ni mfanelo yo tlhela a yi xava.+ 30 Kambe loko o ka a nga yi xavi kukondza ku hela lembe, yindlu leyi nga emutini lowu biyeriweke hi khumbi yi ta va ya munhu loyi a yi xaveke ku ya fikela eka vatukulu vakwe. Hi Lembe Ra Ntshunxeko a yi fanelanga yi tlheriseriwa loyi a yi xaviseke. 31 Hambiswiritano, loko yindlu leyi nga ta xavisiwa yi ri emutini lowu nga biyeriwangiki hi khumbi yi ta tekiwa yi ri xiphemu xa ndhawu ya tiko. Yi fanele yi tshama yi ri ni mfanelo yo tlhela yi xaviwa naswona hi Lembe Ra Ntshunxeko yi fanele yi tlheriseriwa eka loyi a yi xaviseke.

32 “‘Valevhi va ta tshama va ri ni mfanelo yo tlhela va xava tiyindlu leti nga emitini ya vona+ hilaha ku nga heriki. 33 Loko ndhawu leyi nga ndzhaka ya Valevhi yi nga tlheli yi xaviwa, yindlu leyi xavisiweke emutini lowu nga wa vona yi fanele yi tlherisiwa hi Lembe Ra Ntshunxeko,+ hikuva tiyindlu ta miti ya Valevhi i ndzhaka ya vona exikarhi ka Vaisrayele.+ 34 Ku tlula kwalaho, madyelo ya swifuwo+ lama nga ekusuhi ni miti ya vona a ma nge xavisiwi hikuva i ndzhaka ya vona ya hilaha ku nga heriki.

35 “‘Loko makwenu loyi a tshamaka na n’wina o va xisiwana naswona a nga swi koti ku tihlayisa, mi fanele mi n’wi pfuna+ hilaha a mi ta n’wi pfuna hakona muluveri ni muhlapfa,+ leswaku a ta ya emahlweni a tshama na n’wina. 36 Mi nga lavi ntswalo eka yena kumbe mi bindzula hi yena.+ Mi fanele mi chava Xikwembu xa n’wina+ kutani makwenu u ta ya emahlweni a tshama na n’wina. 37 Mi nga lavi ntswalo loko mi n’wi lombe mali+ kumbe mi n’wi nyika swakudya leswaku mi bindzula. 38 Hi mina Yehovha Xikwembu xa n’wina, loyi a mi humeseke etikweni ra Egipta+ leswaku ndzi mi nyika tiko ra Kanana, leswaku ndzi tikombisa ndzi ri Xikwembu xa n’wina.+

39 “‘Loko makwenu loyi a tshamaka na wena o va xisiwana kutani a boheka ku tixavisa eka wena,+ u nga n’wi sindzisi ku endla mitirho ya vuhlonga.+ 40 U fanele a khomiwa ku fana ni mutirhi la thoriweke,+ ku fana ni muluveri. U fanele a ku tirhela ku fikela hi Lembe Ra Ntshunxeko. 41 Kutani u ta suka eka wena, yena ni vana vakwe a tlhelela endyangwini wa ka vona. U fanele a tlhelela endhawini leyi nga ndzhaka ya vakokwa wakwe.+ 42 Hikuva i mahlonga ya mina lawa ndzi ma humeseke etikweni ra Egipta.+ A va fanelanga va tixavisa hilaha hlonga ri xavisiwaka hakona. 43 A wu fanelanga u n’wi khoma hi ndlela ya tihanyi,+ u fanele u chava Xikwembu xa wena.+ 44 U nga xava mahlonga ya xinuna ni ya xisati eka matiko lawa ma nga ekusuhi na wena, u nga xava hlonga ra xinuna kumbe ra xisati eka wona. 45 U nga ha xava mahlonga eka vana va valuveri lava tshamaka na n’wina+ ni le ka mindyangu leyi va nga na yona etikweni ra n’wina naswona ma ta va ya n’wina. 46 Mi nga ha ma hundzisela eka vana va n’wina ma va ndzhaka ya vona hilaha ku nga heriki. Mi nga ha ma endla vatirhi kambe a mi fanelanga mi va khoma hi tihanyi vamakwenu ku nga Vaisrayele.+

47 “‘Kambe loko muluveri kumbe muhlapfa loyi a tshamaka na n’wina o fuwa, kutani makwenu loyi a tshamaka na yena a va xisiwana kutani a boheka ku tixavisa eka muluveri kumbe eka muhlapfa loyi a tshamaka na n’wina kumbe eka xirho xa ndyangu wa muluveri, 48 u ta tshama a ri ni mfanelo yo kutsuriwa endzhaku ka loko a tixavisile. Un’wana wa vamakwavo a nga ha n’wi kutsula,+ 49 kumbe makwavo wa tata wakwe kumbe n’wana wa makwavo wa tata wakwe a nga n’wi kutsula, kumbe xaka rakwe ra le kusuhi ra ndyangu wakwe ri nga n’wi kutsula.

“‘Kumbe loko yena o va a fuwile, a nga tlhela a tikutsula.+ 50 Yena ni loyi a n’wi xaveke va fanele va hlayela ku sukela hi lembe leri a tixaviseke ha rona ku ya fikela hi Lembe Ra Ntshunxeko,+ kutani mali leyi a xavisiwaka ha yona yi ta fambisana ni nhlayo ya malembe.+ Masiku yakwe ya ku tirha ma ta hlayeriwa ku fana ni ya munhu loyi a thoriweke.+ 51 Loko ka ha sale malembe yo tala, u fanele a hakela mali ya ku kutsuriwa kakwe hi ku ya hi nhlayo ya malembe lama saleke. 52 Kambe loko ku sale malembe matsongo leswaku ku fika Lembe Ra Ntshunxeko, u fanele a ma hlayela kutani a hakela ntsengo wa mali ya ku kutsuriwa kakwe hi ku ya hi nhlayo ya malembe lama saleke. 53 U fanele a ya emahlweni a n’wi tirhela lembe ni lembe ku fana ni munhu loyi a thoriweke; u fanele u tiyiseka leswaku a nga n’wi khomi hi tihanyi.+ 54 Hambiswiritano, loko a nga ta swi kota ku tikutsula hi tindlela leti, u ta tshunxiwa hi Lembe Ra Ntshunxeko,+ yena ni vana vakwe.

55 “‘Hikuva Vaisrayele i mahlonga ya mina. I mahlonga ya mina lawa ndzi ma humeseke etikweni ra Egipta.+ Hi mina Yehovha Xikwembu xa n’wina.

26 “‘Mi nga tshuki mi tiendlela swikwembu leswi nga pfuniki nchumu+ naswona mi nga tshuki mi veka xifaniso lexi vatliweke+ kumbe phuphu leyi mi yi hundzuleke xikwembu,+ mi nga tshuki mi veka ribye leri kovotliweke etikweni ra n’wina leswaku mi ri khinsamela;+ hikuva hi mina Yehovha Xikwembu xa n’wina. 2 Mi fanele mi hlayisa tisavata ta mina mi tlhela mi xixima ndhawu ya mina yo kwetsima. Hi mina Yehovha.

3 “‘Loko mi ya emahlweni mi landzela milawu ya mina naswona mi yingisa swileriso swa mina kutani mi swi endla,+ 4 ndzi ta mi nisela mpfula hi nkarhi lowu faneleke,+ tiko ri ta humesa ntshovelo wa rona+ ni mirhi ya le tikweni yi ta veka mihandzu ya yona. 5 Mi ta hula ntshovelo wa n’wina ku fikela hi nkarhi wo hlengeleta madiriva, kutani mi ta hlengeleta madiriva ku fikela hi nkarhi wo byala mbewu; naswona mi ta dya xinkwa xa n’wina mi xurha, mi tshama mi sirhelelekile etikweni ra n’wina.+ 6 Ndzi ta endla leswaku ku va ni ku rhula etikweni+ naswona loko mi etlele a ku nge vi na munhu la nga ta mi chavisa;+ ndzi ta herisa swiharhi leswi nga ni khombo etikweni naswona banga ra nyimpi a ri nge hundzi etikweni ra n’wina. 7 Mi ta hlongorisa valala va n’wina mi va dlaya hi banga. 8 Vanhu va n’wina va ntlhanu va ta hlongorisa vanhu va 100 naswona vanhu va n’wina va 100 va ta hlongorisa vanhu va 10 000, mi ta dlaya valala va n’wina hi banga.+

9 “‘Ndzi ta mi katekisa, ndzi endla leswaku mi tswalana mi andza+ naswona ndzi ta hlayisa ntwanano wa mina na n’wina.+ 10 Loko ma ha dya leswi mi swi tshoveleke n’wexemu, mi ta boheka ku humesa swa khale leswaku mi nghenisa leswintshwa. 11 Ndzi ta veka tabernakela ya mina exikarhi ka n’wina+ naswona a ndzi nge mi fularheli. 12 Ndzi ta famba exikarhi ka n’wina ndzi va Xikwembu xa n’wina+ naswona n’wina mi ta va vanhu va mina.+ 13 Hi mina Yehovha Xikwembu xa n’wina loyi a mi humeseke etikweni ra Egipta leswaku mi nga ha vi mahlonga ya vona naswona ndzi tshove joko ra n’wina ndzi endla leswaku mi famba mi ololokile.

14 “‘Kambe loko mi nga ndzi yingisi kumbe mi nga hlayisi swileriso leswi hinkwaswo+ 15 naswona loko mi bakanya milawu ya mina,+ mi nyenya swiboho swa mina swa vuavanyisi, mi nga swi hlayisi swileriso swa mina hinkwaswo, kutani mi tlula ntwanano wa mina,+ 16 ndzi ta endla leswi landzelaka eka n’wina: Ndzi ta mi xupula hi ku mi tisela maxangu, vuvabyi bya rifuva ni ku hisa ka miri, swi endla leswaku mi nga voni naswona swi endla leswaku mi tsana. Mi ta yi byalela mahala mbewu ya n’wina hikuva yi ta dyiwa hi valala va n’wina.+ 17 Ndzi ta lwa na n’wina, kutani valala va n’wina va ta mi hlula;+ lava mi vengaka va ta mi kandziyela+ naswona mi ta baleka ku nga ri na munhu loyi a mi hlongorisaka.+

18 “‘Loko mi nga ndzi yingisi hambiloko mi humeleriwe hi swilo leswi, ndzi ta boheka ku mi ba ka nkombo hikwalaho ka swidyoho swa n’wina. 19 Ndzi ta endla leswaku mi tshika ku tiomisa nhloko ni ku tinyungubyisa naswona ndzi ta endla leswaku matilo ya n’wina ma fana ni nsimbhi+ ni misava ya n’wina yi fana ni koporo. 20 Mi ta tirha hi matimba mi tirhela mahala hikuva tiko ra n’wina a ri nge humesi nchumu+ naswona mirhi ya tiko ra n’wina a yi nge veki mihandzu.

21 “‘Kambe loko mi ya emahlweni mi ndzi fularhela naswona mi ala ku ndzi yingisa, ndzi ta mi ba ka nkombo hi ku ya hi swidyoho swa n’wina. 22 Ndzi ta rhumela swiharhi exikarhi ka n’wina,+ swi ta endla leswaku mi sala mi nga ri na vana+ naswona swi ta lovisa swifuwo swa n’wina swi tlhela swi hunguta nhlayo ya n’wina naswona a ku nge he fambi munhu emagondzweni ya n’wina.+

23 “‘Loko mi nga yi amukeli ndzayo ya mina+ hambiloko mi humeleriwe hi swilo leswi naswona mi ya emahlweni mi ndzi fularhela, 24 na mina ndzi ta mi fularhela naswona ndzi ta mi ba ka nkombo hikwalaho ka swidyoho swa n’wina. 25 Ndzi ta mi xupula hi ku endla leswaku valala va n’wina va mi hlasela hi banga hikwalaho ka leswi mi tluleke ntwanano wa mina.+ Loko mi hlengeletana emitini ya n’wina, ndzi ta rhumela vuvabyi exikarhi ka n’wina+ naswona mi ta hluriwa hi valala va n’wina.+ 26 Loko ndzi herisa mphakelo wa n’wina wa xinkwa,*+ vavasati va khume va ta baka xinkwa xa n’wina exitikweni xin’we kutani va ta pima xinkwa ivi va mi nyika xiphemu lexitsongo;+ mi ta xi dya kambe a mi nge xurhi.+

27 “‘Loko mi nga ndzi yingisi hambiloko mi humeleriwe hi swilo leswi naswona mi ya emahlweni mi ndzi fularhela, 28 ndzi ta mi hlundzukela ngopfu+ naswona ndzi ta mi xupula ka nkombo hikwalaho ka swidyoho swa n’wina. 29 Hikwalaho mi ta boheka ku dya nyama ya vana va n’wina va majaha naswona mi ta dya nyama ya vana va n’wina va vanhwanyana.+ 30 Ndzi ta herisa tindhawu ta n’wina leti tlakukeke,+ ndzi tsema swo tlhandleka murhi wo nun’hwela, ndzi tlhandleka mitsumbu ya n’wina ehenhla ka mitsumbu ya swifaniso swa n’wina leswi nyenyetsaka*+ leswi mi swi gandzelaka naswona ndzi ta mi fularhela hikuva ma ndzi nyenyetsa.+ 31 Ndzi ta lovisa miti ya n’wina hi banga,+ ndzi herisa tindhawu ta n’wina to kwetsima naswona a ndzi nge wu nun’hweteli nun’hwelo wa magandzelo ya n’wina lama tsakisaka. 32 Ndzi ta endla tiko ri va rhumbi+ naswona valala va n’wina lava tshamaka eka rona va ta ri languta hi ku hlamala.+ 33 Ndzi ta mi hangalasa ni matiko+ naswona ndzi ta endla leswaku valala va n’wina va lwa na n’wina hi banga;+ tiko ra n’wina ri ta va marhumbi+ naswona miti ya n’wina yi ta lovisiwa.

34 “‘Hi nkarhi wolowo tiko ri ta hlayisa tisavata ta rona loko ri sele ri ri rhumbi loko n’wina ma ha ri etikweni ra valala. Hi nkarhi wolowo tiko ri ta wisa hikuva ri fanele ri hlayisa tisavata leti ri nga ti hlayisangiki.+ 35 Masiku hinkwawo loko ri nga ri na vaaki ri ta wisa, hikuva a ri wisanga hi tisavata ta n’wina loko ma ha tshama eka rona.

36 “‘Lava nga ta va va ponile+ ndzi ta va tisela ku chava loko va ri ematikweni ya valala va vona; mpfumawulo wa tluka leri hungiwaka hi moya wu ta endla va baleka naswona va ta baleka ku fana ni munhu loyi a balekelaka banga ivi va wa ku nga ri na loyi a va hlongorisaka.+ 37 Va ta phijana va wa ku fana ni vanhu lava balekaka banga, hambiloko ku nga ri na loyi a va hlongorisaka. A mi nge swi koti ku lwa ni valala va n’wina.+ 38 Mi ta lova exikarhi ka matiko+ naswona tiko ra valala va n’wina ri ta mi dya ri mi heta. 39 Lava saleke exikarhi ka n’wina va ta bola ematikweni ya valala va vona+ hikwalaho ka xihoxo xa n’wina. Va ta bola hikwalaho ka swihoxo swa vatata wa vona.+ 40 Kutani va ta phofula xihoxo xa vona+ ni xihoxo ni ku nga tshembeki ka vatata wa vona ivi va pfumela leswaku a va tshembekanga hi ku va va ndzi fularherile.+ 41 Kutani na mina ndzi va fularherile+ hi ku va yisa etikweni ra valala va vona.+

“‘Kumbexana hi nkarhi wolowo mbilu ya vona leyi sihalalaka yi ta titsongahata+ kutani va ta riha xihoxo xa vona. 42 Ndzi ta tsundzuka ntwanano wa mina na Yakobo+ ni ntwanano wa mina na Isaka+ kutani ndzi ta tsundzuka ntwanano wa mina na Abrahama+ naswona ndzi ta tsundzuka tiko. 43 Loko va nga ri kona etikweni, a ri hlayisa tisavata ta rona+ naswona ri ri rhumbi vona va nga ri kona, vona a va riha xihoxo xa vona hikuva va bakanye swiboho swa mina swa vuavanyisi naswona va nyenye milawu ya mina.+ 44 Hambiswiritano, a ndzi nge va fularheli hi ku helela+ kumbe ndzi va cukumeta lerova ndzi va lovisa loko va ri etikweni ra valala va vona, leswi nga ta onha ntwanano wa mina+ na vona hikuva hi mina Yehovha Xikwembu xa vona. 45 Hikwalaho ka vona, ndzi ta tsundzuka ntwanano lowu ndzi wu endleke ni vakokwa wa vona,+ lava ndzi va humeseke etikweni ra Egipta matiko ma ri karhi ma swi vona,+ leswaku ndzi tikombisa ndzi ri Xikwembu xa vona. Hi mina Yehovha.’”

46 Leswi i swileriso, swiboho swa vuavanyisi ni milawu leswi Yehovha a swi vekeke exikarhi ka yena ni Vaisrayele eNtshaveni ya Sinayi hi ku tirhisa Muxe.+

27 Yehovha a ya emahlweni a vulavula na Muxe a ku: 2 “Byela Vaisrayele u ku, ‘Loko munhu o endla xitshembiso xo hlawuleka+ eka Yehovha xo nyikela mali leyi ringanyetiweke hi ku ya hi ntsengo wa munhu loyi ku nyikeriwaka hi yena, 3 ntsengo lowu ringanyetiweke eka waxinuna loyi a sukelaka eka malembe ya 20 ku ya eka malembe ya 60, ku ta va swiphemu swa silivhere* swa 50 hi ku ya hi mpimo wa ndhawu yo kwetsima.* 4 Kambe loko ku ri waxisati, ntsengo lowu ringanyetiweke ku ta va swiphemu swa silivhere swa 30. 5 Loko va ri ni malembe ya ntlhanu ku ya eka 20, ntsengo lowu ringanyetiweke eka waxinuna ku ta va swiphemu swa silivhere swa 20 kasi eka waxisati ku ta va swiphemu swa silivhere swa khume. 6 Loko va ri ni n’hweti ku ya eka malembe ya ntlhanu, ntsengo lowu ringanyetiweke eka waxinuna ku ta va swiphemu swa silivhere swa ntlhanu ni swiphemu swinharhu swa silivhere eka waxisati.

7 “‘Loko va ri ni malembe ya 60 ku ya ehenhla, ntsengo lowu ringanyetiweke eka waxinuna ku ta va swiphemu swa silivhere swa 15 ni swiphemu swa silivhere swa khume eka waxisati. 8 Kambe loko a ri xisiwana lerova a nga swi koti ku humesa ntsengo lowu ringanyetiweke,+ munhu yoloye u ta yima emahlweni ka muprista, kutani muprista u ta veka ntsengo wa kona. Muprista u ta veka ntsengo wa kona hi ku ya hi leswi loyi a endlaka xitshembiso a nga kotaka ku swi humesa.+

9 “‘Loko xitshembiso xa kona ku ri xifuwo lexi fanelekaka ku nyikeriwa eka Yehovha, xilo xin’wana ni xin’wana lexi nga nyikeriwaka eka Yehovha xi ta va nchumu wo kwetsima. 10 A nge cincisi lexinene hi lexi nga riki xinene kumbe lexi nga riki xinene hi lexinene. Kambe loko a fanele a xi cincisa hi xifuwo xin’wana, swifuwo haswimbirhi swi ta va swo kwetsima. 11 Loko ku ri xifuwo lexi nga tengangiki+ lexi nga ta ka xi nga nyikeriwi xi va gandzelo eka Yehovha, u ta xi yimisa emahlweni ka muprista. 12 Kutani muprista u ta veka ntsengo wa xona loko a vone leswaku i xinene kumbe a hi xinene. Ntsengo lowu ringanyetiweke hi muprista a wu nge cinci. 13 Kambe loko a lava ku xi kutsula, u fanele a engetela 20 wa tiphesente eka mali leyi ringanyetiweke.+

14 “‘Loko munhu a fanele a nyikela* yindlu yakwe yi va nchumu wo kwetsima eka Yehovha, muprista u ta veka ntsengo wa yona loko a vone leswaku i yinene kumbe a hi yinene. Yi ta xavisiwa hi ku ya hi ntsengo lowu vekiweke hi muprista.+ 15 Kambe loko loyi a nyikelaka yindlu yakwe a lava ku tlhela a yi xava, u fanele a engetela 20 wa tiphesente eka mali leyi ringanyetiweke, kutani yi ta va ya yena.

16 “‘Loko munhu a nyikela eka Yehovha yin’wana ya nsimu yakwe, ntsengo wu ta ringanyetiwa hi ku ya hi mbewu leyi lavekaka leswaku ku byariwa eka yona: mpimo wa homere* wa mbewu ya maxalana ku ta va swiphemu swa silivhere swa 50. 17 Loko a nyikela nsimu yakwe hi Lembe Ra Ntshunxeko,*+ ntsengo lowu ringanyetiweke a wu nge cinci. 18 Loko a nyikela nsimu yakwe endzhaku ka Lembe Ra Ntshunxeko, muprista u ta n’wi hlayelela ntsengo hi ku ya hi malembe lama saleke kukondza ku fika lembe leri landzelaka ra Ntshunxeko, kutani ntsengo wu ta hungutiwa hi ku ya hi ntsengo lowu ringanyetiweke.+ 19 Kambe loko loyi a yi nyikelaka a lava ku tlhela a yi xava, u fanele a engetela 20 wa tiphesente eka mali leyi ringanyetiweke, kutani yi ta va ya yena. 20 Loko a nga tlheli a yi xava kutani nsimu yi xaviseriwa munhu un’wana, a yi nge he tlheli yi xavisiwa. 21 Loko hi Lembe Ra Ntshunxeko nsimu yi tlheriseriwa loyi a yi xaviseke, yi ta va nchumu wo kwetsima eka Yehovha, ku fana ni nsimu leyi nyiketeriweke eka yena. Yi ta va ndzhaka ya vaprista.+

22 “‘Loko munhu a nyikela eka Yehovha nsimu leyi a yi xaveke leyi nga riki xiphemu xa ndzhaka yakwe,+ 23 muprista u ta n’wi hlayelela ntsengo wa yona ku fikela hi Lembe Ra Ntshunxeko, kutani u ta n’wi nyika ntsengo lowu ringanyetiweke hi siku rero.+ I nchumu wo kwetsima eka Yehovha. 24 Hi Lembe Ra Ntshunxeko, nsimu yi ta tlheriseriwa eka loyi a yi xaveke eka yena, ku nga n’wini wa nsimu.+

25 “‘Ntsengo wun’wana ni wun’wana wu ta ringanyetiwa hi ku ya hi mpimo wa ndhawu yo kwetsima. Xikele i tigera* ta 20.

26 “‘Kambe a nga kona loyi a faneleke a nyikela mativula ya swifuwo hikuva ma tswariwa ma ri mativula ya Yehovha.+ Hambi i nkuzi kumbe i nyimpfu, i swa Yehovha.+ 27 Loko xi ri exikarhi ka swifuwo leswi nga tengangiki kutani a xi kutsula hi ku ya hi ntsengo lowu ringanyetiweke, u fanele a engetela 20 wa tiphesente eka mali yoleyo.+ Kambe loko xo ka xi nga kutsuriwi, xi ta xavisiwa hi ku ya hi ntsengo lowu ringanyetiweke.

28 “‘Kambe a ku na nchumu lowu nyiketiweke lowu munhu a wu nyiketaka eka Yehovha leswaku wu lovisiwa lowu humaka eka swilo leswi a nga na swona wu nga xavisiwaka kumbe wu tlhela wu xaviwa, ku nga ha va munhu kumbe swifuwo kumbe nsimu leyi a nga na yona. Nchumu wun’wana ni wun’wana lowu nyiketiweke wu kwetsima ngopfu eka Yehovha.+ 29 Ku tlula kwalaho, munhu loyi a gweviweke loyi a nyiketiweke leswaku a lovisiwa a nge kutsuriwi.+ U fanele a dlayiwa.+

30 “‘Xiphemu xin’wana ni xin’wana xa vukhume*+ xa tiko, ku nga ha va xa ntshovelo wa le nsin’wini kumbe xa mihandzu ya mirhi, i xa Yehovha. I nchumu wo kwetsima eka Yehovha. 31 Loko munhu o tshuka a lava ku tlhela a xava xiphemu xakwe xa vukhume, u fanele a engetela 20 wa tiphesente eka mali ya kona. 32 Xiphemu xin’wana ni xin’wana xa vukhume entlhambini wa tihomu ni wa tinyimpfu, hinkwaswo leswi hundzaka ehansi ka nhonga ya murisi, xifuwo xa vukhume xi ta va nchumu wo kwetsima eka Yehovha. 33 A nga fanelanga a xi kambela ku vona loko xi ri xinene kumbe xi nga ri xinene naswona a nga fanelanga a xi cincisa. Kambe loko o tshuka a ringeta ku xi cincisa, swifuwo haswimbirhi swi fanele swi va nchumu wo kwetsima.+ A swi nge kutsuriwi.’”

34 Leswi i swileriso leswi Yehovha a swi nyikeke Muxe eNtshaveni ya Sinayi+ leswaku a swi nyika Vaisrayele.