Lungutelo Ra Bibele

Minyikelo Yo Pfuna Vapfumari Xana I Ndzhwalo Wa Vukreste?

KHUME ra malembe a ri si hela hi mpfhuka Ntlawa wa PTL (Praise the Lord), lowu tindlu-nkulu ta wona ti nga le dzonga vuxa bya United States, wu kombele minyikelo ya ku pfuna swisiwana hi tlhelo ra vukhongeri. Hi ku tirhisa fambiselo ra TV na hi mapapila, va hlengelete timiliyoni ta tirhandhi, leti nga ta ti halaka ti tata mabokisi ya vona ya mali—leyi ku vuriweke leswaku i ya ku haxa evhangeli.

Anakanya ndlela leyi magidi lama nga rhumela mali eka Ntlawa wa PTL ma titweke ha yona loko va hlaya swiviko swa mahungu swo tanihi xiviko lexi xa Associated Press lexi nga vula leswaku Jim Bakker, khale ka muungameri wa PTL, swin’we ni nsati wa yena, Tammy, “hi ku ya hi xiviko va hakeriwe [R4,7 wa timiliyoni] ta muholo ni mali ya ntlhandlekelo hi 1986.” Kambe lexi biheke, xiviko xi ye emahlweni: “Va holeriwe hi ndlela yoleyo hambi loko vutirheli byi ri na xikweleti xa kwalomu ka [R145 wa timiliyoni] . . . Kwalomu ka [R780 000] eka mali ya PTL yi vekiwe etlhelo yi vekeriwa [Jessica] Hahn ku tiyisekisa leswaku u pfala nomu hi ta vuxaka bya yena [bya rimbewu] na Bakker.”

Emahlweni ko va Bakker a gweveriwa khotso hikwalaho ko kanganyisa valandzeri vakwe, loko a ri karhi a tengisiwa, muavanyisi u te: “Eka hina lava va nga ni vukhongeri hi nyangatsekile hi ku hundzuka swiphunta swa vachumayeri ni vaprista lava va ngo hi dyelela mali ntsena.”

A hi vukhongeri ntsena lebyi susumetelaka vanhu lava nyikelaka hi ku hiseka ivi byi bela mali yo tala exikwameni. Swi tolovelekile leswaku van’wana lava va hlengeletaka mali va titekela ku tlula 90 wa tiphesente ta minyikelo leyi va yi kombelaka.

Kutani ke, xana swa hlamarisa leswaku vanhu va sungula ku phirhiwa hi minyikelo yo tano eka vapfumari? Hambi swi ri tano, xana Vakreste va fanele va endla yini? Xana va fanele va nyikela eka timali leti hleriweke ta ku pfuna swisiwana? Xana Bibele yi nyikela switsundzuxo swihi ku tiyisekisa leswaku mali yi tirhisiwa hi vutlharhi ku pfuna van’wana? Hi yihi ndlela leyinene ni leyi tirhaka swinene ku pfuna van’wana?

Ku Nyika—Ina na E-e

U nga tiyiseka, xitsundzuxo xa Bibele xi lava leswaku hi va ni tintswalo hi hanana eka lava pfumalaka. Ku sukela eminkarhini ya khale vanhu va Xikwembu va khutaziwe ku “hanana, va tiva ni ku pambulela van’wana.” (1 Timotiya 6:18; Deteronoma 15:7, 10, 11) Entiyisweni, Vakreste eka 1 Yohane 3:17 va byeriwa leswaku: “Kambe loko munhu a ri ni swilo swa misava leyi, kutani a vona makwavo a ri eku pfumaleni, kambe a nonon’hwisa mbilu ya yena a nga n’wi pfuni, xana rirhandzu ro rhandza Xikwembu ri nga tshamisa ku yihi eka yena xana?”

Nyika, ina; kambe tivonele! Nkarhi na nkarhi hi tshamela ku komberiwa hi lava pfunaka vapfumari, vukhongeri ni hi matsima ya lembe na lembe ya mintirho ya vanhu; vo tala va endla swikombelo leswi susumetaka. Hambi swi ri tano, loko u anakanyisisa hi swona i swinene ku tsundzuka xivuriso xa Bibele: “Mbilu ya munhu wo tlhariha yi lav̌a v̌utivi, Kambe milomu ya ŝihunguki yi dya v̌uhunguki.” (Swivuriso 14:15) Hi marito man’wana, tivonele leswaku u nga amukeli leswi vuriwaka kumbe switshembiso swa lava pfunaka vapfumari hi mali leyi tsariweke. Xana kahle-kahle mali leyi hlengeletiweke yi tirhisiwa hi ndlela yihi? Xana ti kona tinhlengeletano leti Mukreste a nga ti seketelaka? Xana mintirho ya tona i ya politiki, vutiko kumbe yi fambisana ni vukhongeri bya mavunwa? Xana xikongomelo lexi vuriweke xa twala naswona a xi lwisani ni misinya ya Matsalwa?

Van’wana lava pfunaka swisiwana va swi kota ku pfuna vanhu lava pfumalaka hi ndlela leyinene. Loko va langutane ni makhombo ya ntumbuluko kumbe vuvabyi lebyikulu, minkarhi yo tala Vakreste hi voxe va pfuniwe hi vanhu volavo va pfunaka vapfumari. Hambi swi ri tano, van’wana lava pfunaka swisiwana, va lava mali yo tala ya nkongomiso kumbe va hlengeleta mali yo tala, leyi hetelelaka yi nga tirhanga ngopfu eka xikongomelo lexi vuriweke. Hi xikombiso, nkambisiso wa sweswinyana wa tinhlengeletano letikulu leti nga bindzuriki ta le United States ta 117, ku katsa ni lava pfunaka vapfumari, wu kume leswaku ku tlula kotara ya tona ti hakela vatirheli va tona va le henhla hi muholo lowu nga R590 000 kumbe ku tlula hi lembe. Hakanyingi minkambisiso yi kombisa ku tirhisiwa ka mali eka swilo swa manyunyu ni ku hanya vutomi bya vulovolovo. Ku nga khathariseki vito ra nhlangano wa vapfuni va vapfumari, swi tikomba onge ku nyikela eka mavandla yo tano a swi nge xi hetisisi xileriso xa Bibele xo pfuna lava pfumalaka.

Langutelo Leri Ringaniseriweke

Hambi leswi ku nga riki na loyi a lavaka ku tlangisa mali—kumbe leswi nyanyisaka mhaka, a vona yi tirhiseriwa ku engetela swikhwama swa vanhu lava va ngo lava ku tirhela swa vona ntsena—nakambe ku na xilaveko xa ku tivonela ku va ni vukanganyisi eku nyikeni. U nga tirhisi ku tsandzeka kumbe ku nga tshembeki ka van’wana “vapfuni va vapfumari” tanihi nchumu wo honisa lava pfumalaka kumbe u dlaya mintlhaveko ya ntwelo-vusiwana. Swivuriso 3:27, 28 ya tsundzuxa: “U nga ali ku endla le’ŝinene e ka loyi u nga ni fanelo ka yena, Loko ŝi ri mandleni ya wena. U nga v̌uri ka warikweni u re: Famba u ta v̌uya, Munḍuku nḍi ta ku nyika! Kasi leši a ši pfumalaka ši kona ka wena.” (Ringanisa 1 Yohane 3:18.) U nga tibyeli leswaku mavandla hinkwawo ya lava pfunaka vapfumari ma tlangisa mali kumbe ma ni vukanganyisi. Kambisisa mintiyiso, ivi u endla xiboho xa munhu hi xiyexe leswaku xana u ta nyikela kumbe e-e.

Vo tala va hlawula ku pfuna hi voxe, va nyikela tinyiko eka vanhu ni le ka mindyangu leyi pfumalaka hi ku kongoma. Xisweswo, vanyiki va tiyiseka hi ku tirha ni ku hatla ku tirhisiwa leswi va nyikeleke ha swona. Nakambe leswi swi nyikela nkarhi lowunene wa ku kombisa tintswalo hi marito ni hi swiendlo. Hambi loko u nga ri na swo tala swo swi nyikela hi tlhelo ra swilo swa nyama, u nga ha va ni ntsako wa ku nyika. Loko u tlhela u twa hi xilaveko xa xiviri xa mpfuno wo tano, nyikela hi leswi u nga swi kotaka u ri ni moya lowu nga eka, 2 Vakorinto 8:12, leyi nge: “Hikuva loko munhu a navela swinene ku nyika, Xikwembu a xi kombeli leswi a nga riki na swona, kambe xi amukela swo leswi a swi humesaka.”

Nakambe, tsundzuka, leswaku minkarhi yin’wana nchumu lowu nga pfunaka swinene a hi mali ntsena. Yesu u byele valandzeri vakwe a ku “mi famba, [mi] twarisa . . . mhaka leyi nge ‘Mfumo wa matilo wu le kusuhi.’ . . . Mi nyikiwile ntsena, na n’wina; nyikani ntsena.” (Matewu 10:7, 8) Hi ku fanana namuntlha, Vakreste va swi xiya leswaku nkarhi, matimba ni mali leyi va yi tirhisaka eku vuleni ka vumbhoni bya Mfumo—leswi antswisaka vutomi naswona swi nyika ntshembo—i ku nyika swisiwana loku pfunaka hi ndlela leyinene swinene.

Kutani ke, langutelo ra Bibele i ku va ni tintswalo, ku hanana naswona ra tirha. Ri hi tsundzuxa leswaku mpfuno wa leswi vonakaka minkarhi yin’wana wa laveka, naswona xilaveko xa kona a xi fanelanga ku honisiwa. Hi nkarhi lowu fanaka u nga titwi u boheka eka un’wana ni un’wana loyi a nga ha kombelaka mali ya wena. Xiya leswaku i swinene hi ndlela yihi ku tirhisa mali leyi u nga na yona leswaku u tsakisa Xikwembu naswona u pfuna ndyangu wa wena ni munhu-kuloni hi ndlela leyi vuyerisaka. (1 Timotiya 5:8; Yakobo 2:15, 16) Encisa Yesu hi ku xiyaxiya ni ku angula eka swilaveko swa van’wana—hi tlhelo ra moya ni ra leswi vonakaka. Hi marito ya Vaheveru 13:16: “Mi nga rivali ku endla leswinene ni ku pambulela van’wana leswi mi nga na swona, hikuva magandzelo lawa hi wona lama tsakisaka Xikwembu.”