Xana A Hi Va Misava?

HI MUYIMERI WA XALAMUKA! WA LE JARIMANI

“A HI va misava, tanihi leswi na mina ndzi nga riki wa misava.” (Yohane 17:16) Hi marito lawa Yesu u hlamusele vukala-tlhelo bya xiviri bya valandzeri va yena ehenhleni ka timhaka ta politiki. Xana lava tivulaka Vakreste namuntlha va wu fikelela mpimanyeto lowu?

Xiya tinhlamuselo leti landzelaka ta maphepha-hungu mayelana ni ku katseka ka Vujagana ekhale ka German Democratic Republic (GDR), leyi ku fikela loko yi avanile hi 1990 a yi fumiwa hi hulumendhe ya Vukhomunisi.

• “Sweswi leswi Kereke ya Lutere etikweni ra GDR yi dzunisiweke swa xinkarhana tanihi manana wa ndzhundzuluko wa ku rhula, swirho swa yona swi tikomba swi hunguteka swinene. Eka vo tala yi tikomba yi ri mhandzi leyikulu yo seketela mfumo ni xivandla xa Stasi (Ntirho Wo Sirhelela Tiko).”—Die Zeit, November 1991.

• “Swifundzha swin’wana swa Tikereke ta Lutere . . . swi kombise ku pfilunganyeka hi ku katseka ka vatirhi va kereke ni vangheni va yona swin’we na Stasi.”—Evangelische Kommentare, January 1991.

• “Varhangeri va Kereke [ya Lutere] va twa swivilelo swa leswaku vafundhisi a va ha va khathaleli vanhu va vona hi laha a va endla ha kona, tanihi leswi va hisekelaka tipolitiki.”—Süddeutsche Zeitung, February 1990.

• “Weizsäcker [khale ka muungameri wa Riphabliki leri Hlanganeke ra Jarimani] u vule leswaku Kereke [ya Lutere] minkarhi hinkwayo yi pfunetile swinene eka vuxaka bya politiki bya Swifundzha swimbirhi swa Jarimani.”—Wetterauer Zeitung, February 1992.

Ku nghenela tipolitiki a swi nga ha endliwi eKerekeni ya Lutere ntsena. The European yi vikile: “Swi tikomba onge nhlangano wun’wana ni wun’wana wa kereke [ya Protestente] wu ngheneriwe hi vayimeri va Mfumo.” Manfred Stolpe loyi The European yi n’wi hlamuselaka tanihi “mukaneri-nkulu wa kereke ya protestente ni mimfumo ni vukhomunisi,” u vule leswi loko a tiseketela: “A ndzi ta va ndzi qhavulane na Diyavulosi loko sweswo a swi ta antswisa mhaka ya hina.”

Phepha-hungu leri nge Guardian ra le London ri vike hi vuxaka bya le kusuhi exikarhi ka vafundhisi ni nhlengeletano ya Mafia eItaly. Ri te: “Kereke na Cosa Nostra swi tirhe swin’we hi ntsako nkarhi wo leha lerova kereke yi kala yi hehliwa hikwalaho ka ku katseka ka yona.”

Toronto Star yi humese xihloko mayelana ni ntirhisano wa vaprista van’wana va Orthodox va le Russia swin’we ni musunguri wa KGB. Xiviko xi ri: “Ku paluxiwa ka ntirhisano wa kereke ni hulumendhe ya vukhomunisi i xisandzu lexi tsemaka nhlana. . . . Vuhlayiselo bya timhaka bya KGB . . . byi ringanyeta leswaku swirho leswikulu swa kereke a swi paluxanga misinya ya milawu ya swona ntsena kambe swi tiyimisele ku cinca mianakanyo ya varhangeri va vukhongeri va matiko man’wana.”

Loko tikereke ta Vujagana ti ya emahlweni ti nghenela tipolitiki, Vakreste va xiviri va namarhela xileriso xa Yesu leswaku va nga vi va misava.