Langutelo Ra Bibele

I Vamani Lava Yaka eTilweni?

BOMO ya matherorisi yi hlanhlelele xihaha-mpfhuka lexi a xi ri karhi xi haha, yi dlaya hinkwavo lava a va ri endzeni ka xona. Maxaka ni vanghana va vahlaseriwa va byeriwe leswaku varhandziwa va vona sweswi va le tilweni, onge hi loko ku rihiwa rifu ra vona leri a ri nga rindzeriwanga ni leri hlomulaka mbilu.

Loko muyimbeleri un’wana la dumeke a fa, ku vuriwe leswaku u ‘chaya nanga swin’we ni tintsumi etilweni.’

Vuvabyi, ndlala kumbe makhombo swi tekela vana vutomi, naswona vafundhisi va vula leswaku sweswi va tiphina hi ntsako wa le tilweni, kumbexana tanihi tintsumi!

Xana Xikwembu xi lulamisa vuhomboloki bya lavatsongo ni lavakulu hi ku va yisa eka xona eku rhuleni ka le tilweni? Xana ku amukeriwa etilweni i ndlela yo olova ya Xikwembu yo hlayisa hinkwaswo leswi nga swinene ni leswi dzunekaka evanhwini? Xana mavonelo ya Bibele hi wahi?

Lava Nga Riki eTilweni

Nhlamuselo ya Bibele yi swi veka erivaleni: “Xana a mi tivi leswaku lavo homboloka va nga ka va nga dyi ndzhaka ya Mfumo wa Xikwembu, xana?” (1 Vakorinto 6:9) Hambi swi ri tano, Bibele yi tlhela yi vulavula hi vo tala lavo lulama ni vahlaseriwa vo homboloka lava nga taka va nga dyi ndzhaka ya matilo.

Yesu hi yexe u vulavule hi Yohane Mukhuvuri loyi a a ri kusuhi ni ku dlawela ripfumelo: “Ndzi tiyisile ndzi ri ka n’wina: Exikarhi ka vanhu lava tswariweke hi vavasati, a ku humelelanga loyi a tlulaka Yohane Mukhuvuri; kasi la nga lontsongo eka hinkwavo eMfun’weni wa matilo i nkulukumba eka yena.” (Matewu 11:11) Vafana hinkwavo lava nga ni malembe mambirhi ku ya ehansi, va le Betlehema ni le migangeni ya kona, va dlayiwile hi Hosi Heroda hi tihanyi, loko a ringeta ku dlaya Yesu. (Matewu 2:16) Hambi swi ri tano, Yesu u te: “A ku na munhu [kumbe wansati kumbe n’wana] loyi a tshamaka a tlhandlukela ematilweni loko a nga ri loyi a xikeke hi le matilweni, yena N’wana-wa-Munhu [Yesu].” (Yohane 3:13) Hikwalaho ka yini Yesu a nga vulavuli hi vahlaseriwa lava va vuhomboloki tanihi lava nga etilweni?

Yesu U Pfule Ndlela

Yesu u tivule “ndlela, ni ntiyiso, ni vutomi” naswona muapostola Pawulo u n’wi fanise ni ‘swirhangana swa lava etleleke eku feni.’ (Yohane 14:6; 1 Vakorinto 15:20) Xisweswo, ku hava ni un’we loyi a ta n’wi rhangela ku ya etilweni. Kambe loko Yesu a tlhandlukele etilweni emasikwini ya 40 endzhaku ka ku pfuxiwa ka yena, xana u landzeriwe hi vanhu va ripfumelo lava fanelekaka lava ana se a va file? Endzhaku ka masiku ya kwalomu ka khume, muapostola Petro u vule leswi mayelana na Hosi Davhida, “ú file, a va a lahliwa, kutani sirha ra yena ra ha ri exikarhi ka hina ni namuntlha. . . . Hikuva Davhida a nga tlhandlukelanga etilweni.”—Mintirho 2:29, 34.

Xisweswo, ku amukeriwa etilweni a swi katsi ndziho wa ku xanisiwa hi vuhomboloki kumbe hakelo ya ku tshembeka ka munhu. Ematshan’wini ya sweswo, swi endla masungulo ya huvo leyi fumaka ya le tilweni leyi vumbiwaka hi nhlayo ya vayimeri va vanhu lava nga ehansi ka nkongomiso wa Kreste, lava hlawuriweke hi moya lowo kwetsima.—Varhoma 8:15-17; Nhlavutelo 14:1-3.

Mfumo Wa Le Tilweni

Yesu u vulavule hi vulawuri lebyi kumbe hulumendhe, tanihi “Mfumo wa matilo” kumbe ‘mfumo wa Xikwembu.’ (Matewu 5:3, 20; Luka 7:28) A ku nga kunguhatiwanga swona leswaku ntshungu lowukulu wa vanhu wu katseka eka huvo leyi ya vulawuri. Xisweswo, Yesu u yi fanise ni “ntlhambinyana.” (Luka 12:32) Eririn’wini ro sungula leri tirhisiweke exiyengeni lexi xa Bibele, rito “nyana” (mi·krosʹ) ri hambanile na ntshungu (meʹgas), naswona ku tirhisiwa ka rona eka Luka 12:32 ku kombetela eka mpimo kumbe nhlayo yitsongo. Hikwalaho, swirho swa “Mfumo wa matilo” a swi lavi nhlayo leyi nga pimiwangiki. Hi xikombiso: Loko u komberiwe ku chela matinyana enghilazini, u ta tiyiseka leswaku a yi tali yi kondza yi khapa. Kutani, hi laha ku fanaka “ntlhambinyana” a wu nge endliwi hi nhlayo leyikulu ya vanhu. Mfumo wa Xikwembu wu ni nhlayo leyi pimiweke (‘leyitsongo’) ya vafumi-kulobye na Kreste.

Nhlayo leyi kongomeke ya vafumi lava, ya 144 000, yi hlavuteriwe hi muapostola Yohane. (Nhlavutelo 14:1, 4) Eku sunguleni ka Nhlavutelo vanhu lava fanaka va hlamuseriwa tanihi ‘lava humaka etinxakeni hinkwato va ri va tindzimi hinkwato ni va swivongo hinkwaswo ni vamatiko hinkwawo, ku va mfumo ni vaprista va Xikwembu,’ kutani va ta fuma emisaveni tanihi tihosi va ri etilweni. (Nhlavutelo 5:9, 10) Huvo leyi yi lawulaka swin’we na Yesu Kreste i Mfumo lowu a byeleke valandzeri va yena ku wu khongelela. Nakambe i xitirho lexi vulawuri byo biha bya misava byi nga ta susiwa ha xona, hi ndlela yoleyo ku ta vuyiseriwa vululami ni ku rhula evanhwini emisaveni, swin’we ni vutomi lebyi nga heriki eka lava nga ta hanya eka yona.—Pisalema 37:29; Matewu 6:9, 10.

Huvo Leyi Hlawuriweke Ya Vafumi

Tanihi leswi vulawuri lebyi byi siviwaka hi Mfumo lowu, byi teleke vuhomboloki, xana a hi swi voni leswaku ha yini lava katsiwaka eka hulumendhe yoleyo ya le tilweni va faneleke, va hlawuriwa hi vukheta ni ku kamberiwa hi Xikwembu? Xiyimo xa vanhu xa sweswinyana xi nga ha fanisiwa ni xa vakhandziyi va madzana lava khandziyeke xihaha-mpfhuka lexi onhakeke eka maxelo lama biheke. Exiyin’weni xo tano lexi tikaka, xana u nga tsakela xihaha-mpfhuka lexi hahisiwaka hi vanhu lavantshwa, lava nga riki na ntokoto? Nikatsongo! Xiyimo xi ta lava ntlawa wo hahisa lowu hlawuriweke hi vukheta hi ku ya hi timfanelo leti tiyeke.

Malunghana ni lava nga ta tirha etilweni na Kreste Yesu, hi ntshunxekile hi ku tiva leswaku “Xikwembu xi vekile swirho emirini, xin’wana ni xin’wana hilaha xi rhandzeke hakona.” (1 Vakorinto 12:18) Ku navela ka munhu kumbe ku hisekela xikhundlha xa Mfumo a hi xona xilaveko xa kona. (Matewu 20:20-23) Mimpimanyeto yo karhi ya ripfumelo ni mahanyelo swi simekiwile hi Xikwembu leswaku ku nga amukeriwi lava nga fanelekiki. (Yohane 6:44; Vaefesa 5:5) Marito yo sungula ya Dyondzo ya Yesu ya le Ntshaveni ma komba leswaku vafumi-kulobye na Kreste va fanele va tikombisa va ri lava rhandzaka swilo swa moya, lavo rhula, lava rhandzaka leswo lulama, lava nga ni tintswalo, lava nga ni timbilu leti tengeke ni ku rhula.—Matewu 5:3-9; nakambe vona Nhlavutelo 2:10.

Lexi tsakisaka, ntshungu lowukulu wa vanhu, hambi leswi wu nga hlawuriwangiki hi Xikwembu exikarhi ka huvo ya le tilweni ya valawuri lava nga vayimeri, a wu siyiwi wu ri hava ntshembo. Va ta fuma misava leyi yo saseka ni ku tsakela mimbuyelo ya vulawuri bya Xikwembu. Vahlaseriwa va vuhomboloki lava feke khale va ta pfuxeriwa evuton’wini va hanya swin’we ni lava nga ta pona, va vona Mfumo wa Xikwembu ‘wu ta’ hi xiviri. Xitshembiso lexi xi ta hlayisiwa: “La’v̌a lulameke v̌a ta aka misav̌eni, la’v̌o tenga v̌a ta siyiwa kona.”—Matewu 6:9, 10; Swivuriso 2:21; Mintirho 24:15.

Loko u ri ni swivutiso swo karhi swa Bibele endzhaku ko hlaya magazini lowu, hi kombela u titwa u tshunxekile ku vutisa Timbhoni ta Yehovha eHolweni ya Mfumo leyi nga ekusuhi na wena, kumbe u tsalela vakandziyisi va magazini lowu. (Vona tluka 5.)