Ku Kurisa Vana Lava Kongomisiwaka Kahle—Njhani?

Xiviko lexi nga eka The Gazette, ku nga phepha-hungu ra le Montreal, le Canada, xi ri: “Vana va dyondza ku tixixima ni ku tikhoma hi ku kuma rirhandzu ni ndzayo ya vatswari havambirhi.” Xana sweswo swi katsa yini? Hi ku ya hi mutivi wa mianakanyo wa le Montreal la vuriwaka Constance Lalinec, i swa nkoka ku vekela n’wana swipimelo leswi twisisekaka swa mahanyelo.

Lalinec, loyi a tirhanaka ni vana ni mindyangu, u tlhela a vula leswaku “loko hi sivela vana ku tokota vuyelo bya swiendlo swa vona, hi va sivela ni ku dyondza.” Ku pfumelela n’wana leswaku a endla xin’wana ni xin’wana lexi a xi lavaka swi nga khumba ndlela leyi a kulaka ha yona.

Xitsundzuxo xa vutlhari xa Bibele lexi nga ni nkarhi wo leha malunghana ni ku kurisa vana xa fanela. Xi ri: “Ina wa n’wina a a ve Ina, E-e wa n’wina a va E-e.” (Matewu 5:37) Loko milawu leyinene yi vekiwile naswona vana va wena va yi twisisa, endla leswaku yi landzeleriwa hi nkarhi wolowo naswona yi nga tshikiwi. Seketela marito ya wena hi goza leri faneleke. Leswi swi endla leswaku vana va yi tiva kahle milawu ya mutswari ni leswi a swi languteleke—leswaku vanhu ‘va ta tshovela lexi va xi byalaka.’ (Vagalatiya 6:7; Varhoma 2:6) Xikongomelo xa ndzayo ya rirhandzu ni leyi pfunaka hileswaku vana va dyondza ku landzela milawu ni ku tiyisela loko va langutane ni xiyimo lexi hetaka matimba ni loko va nga hatlisi va kuma leswi nga ta va tsakisa, leswaku va ta hlakulela timfanelo leti va ti lavaka leswaku va ta va vanhu lavakulu lava kongomisiweke kahle, lava kotaka ku byarha vutihlamuleri.

Ndzayo leyi engetelekeke malunghana ni leswi Xikwembu xi swi byelaka vatswari hi ku letela vana va vona hi rirhandzu yi kumeka ebukwini leyi nge Xihundla Xa Ntsako eNdyangwini. U nga kuma kopi ya buku leyi yi nga ni matluka ya 192 hi ku tata ni ku rhumela xiphephana lexi eka adirese leyi kombisiweke kumbe eka adirese leyi faneleke eka leti longoloxiweke eka tluka 5 ra magazini lowu.

◻ Ndzi rhumeleni kopi ya buku leyi nge Xihundla Xa Ntsako eNdyangwini. Kombisa ririmi ra kona

◻ Ndzi kombela mi tihlanganisa na mina malunghana ni dyondzo ya le kaya ya mahala ya Bibele.