Ku Khoma Vanhu Hi Tihanyi—Xana Ku Ta Kala Ku Hela?

Livia Turco, Mutirheli Wa Swa Ntshamisano ni Vun’we le Italiya u nyikiwe kopi ya March 8, 2000, ya nkandziyiso wa Xalamuka! leyi vulavulaka hi xiphiqo lexikulu xa vuhlonga lebyi yaka emahlweni eswiphen’wini swa misava. Eka papila leri a ri tsaleleke hofisi ya rhavi ra Timbhoni ta Yehovha le Italiya, u vule leswi:

“Vuhlonga bya manguva lawa, lebyi khumbaka ngopfu vavasati ni vana, byi endla leswaku ku simekiwa tindlela to phalala vanhu va timiliyoni, kambe va sala va ha dya mbitsi va xeva hi nhlomulo.” U gimete hi ku: “Vonelo rin’wana ni rin’wana leri vuriwaka hikwalaho ko hlundzukisiwa hi xiendlo lexi nga amukelekiki i ra nkoka naswona loko ri twiwa hi vunyingi bya vanhu vo fana ni lava hlayaka [Xalamuka!], ri va ni ntikelo.”

Hi ku pfuniwa hi ku aviwa ka tikopi ta Xalamuka! to tlula kwalomu ka 20 wa timiliyoni hi tindzimi ta 82, timiliyoni ta vahlayi a to tivisiwa hi xiyimo xa swiphiqo swa namuntlha ntsena kambe ti nyikiwa ni mintlhantlho leyi sekeriweke eBibeleni.

Kambe xi tama xa ha ri kona xivutiso lexi nge, loko ku ri ni Xikwembu hakunene, hikwalaho ka yini xi pfumelela ku xaniseka konghasi ka vanhu lava nga riki na nandzu? Vo tala va tivutisa leswi, ‘Xana ndzi nga n’wi rhandza njhani Muvumbi loyi vutlhari bya yena byi vonakaka eka ntumbuluko, kambe a nga kombisiki ntwela-vusiwana eka vanhu namuntlha?’ Swivutiso swo tano swi hlamuriwa hi ndlela leyi enerisaka eka broxara leyi nge Xana Xikwembu Xa Hi Khathalela Hakunene? U nga kombela kopi hi ku tata xiphephana lexi kutani u xi rhumela eka adirese leyi nga eka xona kumbe eka adirese leyi faneleke eka leti longoloxiweke eka tluka 5 ra magazini lowu.

□ Ndzi rhumeleni broxara leyi nge, Xana Xikwembu Xa Hi Khathalela Hakunene? Kombisa ririmi leri u ri lavaka

□ Ndzi kombela mi tihlanganisa na mina malunghana ni dyondzo ya mahala ya Bibele.