Mpfuno Wa Ku Herisa Ku Tluriwa Ka Nawu

HI MUYIMERI WA XALAMUKA! EFURWA

SWIENDLAKALO swa sweswinyana swi ku kombise swinene ku hohloka lokukulu ka ku tluriwa ka nawu etindhawini to tala ta le madorobeni ta le Furwa leti honisiwaka ngopfu. Hi ku ya hi magazini wa Xifurwa lowu nge L’Express, “madzolonga ya le madorobeni ma tinyike matimba ku tlula mpimo hi malembe ya tsevu.” Lexi nyanyisaka ni swilo hi leswaku nhlayo ya vana lava endlaka vugevenga bya tihanyi yi andze hi ndlela leyi hlamarisaka.

Ku engetela eka lava va onhetelaka nhundzu, lava xavisaka swidzidzirisi, lava tekelaka vanhu swilo swa vona hi nkani, lava hisaka miako ni makhamba, vanhu lava tlulaka nawu va tlhela va hlasela vayimeri va Mfumo hi ku kongoma. Maphorisa, vatimi va ndzilo ni lava tirhaka eka swo famba swa mani na mani, i van’wana va lava va tshamelaka ku hlaseriwa hi tihanyi.

Ha yini ku ri ni madzolonga yo tarisa xileswi? Vativi vambirhi va ntshamisano va ri: “Lexi lwisanaka ni ku hohloka ka vun’we bya ndyangu i ku xandzuka loku lwisanaka ni hinkwaswo leswi endliwaka hi valawuri.” Va tlhele va tshaha “[vantshwa] lava titwaka va tshikiwile hi valawuri” naswona va nga ri na “ntshembo wa vumundzuku lebyi nga ni xikongomelo.”

Minkarhi hinkwayo Timbhoni ta Yehovha ti chumayela rungula ra le Bibeleni ra ntshembo etindhawini leti ku tlula nawu ku tinyikeke matimba. Eka nongonoko wa Xifurwa lowu wa ha ku haxiwaka eka thelevhixini, mutsari wa maphepha-hungu u te: “Timbhoni ta Yehovha ti nghena etindhawini ta le madorobeni ni le migangeni leyi nga hluvukangiki—tindhawu leti minkarhi yin’wana ti vonakaka onge a ti endleriwi nchumu, maphorisa a ma na mhaka na tona ni mfumo a wu na mhaka na tona. Ti vulavula ni vanhu lava nga emiakweni leyi ni le switarateni swa kona, ti tlhela ti va yingisela loko va vulavula.” Ntirho wa tona wu ni vuyelo lebyinene, hilaha papila leri landzelaka leri humaka eka muntshwa la nga muhlayi wa Xalamuka! ri kombisaka hakona.

“Ndzi rhandza ku mi nkhensa hi mbilu hinkwayo hikwalaho ka tibuku ta n’wina. A mi pfunanga mina ntsena kambe mi antswise ni vuxaka bya mina ni vatswari va mina. Ndzi ni malembe ya 16 ntsena naswona ndzi Mumoslem.

“Leswi ndzi lavaka ku swi vula hi leswaku mi swi kotile ku ndzi pfuna leswaku ndzi tshika ku tlula nawu. Hikwalaho ka sweswo, ndzi endla swilo hi ku pfumelelana swinene ni vukhongeri bya mina, kambe ndza yi hlaya ni Bibele. Hi ku pfuniwa hi n’wina ndzi ya emahlweni ni xikolo. Ku tlula kwalaho, mi pfune vanhu vo hlayanyana endhawini ya ka hina leswaku va tshika ku tlula nawu hikwalaho ko hlaya timagazini ta n’wina—leti ndzi va lombaka tona n’hweti yin’wana ni yin’wana. Ndzi ba mandla ndzi vuyelela eka n’wina.”