‘Magazini Lowu Seketeriwaka Hi Xikwembu’

WANUNA loyi a dyondzaka Bibele ni Timbhoni ta Yehovha eNigeria u ve kona eka nhlangano lowu hleriweke hi Komiti ya Misava Hinkwayo ya le Afrika ya Vavasati ni Vana. U fambe ni tikopi timbirhi ta Xalamuka! leyi ya ha ku humaka.

Esikwini ro sungula ra nhlangano lowu, wanuna loyi u xiye leswaku xivulavuri a xi tirhisa tinhla leti humaka eka magazini lowu a a te na wona. Swihloko swa wona swa ntlhandlamano a swi vulavula hi vutomi. (November 8, 2001) Hiloko a humesa kopi yakwe hi ku hatlisa kutani a sungula ku fambisana ni xivulavuri.

Loko nhlangano wu hela, gqweta leri a ri ta fambisa nhlangano hi xamundzuku ri vone xifunengeto xa nkandziyiso wa Xalamuka! lowu xichudeni lexi xa Bibele a xi wu tamerile, lowu nge “Mpfuno Eka Vavasati Lava Biwaka.” Gqweta leri ri wu lombile. Vusiku byebyo ri cukumete kopi leyi ri yi lunghiseleleke kutani ri endla yin’wana leyi sekeriweke eka swihloko swa Xalamuka! Hi xamundzuku wa kona, loko gqweta ri ri karhi ri nyikela nkulumo ya rona, wansati loyi a a tshame elayinini yoleyo laha ku nga ni xichudeni xa Bibele u humese nkandziyiso wakwe wa Xalamuka! a sungula ku fambisana na rona.

Xichudeni lexi xa Bibele xi pfunile swinene eka khoso yoleyo hikuva a xi hlaye swihloko swa kona eka Xalamuka! Xichudeni lexi xi te: ‘A ndzi kanakani leswaku magazini lowu wu seketeriwa hi Xikwembu.’

Xana u nga tsakela ku tiseriwa magazini lowu ekaya ra wena nkarhi ni nkarhi? Ha yini u nga kombeli Mbhoni yin’wana ya Yehovha leswaku yi ku endlela malunghiselelo wolawo?