Ku Chumayela eXikolweni

Hi mutsari wa Xalamuka! eMexico

LOKO Daniel, muntshwa la nga ni malembe ya 17 a sungula lembe lerintshwa exikolweni, a a tiyimisele ku titivisa eka lava a a nghena na vona xikolo leswaku i Mbhoni ya Yehovha. U swi kotile ku endla sweswo loko mudyondzisi wakwe wa Xinghezi a kombele tlilasi leswaku yi bula ni muhlapfa hambi a ri wihi loyi ririmi ra ka vona ku nga Xinghezi. Sweswo a swi lava leswaku vana va ya etindhawini ta vapfhumba ta le Dorobeni ra Mexico, va ya bula ni vapfhumba volavo, kutani va vuya ni leswi va swi rhekhodeke kwalaho etlilasini.

Daniel u kunguhate ku bula ni murhumiwa la vulavulaka Xinghezi loyi a tirhaka eyindlu-nkulu ya Timbhoni ta Yehovha eMexico, naswona hi nkarhi lowu fanaka, u endle vhidiyo yo koma hi Xinghezi leyi kombisaka ndhawu yoleyo. Tlhandlakambirhi, u hlele swifaniso swa tibroxara to hambana-hambana ta tindzimi ta le Mexico swin’we ni Xihondzo xo Rindza ni Xalamuka! hi tindzimi tin’wana to hambana-hambana. Kutani Daniel u kombele mpfumelelo eka mudyondzisi wakwe wa Xinghezi leswaku a kombisa tlilasi vhidiyo ni swifaniso leswi.

Vadyondzi-kulobye ni mudyondzisi wakwe va hlamale ngopfu hi ntirho lowu endliwaka hi Timbhoni ta Yehovha eMexico. Lava a va yingisele Daniel va hlamale ngopfu hi matshalatshala ya Timbhoni yo fikelela vanhu va le Mexico.

Endzhaku ka vhidiyo leyi ya 25 wa timinete, leyi endleke leswaku a kuma timaraka ta le henhla ku tlula hinkwavo, Daniel u nyike hinkwavo tikopi ta Xihondzo xo Rindza ni Xalamuka! swin’we ni buku leyi nge Swivutiso Leswi Vantshwa Va Swi Vutisaka—Tinhlamulo Leti Tirhaka. Vo tala va teke minkandziyiso leyi naswona leswi swi pfule ndlela ya mabulo ya Bibele. Daniel u ri: “Ndzi nkhensa Yehovha hikuva ndzi swi kotile ku tisa ku dzuneka evitweni rakwe hikwalaho ka xiavelo xo olova xa le xikolweni.”