Ku Pfuna Vabohiwa Va Cinca eMakhotsweni Ya Le Mexico
Hi mutsari wa Xalamuka! eMexico
KU VURIWA leswaku swin’wana leswi endlaka leswaku vabohiwa va pfaleriwa ejele i ku va pfuna leswaku va cinca. Hambiswiritano, ku va pfalela ntsena a swi nge endli leswaku va cinca. Leswaku munhu a cinca swi fanele swi suka emianakanyweni ni le mbilwini yakwe, kutani a hundzula mahanyelo ya yena layo biha ya khale, a tiyimisela ku hanya hi ndlela yin’wana. Emakhotsweni yo tala emisaveni hinkwayo, ku cinca lokunene ku vangiwe hi dyondzo ya Bibele leyi dyondzisiwaka hi Timbhoni ta Yehovha. A hi voneni xiyimiso lexi ti xi tirhisaka ku va pfuna le Mexico.
Timbhoni ta Yehovha ti endzela makhotso ya 150 eMexico, ti pfuna vabohiwa ku hlaya Bibele ni ku va dyondzisa mahanyelo ni tidyondzo ta Bibele. Hi xikombiso, ekhotsweni ra le Ciudad Juárez, Chihuahua, vatirheli lava nga Timbhoni ta Yehovha nkarhi ni nkarhi va dyondzisa vabohiwa va kwalomu ka 1 200. Vabohiwa va va xixima swinene hambi ku ri ku va sirhelela eka swiyimo leswi nga ni khombo. Siku rin’wana loko ku pfuke hasahasa ekhotsweni rero, van’wana va vabohiwa va kombele ntshungu leswaku wu ku matlhari ehansi leswaku Timbhoni ti ta huma ti sirhelelekile.
Xalamuka! ya May 8, 2001 leyi a yi ri ni xifunengeto xa nhloko-mhaka leyi nge “Xana Vabohiwa Va Nga Hundzuriwa?” yi tsakise vabohiwa swin’we ni valawuri va khotso. Ekhotsweni ra le San Luis Río Colorado, Sonora, Timbhoni ta 12 ti fambise timagazini ta 2 149.
Loko ti kuma lava tsakelaka Bibele hakunene, Timbhoni ta Yehovha ti tlhelela vhiki ni vhiki leswaku ti ya va dyondzisa Bibele ni ku fambisa minhlangano ya vukhongeri. Xana xiyimiso lexi xa ku dyondzisa Bibele xi va pfune ku fikela kwihi vabohiwa leswaku va cinca mahanyelo ya vona?
Vabohiwa Va Va Vatirheli Lava Nga Vakreste
Jorge u ve xigevenga a nga si heta ni malembe ya 20 hi vukhale. Endzhaku ko tirhela xigwevo xa yena xa 13 wa malembe ekhotsweni ra Islas Marías, u ntshunxiwile. Kambe endzhaku ka sweswo u rhetemukile a tlhelela entirhweni wa yena wo ngungumerisa swidzidzirisi. Leswi se a a ri ni vuswikoti byo duvula vanhu a a yingisa loko a lerisiwa ku dlaya, xisweswo u hetelele a dlaye vanhu va 32. Loko a ri ekhotsweni nakambe, magqweta ya yena ma n’wi byele leswaku vamathwarivona va le ntlaweni wa yena va lava ku hakela mali yo tala yo n’wi humesa ekhotsweni. Vamathwarivona lava a va lava leswaku a huma ekhotsweni leswaku va ta n’wi lerisa ku ya dlaya munhu un’wana. Kambe hi nkarhi wolowo Jorge a a dyondza Bibele ni Timbhoni ta Yehovha. A endle nhluvuko hi tlhelo ra moya naswona se a a khuvuriwile, a ri phayona ra nkarhi hinkwawo ekhotsweni. Xana a a ta pfumela ku ntshunxiwa a ya tirhela vamathwarivona lavaya nakambe kumbe a a ta tshama ekhotsweni a tirhela Yehovha? Jorge u hlamule a ku: “Ndzi lava ku tshama ekhotsweni ndzi hakela swidyoho leswi ndzi swi endleke. Sweswi ndzi tirhela Yehovha Xikwembu, Hosi Leyi Lawulaka.” Jorge u tshame a tshembekile eka Xikwembu naswona u fe a ri ni ntshembo wo pfuxiwa. Vanghana va yena va moya va vula leswi ha yena, “A a ‘tiva ntiyiso, kutani ntiyiso wu n’wi ntshunxile.’”—Yohane 8:32.
David, loyi a tirhelaka xigwevo xa malembe ya 110 xa ku dlaya, ku tlhakisa ni ku yiva, u pfaleriwe ekhotsweni eka xiyenge lexi rindziwaka ngopfu laha ku tshamaka swigevenga leswi nga ni khombo. Hambiswiritano, hikwalaho ka ku cinca lokukulu ku sukela loko a sungule ku dyondza Bibele ni Timbhoni ta Yehovha, u kume mpfumelelo wo ya eminhlanganweni a rindziwile ehandle ka xiyenge lexi. Vutomi bya yena byi cincile byi fambisana ni swilaveko leswi nga eBibeleni, kutani sweswi u hlanganyela entirhweni wo chumayela naswona u dyondzela vabohiwa van’wana va nhungu Bibele. Ndyangu wa yena wu tsakisiwe hi ku cinca loku a ku endleke lerova wu ya eka yena leswaku a ya wu dyondzisa Bibele. David u ri, “A ndzi karhali ku nkhensa Yehovha hikwalaho ka leswi a ndzi nyikeke ntshunxeko wa moya.”
Hikwalaho ka xiyimiso xa dyondzo ya Bibele lexi fambisiwaka hi Timbhoni ta Yehovha, ku ni vabohiwa lava cinceke mahanyelo ya vona va 175 eka makhotso ya 79 lama nga eMexico naswona se va fanelekela ku hlanganyela entirhweni wo chumayela kasi 80 wa vona se va khuvuriwile. Va dyondzela vabohiwa van’wana va 703 Bibele. Ku tlula kwalaho, vabohiwa va kwalomu ka 900 va va kona eminhlanganweni ya Vukreste leyi khomeriwaka ekhotsweni.
Valawuri Va Khotso Va Nkhensa
Valawuri va khotso va wu tsakela ntirho lowu endliwaka hi Timbhoni ta Yehovha. Hi xikombiso, valanguteri va khotso eTekax, Yucatán, va nyike Timbhoni xitifiketi xo nkhensa “nseketelo wa tona lowu nga riki na vutianakanyi ni wa vumunhu” hikwalaho ka ku va ti pfune vabohiwa hi lembe ra 2002.
Loko Timbhoni ti sungula xiyimiso xo dyondzisa Bibele ekhotsweni leri, a ti khoma minhlangano ya tona ti vekiwe tihlo ra vukarhi hi varindzi vo hlayanyana. Kambe, hi ku famba ka nkarhi, loko vabohiwa va ri karhi va cinca mahanyelo ya vona, ntlawa lowu wu sungule ku xiximiwa hi varindzi ku fikela laha a wu rindziwa hi murindzi un’we.
Vabohiwa va le Ciudad Juárez va ni Holo ya vona ya Mfumo. Va kume mpfumelelo wo lunghisa muako wa khale wa tinsimbi lowu a wu tshikiwile leswaku wu va ndhawu ya vugandzeri. Vabohiwa va 13 swin’we ni swichudeni swa vona swa Bibele leswi na swona swi nga vabohiwa hi vona va akeke holo leyi. Holo leyi yi ni fambiselo ra mpfumawulo, xihambukelo, switulu swo fana ni swa le sinema leswi ringanaka vanhu va 100. Vanhu va kwalomu ka 50 va va kona nkarhi hinkwawo eminhlanganweni ya ntlhanu ya vhiki ni vhiki.
Ina, dyondzo ya Bibele yi nga n’wi pfuna munhu leswaku a cinca. Ku fana na Manase wa le Bibeleni—hosi ya Muyuda leyi endleke xidyoho lexikulu naswona yi veke mubohiwa ekhotsweni ra le Babilona—loyi a hundzukeke a tlhela a kombela ku rivaleriwa, namuntlha vabohiwa va nga hundzuka va va vanhu lava chavaka Xikwembu.—2 Tikronika 33:12, 13.
[Xifaniso lexi nga eka tluka 30]
Nkhuvulo ekhotsweni
[Xifaniso lexi nga eka tluka 31]
Vatirheli va nkarhi hinkwawo ni valeteri va vona eXikolweni xa Ntirho wa Vuphayona ekhotsweni