U Nga Wu Kuma Ntsako Wa Xiviri!

VANHU vo tala emisaveni hinkwayo va kholwa leswaku ntsako wu tisiwa hi ku va ni movha wa manyunyu, mali yo tala ebanki, dyondzo ya le henhla, yindlu leyikulu ni swilo leswa ha ku humaka swa elektroniki, naswona munhu a ri ni miri wo saseka wo lala kumbe a ri mpohlo. Kambe, xana ntsako wa xiviri wu titshege hi ku va ni swilo leswi vonakaka ni ku va munhu la sasekeke?

Ku endliwe “vulavisisi lebyikulu mayelana ni leswi nga endlaka leswaku munhu a tshama a tsakile, a ri ni langutelo lerinene naswona a hanye kahle emianakanyweni,” hi ku ya hi xiviko xa magazini wa Time. Vuyelo bya vulavisisi byebyo byi hlamarise vo tala. Vumbhoni byo tala byi kombisa leswaku vanhu lava kholwaka leswaku mali, ndhuma kumbe ku saseka swi ta endla leswaku va tsaka, va tixisa. Entiyisweni, va tiendlela masungulo lama nga hoxaka miehleketo ya vona ekhombyeni naswona ma nga endlaka leswaku va va ni ntshikilelo.

Le United States, sweswi vanhu vo tala va fumile ku tlula eku sunguleni. “Kambe leswi a swi endlanga leswaku hi va ni ntsako,” ku vula magazini wa Time. Entiyisweni, ku nga ha vuriwa leswi fanaka hi vanhu va le matikweni man’wana. Tiko ra Chayina leri nga ni ikhonomi leyi nyukaka ri ni nhlayo leyi engetelekaka ngopfu ya vanhu lava pfumalaka ntsako. Etikweni rero “vanhu vo tala lava nga exikarhi ka malembe ya 15 na 34 va hela” hi ku tidlaya, hi ku vula ka magazini lowu humaka endzhaku ka tin’hweti tinharhu wa Access Asia. Xin’wana lexi vangaka xiphiqo lexi i ntshikilelo lowu vantshwa va langutanaka na wona wo lava ku humelela emisaveni loko va ri karhi va kula.

Swi le rivaleni leswaku ku va ni swilo leswi vonakaka a swi wu susi ntshikilelo ni ku vilela; kambe swo ku nyanyisa. “Ndlela leyi hi hanyaka ha yona sweswi hi yona yi hi vangelaka swiphiqo swa mintlhaveko ni swa miehleketo,” ku gimete nkambisiso wun’wana wa le yunivhesiti. Hi ku ya hi mukambisisi wa swiphiqo swa vanhu, Van Wishard, “tikhampani to tala ti hakela ndzindza-khombo wa rihanyo ni miehleketo ya vatirhi va tona, naswona ndzindza-khombo lowu hi wona wu kulaka hi xihatla.”

Hambi ku ri vana, swa va khumba leswi endlekaka emisaveni ya hina leyi cinca-cincaka hi ku hatlisa. Se ku ni tibuku ta vana va malembe ya nhungu, leti va tsundzuxaka hi “ndlela leyi va nga swi xiyaka ha yona swikombiso swa ntshikilelo ni ndlela leyi va nga langutanaka na wona ha yona,” ku vula Wishard. Hi ku ya hi tibuku leti vulavulaka hi ntshikilelo, ematikweni yo hlayanyana ya le Vupela-dyambu, nhlayo ya vana lava kumiweke va ri ni ntshikilelo yi tlakuka hi 23 wa tiphesente hi lembe. Ku engetela kwalaho “ya engeteleka nhlayo ya tindzumulo leti nwaka maphilisi yo lwa ni mavabyi ya miehleketo.”

Vanhu va hanya hi ku chava—leswi swi katsa ni ku chava ku cinca-cinca ka ikhonomi. Leswi vanhu va yaka mahlweni va hisekela tipolitiki ni vukhongeri ku tlula mpimo, vo tala va chava leswi vumundzuku byi nga ha va tiselaka swona. Xana mpfuno wu kona?

Eka malembe ya kwalomu ka 2 000 lama hundzuke, Yesu Kreste u dyondzise vanhu ndlela yo hanya vutomi lebyi phyuphyisaka ni lebyi hungutaka ntshikilelo. Rungula ra dyondzo yakwe a ri olova kambe a ri tamele ntiyiso wa nkoka. U te: “Va tsaka lava khathalaka hi xilaveko xa vona xa moya.” (Matewu 5:3) Phela, Yesu u khutaze vayingiseri vakwe ku khathala hi xilaveko xa nkoka—ku nga ntiyiso wa moya malunghana ni Muvumbi wa hina ni xikongomelo Xakwe hi hina.

Hilaha hi nga ta swi vona hakona eka swihloko leswi landzelaka, ntiyiso wu nga hi pfuna ku xiya leswi nga swa nkoka hakunene, leswi nga ta endla leswaku hi tsaka ni ku va ni xikongomelo evuton’wini. Ntiyiso wolowo wu tlhela wu hi nyika ntshembo lowunene.

[Marito lama tshahiweke exihlokweni lama nga eka tluka 3]

Xana ntsako wu kumiwa hi ku va ni swilo leswi vonakaka?