Xikwembu Xa Hi Khathalela!

NDLELA leyi Xikwembu xi yi tameleke ha yona mhaka ya ku xandzuka loku sunguleke le Edeni, yi kombisa rirhandzu ra xona lerikulu leri xi nga na rona hi un’wana ni un’wana wa hina ni ndlela leyi xi khathalaka ha yona hi vumundzuku bya hina. Hi kombela u kambisisa vumbhoni lebyi landzelaka lebyi kombisaka leswaku hakunene Xikwembu xa hi khathalela, kutani u hlaya matsalwa lama kombisiweke, eBibeleni ya wena.

❖ Xi hi nyike misava, leyi sasekeke ngopfu, swiharhi leswi tsakisaka ni misava leyi nga ni swakudya swo tala.—Mintirho 14:17; Varhoma 1:20.

❖ Xi hi nyike miri wa kahle, lowu kotaka ku tsakisiwa hi swilo swo hambana-hambana siku ni siku, ku fana ni ku ringeta nantswo wa swakudya leswinene, ku vona ku pela ka dyambu, ku twa n’wana a hleka ni ku twa ku tsakisa loko u khumbiwa hi munhu loyi u n’wi rhandzaka.—Pisalema 139:14.

❖ Xi hi nyika nkongomiso wa vutlhari lowu hi pfunaka ku langutana ni swiphiqo ni mintshikilelo.—Pisalema 19:7, 8; 119:105; Esaya 48:17, 18.

❖ Xi hi nyika ntshembo, ku katsa ni ntshembo wo hanya eparadeyisini laha misaveni ni ku vona varhandziwa va hina loko va pfuxiwa eku feni.—Luka 23:43; Yohane 5:28, 29.

❖ Xi rhumele N’wana la nga swakwe leswaku a ta hi fela leswaku hi ta va ni ntshembo wa ku hanya hilaha ku nga heriki.—Yohane 3:16.

❖ Xi simeke Mfumo wa Mesiya etilweni naswona xi hi nyike vumbhoni byo tala bya leswaku Mfumo wolowo wu ta lawula misava hi ku helela ku nga ri khale.—Esaya 9:6, 7; Matewu 24:3, 4, 7; Nhlavutelo 11:15; 12:10.

❖ Xa hi rhamba leswaku hi khongela eka xona, hi xi byela leswi nga etimbilwini ta hina naswona loko hi endla tano, xi ta hi yingisa hakunene.—Pisalema 62:8; 1 Yohane 5:14, 15.

❖ Xi hambeta xi tiyisekisa vanhu leswaku xa va rhandza swinene naswona xa khathala ha vona.—1 Yohane 4:9, 10, 19.