Xana Vukati Bya N’wina Byi Nga Lunghisiwa?

XANA na n’wina mi nga swi tsakela ku lunghisa vukati bya n’wina? Loko swi ri tano, mi ta sungula hi yini? Ringetani ku tirhisa swiringanyeto leswi landzelaka.

1 Tiyimiseleni ku byi lunghisa.

Pfumelelanani leswaku mi ta khomisana leswaku mi kondletela ku rhula evukatini bya n’wina. Ringetani ku tsala swiboho swa n’wina ephepheni. Loko havumbirhi bya n’wina mi tiyimiserile, ku lunghisa vukati bya n’wina ku ta va ntirho lowu mi nga ta wu endla swin’we.—Eklesiasta 4:9, 10.

2 Kumisisani xiphiqo xa kona.

I yini lexi kavanyeteke vukati bya n’wina? Hi xivulwa xin’we, tsalani leswi mi ehleketaka leswaku swa kayivela kumbe leswi mi navelaka ku swi cinca evukatini bya n’wina. (Vaefesa 4:22-24) I ntiyiso leswaku xiphiqo lexi u xi tsaleke xi nga ha hambana ni lexi tsariweke hi nkataku.

3 Tivekeleni pakani.

Mi nga tsakela leswaku vukati bya n’wina byi va njhani eka tin’hweti ta tsevu leti taka? Hi swihi swilo leswi mi nga tsakelaka ku swi antswisa? Tsalani tipakani ta n’wina ephepheni. Loko mi swi tiva kahle swilo leswi mi swi lavaka evukatini bya n’wina, swi ta mi olovela ku fikelela tipakani ta n’wina.—1 Vakorinto 9:26.

4 Tirhisani ndzayo ya Bibele.

Loko se mi kumisise xiphiqo xa n’wina naswona mi endle xiboho xa mindzulamiso leyi mi nga tsakelaka ku yi endla, lavani switsundzuxo eBibeleni. Milawu ya yona a yi hundzeriwi hi nkarhi naswona ya pfuna hakunene. (Esaya 48:17; 2 Timotiya 3:17) Hi xikombiso, Bibele yi khutaza wena ni nkataku leswaku mi rivalelana. Entiyisweni, Bibele yi vula leswaku “munhu wa miehleketo . . . loko a hoxeriwile u swi ba hi makatla.”—Swivuriso 19:11, Bibele—Mahungu Lamanene; Vaefesa 4:32.

Hambiloko ro sungula matshalatshala ya n’wina ma vonaka onge a ma tswali mihandzu, mi nga heli matimba! Loko buku leyi nge The Case for Marriage yi vika hi ta vuyelo lebyi tsakisaka bya nkambisiso wun’wana lowu endliweke, yi ri: “Vuyelo bya kona bya hlamarisa: 86 wa tiphesente ta vatekani lava nga tsakangiki lava hambetaka va tshama swin’we va kume leswaku endzhaku ka malembe ya ntlhanu va sungule ku va ni ntsako.” Hambi ku ri vatekani lava vuleke leswaku vona a va tsakanga nikatsongo va kume leswaku xiyimo xa vona xi cincile.

Kumbexana sweswo swi nga endleka ni le vukatini bya n’wina. Timbhoni ta Yehovha leti nga vatsari va magazini lowu, ti kume leswaku Bibele yi ni milawu leyi nga pfunaka vatekani. Hi xikombiso, vukati byo tala swi sungula ku byi fambela kahle loko vatekani va va ni musa, ntwela-vusiwana naswona va rivalelana hi mbilu hinkwayo. Vavasati va dyondze leswaku i swa nkoka ku kombisa “moya wo rhula ni wo olova,” naswona vavanuna va xiye leswaku ku va va nga va hlundzukeli ku tlula mpimo vasati va vona swa vuyerisa.—1 Petro 3:4; Vakolosa 3:19.

Milawu leyi ya le Matsalweni ya pfuna hikuva Yehovha Xikwembu la nga Mutsari wa Bibele, hi yena la sunguleke lunghiselelo ra vukati. Ha yini mi nga kombeli Timbhoni ta Yehovha leswaku ti mi nyika rungula leri engetelekeke malunghana ni ndlela leyi Bibele yi nga mi pfunaka ha yona evukatini bya n’wina?a