Xana Bibele Yi Ri Yini Hi Vukati?

Nhlamulo ya Bibele

Endzhaku ka loko Xikwembu xi tumbuluxe wanuna ni wansati wo sungula, xi va catisile. Xi sungule vukati leswaku ku va nchumu wo hlawuleka lowu hlanganisaka wanuna ni wansati leswaku va va ndyangu.—Genesa 1:27, 28; 2:18.

Xikwembu xi lava leswaku vatekani va tsaka. (Swivuriso 5:18) EBibeleni, xi veke milawu leyi vatekani va faneleke va yi yingisa ni leyi nga va pfunaka leswaku va tsaka evukatini bya vona.

Leswi hi nga ta bula haswona eka nhlokomhaka leyi

• Vatekani va fanele va yingisa milawu yihi ya Xikwembu?

• Xana Xikwembu xa va pfumelela vatekani leswaku va hambana kumbe va dlaya vukati?

• Xana vukati byi fanele byi va enawini leswaku byi amukeleka eka Xikwembu?

• Hi ku ya hi Bibele, wanuna ni wansati lava tekaneke va ni vutihlamuleri byihi?

• Xana Xikwembu xi lava leswaku vatekani va va ni vana?

• Bibele yi nga byi pfuna njhani vukati bya mina?

• Tindzimana ta Bibele leti vulavulaka hi vukati

Vatekani va fanele va yingisa milawu yihi ya Xikwembu?

Ku sukela eku sunguleni, Xikwembu xi sungule vukati leswaku byi hlanganisa wanuna ni wansati leswaku va va nyama yin’we. (Genesa 2:24) Xikwembu a xi swi lavi leswaku vanhu va teka tshengwe, va rhandzana ni va rimbewu leri fanaka kumbe va tshama swin’we va nga tekananga. (1 Vakorinto 6:9; 1 Vatesalonika 4:3) Yesu u dyondzise valandzeri vakwe leswaku va yingisa milawu ya Xikwembu leyi xi yi vekeke eku sunguleni mayelana ni vukati.—Marka 10:6-8.

Xikwembu xi lava leswaku vatekani va tshama swin’we vutomi bya vona hinkwabyo. Loko wanuna ni wansati va tekana, va tshembisa ku tshembeka eka vona havambirhi ni ku tshama swin’we va nga hambani loko ntsena va ha hanya. Xikwembu xi lava leswaku va hanya hi xitshembiso xexo.—Marka 10:9.

Xana Xikwembu xa va pfumelela vatekani leswaku va hambana kumbe va dlaya vukati?

Ku nga ha va ni mikarhi leyi nuna na nsati va bohekaka ku hambana, ku fana ni loko un’wana wa vona a fanele a famba leswaku a ya khathalela xiyimo xa xi hatla xa le ka vona. Kambe Bibele ya swi sola loko va hambana hileswi va nga ni swiphiqo evukatini bya vona. Ku ri na sweswo, Bibele yi va khutaza leswaku loko va langutane ni xiyimo xo tano, va xi lulamisa leswaku va nga hambani.—1 Vakorinto 7:10.

Hi ku ya hi Bibele, vuoswi hi byona ntsena lebyi pfumelelaka vatekani ku dlaya vukati. (Matewu 19:9) Hikwalaho, loko nuna na nsati va hlawula ku hambana kumbe ku dlaya vukati ku nga ri hikwalaho ka vuoswi, hi ku ya hi Matsalwa havumbirhi bya vona a va fanelanga va rhandzana ni vanhu van’wana kumbe va nghenela vukati byin’wana.—Matewu 5:32; 1 Vakorinto 7:11.

Xana vukati byi fanele byi va enawini leswaku byi amukeleka eka Xikwembu?

Xikwembu xi lava leswaku Vakreste va yingisa milawu ya tiko loko swi ta emhakeni ya vukati. (Tito 3:1) Loko swi koteka leswaku vatekani va tsarisa vukati bya vona ximfumo, va kombisa leswaku va xixima milawu ya mfumo ni nawu wa Xikwembu wa leswaku vukati i xiboho xa vutomi hinkwabyo.a

Hi ku ya hi Bibele, wanuna ni wansati lava tekaneke va ni vutihlamuleri byihi?

• Vutihlamuleri lebyi nuna na nsati va nga na byona. Nuna na nsati va fanele va rhandzana ni ku tlhela va xiximana. (Vaefesa 5:33) Va fanele va tshembeka eka vona havambirhi ni ku tlhela va enerisa ku navela ka vona ka timhaka ta masangu hi ndlela ya rirhandzu. (1 Vakorinto 7:3; Vaheveru 13:4) Loko va ri na vana, va fanele va pfunana ku va kurisa.—Swivuriso 6:20.

  

  Bibele a yi yi hlamuseli hi vuenti ndlela leyi vatekani va faneleke va khomisana hayona loko swi ta eka ntirho wa ku tihanyisa ni mitirho ya le kaya. Va tiendlela xiboho xa leswi nga ta va tirhela endyangwini wa vona.

• Vutihlamuleri bya wanuna. Bibele yi vula leswaku “wanuna i nhloko ya nsati wakwe.” (Vaefesa 5:23) Sweswo swi vula leswaku u fanele a kongomisa ndyangu wakwe ni ku tlhela a endla swiboho leswi nga ta vuyerisa nsati ni vana.

  

  U fanele a tiyiseka leswaku va ni rihanyo lerinene, va tsakile naswona va ni vuxaka lebyinene na Xikwembu. (1 Timotiya 5:8) U kombisa leswaku u xixima vumunhu ni vuswikoti lebyi nsati wakwe a nga na byona loko a tirhisana na yena ni loko a rhanga a yingisela mavonelo yakwe ni ndlela leyi a titwaka hayona loko a endla swiboho. (Swivuriso 31:11, 28) Bibele yi vula leswaku wanuna u fanele a endla vutihlamuleri byakwe hi ndlela ya rirhandzu.—Vakolosa 3:19.

• Vutihlamuleri bya wansati. Bibele yi vula leswaku “wansati u fanele a va ni xichavo xo enta eka nuna wakwe.” (Vaefesa 5:33) Nakambe Xikwembu xa tsaka loko wansati a xixima vutihlamuleri lebyi xi byi nyikeke wanuna.

  

  Vutihlamuleri bya wansati i ku pfuna nuna wakwe leswaku a endla swiboho leswinene ni ku seketela vuhloko byakwe. (Genesa 2:18) Bibele yi bumabumela wansati loyi a endlaka vutihlamuleri byakwe bya nkoka evukatini.—Swivuriso 31:10.

Xana Xikwembu xi lava leswaku vatekani va va ni vana?

Doo! Enkarhini lowu nga hundza, Xikwembu xi lerise van’wana va vagandzeri va xona leswaku va va ni vana. (Genesa 1:28; 9:1) Kambe xileriso xexo a xa ha tirhi eka Vakreste namuntlha. Yesu a nga zanga a byela valandzeri vakwe leswaku va va ni vana. Hambi ku ri vadyondzisiwa vakwe vo sungula a va zanga va vula leswaku vatekani va fanele va va ni vana. Vatekani va tihlawulela loko va lava ku va ni vana.

Bibele yi nga byi pfuna njhani vukati bya mina?

Bibele yi ni milawu leyi nga pfunaka vatekani leswaku va sungula vukati bya vona kahle. Milawu yoleyo yi nga tlhela yi va pfuna leswaku va papalata swiphiqo kumbe va swi hlula.

Milawu ya Bibele yi nga pfuna vatekani leswaku . . .

• va kombisana rirhandzu ra ntiyiso.—1 Vakorinto 13:4-7; Vakolosa 3:14.

• va lulamisa swiphiqo.—1 Vakorinto 10:24.

• va va vayingiseri lavanene.—Yakobo 1:19.

• va xiximana.—Varhoma 12:10.

• va rivalelana.—1 Petro 4:8.

• va tshembeka.—Marka 10:9.

• va lehiselana mbilu.—Vaefesa 4:2, 3.

• va khomisana.—Eklesiasta 4:9.

• va rhandzana swinene.—Risimu Ra Solomoni 8:7.